लूका 6
6
सन्चारी छोमु च्यि च्यि काम खिता ओङगीते
(मत्ती १२:१-८; मर्कूस २:२३-२८)
1ङीमाई येशूताङ थे चेलाओन लामला डुइन ओतान। थे लामगी फारताङ छुरला ठे स्यीङ ओतान। थेमे चेलातेबाचेन ठे ङिमा ज्युरला मुरला सेइन ख्याम्सुङ। थे छोमु सन्चारी ओतान। 2थोक खिता थोङगीन फरिसी पाटी मिओनगी येशू चेलाओनला “थरिङ सन्चारी छोमु ख्योकोन च्यिला ठे ङिमा ज्युरगीते? परमेश्वर नियमलानी सन्चारी छोमु छ्याःङ काम खिता मेङगो सिन साबा ओत मेन?” सिन ङारसुङ। 3चेलातेबाला ङारा थोङगीन येशूकी थेबाला “दाऊद गेल्बोकी चुक खाबा ओताने सिन ख्योकोनगी पढे खाबा मेतरो? 4फ्रोबा फापे बेलाला खापाङ छ्याःङ साच्येते मेङेत्जीन पालोई थेकी परमेश्वरला माने खित्च्येते खाम्बादु स्यूकीन थेरू चढे खाबाते स्योबेनराङ पूजारीला नाङ खाईन सोबा ओतान। थेमे थे खोरोङ मिओनलाङ थे स्योबेनराङ गोकीन बिन्दा ओतान। तर परमेश्वर नियमलाचेन थे स्योबेन पूजारीओनगीकामा सा ओङगो सिन टिबा ओत मेन?” सिन सिदुक। 5थोक साकीन च्याकीन थेकी याङराङ थेबाला “परमेश्वर ओत्सादुई वाबाते मि ङात्ताङचेन सन्चारी छोमुङ दि खिता ओङगो, थे खिता मेङगो सिन सिरच्येते अधिकार ओत,” सिन सिदुक।
येशूकी सन्चारी छोमुराङ मिज्यीकला ठाक्पा खाबाते
(मत्ती १२:९-१४; मर्कूस ३:१-६)
6थेमे ज्येनज्यीक सन्चारी छोमुङ येशू मिटिङ खित्च्येते खाम्बाज्यीक्तु गाल्गीन मिओनला लोपाला स्यूसुङ। थेरू सामे लाक्पा काम्गीन थे लाक्पा चलेराङ खिता मुथुप्च्या गालाते मिज्यीगोङ ओतान। 7थेमे थेरू वाबा ओताते धर्मे गुरूओनताङ फरिसी पाटी मिओनचेन येशूते खइँदा दोष तेन्दा थुप्कीता सिन थेकी चुक खिका, च्यि खिका सिन च्याङबो खाला तेइनराङ ओतान। थेबाचेन सन्चारी छोमु छ्याःङ काम खिता मेङच्येते दिन ईन सिन परमेश्वर नियमला टिबाते बात दिला छ्याराङ ओत। था दिकी थे लाक्पा काम्बाते मिला ठाक्पा खासीन थेकी नियम ङ्ये च्युत्सुङ सिन गल्ती तेन्दाप सिन विचार खाईन देता ओतान। 8तर थेबे सेमगी बात छ्या स्येकीन येशूकी थे लाक्पा काम्बाते मिला “खो खोक लाला च्याला दुरू गाङे दोन्दु स्योक्ते,” सिन काताङसुङ। थेमे थे मिङ थे दोन्दु गाल्गीन लाकीन देत्सुङ। 9थेमे येशूकी थे खोरोङ गल्ती तेन्दाप सिन देताते मिओनला “लो ङा ख्योकोनला बातज्यीक ठामीन, सन्चारी छोमु लेमु काम खिता डिगीताना मेलेबा काम खिता डिगीते? मिला सोन ज्युता लेमु ईन्दाना स्यिर ज्युता लेमु ईन्दे? परमेश्वर नियमताङ डिक्च्येते काम खाङ ईन्दे?” सिन 10थेबाला रकस्यिक ताकीन देत्सुङ। थेमे थेकी थे लाक्पा काम्बाते मिला “खुईते लाक्पा स्योङते,” सिन सिदुक। थे मिकीङ लाक्पा स्योङजीन लेमु खाला चले खिता थुप्च्या गाल्सुङ। 11येशूकी थेरू थोक थोक खाबा थोङगीन थे मिओन स्येदाङगी टोले स्यिसुङ। थेमे था थेला च्यि खाला स्येदाङ सेत्च्या ईन्ताका सिन खोपरोङ नाङ ठो खिताला स्यूसुङ।
येशूकी छाने खाबाते मेरा च्युन्ङी चेलाओन
(मत्ती १०:१-४; मर्कूस ३:१३-१९)
12थेजीनराङ बाजिई येशू परमेश्वरला प्रार्थना खिताला बोमज्यीकने गाल्सुङ। थेमे नुप खाङ थेनेराङ प्रार्थना खिन देत्सुङ। 13ङारो च्योक्ते नाम लानामेकी थेकी थे खोरोङ चेलातेबा जतिला काताङगीन च्याकीन थेबे नाङदुई मेरा च्युन्ङीला छाने खासुङ। थेमे थेकी थेबाला “ख्योकोनबरीचेन ङे खटे खाबाते मि ईन,” सिन सिदुक। 14थोक खाईन छाने खाबाते मेन्दा च्युन्ङी नाङ दोक्पोई शिमोन ओतान। थेला येशूकी पत्रुस सिनोङ मिन ज्याक्पा ओतान। थेमे ज्येन मेरा च्युच्यीकचेन शिमोन आज्यो अन्द्रियास, याकूबताङ यूहन्ना, फिलिप, बारथोलोमाइ, 15मत्ती, थोमा, अल्फयस फुज्युङ याकूब, देशभक्त सिराते पाटी मि शिमोन, 16याकूब सिराते मि फुज्युङ यहूदा थेमे तिरी थे खोरोङला धोका तेरकान्ते यहूदा इस्करियोत ओतान।
येशूकी लोप्च्येतेताङ ठाक्पा खित्च्येते काम खाबाते
(मत्ती ४:२३-२५)
17थेमे येशू थे खोरोङगी छाने खाबाते मेरा च्युन्ङीताङ बोमनेकी फाप्कीन दिङमाज्यीक्तु लेप्सुङ। थेत्ताङ ख्याम्कान्ते ज्येन चेलातेबाङ काल्बेई थे दिङमादु ओतान। थोकराङ खाईन ज्येन ज्येन ठाउँलेकी वाबाते मिङ आउदी काल्बेई ओतान। थेबाचेन यहूदिये अञ्चलपेकी, यरूशलेम सारनापेकी थेमे समुन्द्रे छेउकी नाङला ओताते सीदोनताङ टायर सिराते सारगी नाङपेकी वाबा ओतान। 18येशूकी लोप्कीन ओताते परमेश्वर बात ङेन्दाला थेमे रोग खोबातेबाचेन ठाक्पा खाला नाङ सिराला थेरू वाबा ओतान। थेबे नाङ ल्हन्डीक खोबाते मिओनोङ ओतान। येशूकी थेबाला खोबाते ल्हन्डीक तेन्गीन ताङगीन थेबाला ठाक्पा खासुङ। 19मिबरीचेन खोपरोङ ठाक्स्यीत सिन येशूला द्वा छोल्गीन ओतान। थेत्ताङ नाबाते मिओनला ठाक्पा खित्च्येते शक्ति ओतेकी थेबा गाङे ठाक्सुङ।
येशूकी सु सु भाग्यमानी ईन्दे सिन साबाते
(मत्ती ५:३-१२)
20थेरूई येशूकी थेरू ओताते गाङे चेलातेबा ओत्सापाला ताकीन दोक सिन बात खिताला स्यूसुङ। थेकी थेबाला “ख्योकोन दुक्पा ङेताते मिओन भाग्यमानी ईन। च्यिला सासीन ख्योकोन परमेश्वर राज्यदु स्यूला थेरू देता ङेत्क्यो। 21ख्योकोन थरिङोला दाङच्या खाला साप थुङा मेङेत्कान्ते मिओन भाग्यमानी ईन। च्यिला सासीन ख्योकोनला गोबाते जति गाङे परमेश्वरगी तेरग्यो। ख्योकोन थरिङोला पीरगी ङ्वा फाप्कान्ते मिओन भाग्यमानी ईन। च्यिला सासीन तिरी ख्योकोन गाकी गोता ङेत्क्यो। 22थेमे परमेश्वर ओत्सादुई वाबाते मि ङाला विश्वास खाबेकी खित्सादु ज्येनगी ख्योकोनला मिगी थोङसार्मु खिओ। ख्योकोनला खाम्बाताङ युलदुकी देन्ग्यो। थेबेकी ख्योकोनला नाना-भाँती दोष लै खिओ, मेलेबा मि ईन सिन सिओ। दोक्ते दुक्पा ङेत्कान्तेबा ख्योकोन भाग्यमानी ईन। 23थेबेकी थोक खित्जीन ख्योकोन गा खिन बाक चे। च्यिला सासीन स्वर्गने ख्योकोनगी छ्येज्यीक इनाम ङेत्क्यो। ख्योकोनला दुक्पा तेरकान्तेबे ज्युज्यु पुर्खेकीङ परमेश्वर बात खित्कान्ते मिओनला गोमाबा होदोकराङ खाईन दुक्पा बिन्दा ओतान।
येशूकी सु सुला मेलेबा ओङगीते सिन साबाते
24तर ख्योकोन थरिङोला छ्युक्पु ओताते मिओनला तिरी मेलेबा ओङगो। च्यिला सासीन ख्योकोनगी ङेत्च्येते किम्मु ङेत्कीन सिन्दा ओत। 25थेमे ख्योकोन थरिङोला सुबा दुला दुला सा ङेत्कान्ते मिओनला तिरी मेलेबा ओङगो। च्यिला सासीन था तिरी ख्योकोन तुक्पाराङ देता फाप्क्यो। थोकराङ खाला ख्योकोन थरिङोला किम्मु ङेत्कीन गाकी गोत्कीन देत्कान्ते मिओनला तिरी मेलेबा ओङगो। च्यिला सासीन पीरताङ दुक्पेकी खित्सादु था तिरी ख्योकोन ङुइन देता फाप्क्यो। 26थेमे थरिङोला मि गाङेराङ ख्योकोनताङ खुशी ओत्सीन तिरी ख्योकोनला मेलेबा ओङगो। च्यिला सासीन होदोक खाला ख्योकोनताङ खुशी ओङकान्तेबे ज्युज्यु पुर्खाङ थाङबोबा परमेश्वर बात खित्कान्ते मि ईन साला मेन्दे बात लोप्कान्ते मिओनताङ खुशी ओतान।
शत्रुओनलाङ ङिङज्ये खित्च्येते बात
(मत्ती ५:३८-४८)
27थेमे ङे बात ङेन्कान्ते मिओनला ङा दोक दोगोङ खि सिन सिओ। च्यि सासीन था ख्योकोनगी खेराङ शत्रुलाङ ङिङज्ये खि। खेराङला मिगी थोङसार्मु खित्कानला लेमु खि। 28थेमे सुइँदेकी ख्योकोनला मोता खासीन थेलाङ थोकराङ माकेत, बरू थेला आशी बिन। थोकराङ खाला ख्योकोनला मेलेबा मि ईन साला दुक्पा तेरकान्ते मिओनला लेमु ओङस्यीत सिन परमेश्वरताङ प्रार्थना खि। 29थेमे सुइँदेकी खेराङला डाम्स्याकज्यीक ग्याप्सीन थेला ज्येनते डाम्पाङ सेत्ला बिन। सुइँदेकी ख्योकोनते कोट ठ्वालाङ याङराङ फेङगाकोङ खेरा चाल्सीन थेङ थेला मेतेरो मासेर। 30सुइँदेकी खइँदा नाङ खासीन थेबाला बिन। थेमे सुइँदेकी ख्योकोनते खइँदा खेरसीन थेला लोक्ला ग्युरला नाङ मासेर। 31जे ईन्स्यीत ख्योकोन खेराङला ज्येनगी चुक खित्स्यीत सिन सेम खिते थेबालाङ थोकराङ खि।
32थेमे ख्योकोनगी खेराङला ङिङज्ये खित्कान्ते मिओनलाकामा ङिङज्ये खासीन परमेश्वरगी ख्योकोनला च्यि मान तेरगीतेरो? दाक्पोनला ङिङज्ये खित्कानलानी ज्येनगी पापी साबाते मिओनगीङ ङिङज्येराङ खिओ। 33थेमे जसकी खेराङला लेमु खिदुक थेलाकामा लेमु खासीन परमेश्वरगी ख्योकोनला च्यि मान तेरगीतेरो? दोकनी याङ ज्येनगी पापी साबाते मिओनगीङ खिओ। 34थेमे सुइँदाला खइँदा किन्जीन जसकी तिरी ज्येला थुप्च्या दुक थोक्तेबालाकामा किन्सीन परमेश्वरगी ख्योकोनला च्यि मान तेरगीतेरो? ज्येला थुप्कान थुप्कान नाङ लिनदिन खित्च्येतेनी ज्येनगी पापी साबाते मिओनगीङ खिओ। 35ख्योकोनगीचेन खेराङ शत्रुओनलाङ ङिङज्ये खि, थेबाला लेमु खि। सुइँदाला खइँदा किन्जीन किम्बाराङ लिन्दाप सिन मातेर। ङे खि साबा च्योकराङ खासीन गाङे भन्दा छ्येते परमेश्वरगी ख्योकोनला तिरी छ्येज्यीक मान तेरग्यो। थेमे ख्योकोनला थे फुज्युङ फुमु ईन सिरा सोई खिओ। च्यिला सासीन परमेश्वरगी बैगुनीताङ मेलेबा काम खित्कान्ते मिओनलाङ ङिङज्ये खिओ। 36थोगी आबा परमेश्वरगी मिओनला ङिङज्ये खाबा च्योकराङ खाला ख्योकोनगीङ ज्येनला ङिङज्ये खि।
ज्येनगी गल्ती तेन्दा मेङगो
(मत्ती ७:१-५)
37थेमे ख्योकोनगी ज्येनला फलाना दोक्ते, थे थोक्ते सिन मासेर। थोक खासीन परमेश्वरगी ख्योकोन दोषी ईन सिन सिओ। थेमे ख्योकोनगी फलानेकी थोक खाबेकी थेकी सजाय ङेताराङ फाप्क्यो सिन मासेर। दोक खासीन परमेश्वरगीङ ख्योकोनला खेराङ कामगी सजाय तेरग्यो। बरू ख्योकोनला सुइँदेकी खइँदा मेलेबा खासीन थेबाला माफ बिन। दोक खासीन परमेश्वरगी ख्योकोन पापोङ माफ तेरग्यो। 38थेमे ख्योकोनगी खेराङताङ ओताते ज्येनताङ गोला सो। दोक खासीन परमेश्वरगी ख्योकोनला गोच्येते जति वालछ्येल ओङच्या खाला तेरग्यो। बातचेन दिराङ ईन। ज्येनला ख्योकोनगी जस्तो खिदुक परमेश्वरगीङ ख्योकोनला उस्तोराङ खिओ,” सिन सिदुक।
39थोरूमोङ बात खिन थेकी थेबाला “च्यि अन्धेकी ज्येनज्यीक अन्धला खइँसापा टीला खेरा थुप्क्यो? थोक खिता चाल्सीन दाक ङिकाराङ गाराम गुरूम रिल्ग्यो याङ मेनरो? 40थेमे चेलातेबा गुरूते छेतराङ स्येकान मेङगो। गुरूतेकी लाप्नामेईकामा थेबा थे छेतराङ स्येकान डुइओ। 41ख्योकोननी मि गोःला स्यिक युक्पा थोङकान्ते थेमे दाक्पोन गोःलाचेन ताक युक्पाङ मोथोङकान्ते मि ईन। 42दोक मेन्दा ईन्सीन ख्योकोनगी दाक्पोनगी खाबाते छ्येज्यीक गल्तीराङ माताबा खाला खेराङ आज्यो न्वाकीते टेक्टेस्यिक गल्ती तेन्च्या मेतान। ख्योकोन चुक्तेन्दे ईन्दाका। थोङला दाक्पोन गल्ती छ्या स्येबा खि। थेमेकामा खेराङ आज्यो न्वाकी खाबाते गल्ती बात खि।
सु मि चुक्ते ईन्दाका सिन चुक खाला ठाल्गीते
(मत्ती ७:१६-२०; १२:३३-३५)
43थेमे ज्येनोङ बात च्यि सासीन रोग लै माक्याबाते दोङबोला लेमुराङ खाला फलफूल गोन्ग्यो। रोग लै खाबाते दोङबोलाचेन लेमु खाला फलफूल मोगोनो। 44थोक ईन्देकी फलफूल तालाराङ थे दोङबो रोग लै खाबातेताङ माक्याबाते चुक्ते ईन्दे सिन डेला थुप्क्यो। थेमे चाङगी बुटाला नोमुङ नेभारा मोगोनो। थोमगी आस्यालु झाङला अंगूरोङ मोगोनो। 45थोकराङ खाला सु मि चुक्ते ईन्दाका सिन दाक ठाल्ग्यो। च्यिला सासीन मिते सेम लेमु ओत्सीन थेते बानीताङ बात जेसुकै लेमु ओङगो। सेम मेलेबा ओत्सीनचेन बानीताङ बादोङ मेलेबाराङ ओङगो। दाक्पोन सेमदु जे दुक खालाङ थेराङ थेन्ग्यो।
येशू बात थोकान्तेबेकी चुक खिता फाप्कीते
(मत्ती ७:२४-२७)
46थेमे ख्योकोन ङे साबाते बात ङेनराङ मेङेन्कान मिङ ङाला माने खित्च्या सिन प्रभु खो छ्ये ईन सिन च्यिला सिते? 47ङे छ्य्वापा लै खाला ङे बात ङेन्ला खि साबा च्योकराङ खित्कान्ते मि सु च्योक्ते ईन्दे छ्या ओत? 48थोक्ते मिचेन लेमुते ठाउँ छाने खाला जस्तो ओङजीनोङ माराम्च्या खाला खाम्बा जोकान्ते मि च्योक्ते ईन। थे मिकीचेन जग तीङ खाला ठुला रोम्बो खाला खाम्बा जोइओ। थोक खाईन जोबाते खाम्बाचेन जग रोम्बो ओतेकी खित्सादु ठाङके भल ग्याकीन वासीनोङ रामराङ मारामो। 49तर ङे बात थोलाङ खि साबा च्योकराङ मिक्किकान्ते मिचेन जग रोम्बो खाला मिदिङा खाला खाम्बा जोकान्ते मि च्योक्ते ईन। थोक खाईन जोबाते खाम्बानी भल ग्याला ओङजीन छ्याःङ मेदेता खाला बराङ बुरूङ राम्ग्यो,” सिन सिदुक।
Currently Selected:
लूका 6: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
