1PETERU 3
3
Yhoem: Seing: Myhi' Yo' Yhoem: Seing: Phoo Yi
1Houg: yo' dakhyoo" ti"- yhoem: seing: myhi' yi we"- nanu" da" yhoem: seing: pho, vhoeb, khang" khyo" cang nyid ge'. hid: su" koid khyo" wigi Mangso da" mungdang: ri aloem" jeing" shi" yhoem: seing: phoo yo" nghoid ri nanu" nyid yab, zei: so' da" aved, asam" yoomo loem" jeung" lo boem wa zi nghoid- nanu" da" nhoid mo wigi ci: tid anoo. 2Khasu" wim ga: ri nanu" da" aved, asam" khayhi' gyeing" phyu: young" da" khyoo: yo' phau" myang: nheigloem: ri nyangnu" shau" myang lo boem wa zi nghoid. 3Nanu' da" gung du: yung" lho' khyoo: gi nghe: shoid mo lhoo, yhoung khyoo:- xam: kuid" kued" ziyo' byi: mi, yung: zi ngei sheing: lug nyoug tab shoung: yhoung khyo" anghoid baja". 4Nyang: nya: nheigloem: ung: khoug: yo' sen: da" khyoo:- gyeungshang: nu" nham, nheigloem: ein: da- khanham we' ashoem: apyang: lo" da" lhoo, ri yhoung ci: ge'. Houg: yhang: ti" lhoo, ri yhoung ci: da" khyoo: gi Mangso shid' khoin" moo phoug" dab, da" khyoo: nghoid. 5Shid' phyang" Mangsoo ri loem, khau: nheig byu nyid da" myi: yi: yi gi nyangnu" da" yhoem: seing: pho, bang: da" dang: ri we' tam" gyo: khyo" nyangnu" da" gung ri lhoo, yhoung nyid boem ago". 6Sa ra: gi Abraham da" dang: ri tam" gyo: Abraham ri nga" yhoem: seing: ga: tid. Nanu" we' agyug avoem loo: ge da" moo" ri zei: nyid rigi nanu" we' Sara da" myiyi: zoo: yi nghoid.
7Houg: yo' dakhyoo" ti"- yhoem: seing: pho we"- nanu" da" yhoem: seing: myhi' yi gi nanu" tho' moo yoem: neing: mo, nghoid ziri se' lho: nyangnu" yo' zoem" khau: nyid ge'- nyangnu" gi apyaid' ato: kangso yo' sen: da" jeju" ri nanu" yo' da khyoo" ti" yo" yu wa mo, nghoid yoomo nanu" gi nyangnu" ri phoug" phoug" myang myang zoem" khau: nyid ge'- hougsu" nghoid lang" she' nanu" da" akyu" mho' thui: gi khanham we' dakhyoo" ti"- yo' mho' nyid boem wa zi nghoid.
Deungmain" Khyoo: Yoomo- Kyi'" khyeig Shau" Khyoo:
8Lo" thang moo tid shed' nau da" khyoo: gi nanu" gi e" myed, nheigloem: daloem: za: dabo nyid ge'- dayug yo' dayug nheig khyeig shoo" myen: go" nyid ge'. dayug yo' dayug gi mang: kang nhung" kang yi yhang: ti" jheddab go" nyid ge'. nheig se' khyeug da" nheigloem: bo nyid ge'. khyo, nyhoem: ziyo' zoem" khau: nyid ge'. 9Akhyeung" bang: rigi akhyeung" khyo"-nheung" mo, rigi doem, nheung" khyo" latoo: aphug goo"- hougsu" latoo: phug wa gung khoo: gi main' boo coug: bo da" dang: ri tid byid: nyid ge'- Khasu" wim gari Mangsoo gi nanu" ri khe: yu u ri mainkaid da" jeju" ri shau" kham, zoo: goo" baja" ga- nanu' ri dang: soo' byid: bye. 10Jhoem: mungdang: moo
bo ziyo' dakhyoo" ti" nghoid. gau yi khyo" kangso' dei nyid noug su: yo'
ge da" bidnyid ri myang noug su: hang" nghoid loug we'
akhyeung" dang: atid' loo: za-nyang: nya: da" nhoid moo
mhau' fain" da" dang: tid jang" mo, no: pyam' ca" nyid. 11Nyang: gi akhyeung" da" moozoo" mo lheung: lo" lho: ge da" moo" ri zei: ja"-
nya: emyid, bain' sho' yo' ngei pyoo: myenjham" da" khyoo: shau" wa shid re" yoem: kaid' sho: nyid ca".
12Khasu" wim ga: ri Aseing: gi deingmain" mo, riyu" coung" zung" lhug lho:
nyangnu" da" akyu" mho' thui: ri tam" gyoo: byid: nyid. Nghoid loug we' a
khyeing" ashoeb da" moo" zei: nyid mo, ri gi
13Aseing: nheig yo: myonhoo: thoung: zhug to". Gyeing" nyang:- nanu" gi ge, da" moo" zei: wa vho: ngei nyid rigi kha: yug gi nanu" ri gyi se' koid wa lha". 14Nghoid loug we' gyeing" nyang: nanu" gi deungmain" deing byeung da" moo" zei: yoomo shid: gyoin, noo gyoin yo' shen" yhen zi: shau" nyid rilang"- nanu" gi khayhi' ngi lho, boem bye lha". hang" ri we' agyug nyid goo"- myid' we' amyo: nyid goo". 15Nanu" da" nheigloem: khoug: moo Khristu ri phau" myang: lho: wigi Aseing: gi yhoem: seing: khyo" nyang:- coung" nghei kham: yu nyid ge'- nanu" yo" kham: yu bye: da" nheig byu joyoo da" khyoo: ri myid: phoid: sho: loo su: ri kha: uringhoid loug we' tid phoid: sho' kyoo" wa shid re" jen" jen" koid too" ge'. 16Nghoid loug we' nu" nham, phau" myang: khyo" phoid: kyo" nyid ge'- nanu" da" yeug koung nheigloem: moo ce" yooboo we' adab baja"- Houg: su" wigi nanu" ri juang" yi zi shau" nyid da" uri Khristu da" thang: cang mo, khyo" nanu" da" asam" aved, joem ri ge, khyo" tid mo, gi sho' thu goo" wa zi nghoid. 17Mangsoo vho: khyo" nghoid rigi akhyeung" da" moo" zei: wa tho' moo gi ge, da" moo" ri zei: yoomo shen" yhen shau" zi gi je" ge, nyid. 18Khasu" wim gari Khristu gi yooboo yoo" mo, gung thid' -dalheing: dam, bain' sho' shid: kham: pyam bye- nanu" ri Mangso jang" moo shu" ju" loo wa da" shid' re" yooboo yoo" mo, shid' mo byu gi dayug gi shid: bye-nyang: gi moug: myed, gung shoo" ri said' pyam zi shau" bye- nghoid loug we' venyi khyo" doem dei loo nhang: zi shau" bye. 19Aseing: gi nya: venyi khyo" nyang:- thung: loung" jo, da" venyi yi jhang khyoo: tarha" lo" kho" kyo. 20Hau: da" venyi joem gi No-a sangphoo' yhoem: zhug nyid uri Mangsoo gi nheigloem: sheing: sheing: lang" nyid da" ayo, moo nya: mungdang: ri atam" gyoo: mo, da" venyi joem nghoid. nghoid loug we' gyid mo yo" khyoid yu mo, gi sangphoo' khoug: moo dajhi' za: date: bo lho: nghab shang ein: rigi shed' yug za: date: nghoid. 21He: da" khyoo: gi nanu" ri akhid" khyoid yu to" da" Babtisma kham da" khyoo: ri tu, to" alhoo: nghoid- hau: Babtisma kham da" khyoo: gi gung du: mo aco' ajhoid khyoo: ri ced" pyam' khyo" anghoid loo: za: gyeungshang: da" nheigloem: yo' Mangsoo yo' dang: theung thang" cab, zain: go" to" da" khyoo: nghoid- hau: khyoo: gi nanu" ri Aseing Yesu shid: da" jang" mo doem dei to'' lo da" yoem: khyo" wigi hau: Babtisma kham, khyoo: gi nanu" ri khyoid yu bye. 22Hau: da" Aseing: gi moug: khung: khyoo: vang lo" lho: akhid" Mangso lo, yo shoid moo zhoung: jo, bye- moug: lagyoo: yi yo' moug: khung: mo aya: yoo" mo, yo' myonhoo: phung" yoeb, boo mo, tho' moo oung: doid' lo" wigi vhoeb khang" nyid bye.
Currently Selected:
1PETERU 3: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.
