लूका 10
10
येशूकी ज्येनोङ चेलाला काम खित ताङाते
1दि तिरी प्रभु येशूकी परमेश्वर राज्य बात लोपाला ज्येन मेरा खाल सुमताङ च्युताम्बा मि छाने खासुङ। थेमे थेबाला था थे खोरोङ डोच्येते गाङे सारताङ युल युलला मेरा ङि ङि खाला गोमा गोमा तोङच्या खासुङ। 2थेबाताङ बात खिन थेकी “स्यीङदु थोक्पा रूक्पा फाप्च्येते बाली काल्बेई ओत्कीन खेतालाचेन टिक्पीईकामा ओत्सीन स्यीङगी धनीला ज्येनोङ खेताला गोच्या दुक सिन सिरा फाप्क्यो मेन? थोकराङ खाला ज्येनला परमेश्वर बात लोप्कान्ते मि टिक्पीईकामा ओतेकी थोक्ते मि काल्बेई फेल छ्युत सिन ख्योकोनगी परमेश्वरला प्रार्थना खि। च्यिला सासीन परमेश्वर राज्यदु स्यूक्पा छोल्कान्ते मि आउदी काल्बेई दुक। 3लो था ख्योकोन ग्युक। फारे हूलगी लुई रीउओनला थेप्सीन चुक खिते सिन ङुरूङला छ्या ओत मेन? ङे दुरूकी ताङनामेई फारेकी लुई रीउला खिता च्योकराङ मिओनगी ख्योकोनला मेलेबा खिओ। 4था डोजीन ख्योकोनगी लामला गोक्यो सिन पैसे थैली, साच्या थुङच्या लुबाप सिन झोला थेमे काचाप छ्याःङ खुरला माखेर। लामला सुइँदाताङ काल्बा अलमल मिक्किता खाला सरासर ख्योम।
5खेराङ लेप्सा लेप्सादु जुन खाम्बादु स्यूइदुक थे खाम्बे मिओनला परमेश्वरगी ख्योकोनला लेमु खित्स्यीत सिन सि। 6थे खाम्बे मिओनगी ख्योकोनला लेमु खासीन ख्योकोनगी साबा च्योकराङ खाला परमेश्वरगी थेबाला लेमु खिओ। थेबेकी थोक माक्यासीनचेन ख्योकोनगी थेबाला बिन्दाते आशी लै मिक्किओ। 7खेराङ स्यूबाते खाम्बे मिकी बिन्दाते साप थुङा ङोचा मिक्किता खाला सो थुङ। च्यिला सासीन खेतालेकी खोपरोङ निमेक ङेता च्योकराङ ख्योकोनोङ ज्येनतेबे लाईदु काम खित्कान्ते मि ईन्देकी ख्योकोनला गोच्येते जति थेबेकीराङ तेरा फाप्क्यो। थेरू देत देतसाक थे खाम्बादुराङ देत। खाम्बा खाम्बा युला स्यासा मादेत।
8जुन ठाउँकी मिकी खेराङला लेमु खिदुक थेरूराङ देत्ला थेबेकी च्यि च्यि सा थुङा तेरगीका थे थेराङ सो थुङ। 9थेमे थे ठाउँदु नाबाते मिओनला ठाक्पा खि। थेरू ओताते मिओनला ‘परमेश्वर राज्य ख्योकोन दोन्दु वाबा ओत,’ सिन लोप। 10तर जुन ठाउँकी मिकी खेराङला लेमु मिक्किदुक थोक्ते ठाउँदुचेन थेरू मि गाङेकी थोच्या खाला 11‘ख्योकोनगी परमेश्वर बात ङेन्दा सेम माक्यासुङ। थोगी तिरी सजाय ङेत्जीन ख्योकोनगी सुङलाङ गाल खिता मेङेदो सिन सिराला ङेराङ काम्बाला खोबाते थाला समेदोङ टकटक खाला दुरूकी ख्याम्ग्यो। ईन्सीनोङ दि बातज्यीक छ्या स्येबा खि। च्यि सासीन परमेश्वर राज्य वाकीन सिन्दा ओत,’ सिन साला ज्येननापा दाक ग्युक। 12ङा ख्योकोनला च्यि सिते सासीन थाङबो सदोम सारगी मिओनगी आउदी मेलेबा मेलेबा काम खाबा ओत्सीनोङ था तिरी परमेश्वरगी न्याय खिते छोमु थेबाला भन्दाङ छ्येज्यीक सजायनी होथोक्ते ठाउँकी मिओनलाका तेरग्यो।
13थोकराङ खाला खोराजीनताङ बेथसेदादु मिवे, ख्योकोनला था आउदी मेलेबा ओङगो। ङे ख्योकोन नाङ खाबाते अचम्बते कामतेबा टायरताङ सीदोन सारगी मि नाङ खाबा ईन्सीन थेबेकी खोपरोङ पापी दुका सिन छ्या स्येला भाङ्रे खोलाक खोन्ला खोपरोङ गोःला थाला कोन्ला खित्च्या ओतान। दोक खाला थेबा परमेश्वर छ्य्वापा लै खित्च्या ओतान। 14थोगी परमेश्वरगी न्याय खिते छोमु ख्योकोनला छेत सजायनी थेकी टायरताङ सीदोन सारगी मिओनलाङ मेतेरो। 15थेमे कफर्नहुम मिवे, ङे ख्योकोन नाङ अचम्बते काम काल्बेई खासुङ सिन ख्योकोनचेन स्वर्गने ड्वा ङेत्क्यो सिन छ्ये खाईन देत्ला दुक। तर न्याय खिते छोमु ख्योकोनलानी परमेश्वरगी नरककुण्डमाका लुक्यो।
16था ख्योकोनगी परमेश्वर राज्य बात लोप्जीन जसकी ख्योकोन बात ङेन्गीदुक थेकी ङे बातराङ ङेन्दाते ईन। थेमे जसकी ख्योकोन बात मेङेन्दुक थेकीचेन ङे बात माङेन्दाते ईन। ङे बात मेङेन्कान्तेकीचेन ङाला दुरू तोङकान्तेकी साबातेङ माङेन्दाते ईन,” सिन थेबाला थेरूई ताङसुङ।
येशूकी कामला ताङाते चेलाओन ग्युरगीन वाबाते
17थेमे ठाउँ ठाउँला परमेश्वर बात लोपाला ताङाते थे मेरा खाल सुमताङ च्युताम्बा येशू ओत्सादु ग्युरगीन लिच्युङ। थेमे गा खिन थेबेकी “प्रभु, मिओनला खोबाते ल्हन्डीकओनला ङ्योकोनगी खुई मिन लाकीन थेन्ला ग्युक सिन कोत्नामेई थेबा गाङे थेन्गीन गाल्सुङ,” सिन लाःप्सुङ। 18थोक सिरजीन थेकी “ईन ईन, ल्हन्डीक गेल्बो शैतान हारे खाबा ओत। ङा तेइनराङ ओतान। चिलाम खिता च्योकराङ खाईन थे स्वर्गनेकी ल्हुम्सुङ। 19ख्योकोनगी रूलताङ बिच्छीला ङेन्ला ख्याम्बा थुप्क्यो। थेबेकी ख्योकोनला छ्याःङ खिता मुथुबो। ख्योकोन शत्रुगी जति मेलेबा खिता चाल्सीनोङ ख्योकोनगी थेला ग्याल्ग्यो। सुङगीङ थेमे छ्याःङगीङ ख्योकोनला मेलेबा खिता मुथुबो। 20ल्हन्डीकओनगी ख्योकोनगी कोताते ङेन्दा थोङजीन गा लासुङ मेन? गा खित्च्येते बातचेन दिराङ मेन। परमेश्वरगी तिरी थे खोरोङताङ देता ङेत्कान्ते मिओन नाङ स्वर्गने ख्योकोन मिनोङ टिबा ओत। गा खिता फाप्च्येते बातनी दिका ईन,” सिन सिदुक।
येशू गा खाबाते
(मत्ती ११:२५-२७)
21थे बेलालाराङ परमेश्वर आत्मे छ्य्वापेई आउदी गा खिन येशूकी “आबा, खो दि स्वर्गताङ पृथ्वीते मालिक ईन। ङा खुईते जय जय खिओ। च्यिला सासीन परमेश्वर राज्य बात खुई पढे माक्याबाते थेमे काल्बा बात छ्या मेस्येकान्ते मिओनला लेमु खाईन खो च्युत्सुङ। दि बातनी खुई आउदी बुद्धि ओतातेताङ काल्बेई पढे खाबाते छ्ये छ्ये मिलाङ खो च्युता मेतान। आबा खोल्ला दोक खिताराङ लेमु लासुङ। दोक खाईन खुई खिता चालाते च्योकराङ ओङसुङ,” सिन सासुङ। 22याङराङ थेकी “आबेकी ओताते जति गाङे ङे जिम्माला बिन्दा ओत। थेमे ङाला गाङे बात छ्या स्ये च्युता ओत। ङा चुक्ते ईन्दे सिन आबेकीकामा छ्या स्येक्यो। थोकराङ खाला आबा चुक्ते ईन्दे सिनोङ ङेकामा छ्या स्येक्यो। ङेकामा मेन, ङे छ्या स्ये ज्युता चालाते मिओनगीङ आबाला लेमु खाला छ्या स्येक्यो,” सिन सिदुक।
23थेमे थेकी थे खोरोङ चेलाओनलाकामा बात खिन “ख्योकोन परमेश्वर राज्य वाबाते थोङकान्ते मिओन चुक भाग्यमानी ईन्दाका। 24ङा ख्योकोनला च्यि सिते सासीन ख्योकोनगी थोङा ङेताते परमेश्वर राज्य ताप सिन परमेश्वर बात खित्कान्ते मिओन थेमे गेल्बोओन काल्बेई गुकीन देता ओतान। ईन्सीनोङ थेबे पालोला ता माङेत्सुङ। थोकराङ खाईन ख्योकोनगी थोबा ङेताते परमेश्वर राज्य बात चुक दुका सिन थोबा चाल्सीनोङ थेबेकी थे बेलाला थोबा माङेत्सुङ,” सिन सिदुक।
ज्येनला लेमु खित्कान्ते सामरी बात
25थेमे पालोई धर्मे गुरूज्यीगी येशू ओत्सादु वाकीन थे सेम ता चाल्सुङ। थेकी “गुरू, नोमुङ मिसिन्च्येते जुनी ङेताला ङे च्यि खिता फाबोङा, लाप्ला नाङना,” सिन सिदुक। 26थोक सिरजीन येशूकी “परमेश्वर नियमला च्यि खिता फाप्क्यो सिन टिला दुका? थेमे खुई च्यि बात खोसुङा?” सिन सिदुक। 27थेमे थेकी “परमेश्वर नियमलानी ‘खुई प्रभु परमेश्वरला खोरोङ आत्माताङ बुद्धिकी थेमे स्येतकी थुपासम्म सेमदुकीराङ ङिङज्ये खि। थेमे दाक्पोन ज्यानला माया खिता च्योकराङ खाला ज्येनलाङ ङिङज्ये खि,’ सिन साबा ओत,” सिन सिदुक। 28थेकी थोक सिरजीन येशूकी थेला “खुई ठीकराङ सिदुक। खो परमेश्वर नियमला खि साबा ओता च्योकराङ खि। थेमे नोमुङ मिसिन्च्येते जुनी ङेत्क्यो,” सिन सिदुक।
29तर थेकी थे खोरोङ लेमु खिता छोल्कान ईन सिराच्योक खिन “ङे ङिङज्ये खिता फाप्च्येते ज्येन मि सु ईन्दे ओना?” सिन सासुङ। 30थेमे येशूकी थेला “बाजिई मिज्यीक यरूशलेमनेकी यरीहो सारनामा डुइन ओताक्वालो। डोजीन लामला डाँकाओनगी थेप्कीन थेला जुम्गीन जेसुकै ठ्वाकीन आदा मार्दो डोच्या खाईन दुकीन थेरूराङ पेर्दुङबा सिली जोकीन क्युरगीन गाल्दुक्लो। 31थेमे च्यि ओङकालो सासीन यरूशलेमनेकी थे लामनामाराङ खाईन पूजारीज्यीक वादुक्लो। थेकी थे डाँकाओनगी थोक जोकीन ज्याक्पाते मिला थोङदुक्लो। ईन्सीनोङ माथोङा च्योकराङ खाईन थे ख्योक क्योगीन गाल्दुक्लो। 32टिक्पी तिरी लोईन थे लामनेईराङ खाईन परमेश्वर मन्दिरदु काम खित्कान्ते लेवीज्यीक थेमाला फाप्तुक्लो। थेकीङ थे मिला थोङगीन गोमेतेकी च्योकराङ छ्याःङ मिक्किता खाईन क्योगीन गाल्दुक्लो। 33थेमे रकस्यिक तिरी थे लामला ख्याम्गीन ओताते सामरीज्यीगोङ थे मिला थोक जोकीन ज्याक्सादु लेप्तुक्लो। थे मिला थोङजीन थे सामरीला आउदी ङिङज्ये लादुक्लो। 34थेमे थेकी थेला मा थोत्सा थोत्साला मोर्गुताङ ज्येन मेनोङ कुकीन मास्युम खाईन बिन्गीन थे खोरोङ गधे लाक्तु जेत्कीन हुटेलज्यीक्तु खेरदुक्लो। थेमे थेरूङ च्यि च्यि खिता फाप्कीका लेमु खाईन तादुक्लो। 35थेमे ङारो च्योक्ते थेकी हुटेल धनीला चाँदी डबल ङि थेन्ला तेरगीन ‘लो दि मिला साप थुङा बिन। थेमे लेमु खाला स्याहार सुसार खि। ज्येन ल्हाक्पा खर्च लै खासीन थे ङा लोक्ला दुरू ओङजीन ज्येलामीन,’ सिन साकीन गाल्दुक्लो,” सिन सिदुक। 36दोस्यिक सानामेकी येशूकी थे धर्मे गुरूला “था खो चुक सिते? थेबा मेरा सुमगी नाङ डाँकाओनगी दुबाते थे मिला खाङगीचेन ज्येनला खिता फापा च्योकराङ लेमु खासुङ सिराच्योक लाङगीका?” सिन ठिसुङ। 37थोक सिन ठिजीन थेकी “ङालानी थे मिला दया खित्कान्ते मिकीराङ ज्येनला खिता फापाच्योक खाबाते ईन सिराच्योक लाङगीदुक,” सिन सिदुक। थेमे येशूकी थेला “थोगी लो खो ग्युक थेमे खुईङ होथोकराङ खि,” सिन सिदुक।
येशू मार्थाताङ मरियम खाम्बापा गालाते
38डुइन डुइन येशूताङ थे चेलाओन युलज्यीक्तु लेप्सुङ। थेरू मार्था सिराज्यीक फेम्मे मिकी येशूला थे मोरोङ खाम्बादु स्योक सिन काताङसुङ। 39मार्थेते मरियम सिराज्यीक नुमु ओतान। प्रभु येशू खाम्बे नाङ स्यूनामेई मरियमचेन थे खादु देत्कीन थे बात ङेन्दाला स्यूसुङ। 40मार्थाचेन साप ज्वाप्ला स्यूसुङ। थे मोरोङकामा साप जोइन जोइन हाइरेन गाल्गीन थेकी येशू खादु लेप्कीन “ए प्रभु, गाङे काम ङाकामा खिन ओत। दिचेन दुरू गोगे देत्ला दुक। दोक खाबाते प्रभु खुई माथोङसुङ? दिला गाल्ला ङाला र्वा खि सिन सिना,” सिन सिदुक। 41थोक सिरजीन प्रभु येशूकी “फुमो, खोनी साच्या थुङच्याताङ ज्येन ज्येन कामगी पीर खिदुक। खो च्यिला दोक आउदी खाला दोक्ते बातकी पीर खिते? 42खिता फाप्च्येते कामज्यीककामा ओत। थे काम मरियमगी खिन दुक। दोक माकेत सिन दिला सुङगीङ सिरा मेङगो,” सिन सिदुक।
Currently Selected:
लूका 10: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
