लूका 8
8
येशूला मद्धत खित्कान्ते फेम्मे मिओन बात
1दोक ओङाते टिक्पी तिरी येशू युलगी नाङला सारगी नाङला गाङेपा युगीन परमेश्वर राज्य गा लाङच्येते बात मिओनला लोप्कीन ख्याम्सुङ। थे खोरोङ चेला च्युन्ङीङ थेत्ताङ ङ्योम्बुराङ ओतान। 2थेजीन कोई कोई फेम्मे मिङ थेबाताङ ङ्योम्बुराङ ख्याम्बा ओतान। थेबाला येशूकी ठाक्पा खाईन बिन्दा ओतान। थेबे नाङ गोमा कोई खुदुक खुदुक रोग लै खाईन नाबा ओतान, कोईकी ल्हन्डीक खोकीन दुक्पा ङेता ओतान। थे फेम्मे मिओन नाङ दोक्पोईचेन मरियम ओतान। थेला मिओनगी मग्दलिनी सिनोङ सिरच्येते खिन ओतान। थेदुकीचेन गोमा येशूकी ल्हन्डीक दुईन तेन्गीन ताङा ओतान। 3थेमे ज्येन मेरा ङिचेन योअन्नाताङ सुसन्ना सिरातेन्दे ओतान। योअन्नाचेन चूजा सिराते मि फेम्मे ओतान। चूजाचेन हेरोद गेल्बो दरवारदु काम खित्कान्ते छ्येज्यीक मि ओतान। दिबाकामा मेन्देकी ज्येन ज्येन फेम्मे मिङ थेबाताङ ङ्योम्बुराङ ख्याम्बा ओतान। दिबा गाङेकी खोपरोङ पैसेकी येशूताङ थे चेलाओनला दोक खाला गा लाङच्येते बात लोप्कीन ख्याम्जीन साप थुङाला गोच्येते जेसुकै बिन्ला मद्धत खिन ओतान।
सोन देप्कान्ते मि कथा
(मत्ती १३:१-९; मर्कूस ४:१-९)
4ठाउँ ठाउँलेकी मिओन येशू ओत्सादु ओङगीनराङ ओतान। थोक खाला आउदी काल्बेई मि जम्मा ओङजीन बाजिई येशूकी थेबाला कथाज्यीक लाःप्सुङ। 5थेकी थेबाला “बाजिई मिज्यीक सोन देपाला गाल्दुक्लो। थेमे सोन देप्जीन कोई सोन लामदु फाप्कीन थे सोनगी लाक मिओन ख्याम्दुक्लो। थेमे थे सोनचेन तिरी छ्योज्युङमेकी वाकीन गाङे सोदुक्लो। 6याङराङ कोई सोनचेन टिक्पी टिक्पीकामा सबी थेमे दो काल्बेई ओत्साला फाप्तुक्लो। थेमे केनामेकी सबी काल्बेई मेतेकी दाक काम्गीन स्यिदुक्लो। 7थोकराङ खाईन कोई सोनचेन चाङगी बुटे नाङला फाप्तुक्लो। थेमे केनामेकी चाङगी बुटेकीराङ सोदुक्लो। 8सबी लेमु ओत्साला फापाते सोनचेन लेमु खाईन केकीन लेदुक्लो। ङिमा तुला मुरला ताजीन ङिमा रेरेला गेडा सय रेरे स्यूबा ओता थेप्तुक्लो,” सिन सासुङ। थेमे थेकी थेबा गाङेला “ङेन्दा सेम ओत्कान्ते मिकी दि बातओन लेमु खाला ङेन,” सिन सिदुक।
सोन देप्कान्ते मि कथे अर्थ च्यिन्दे
(मत्ती १३:१०-२३; मर्कूस ४:१०-२०)
9थे कथे अर्थ चेलातेबेकीङ माखोसुङ। तिरी थेबेकी येशूला “थे कथे अर्थ च्यि ईन्दे, ङ्योकोनला लाःप्ला नाङना गुरू,” सिन सिदुक। 10थोक सिन ठिजीन थेकी “परमेश्वर राज्य सिराते च्यि ईन्दे थेमे परमेश्वरगी चुक खाला मि नाङ राज्य खिते सिरच्येते बात ख्योकोनलानी परमेश्वरगी खो च्युता ओत। तर ज्येनला परमेश्वर राज्य बात लोप्जीनचेन ङा कथालाकामा लोप्क्यो। थेबेकी परमेश्वरगी खिन ओताते काम थोङसीनोङ च्यि खिता चालाते ईन्ताका सिन छ्याःङ छ्या मेस्येस्यीत थेमे परमेश्वर बात थोसीनोङ च्यि साबाते ईन्दे सिन छ्याःङ मोखोस्यीत सिनराङ ङा थेबाला कथालाकामा परमेश्वर बात लोप्क्यो, कथे अर्थचेन मालाःबो।
11था ङे ख्योकोनला थे कथे अर्थ च्यि ईन्दे सिन लाःप्ला बिनगी। सोन साबातेचेन परमेश्वर बात ईन। 12लामला फाप्कीन छ्योज्युङमेकी तुकीन सोबाते सोन साबातेचेन परमेश्वर बात थोकान्तेबे नाङ थरीज्यीक मिला साबाते ईन। थोक्ते मितेचेन परमेश्वर बात ङेन्च्येते सेमराङ मेतेकी थे बात थोसीनोङ थे बात पत्ते मिक्किस्यीत थेमे परमेश्वरगी थेबाला पापदुकी मेडेल्स्यीत सिन शैतानगी थेबेकी थोबाते बात होत्ता टोक ज्येत ज्युत्क्यो। 13थेमे कोई कोईकी परमेश्वर बात थोबासात्तु आउदी गा खिन ङेन्ग्यो। ईन्सीनोङ थे बात लेमु खाला सेमगी नाङ मोज्योओ। थोगी परमेश्वर बात ङेन्देकी खित्सादु तिरी खइँदा दुक्पा ङेत्जीन थेबेकी थे बात ङेन्दा दाक तोङगो। टिक्पी टिक्पीकामा सबी थेमे दो काल्बेई ओत्साला फापाते सोन साबातेचेन होथोक्ते मिओनला साबाते ईन। 14लोक्ला कोई कोईकी परमेश्वर बातनी ङेन्ग्यो। ईन्सीनोङ साच्या थुङच्याताङ खोन्च्ये पीर, सम्पत्ति लोभ थेमे सुबा दुला दुला सेइन किम्मु खाला देता चालेकी खित्सादु थेबेकी थोबाते परमेश्वर बात दाक टोक ज्येत्ला छ्याःङ काम लै मिक्किओ। चाङगी बुटे नाङ फाप्कीन केबाते छ्याःङ मागोन्दाते सोन साबातेचेन होथोक्ते मिओनला साबाते ईन। 15कोई कोईकीचेन परमेश्वर बात थोनामेई आउदी लेमु खाला ङेन्ग्यो। थेबेकी खोपरोङला जे ओङसीनोङ थे बात ङेन्दा मोतोङा खाला लेमु काम खिन देत्क्यो। सबी लेमु ओत्साला फापाते सोन साबातेचेन होथोक्ते मिओनला साबाते ईन।
परमेश्वर बात लेमु खाला ङेन्दा फाप्क्यो
(मर्कूस ४:२१-२५)
16थोरूमोङ ज्येन बात च्यि सासीन बत्ती पारला च्याला सुङगीङ खइँदा नोतकी उप्ला मोज्योओ, खाटकी चावादुङ मोबोङो। बरू नाङने स्यूक्कान गाङेकी नाम्दाक थोङस्यीत सिन खइँसाला थोम्बोला ज्य्वाक्यो, मेन? 17बात च्यि सासीन थोरूमसाक ख्योकोनला छ्या स्ये माच्युताते बातबरी थाचेन परमेश्वरगी छ्या स्ये ज्युत्क्यो। थेमे थोरूमसाक माखोबाते बाततेबाङ खो ज्युत्क्यो। दोक खिन ज्येनतेबेकीङ थे बात छ्या स्येकीन डुइओ। 18थोगी ङे लोप्च्येते बात लेमु खाला ङेन। दि बात ङेन्ला लेमु खाला खोबा छोल्कानला दोक्ते बात झन काल्बेई छ्या स्येस्यीत सिन लाप्ला तेरग्यो। दि बात थोलाङ खोबा मोछोल्कान्ते मिओनलाचेन खोपरोङला छ्या ओत सिराच्योक लाबाते बादोङ टोक ज्येत ज्युत्क्यो,” सिन सिदुक।
येशूकी चुक्तेला थे खोरोङ मि ईन सिते
(मत्ती १२:४६-५०; मर्कूस ३:३१-३५)
19पालोई येशू मिओनला परमेश्वर बात लोप्कीन ओते बेलाला थेते आमातेताङ न्वातेबा थेला ठेता खिताला थेरू ख्योल्सुङ। थेरू मि काल्बेई ओत्कीन थेबा थे दोन्दु ड्वा माथुप्सुङ। 20थेमे मिज्यीगी थेला “ए गुरू, खुईते आमाताङ न्वाओन खोल्ला ठेता खित्च्या सिन फिनामा गुकीन देत्ला दुक,” सिन सिदुक। 21थेकी थोक सिरजीन येशूकी थेरू ओताते मि गाङेला “परमेश्वर बात ङेन्ला थेरू खि साबा साबाच्योक खित्कान्ते मिओनराङ ङेते आमाताङ न्वाओन ईन,” सिन सिदुक।
येशूकी ल्हाबाताङ समुन्द्रे छाल तोर च्युताते
(मत्ती ८:२३-२७; मर्कूस ४:३५-४१)
22थेमे ङीमाई येशू थे खोरोङ चेलातेबाताङ डुङ्गाज्यीकला जेसुङ। थेमे थेकी थेबाला “लो था ङुरूङ समुन्द्रे फारकेनपा डुइ,” सिन साकीन थेपा ड्वाप्ला स्यूसुङ। 23थेपा डुइन डुइनलाराङ येशूचेन भुसुक्क ङिक गाल्सुङ। थेमे थेरू चुक ओङसुङा सासीन आउदी छ्येज्यीक ल्हाबा चले खाईन समुन्द्रे छालगी छ्यु डुङ्गामा स्यूक्पाला स्यूसुङ। दोक खाईन छ्यु स्यूबेकी थेबा नुप्ला स्यिइता सिराच्योक गाल्गीन सिन्दा ओतान। 24थोगी ज्यीबेकी आते खिन चेलातेबेकी येशूला “ए गुरू, ल्वा ना ल्वा,” सिन ङिक चेत्कीनकामा “लो तो, डुङ्गा नुपा खाईन सिन्सुङ। था ङुरूङ स्यिच्या ओङसुङ,” सिन छेरा खासुङ। थेमे ङिक छेत्कीन खोक लाकीन येशूकी ल्हाबाताङ समुन्द्रे छालला “गोगे देत,” सिन सासुङ। थेकी थोक सानामेई ल्हाबा चले खिता ताङसुङ, समुन्द्रे छालोङ तोरसुङ। 25थेमे थेकी चेलातेबाला “ङे ख्योकोनला जोए खिता थुप्क्यो सिन ख्योकोनगी ङाला विश्वास खाबाते खोइ?” सिन सिदुक। येशूकी थोक खाबा थोङगीन अचम्ब लाकीन आते खिन चेलातेबेकी “आबिई, दि मि चुक अचम्बज्यीक ईन्दाका। दिकी कोतातेनी ल्हाबाताङ समुन्द्रे छालगी समेदोङ ङेन्गीदुक,” सिन सासुङ।
येशूकी मिज्यीकदुकी ल्हन्डीक काल्बेई तेन्गीन ताङाते
(मत्ती ८:२८-३४; मर्कूस ५:१-२०)
26थोक ओङनामेई डुइन डुइन येशूताङ थे चेलाओन गालील अञ्चल फारकेनपा गिरासिनी सिराते मिओन देत्सापा ख्योल्सुङ। 27थेमे डुङ्गादुकी फाप्नामेई थे सारगी मिज्यीगी वाकीन येशूला ठेता खासुङ। थेला ल्हन्डीक खोबा ओतान। थेकी जीउला खोलाक माखोन्दातेताङ खाम्बादु मादेताते काल्बा गाला ओतान। थे खालि रो ज्य्वाच्येते फुगी नाङलाकामा देत्कीन ओतान। 28येशूला ठेत्नामेकी थे मिकी गुर्बु खाला से खिन ल्हन्डीक खानापेई कस्स्ये खाला छेरा खिनकामा “ए येशू, खो गाङे भन्दा छ्येते परमेश्वर फुज्युङ ईन सिन ङाला छ्या ओत। खो ङाला दुक्पा तेराला दुरू च्यिला वाबे? ङाला दुक्पा मातेर ओर्च्ये,” सिन सिदुक। 29येशूकी थे मिदुकी थेन्ला ग्युक सिन कोतेकीराङ ज्यीबेकी थे ल्हन्डीककी थोक खाईन बिन्ती खाबा ओतान। थे ल्हन्डीककी थे मिला याङ याङ जा लोङगीन ओतान। लाक्पा काम्बाला नेल कोन्गीन ठाकीन ज्याक्सीनोङ थे ल्हन्डीककी थेबाङ बताबेता च्येत्ला थे मिला पाङलाकामा टीला खेरगीन ओतान। 30थेमे येशूकी थे ल्हन्डीकला “खुई मिन च्यि ईन्दे?” सिन ठिजीन थेकी “ङे मिन हूल ईन,” सिन सिदुक। च्यिला सासीन थे मिला आउदी काल्बेई ल्हन्डीक खोबा ओतान। 31थेमे थे ल्हन्डीकओनगी येशूला “ङ्योकोनला थरिङराङ नरककुण्डमा मातोङ,” सिन बिन्ती खासुङ। 32थेङलाराङ बोमगी नाङला फाक्पा काल्बेई चरन खिन ओतान। थेमे थे ल्हन्डीकओनगी येशूला “बरू ङ्योकोनला उथे फाक्पाओन नाङदु देताला थोङ,” सिन सिरजीन थेकीङ “लो ग्युक,” सिन सिदुक। 33थोक सानामेकी थे ल्हन्डीकओन थे मिला ताङगीन फाक्पाओनला खोबाला गाल्सुङ। थेमे थेरू च्यि ओङसुङा सासीन फाक्पा गाङे ङ्योबाच्योक गाल्गीन बोमगी नाङमा छ्योङगीन डोजीन ठाःकनामा रिल्गीन समुन्द्रमा स्यूकीन नुप्कीन स्यिसुङ।
34थोक थोक ओङा थोङगीन फाक्पे गोठालाओन ज्यीबेकी छ्य्वाकीन गाल्गीन सारताङ युलगी नाङले मिओनला थे बातबरी लाःप्सुङ। 35थेमे च्यि ओङाते ईन्दाका सिन थेङले मिओन थेपा तार गाल्सुङ। येशू ओत्सादु लेप्ला ताजीन थेबेकी ल्हन्डीक खोबाते थे मिचेन ठागीन खोलाक खोन्गीन येशू खादु देता ओता थोङसुङ। थे थोक खाईन ठाक्पा ओता थोङनामेईनी तार ओङकान्ते मिओन ज्यीबेकी झन आते खासुङ। 36येशूकी थे मिदुकी ल्हन्डीक उरगीन ठाक्पा खाबाते थोङकान्ते मिओनगीचेन थेकी चुक खाईन थेला ठाक्पा खासुङा सिरच्येते बात गाङे थेरू वाबाते मिओनला साकीन बिन्सुङ। 37दि गाङे बात थोनामेईनी थे मिओन झन ज्यीबेकी थरावरी गाल्सुङ। थेमे थे गिरासिनीबा गाङेकी वाकीन येशूला “हजूर खो ओर्च्ये दुरू मादेत, दुरूकी ग्युक,” सिन सासुङ। थेमे येशू डुङ्गाला जेकीन थेरूकी ड्वाप्ला ठीक खासुङ। 38थे थोक खाला डोजीन थेकी ल्हन्डीक तेन्गीन ठाक्पा खाबाते मिकीचेन थेला “ङाङ खोत्ताङराङ डुइओ,” सिन सिदुक। 39ईन्सीनोङ येशूकी थेला “खो ङात्ताङ ड्वा माफाबो। बरू खाम्बापा ग्युक। थेमे परमेश्वरगी खोल्ला चुक खाईन ठाक्पा खासुङा थे बात मि गाङेला सि,” सिन थेरूकी ताङसुङ। थेमे थे मिकीङ सारगी नाङपा गाल्गीन येशूकी थे खोरोङला चुक खाईन ठाक्पा खासुङा सिन मि गाङेला लाःप्सुङ।
येशूकी स्याप्ते फेम्मे फिजाला सोम्बो लोक्पाते
(मत्ती ९:१८-२६; मर्कूस ५:२१-४३)
40येशू थेरूकी समुन्द्रे छुरकेनपा लेप्नामेकी थे वादुक सिन मिओनगी थेला आउदी लेमु खासुङ। थेबाचेन थे नाम थेपा ग्युरला ओङगीताका सिन थे लामराङ ताकीन देता ओतान। 41थेमे थेरू मिटिङ खित्च्येते खाम्बेते याइरस सिराज्यीक छ्येते मिङ लेप्सुङ। वाकीन थेकी येशूला काम्बाला से खाईन “गुरू, ङात्ताङ ङे खाम्बापा डुइ ओर्च्ये,” सिन सासुङ। 42च्यिला सासीन थेते फुमुते खोक्पो खाईन नाकीन खाला बाक देत्कीन सिन्दा ओतान। थे लो च्युन्ङीते ओतान। थेते फुज्युङ फुमु सिराते थे दोक्पोईराङ ओतान।
थेमे येशू थेत्ताङ ख्याम्सुङ। थोक खाला थेपा डोजीन थेत्ताङ ज्येनोङ आउदी काल्बेई मि च्येपा च्येप खिन ख्याम्बा ओतान। 43थेबे नाङ लो च्युन्ङी थोङलामेकी ठाक ऊरच्येते बेथेकी नाबाते फेम्मे मिज्यीगोङ ओतान। ठाक्स्यीत सिन डाक्टरला मेन खित ज्युत्जीनराङ थेते ओतातेबरी जेसुकै सिन्दा ओतान। ईन्सीनोङ थातासाक थे बेथा सुङगीङ ठाक्पा खिता थुपा मेतान। 44येशू दोन्दु ख्योल्गीन थेकी येशूकी खोन्दाते खोलाक छेउला ल्हाकनापेई छुस्स दोसुङ। थोक खाला द्वापज्यीकताङराङ थेते ठाक ऊरच्येते बेथा दाक ठाक्सुङ। 45थेमे येशूकी “ङाला सुई दोबे?” सिन थेरू ओताते मिओनला ठिसुङ। तर गाङेकी “ङेङ मेन, ङेङ मेन,” सासुङ। थेमे पत्रुस थेमे थेत्ताङ ओताते ज्येनतेबेकी “गुरू, मि दोक च्येपा च्येप खाईन ख्याम्सादुङ खोल्ला थोईकी दो, थोईकी मादो, दिकीराङ दोसुङ सिन चुक खाला सिरच्ये,” सिन सिदुक। 46थोक सिरजीनोङ थेकीचेन “ङाला मिज्यीगी दोच्ये सेम खाईन दोसुङ। च्यिला सासीन ङात्ताङ ओताते ठाक्पा खित्च्येते शक्ति थेन्गीन गालाते ङे छ्या स्येसुङ,” सिन सिदुक। 47थेमे थे फेम्मे मिकी थे मोरोङगी थेला दोबाते बात येशूकी थाहा ङेत्सुङ सिन छ्या स्येसुङ। थोगी थेकी ज्यीबा खिन दारगीनकामा वाकीन येशू काम्बाला से खाईन थेरू मि गाङे ङोन्दु “ङा लो च्युन्ङी थोङलामेई ठाक ऊरच्येते बेथेकी नाबा ओतान। थेमे जति मेन खासीनोङ थातासाक सुङगीङ ठाक्पा खिता थुपा मेतान। ङेते दि बेथा ठाक्स्यीत सिन ङे गुरूते खोलाक दोबाप। थोक खाला खोलाक द्वासात्तु ङा दाक ठाक्सुङ,” सिन येशूला गाङे बात लाःप्सुङ। 48थेमे येशूकी थेला “फुमो, खुई ङाला विश्वास खाबेकी खित्सादु खो ठाक्पाते ईन। लो था खोले खोले ग्युक। थेमे लेमु खाला देत,” सिन सिदुक।
49थोक खाला येशू बात खिन खिनलाराङ याइरस खाम्बापेकी मिज्यीक लेप्कीन थेला “हजूर, खुईते फुमु स्यिसुङ। था गुरूला च्यिला दुक्पा तेरच्ये,” सिन सिदुक। 50थे मिकी साबाते बात थोकीन येशूकी याइरसला “पीर माकेत, ङाला विश्वासकामा खि। खुई फुमु सोन्ग्यो,” सिन सिदुक। 51थेबा गाङेराङ थे खाम्बादु ख्योल्नामेई येशूकी खालि पत्रुस, यूहन्नाताङ याकूब थेमे थे फेम्मे फिजे आबातेताङ आमातेलाकामा नाङने स्यूक च्युत्सुङ। 52थे खाम्बे नाङ ओताते मि गाङेराङ थे फुमु फिजा स्यिसुङ सिन आउदी खाला दुङाल खिन ओतान। येशूकी थेबाला “ख्योकोन दोक खाला दुङाल माकेत। दि फिजा स्या मेत, दिनी ङिक गालातेकामा ईन,” सिन सिदुक। 53थे मिओनला थे फिजा स्याप्तेराङ ईन सिन छ्या ओतेकी थेकी थोक सिरजीन दिकी च्यि लेम्बे बात खिका सिन थेबेकी थेला खिस्यी खासुङ। 54थेमे येशूकी थे स्याप्ते फेम्मे फिजे लाक्पाला जुम्गीन “ए फुमो ल्वा,” सिन सिदुक। 55थोक सिरासात्तु थे फिजा सोम्बो लोगीन खोक लासुङ। थेमे येशूकी “दिला खइँदा साप थुङा बिन,” सिन आबा आमातेबाला कोत्सुङ। 56थोक खाला फुमुते सोम्बो लोक्जीन थे आबातेताङ आमाते दोक च्यि अचम्ब ओङसुङा सिन छक्क परे खासुङ। येशूकीचेन थेबाला “ङे दोक खासुङ सिन ख्योकोनगी दि बात सुङलाङ मासेर याङ,” सिन कोत्सुङ।
Currently Selected:
लूका 8: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
