1PETERU 5

Mangso Da" Yang Phung

1Ngoo gi phung ludaid' dayug khyo" nanu" mo phung ludaid' yi ri mho' tung" pain: kaid. Ngoo gi Khristu kham' zo: da" kyi" khyeug khyoo: ri bo myang se' da" sag si: dayug khyo" thang: phyang" toin" shid' byid: loo wa da" myonhoo: phung" yoeb, ri-bo shau" kham: yu wa su: nghoid nanu" gi nanu" nyang: riab, byid: too" bye: da". 2Mangso da" yang phung: ri Mangsoo nanu" ri koid nhang: nau ziyo' dakhyoo" ti"- yu" coung goin, zung" lhug nyid ge, anoug akhyoid' khyo" akoid loo: za: nu" nham, vho: ngei da" myid' yo' koid nyi ge'- La, ga, nyho, khyo" anghoid loo: za: zhoo: gyi: zei: nau, khyo" gau yi ngei pyo: ziyo' zei: so' vhoin, wu, nyid ge'. 3Nanu" ri ab, byid: to" da" phung: ri seing: zoo: nau myid' khyo" akoid goo"- hau: yang phung: yi da" shid' khoin" moo yu" yu ge, da" khoo" shid: ri toin" shid' nyid ge'. 4Yang lhug zoug: moo" thu' myhang lo da' bidnyid moo nanu" gi myonhoo: phung: yoeb, bug thu' sheing" jhu" ziyo' khanham we' ashoem: apyang: lo: da" bidmug ri shau" yu boem wa zi nghoid.

5Houg: yo' dakhyoo" ti"- nanu" zoolu: zoomyi: yi we' ludaid' yi da" dang: ri tam" gyo: nyid ge'. nyang: cang" nyang: zoem" khau: da" khyoo: moo nanu" dangain" mo, gi khyo, nyhoem: ein: da" khin' ri void, ci: lho: dayoug da" dei zoo: dayug koid nyid ge'. Khasu" wim ga: ri jhoem: mungdang: moo Mangsoo gi nghoid boin: mo, ri doin: khyo' pyam lho: nheigloem: nyhoem: mo, ri jeju" byid: nyid ga: lhid" to". 6Houg: su" nghoid yoomo phoo Mangsoo gi nya: ge, da" ayo, ju" lang" nanu" ri yo" tu: to' kaid' wa shid re" nya: yoem: moo" bo da" lo, yoem: bid shoem: khoug: moo khyo, nyhoem: lho: nyid ge'. 7Mangsoo gi nanu" ri jheddab goin, coung: nyid yoomo nanu" da" myid' myoo: ung: loug khyoo: dangain" ri nyang: ri ab, pyam byid: ge'.

8Gyeung: boin: da" byugyeing" koid nyi ge'. zed" lhid' lho: nyid ge'. nanu" da" gyivoo nghoid yu satan gi kha: yug ri myhau: pyam' wa la"» ga: myeung dang: yen" da" khang khyi yo' du nyid. 9Nanu" koem gi loem" jeung" da" khyoo: moo geung: teung jo, lho: nyang: ri lhoem: zain: ge'. Khasu" wim ga: ri nanu" nyang: si' bye: ziyo' dakhyoo: ti"- mougmyid' gyab, goin" jang" moo nyid da" nanu" da" loem" jeung" mang nhung" yi gi hid: yhang: te" da" shen" yhen kyi" khyeug khyoo: ri thoung" shau" nyid boem. 10Nghoid loug we' nanu" gi daso' za: shen" yhen ziri thoung" shau" thang: ri Khristu yo' dage" apyaid' ato: myonhoo: phung" yoeb, ri shau" kham: yu wa shid re" nanu" ri khe: yu da" jeju" dangain" Aseing: Mangsoo nyang: nanu" ri joeb, byeung" mo, bui" nhang: lho: wigi geung: teung khyoo: yoem: zeing so' moo" yo' loem, ge" da" apoem: ayang: qei" byid: wa nghoid. 11Nya: jang" moo apyaid' atoo:- myonhoo: phung" yoeb, bug thu' seing" jhu" jo, baja" o" Amen.

Lo" Thang Mo Vhu" Kaid Dang:

12Ngoo gi he: da" mougsoug" lhid" zoore"- Sila bo pang" byid: khyo" he: mougsoug" ri nanu" jhang khyoo: lhid" foin: kaid' sila gikyed da" Khristain mang nhung" dayug nghoid ein:- ngoo myid loem nyid. Nanu" ri yoem: byid: da" dang: tid wa ziyo' - nanu" shau" kham' zo: da" jeju" gi Mangsoo byid: da" jeju" gyeing" nyang: nghoid da" ziri sag si: kham' wa shid re" he: da" mougsoug" ri lhid" kaid. hau: jeju" moo geung: tung yab, jo, ge'.

13Mangsoo khyen: yu da" jeju' ri nanu" yo' dakhyoo" ti" shau" kham: yu da" Babelon voo mo-nanu" da" mang nhung" phung: byu yi we' nanu" ri vhu" kaid' ago"- nga" zoo: Marku we' nanu" ri vhu" kaid. 14Nanu" nyang: cang" nyang: we' Khristain jheddab nheigloem: khyo" boo: bug bug go" nyid ge'- Khristu khoug: moo nyid mo, nanu" dangain" bang: da" atho' moo myen, jham" ngei pyo: nyid goo" baja" o".

Currently Selected:

1PETERU 5: LCL

Highlight

Copy