लूका 9
9
येशूकी चेला च्युन्ङीला काम खित ताङाते
(मत्ती १०:५-१५; मर्कूस ६:७-१३)
1थेमे येशूकी थे खोरोङ चेला च्युन्ङीला दोन्दु काताङगीन च्याकीन थेबाला मिओनला खोबाते ल्हन्डीक तेन्ला तोङच्येते थेमे नाबाते मिओनला ठाक्पा खित्च्येते शक्तिताङ अधिकार बिन्सुङ। 2थेमे थेकी थेबाला “ठाउँ ठाउँला गाल्ला परमेश्वर राज्य सिराते च्यिन्दे, थेकी चुक खाला राज्य खिते सिन लोप थेमे नाबाते मिओनला ठाक्पा खि,” सिन सिदुक। 3थोरूमोङ बात खिन थेकी “डोजीन ख्योकोनगी लामला गोक्यो सिन लाःक्तु फेर्का माखेर। झोलाताङ ग्या जारा थेमे पैसाङ छ्याःङ माखेर। फेङगाकोङ दोक्पोईकामा खेर। 4थेमे खेराङ लेप्सादु जुन खाम्बे मिकी खेराङला थेबाताङ देत सिन लेमु खिदुक, थेरू देत देतसाक थे खाम्बादुराङ देत। खाम्बा खाम्बा युला स्यासा मादेत। 5थेमे खेराङ लेप्सादु मिओनगी ख्योकोनला लेमु माक्यासीन थोक्ते ठाउँलाचेन देतराङ मादेत। थोक्ते ठाउँ ताङला ख्याम्जीन परमेश्वर बात माङेन्देकी थेबेकी तिरी सजाय ङेत्जीन सुङलाङ गाल खिता मेङेदो सिन सिराला खेराङ काम्बाला खोबाते थाला समेदोङ टकटक खाला थेरूकी ख्योम,” सिन सिदुक। 6थेमे थे चेलाओनगी गाङेपा युगीन युल युलला गा लाङच्येते बात लाप्सुङ, नाबाते मिओनलाङ ठाक्पा खासुङ।
हेरोद गेल्बो अलमल्ल परे खाबाते
(मत्ती १४:१-१२; मर्कूस ६:१४-२९)
7हेरोद गेल्बोकीङ येशूताङ थे चेलाओनगी खाबाते अचम्बते कामगी बात गाङे थोसुङ। येशू सु ईन्ताका सिन छ्या मास्येकीन थे अलमल्ल परे खासुङ। च्यिला सासीन लालेकी येशूनी थोङला हेरोद खोरोङगी सेताते बप्तिस्मा तेरकान्ते यूहन्नाराङ सोम्बो लोगीन वाबाते ईन सिन बात खिन ओतान। 8कोईकीचेन परमेश्वर बात खित्कान्ते एलिया लोईन वादुक सिन ओतान। लोक्ला ज्येन ज्येनगीचेन थाङबो परमेश्वर बात खित्कान्तेबे नाङ दोक्पोई सोम्बो लोगीन वाबाते ईन सिन बात खिन ओतान। 9गेल्बो हेरोदकीचेन “यूहन्नालानी ङे ङाराङगीराङ गोः तुप्कीन सेत च्युताते ईन। थेमे दि येशू सिराते मिकी अचम्ब लाङच्येतेन्दे काम खिदुक्लो। दि सु ईन्ताका?” सिन सासुङ। थेमे थे सु ईन्दाका सिन थेकी येशूला ठेता खिता छोल्गीनराङ देत्सुङ।
येशूकी हजार ङा मिला साप बिन्दाते
(मत्ती १४:१३-२१; मर्कूस ६:३०-४४; यूहन्ना ६:१-१४)
10येशू ख्रीष्टकी खटे खाबाते चेलाओन युल युललेकी ग्युरगीन वाकीन खोपरोङगी खाबाते कामताङ बात गाङे थेला लाःप्सुङ। थेमे थेबाताङकामा देताप सिन येशू थेबाला टीकीन थेरूई बेथसेदा सिराते सारनापा गाल्सुङ। 11थे थेपा गालाते बात छ्या स्येकीन मि आउदी काल्बेई थे तिङ ङ्योगीन थेपाराङ गाल्सुङ। थेबा थोक खाईन वाबा थोङगीन येशूकी थेबा गाङेला लेमु खासुङ। थेबाला परमेश्वर राज्य बात लाप्कीन बिन्सुङ, थेबे नाङ नाबा ओतातेबालाङ ठाक्पा खासुङ। 12थोक थोक खित्केलाराङ नामोङ स्योबा खाबा ओतान। थेमे थे खोरोङ चेला च्युन्ङीतेबा वाकीन येशूला “गुरू, दि छ्याःङ मेङेत्च्येते ठाउँ ईन। थोगी दि मिओनला साप थुङा ङ्योला साप्ला थेमे स्यासा देताला दुरूकी खइँसाला युल युलला ग्युक सिन थोङ,” सिन सिदुक। 13थोक सिरजीन थेकी थेबाला “मेन मेन, दिबाला ख्योकोनगीराङ साप थुङा बिन,” सिन सिदुक। थेमे थेबेकी “ङ्योकोनताङ खालि स्योबेन ङाताङ ङ्या ङिकामा ओत। दोक काल्बेई मिला ङ्योकोनगीराङ साप थुङा ङ्योला तेरा फाप्क्यो साबाप गुरू, ना च्यिन्दे?” सिन सिदुक। 14थेरू हजार ङाजो ख्योओ मिकामा ओतान। थेमे थेकी चेलातेबाला “लो दि मिओनला मेन्दा खाल ङिताङ च्युताम्बा च्युताम्बेते हूल रेरे जोला लेमु खाला साला देत छ्युत,” सिन कोत्सुङ। 15थेबेकीङ साबा च्योकराङ खाईन मिओनला देत च्युत्सुङ। 16थेमे येशूकी थे स्योबेन ङाताङ ङ्या ङि लाःक्तु लाकीन नामने ताकीन थे सापकी लाईदु परमेश्वरला धन्यवाद बिन्सुङ। थेमे थेकी थे स्योबेन च्यागीन च्याकीन थेमे ङ्याङ टुक्रा टुक्रा जोकीन गाङेला गोला बिन सिन चेलातेबाला बिन्नामेई थेबेकीङ साबा च्योकराङ खाईन गोकीन बिन्सुङ। 17थेमे मि गाङेकी डाडासाक सोसुङ। थेबेकी सोकीनोङ चेलातेबेकी थेरू लूबाते स्योबेनताङ ङ्ये टुक्राटुक्रीकी तोलुम च्युन्ङी काङसुङ।
पत्रुसकी येशूला ख्रीष्टराङ ईन साबाते
(मत्ती १६:१३-२०; मर्कूस ८:२७-३०)
18ङीमाई येशू थे खोरोङकामा प्रार्थना खिन ओतान। चेलातेबाङ थेत्ताङराङ ओतान। थेमे थेकी थेबाला “ङाला मिओनगी सु दुका खिका?” सिन ठिसुङ। 19थोक सिरजीन चेलातेबेकी “गुरू खोल्ला लालेकी बप्तिस्मा तेरकान्ते यूहन्ना सोम्बो लोगीन वाबाते दुका खिदुक। कोईकी थाङबो परमेश्वर बात खित्कान्ते एलिया दुका खिदुक। थेमे कोईकीचेन परमेश्वर बात खित्कान्तेबे नाङ दोक्पोई लोक्ला वाबाते ईन सिन बात खिदुक,” सिन सिदुक। 20लोईन थेकी थेबाला “थेमे ख्योकोनलाचेन ङा सु ईन सिराच्योक लाङगीका याङ?” सिन ठिजीन थेबे नाङ पत्रुसकी “गुरू, खो परमेश्वरगी तोङगो साबाते ख्रीष्ट ईन,” सिन सिदुक। 21पत्रुसकी थोक सानामेई थेकी थेबाला “दि बातचेन ख्योकोनगी सुङलाङ मासेर,” सिन कोत्सुङ।
येशूकी थे खोरोङ स्यिच्येते बात खाबाते
(मत्ती १६:२१-२३; मर्कूस ८:३१-३३)
22थोरूमोङ बात खिन येशूकी थेबाला “परमेश्वर ओत्सादुई वाबाते मि ङे आउदी दुक्पा भोगे खिता फाप्क्यो। यहूदी छ्ये छ्ये मि, छ्ये छ्ये पूजारी थेमे धर्मे गुरूओनगी ङाला परमेश्वरगी ताङाते ईनराङ मेन सिन सिओ। थेमे सेदोङ ज्युत्क्यो। तर सेताते ङीमा सुमगी छोमु परमेश्वरगी ङाला सोम्बो लोइओ,” सिन सिदुक।
येशूताङ ख्याम्बाला चुक ओङा फाप्कीते
(मत्ती १६:२४-२८; मर्कूस ८:३४-९:१)
23थेमे थेकी याङराङ चेलातेबाताङ थेरू मि गाङेला “ङात्ताङ ख्याम्बा सेम खित्कान्ते मिकीचेन दाक्पोन खुशीला ख्याम्बा तोङा फाप्क्यो। जस्तो दुक्पा ओङसीनोङ ओङस्यीत सिन ङीमे ठाङमा थेकीचेन दाक्पोन टाँए खाला स्या फाप्च्येते स्यिङगी थाम खुरला ङे तिरी ख्याम्बा फाप्क्यो। 24च्यि सासीन तिरी बो माताबा खाला सुइँदेकी दाक्पोन ज्यानगी माया खिदुक सासीन थेकी नोमुङ मिसिन्च्येते जुनी मेङेदो। दाक्पोन फाइदा माताबा खाला ङे लाईदु दाक्पोन ज्यानगी मायाङ मारे खित्कान्ते मिकीचेन नोमुङ मिसिन्च्येते जुनी ङेत्क्यो। 25सुइँदेकी दि जुनीला दि सा लुङबादु ओतातेबरी जेसुकै ङेता ओत्सीनोङ स्यिनामेई थे मिते च्यि आश ओङगीतेरो? 26थेमे सुइँदेकी ङे मि ईन सिराला ङोचा खिदुक थेमे ङे बात मेङेन्दुक सासीन परमेश्वर ओत्सादुई वाबाते मि ङाङ तिरी छ्येज्यीक शक्ति ङेत्ला ग्युरला ओङजीन थोक्ते मिला ङो मेस्येओ सिन सिओ। थेजीन ङा आबेते छ्येज्यीक शक्ति ङेत्ला नाम्दाककी झिलिमिली गाल्ला थे दूतओनताङ दुरू ग्युरला ओङगो। 27ङा ख्योकोनला दि बादोङ साला ज्य्वाक्यो। च्यि सासीन ख्योकोन नाङ कोई कोईचेन परमेश्वर राज्य थोङलाकामा स्यिइओ,” सिन सिदुक।
येशूला छ्येताङ झिलिमिली गाला थोङाते
(मत्ती १७:१-८; मर्कूस ९:२-८)
28दि बात सानामेई हप्ताईजो तिरी पत्रुस, यूहन्ना थेमे याकूबला टीकीन येशू बोमज्यीकने प्रार्थना खिताला गाल्सुङ। 29येशू थेरू प्रार्थना खिन खिनला च्यि ओङसुङा सासीन थे छ्येत आउदी टल्के खित्च्या गाल्सुङ। थेकी खोन्दाते खोलाकोङ मिगी ताराङ मुथुप्च्या आउदी कार्मु गाल्सुङ। 30थेमे थेरू मेन्दा ङि मि वाकीन थेत्ताङ बात खिताला स्यूसुङ। थेबा ङिबोचेन परमेश्वर बात खित्कान्ते मोशाताङ एलिया ओतान। 31थेबाङ नाम्दाककी झिलिमिली गाला ओतान। थेमे थेबेकी था परमेश्वरगी साबा च्योकराङ खाला येशू यरूशलेमदु गाल्ला स्यिच्येते बात खिन ओतान। 32थे बेलाला पत्रुसताङ थे र्वा ङिबोचेन च्य्वा गोरगीन ओतान। ङिक सेनामेई ताजीन थेबेकी येशूला मिगी ताराङ मुथुप्च्या नाम्दाककी झिलिमिली गालाते थेमे मोशाताङ एलियालाङ थे खादु लाकीन देता ओताते थोङसुङ। 33मोशाताङ एलिया थेरूई ख्याम्बा खाबा ओतान। थेमे थे बेलालाराङ पत्रुसकी “ओहो गुरू, ङुरूङला दुरूराङ देता लेमु दुका। ङ्योकोन गुरू खोल्ला, मोशाला थेमे एलियाला देते लाईदु पली रेरे ज्वामीन,” सिन सिदुक। पत्रुसला थे खोरोङगी फिजे बात च्योक खाबाप सिन छ्या मेतान। 34थेकी बात खिन खिनलाराङ मुक्पा वाकीन थेबा गाङेला उप्सुङ। थोक खाला मुक्पेकी उप्जीन चेलातेबा आउदी ज्यीबा खासुङ। 35थेमे थे मुक्पे नाङदुकीराङ “दि ङे फुज्युङ ईन। ङे दिला छाने खाबा ओत। दिकी साबाते बात ङेन,” सिन सिरा थेबेकी थोसुङ। 36दि बात थोकीन सिन्नामेई थेबा सुमबोकी येशूकामा थेरूराङ ओता थोङसुङ। खोपरोङगी थोङाते थोक अचम्बते बात थेबा सुमबोकी थेजीन सुङलाङ मासासुङ।
येशूकी फिजाला खोबाते ल्हन्डीक तेन्गीन ताङाते
(मत्ती १७:१४-१८; मर्कूस ९:१४-२७)
37ङारो च्योक्ते येशूताङ थे चेला सुमबो थे बोमनेकी थुल्ला फाप्सुङ। थेमा लेप्नामेकी येशूला मि आउदी काल्बेईकी ठेता खासुङ। 38थेमे थेबे नाङ मिज्यीगी येशूला “गुरू, ओर्च्ये ङे फुज्युङ ठाक्पा खाला नाङ। ङेते ज्येन फिजा मेत। 39दिला बेला बेलाला ल्हन्डीकज्यीक खोकीदुक। थे खोनामेई दि कस्स्ये खाला छेरा खिदुक। थेमे थेकी दिला जा लाङला खानामा बावाङ देन्गीदुक। दोक खाला दुक्पा बिन्ला थेकी दिला सेताराङ खिदुक। थेमे बल्ल बल्लकामा तोङगीदुक। 40ङे थे ल्हन्डीक तेन्ला नाङ सिन खुई चेलाओनला साबाप। तर थेबेकी थोक खिता माथुप्सुङ,” सिन सासुङ। 41थोक सिरजीन येशूकी “ख्योकोन था समय मि परमेश्वरला विश्वास खितराङ मिक्किकान थेमे थे बात ङेनराङ मेङेन्कान्ते ईन। परमेश्वरताङ छ्येज्यीक शक्ति ओत सिरच्येते बात था ख्योकोनगी नामचेन खोच्ये? थेमे था थोईसाक ङा दोक्ते काम खिन ख्योकोनताङराङ देत्च्ये,” सिन साकीन च्याकीन थे मिला “खुई फुज्युङला दुरू खोरच्योक,” सिन सिदुक। 42थोक सानामेकी थे ल्हन्डीक खोबाते ख्योओ फिजा येशू खादु ओङगीन ओतान। थेमे थे बेलालाराङ ल्हन्डीककी थेला जा लाङगीन स्याङे जोसुङ। थेमे येशूकी थे ल्हन्डीकला “थे फिजादुकी थेन्ला ग्युक,” सिन कोत्सुङ। थेमे थे ल्हन्डीक थेन्गीन गाल्सुङ। थोक खाईन थेकी थे फिजा ठाक्पा खाईन च्याकीन आबातेला बिन्सुङ। 43परमेश्वरते थोक छ्येज्यीक शक्ति थोङगीन मि गाङे छक्क परे खासुङ।
येशूकी लोईन थे खोरोङ स्यिच्ये बात खाबाते
(मत्ती १७:२२-२३; मर्कूस ९:३०-३२)
मि गाङेराङ येशूकी खाबाते दोक्ते अचम्ब अचम्बे काम थोङगीन छक्क परे खाबा ओतान। थेमे थेजीनराङ थेकी चेलातेबाला 44“ङा ख्योकोनला दि बातज्यीक सिओ। दि बात लेमु खाला नामज्योक सेत्ला ङेन। च्यि सासीन था परमेश्वर ओत्सादुई वाबाते मि ङाला मिज्यीगी धोका बिन्ला ज्येन मि लाःक्तु सोम्पे खित्च्येते बेला लेपा खाबा ओत,” सिन सिदुक। 45थेकी थोक सिरजीन च्यि साबाते ईन्ताका सिन चेलातेबेकी छ्याःङ माखोसुङ। च्यिला सासीन परमेश्वरगीराङ थेबाला थे बात खो माच्युत्सुङ। थेबेकीङ ज्यीबेकी खित्सादु गुरू खुई दि च्यि साबाते ईन्दे सिन थेला माठिसुङ।
येशूकी सु छ्येते ईन्दे सिन साबाते
(मत्ती १८:१-५; मर्कूस ९:३३-४०)
46येशू चेलाओन नाङ सु छ्येते ईन्दे सिरे बातला थोम्मु स्योरसुङ। 47येशूकी थेबे सेमगी बात छ्या स्येकीन फिजाज्यीकला थे खोरोङ खादु क्याल्सुङ। 48थेमे चेलातेबाला “लो दि फिजाला तो। खोपरोङ ङे मि ईन्देकी दि फिजाला लेमु खित्कान्ते मिकी ङालाराङ मान खाबाते ईन। ङाला मान खित्कान्तेकीचेन ङाला दुरू तोङकान्तेलाङ मान खाबाते ईन। बातचेन दिराङ ईन, ख्योकोन नाङ ङा ङाराङ ईन सिराच्योक मिक्किकान्तेराङ छ्येते ईन,” सिन सिदुक।
49थेमे यूहन्नेकी थेला “गुरू, मिज्यीगी खुई मिन लाला मिओनला खोबाते ल्हन्डीक तेन्ला तोङगीन ओता ङ्योकोनगी थोङसुङ। थे ङुरूङताङ ख्याम्कान्ते मि मेन्देकी ङ्योकोनगी थेला येशू मिन लाला खुई दोक खिता मेङेदो सिन ङाराप,” सिन सिदुक। 50थोक सिरजीन येशूकी थेला “थोक्ते मिला ख्योकोनगी थोक माकेत सिन मासेर। च्यिला सासीन ख्योकोनला मेलेबा मिक्किकान्ते मिचेन ख्योकोनताङ डिक्कान्तेराङ ईन,” सिन सिदुक।
सामरीओनगी येशूला लेमु माक्याबाते
51येशू स्वर्गने डोच्येते बेला लेपा खाबा ओतान। थोगी थेकी यरूशलेमपा डोच्येते टुङ्गो खाईन थेपाराङ ड्वाप्ला स्यूसुङ। 52थेमे स्यासा ठीक खि सिन थेकी कोई कोईला थे खोरोङ गोमा ताङसुङ। थेमे थेबेकी सामरिये अञ्चलते युलज्यीक्तु लेप्कीन स्यासा नाङ खासुङ। 53तर थे युलगी मिओनगी येशूङ यरूशलेमपा डोच्येते दुका सिन छ्या स्येकीन थेबाला स्यासा माबिन्सुङ। 54थोक खाईन स्यासा माबिन्दाते थाहा छ्येत्कीन थे चेला याकूबताङ यूहन्नेकी येशूला “प्रभु, था ङ्योकोन परमेश्वरला स्वर्गनेई मे ताङला थे मिओनला सजाय बिन सिन सिरामीन, ना खो चुक सिते?” सिन सासुङ। 55थोक सिरजीन थेकी ख्युर ग्युरगीन थेबा ङिबोला “थोक माकेत,” सिन थाप्सुङ। 56थेमे थेबा गाङेराङ ज्येनज्यीक युलनापा गाल्गीन देत्सुङ।
येशूताङ ख्याम्बाला चुक खिता फाप्कीते
(मत्ती ८:१८-२२)
57येशूताङ थेबाबरी डुइनराङ ओते बेलाला लामला मिज्यीगी थेला “गुरू, ङाङ खुई चेला ओङला खो जता गाल्सीनोङ खोत्ताङराङ ख्याम्ग्यो,” सिन सिदुक। 58थोक सिरजीन थेकी “तर दि बात छ्या स्येबा खि। च्यि सासीन किप्च्याङते देत्च्येते ठाउँ ओङगो। थोकराङ खाला छ्योज्युङमेतेङ छाङ ओङगो। तर परमेश्वर ओत्सादुई वाबाते मि ङेतेनी थेबेते च्योक खाला देत्च्येते ठाउँ छारीनी गोःज्यीक रिल्ला देत्च्येते ठाउँओङ मेत,” सिन सिदुक। 59ज्येन मिज्यीकलाचेन थेकी “लो खो ङात्ताङ ख्योम,” सिन सिदुक। थोक सिरजीन थेकी “प्रभु, ङा गोमा ङे आबे रो दिला ओङामीन। थेमे खोत्ताङ ड्वाप,” सिन सिदुक। 60थेमे येशूकी थेला “रो दिक्च्येतेनी परमेश्वरगी खि साबाते माङेन्गीन थे लाईदु स्याप छेतराङ गालाते मिओनगीङ खिता थुप्क्यो। खुईचेन गाल्ला परमेश्वर राज्य बात मिओनला लोप,” सिन सिदुक। 61याङराङ ज्येन मिज्यीगी थेला “प्रभु, ङाङ खोत्ताङराङ ख्याम्ग्यो। दि बात ङा खाम्बापा गाल्ला लाःप्ला ओङामीन,” सिन सिदुक। 62थेमे येशूकीचेन थेला “लाङ मोताला स्यूनामेई लाङबेकी ल्हाकनापा ग्युरला तेइन देत्सीन लेमु खाला लाङ मोता मुथुबो। थोकराङ खाला पूरो सेम परमेश्वर छ्य्वापाराङ लै मिक्ककान्ते मिकीङ परमेश्वर राज्यदु खिता फाप्च्येते काम खिता मुथुबो,” सिन सिदुक।
Currently Selected:
लूका 9: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
