लूका 7
7
येशूकी मिल्टेरी क्याप्टेन योक्पोला ठाक्पा खाबाते
(मत्ती ८:५-१३)
1थे खोरोङ बात ङेन्दाला जम्मा ओङाते मिओनला दि गाङे बात लाप्कीन सिन्नामेकी येशू कफर्नहुमपा गाल्सुङ। 2थे सारदु मिल्टेरी क्याप्टेनज्यीक ओतान। थे मि यहूदी मेतान। थेते आउदी मन परे खाबाते योक्पोज्यीक ओतान। थे ज्यीबा लाङच्या खाईन नाकीन स्याप खाबा ओतान। 3थे मिल्टेरी क्याप्टेनगी येशू थेरू वाबाते बात थोसुङ। थेमे थेकी थे सारगी यहूदीओन छ्ये छ्ये मि कोई कोईला “ख्योकोनगी येशू ओत्सादु गाल्ला देपा वाला ङे योक्पो ठाक्पा खाला नाङ सिन बात खि,” सिन थे ओत्सापा ताङसुङ। 4थेमे थे यहूदीओन छ्ये छ्ये मिकीङ येशू ओत्सादु ख्योल्गीन थे क्याप्टेनगी सि साबाते बात लाःप्नामेई “हजूर, ओर्च्ये गाल्ला थे मि योक्पोला ठाक्पा खाला बिन। 5च्यिला सासीन थे क्याप्टेनगी ङुरूङ यहूदीओनला आउदी लेमु खिदुक। थेमे ङ्योकोनते मिटिङ खित्च्येते खाम्बाङ थेकीराङ जोकीन बिन्दाते ईन,” सिन सिदुक। 6थेबेकी थोक सानामेई येशू थेबाताङ गाल्सुङ।
येशू थे क्याप्टेन खाम्बापा ख्योला ख्योला खाबा ओतान। थे थेपा ओङगीन ओताते बात छ्या स्येकीन थेकी र्वातेबा कोई कोईला “लो ख्योकोन फिपाराङ येशूला ठेता खित ग्युक। थेमे थेला ङे दोक सिदुक सिन सि। चुक सासीन ‘प्रभु खो दोक दुक्पा खाला देपाराङ ओङा माफाबो। प्रभु खो च्योक्ते छ्ये मि ङा च्योक्ते मि खाम्बादु ओङा सोई मिक्किओ। 7ङा ङाराङ खुई दोन्दु ओङा सोई खित्च्या मेतेकीराङ ङे ज्येन ज्येनला खो ओत्सादु ताङाते ईन। प्रभु खुई ङे योक्पो ठाक्स्यीत सिनकामा साला नाङ। थोस्यिक सानामेई थे दाक ठाइओ। 8च्यिला सासीन ङा ङाराङोङ छ्ये छ्ये मिकी कोताते ङेन्कान्ते मि ईन। ईन्सीनोङ ङात्ताङोङ ज्येनला कोत्च्येते अधिकार ओत। थोगी ङे चावादु मिल्टेरीओनगी ङे कोताते ङेन्ग्यो। थेबा ङे ग्युक सिरजीन डुइओ थेमे स्योक सिरजीन ओङगो। थोकराङ खाला ङे ङाराङ योक्पोला दोक खि सासीन थेकीङ थोकराङ खिओ,’ सिदुक सिन सि,” सिन येशू ओङगीन ओत्सापा ताङसुङ। गाल्गीन थेबेकीङ थेकी सि साबाते बात येशूला लाःप्सुङ। 9थे लोन थोजीन थेला आउदी अचम्ब लासुङ। थेमे थेकी थे खोरोङताङ तिङ ङ्याकीन ख्याम्बाते मि हूलनापाला ग्युरगीन “लो तो, ङाला थे क्याप्टेनगी छेत विश्वास खित्कान्ते मिनी ङे थातासाक ख्योकोन इस्राएली नाङोङ सुङ थोङा मेत,” सिन सिदुक। 10थेमे थे क्याप्टेन र्वाओन थेरूकी ग्युरगीन गाल्सुङ। थेबा खाम्बादु लेप्जीन थे क्याप्टेन योक्पो ठागीन सिन्दा ओतान।
येशूकी स्याप्ते मिला सोम्बो लोक्पाते
11टिक्पी तिरी येशू नाइन सिराते सारनापा गाल्सुङ। थेजीन थेत्ताङ थे खोरोङ चेलाओन थेमे ज्येनोङ मि काल्बेई ख्याम्बा ओतान। 12येशू थे सारदु लेपा लेपा खालाराङ च्यि ओङसुङा सासीन थे सारदुकी मलामीओनगी रोज्यीक खुरगीन तेन्सुङ। थेचेन ख्योबो स्याप्ते फेम्मे मि फुज्युङ रो ओतान। थेते फुज्युङ सिराते थेज्यीककामा ओतान। थे फेम्मे मि थेमे सारगी मि काल्बेई थे रोई तिरी तिरी ख्याम्बा ओतान। 13थे फेम्मे मिला थोङगीन प्रभु येशूला आउदी ङिङज्ये लासुङ। थेमे थेकी थेला “ए आज्यी, दोक खाला माङु, ङ्वा माफाबो,” साकीन 14गाल्गीन च्याकीन थे मि रो ठाकीन खुराते स्यिङला जुम्सुङ। थोक खानामेई रो खुरकान्ते मिओन थेरूराङ देत्सुङ। थेमे येशूकी थे मि रोला “ए फुज्यो, लो ल्वा,” सिन सासुङ। 15थेकी थोक सिराईताङ थे स्याप्ते मि दाक सोम्बो लोगीन लासुङ। थेमे बादोङ खिताला स्यूसुङ। थेमे येशूकी थे फेम्मे मिला “लो था खोरोङ फुज्युङला खेर,” सिन सिदुक। 16थेकी थोक अचम्बते काम खाबा थोङगीन थेरू ओताते मि गाङेराङ आउदी ज्यीबा खिन छकदाङ परे खासुङ। थेमे थेबेकी “ओहो, ङुरूङ ओत्सादु परमेश्वर बात खित्कान्ते चुक छ्येज्यीक मि वाका। थे खोरोङगी छाने खाबाते मि ङुरूङला लेमु खिताला साँच्चीराङ परमेश्वर वादुक,” सिन परमेश्वरते जय जय खिताला स्यूसुङ। 17येशूकी खाबाते दि कामगी बात यहूदिये लुङबा खाङकामा मेन, थे फेरो नाङपा गाङेपा फैले खासुङ।
यूहन्नेकी येशू ओत्सापा बात ठिर ताङाते
(मत्ती ११:१-६)
18यूहन्ने चेलाओनगी येशूकी खाबाते अचम्बते कामगी बात गाङे थेला लाःप्सुङ। 19थेमे थेकी थे खोरोङ चेलातेबा मेन्दा ङिला काताङगीन “लो ख्योकोन येशू ओत्सादु ग्युक। थेमे थेला परमेश्वरगी तोङगो साबाते ख्रीष्ट हजूर खोराङ ईन्दाना था ज्येनज्यीक ओङगीते सिन ठिला स्योक,” सिन प्रभु येशू ओत्सादु ताङसुङ। 20थेमे थेबा ङिबोकी येशू ओत्सादु लेप्कीन “हजूर, बप्तिस्मा तेरकान्ते यूहन्नेकी ङ्योकोनला परमेश्वरगी तोङगो साबाते ख्रीष्ट हजूर खोराङ ईन्दाना था ज्येनज्यीक ओङगीते सिन ठिर ताङसुङ,” सिन सिदुक। 21थे बेलाला येशूकी थरी थरी रोग लै खाईन नाबाते मिओनला ठाक्पा खिन ओतान, ल्हन्डीक खोबाते मिदुकी ल्हन्डीक उरला तोङगीन ओतान थेमे अन्धतेबा काल्बेईला मिगी थोङच्या जोबा ओतान। 22यूहन्ने चेलाओनगी यूहन्नेकी ठिर ताङाते बात सानामेकी येशूकी थेबाला “ख्योकोनगी ङे खाबाते कामतेबा खेराङ मिगीराङ थोङा ओत। थेमे ङे लोप्कीन ओताते बात थोबा ओत। था ख्योकोनगी यूहन्ना ओत्सापा गाल्ला च्याला अन्धतेबा थोङा थुप्च्या गालाते, कुज्येतेबा ख्याम्बा थुप्च्या गालाते थेमे जे खोबाते मिओन ठाक्पाते खेराङगी थोङातेताङ थोबाते गाङे बात थेला सि। थोकराङ खाला ओन्बातेबा थोबा थुप्च्या गालाते, स्याप्ते मिओन सोम्बो लोक्पाते थेमे छ्याःङ मेताते मिओनला गा लाङच्येते बात लाप्कीन बिन्दाते बातओनोङ थेला सि। 23छ्याःङ शंका मिक्किता खाला ङाला परमेश्वरगी ताङाते ईन सिन विश्वास खित्कान्ते मिओन भाग्यमानी ईन सिन सि,” सिन सिदुक।
येशूकी यूहन्ना चुक्ते मि ईन्दे सिन साबाते
(मत्ती ११:७-१९)
24थेमे यूहन्नेकी थे खोरोङ ओत्सादु ताङाते मिओन ग्युरगीन गाल्नामेकी येशूकी थेरू ओताते मिओनताङ यूहन्ने बात खिताला स्यूसुङ। थेकी थेबाला “यूहन्ना री नाङला देता ओते बेलाला ख्योकोन थेपा च्यि तार गाले? च्यि ल्हाबा खित्जीन होथेङपा ओताते काँसकी सो योम्च्येते तार गालाप? 25ना आउदी लेमुते खोलाक खोन्ला किम्मु खाला देत्कान्ते मि तार गाले? थोक्ते मिनी गेल्बो दरवार नाङलाका देत्क्यो सिन ख्योकोनला छ्याराङ ओत। 26थोगी थेपा ख्योकोन ज्येनतोक छ्याःङ ताप्ला मेन्देकी परमेश्वर बात खित्कान्ते मिज्यीकलाका तार गाला ओतान मेन? थोक खाईन ख्योकोन ठेता खित गालाते यूहन्नानी परमेश्वर बात खित्कान्ते मिकामा मेन, थे भन्दाङ छ्येते ईन। 27च्यिला सासीन ख्रीष्टला देमा तोङच्येते बात खिन परमेश्वरगी परमेश्वर बातला ‘खोल्ला तोङा भन्दा गोमा ङा मिज्यीकला तोङगो। थेकीराङ खुई लाईदु जेसुकै ठीक खिओ,’ सिन साबा ओतान।#मलाकी ३:१ परमेश्वरगी ख्रीष्टला तोङा भन्दा गोमा तोङगो साबाते मिचेन यूहन्नाराङ ईन। 28थोगी यूहन्नाचेन दि सा लुङबादु ओताते मिओन नाङ छ्येते ईन। थातासाक थे छेत छ्ये मि सुङ केबा मेत। तर था परमेश्वर राज्य बातराङ खिइ सासुङ सासीनचेन बात खुदुकराङ ईन। यूहन्ना थोक छ्ये ईन्सीनोङ परमेश्वर राज्यदु स्यूबाते मिओन छेत छ्ये मेन। थेबा गाङे यूहन्ना भन्दाङ छ्ये ईन,” सिन सिदुक।
29येशूकी साबाते दि बात थेरू ओताते मि गाङेकी थोसुङ। थेबे नाङ काल्बा च्योक्ते मिओनताङ कर लिन्कान्ते मिओनगीचेन येशूकी साबाते बाततेबा परमेश्वरगीराङ सिर च्युताते ईन सिन ङेन्सुङ। थेबेकीचेन गोमा यूहन्ने बादोङ ङेन्गीन बप्तिस्मा लाबा ओतान। 30फरिसी पाटी मिओनताङ धर्मे गुरूओनगीचेन यूहन्ने बादोङ ङेन्दा मेतान, बप्तिस्माङ लाबा मेतान। थेबेकी यूहन्ने बात ङेन्दा ईन्सीन परमेश्वरगी खिता चाला च्योकराङ खाला थेबाला लेमु खित्च्या ओतान। थेबेकी माङेन्देकीराङ परमेश्वरगी थेबाला लेमु खिता माथुप्सुङ।
31थोरूमोङ बात खिन येशूकी “ख्योकोन था समय मि गाङेराङ चुक्ते ईन्दे सासीन 32चोमु खिताला ठाउँज्यीक्तु रूला देत्कान्ते फिजाओन च्योक्ते ईन। थेबाचेन खोपरोङ खोपरोङ नाङराङ मिडिगो। थेबा लाला लालेकी ज्येनतेबाला ‘ङ्योकोनगी बाक चे सिन लु लाला बाजा फुला खित्जीनोङ ख्योकोन च्यिला टेरेराङ मिक्किता खाला देत्कीते? थेमे ख्योकोनगीङ दुङाल खि सिन ङ्योकोन दुङाल खित्जुम खित्जीनोङ ख्योकोनचेन च्यिला खाराक्पाराङ देत्कीते?’ सिन सिओ। 33बात च्यि सासीन बप्तिस्मा तेरकान्ते यूहन्नेकी छ्याङ रक्सी सिराते बान्दा माथुसुङ थेमे जेसुकै मासोसुङ। तर ख्योकोन गाङेकी थेला ल्हन्डीक खोबाते मि दुका सिन सासुङ। 34थेरूई परमेश्वर ओत्सादुई वाबाते मि ङाचेन दुरू वाकीन जेसुकै सोबान, थुबान। तर ङात्ताङोङ ख्योकोन ‘तोते, थे चुकस्यिक ईन्दाका। थेनी आउदी सोलुन्दाईताङ छ्याङ रक्सी थुङकानज्यीकका ओताक्वा। थेमे थेनी कर लिन्कान्तेबा थेमे ज्येनोङ पापीओनताङका र्वा खिदुक,’ सिन स्येदाङ खिदुक। 35जे ईन्सीनोङ परमेश्वरगी खाबाते काम थोङला दि काम थेकी आउदी बुद्धि पुरे खाईन खाबाते ईन सिन खोकान्ते मिओनोङ ओङगो। होथोक्ते मिओनला ताला परमेश्वरगी साँच्चीराङ आउदी बुद्धि पुरे खाला काम खिओ सिन लेमु खाला छ्या स्येक्यो,” सिन सिदुक।
येशू शिमोन खाम्बादु डोजीन ओङाते बात
36ङीमाई फरिसी पाटी मिज्यीगी येशूला सेन साप्ला काताङा ओतान। थेमे येशू थे खाम्बादु लेप्कीन साप साप्ला देत्सुङ। 37थे सारदु मेलेबाते काम खित्कान्ते फेम्मे मिज्यीक ओतान। थे रन्डी ईन सिन थेङले मि गाङेला छ्या ओतान। येशू थेरू साप सेइन दुक सिरा थोकीन सिसी खाङ आउदी स्यीम्बु बास्ना चले खित्च्येते मोर्गु खुरगीन च्याकीन थे फेम्मे मि येशू गालाते खाम्बादु ख्योल्सुङ। 38थेमे येशू देत्सादु ल्हाकनापा लेप्कीन थे आउदी खाईन ङ्वाप्ला स्यूसुङ। थोक खाला ङुजीन मिकच्युक फाप्कीन म्वाबाते येशू काम्बा थे मोरोङ टेकीराङ पिकीन बिन्सुङ। थेमे छ्ये छ्ये गुरूला खिताच्योक खाईन मान खासुङ। थेमे थे स्यीम्बुते बास्ना चले खित्च्येते मोर्गुङ थे काम्बाला कुकीन बिन्सुङ।
39थे फेम्मे मिकी थोक थोक खित्जीनोङ येशूकी छ्याःङ मिसिरजीन थेला निम्तो खित्कान्ते फरिसी पाटी मिकी दि परमेश्वर बात खित्कान्ते मि मेन्दा च्यिन्दा। थोक्ते मि ईन्दा ईन्सीन दि रन्डी ईन सिन छ्या स्येच्या ओतान। थेमे दिकी थे खोरोङला दोर ज्युत्च्या मेतान सिन विचार खासुङ। 40थे सेमगी बात छ्या स्येकीन येशूकी थेला “शिमोन, ङा खोल्ला बातज्यीक ठामीन,” सिन सिदुक। थोक सिरजीन थेकी “ओङगो गुरू, च्यि बात ईन्दे लो सि,” सिन सिदुक। 41थेमे येशूकी “बाजिई साहू ऋण फोक्पाते मेन्दा ङि मि ओताक्वालो। थेबे नाङ दोक्पोईकी चाँदी डबल सय ङा थेमे ज्येनतेकीचेन खाल ङिताङ च्युताम्बा ज्येला फाप्च्या ओताक्वालो। 42थेबा ङिकारगी थे पैसा ज्येला मुथुप्च्या थोङगीन साहूकी थे ऋण मिलिन्च्या खादुक्लो। खोल्ला था थेबा ङिबो नाङ खाङगीचेन आउदी गा खिन थे साहूला ‘खुई चुक छ्येज्यीक गुन खासुङा,’ सिन सिओ सिराच्योक लाङगीका?” सिन सिदुक। 43थोक सिरजीन शिमोनगी “ङालानी थे ऋण काल्बेई ज्येला फाप्च्या ओताते मिकीराङ थे साहूला खुई थोई लेमु खासुङा सिन आउदी गा खितासीन सिराच्योक लाङगीदुक,” सिन सिदुक। थेमे येशूकी “खुई ठीकराङ सिदुक,” सिन सिदुक।
44थेरूई थे फेम्मे मि ओत्सापाला ग्युरगीन थेकी शिमोनला “लो दि फेम्मे मिला ताला विचार खि। ङा दुरू ओङजीन खुई ङाला काम्बा ठुताला छ्युङ माबिन्सुङ। तर दिकीचेन दि मोरोङ मिकच्युककी ङे काम्बा म्वाकीन दि मोरोङ टेकीराङ पिकीन बिन्सुङ। 45दिकी दुरू ख्योला छुरनामेई ङाला छ्ये छ्ये गुरूला खिता च्योकराङ मान खिनराङ देत्सुङ। तर खुईनी ङाला डोम्बोला छेदोङ मान माक्यासुङ। 46थोस्यिककामा मेन, खुईचेन ङाला गोःला समेदोङ मोर्गु कुकीन माबिन्सुङ। दिकीचेन आउदी महँगोते स्यीम्बुई बास्ना चले खित्च्येते मोर्गुङ ङे काम्बालाका कुकीन बिन्सुङ। 47थोगी खोल्ला ङा दि बात सिओ। च्यि सासीन दिकी काल्बेई पाप खाबा ओत्सीनोङ थे गाङे माफ ओङा ओत। थे गुन थोङगीनराङ दिकी ङाला दोक आउदी खाईन मान खाबाते ईन। पाप काल्बा माक्याबाते मिला थे पाप माफ बिन्सीन माफ तेरकान्तेला थेकी थोक काल्बा मान मिक्किओ,” सिन सिदुक। 48थेमे येशूकी थे फेम्मे मिला “खुई खाबाते पाप गाङे ङे माफ खाबा ओत,” सिन सिदुक।
49येशूकी थेला थोक साबा थोकीन थेरू साप सेइन ओताते ज्येन ज्येन डोम्बोकीङ खोपरोङ नाङ “दिकी चुक खाला मि पाप माफ तेरा थुप्कीते? दि चुकस्यिक मि ईन्दाका,” सिन बात खिताला स्यूसुङ। 50येशूकीचेन थेबे बातला नामज्योकराङ मेसेता खाईन थे फेम्मे मिला लोईन “खुई खोरोङ पाप ङे माफ खिता थुप्क्यो सिन विश्वास खाबेकी ङे खुई पाप गाङे माफ खाबा ओत। लो था खोले खोले ग्युक। थेमे लेमु खाला देत,” सिन सिदुक।
Currently Selected:
लूका 7: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
