Mark 2

1Ka Mâ‐a vala pě o Kapěrnaum hwi jâkâ tombango, ka sango ya ’luanidě, na, a bě nd‘ o ndabo. 2Ka bato baitě e yolaně o njo pâkâ, ba diye pě na ngudi ba kokakě o ndabo, tombe n‘ ubiyâ; A ka pakwaka ndaga o bâ‐ba jadi. 3Ka bâ‐ba viya o Mâ‐a jadi na moto a diyakidi na ebědi ya nyolo limbelimbe, a diyaki bapwěngo na bato banai. 4O bâ‐ba diyakidi ba diye na ngudi e pakiyě o Mâ‐a jadi ’kabojana ebimba, ka bâ‐ba bumudě unyuwa o ndabo ’aju e diyakidi; o bâ‐ba diyaki mâ bumuděngo, ka bâ‐ba hubě ikondo ja ubědi mua nyolo limbelimbe i diyakidi. 5O Jisus a yěněkidi ikamide jabu, ka Mâ‐a vâ na ubědi mua nyolo limbelimbe, na, Mwana o, mabe mâvě ma ’yidwěnd‘ âvě. 6Ndi balěndi na bahuhu ba diyakind‘ omě diye diye, ba ka kalaka na melema meabu, 7na, E lě nde ya momo těkaně e kilakě Anyambě kakana? Nja ka ’yidě mabe kabo Anyambě dipâ? 8Elěngiaha o Jisus a yowakidi n‘ ilina jaju na ba pikilakiyandi bâ mětě na bâ mětě, ka Mâ‐a vâ na bâ, na, O pikilakiya li belombo těkabe o melema meanyu nande? 9Nana e ndi bobâbu na vâ na ubědi mua nyolo limbelimbe, na, Mabe mâvě ma ’yakudw‘ âvě, na ba o vâ, na, Umwaka, na nâvě wa nângâ ikondo jâvě, na nâvě wa tamuwa? 10Nd‘ ovaně nd‘ inyěni o ka yowěni, na, Mwana moto a na ngudi e ’yakidě mabe o he (ka Mâ‐â vâ na ubědi mua nyolo limbelimbe, na), 11Mbi vwi na nâvě, na, Umwaka, nângâkâ ikondo jâvě, na nâvě wa vala o ndabo ’âvě. 12Elěngiaha, tepě ka mâ‐a ’muwa, ka mâ‐a nângâ ikondo jaju, ka mâ‐a vala o boho boabu boa běhěpi; jâ ndi jabu ja běhěpi ja mama, ba ka bendakě Anyambě, na, Ho ha yěnete yâ kakana.

13Ka Mâ‐a vala pě njo ’pâkwě baka na etima, ka ’bumbu yěhěpi ya kâbidě Mâ, a ka yokwakidě bâ. 14O Mâ‐a diyakidi a tombaka, ka Mâ‐a yěně Livai mwana wa Alfius diyango o inângânido via pago, ka Mâ‐a vâ na ju, na, Vitakě ’Mba. Ka mâ‐a ’muwa na vitě Mâ.

15E diyakindi o Jisus a diyakindi a jaka o ndabo ’aju kakana, bayoli pago na bato babe ba diyaki tepě, na Jisus na beyokwedi beaju ta; ’kabojana ba diyaki baitě, ka bâ‐ba vitaně Mâ. 16O balěndi na Farisi ba yěni Mâ‐a jaka na bayoli pago na bato babe, ka bâ‐ba vâ na beyokwedi beaju, na, E lě nde eaju e mâtâkě na e jakě na bayoli pago na bato babe? 17O Jisus a yoki yâ, ka Mâ‐a vâ na bâ, na, Ba di mepeha, ba vahaka nganga; ndi kabo ba běkě: Mbu vaka ka ndiya bato bayamu, ndi kabo babe na, ba luwake melema.

18Beyokwedi bea Jân na bea Farisi ba ma diyakandi ba hindinaka njo jâkâ, ka bâ‐ba viya, ka bâ‐ba uwa Mâ, na, E lě nde ya beyokwedi bea Jân na bea Farisi be diyakě be hindinaka, ndi beâvě be hindine. 19Ka Jisus a vâ na bâ, na, Mbweyi j’ ubayi i ka yâlěte o hindina o ubâmbi u di na jâ? Ulingo ’muabu u di n‘ ubâmbi i ’bě na ngudi o hindina. 20Ndi hwi i vakandi j‘ ubayi i ka nângânwě bâ, nandi běngě ba hindinake o hwi tědině. 21O ’bě na moto a ka tumě epěhi y‘ unamba mua kya o ngâi ya vyo, vâkâna epěhi tě e hângâkwě ně e ka paděndi ya vyo, n‘ ibeku ja kena. 22O ’bě tepě na moto a vamakě ivě ja kya o mbute ja vyo, vâkâna ivě ja kya i ka tumbidi mbute na ivě ja hoviya, na mbute ja jongoliya: ndi ivě ja kya i vamakwěndi o mbute ja kya.

23O buhwa boa Iyâjâ, A diyakindi a tamwaka o meanga mea poti kakana; ka beyokwedi beaju bea yalě ibuka ja poti o bâ‐ba diyaki ba kěkě. 24Ka Farisi ba vâ na Ju, na, Yěněkěte, e lě nde abu e hakě, o buhwa boa Iyâjâ, e ha ibě hohonganěngo? 25Ka Mâ‐a vâ na bâ, na, O ha langeteni ka Devid a hakidi o mâ‐a diyakidi na mala, na mâ‐a yoka nja, na ba diyaki na ju? 26O mâ‐a kěkidi o ndabo ’a Anyambě o ’gombe ya Abaiethar prist eněně, ka mâ‐a ja pěmbě y‘ ilevudwě, e ha diyakidi hohonganěngo na a jaka kabo prist dipâ, ka mâ‐a vě tepě ba diyaki na ju. 27Ka Mâ‐a vâ na bâ, na, Iyâjâ i velakudwi moto, ndi hanga na moto nda velakudwě Iyâjâ. 28Vâkâna Mwana moto a ndi Upangiyi tepě mua Iyâjâ.

Currently Selected:

Mark 2: BNG1895

Highlight

Copy