Mark 3

1Ka Mâ‐a vala o tyâtyi ’abu epâkwě njo: moto a diyakind‘ omě a diyakidi enâ vivilaniyango. 2Ba ka běmběkě Mâ na ipě A ka yongi mâ o buhwa boa Iyâjâ, ovaně nd‘ o bâba ka hěnjě Mâ. 3Ka Mâ‐a vâ na momo tě a diyakidi enâ vivilaniyango, na, Těměkě o hanganě. 4Ka Mâ‐a vâ na bâ, na, E te hohonganěngo na o ha bwam‘ o hwi j‘ Iyâjâ, ipě o ha bobe? o yongě ’měnâ, ipě o weya? 5Ka bâ‐ba diya dâ. Ka Mâ‐a tamuwa bâ na ngambi, A yěněkě ngěbě o melema meabu mekolo, ka Mâ‐a vâ na momo, na, Hambakidě enâ ’vě. Ka mâ‐a hambidě: ka enâ ’aju ya timba upeha pani ka epâkwě. 6Ka Farisi ba puma, ka bâ‐ba paniya o vala o ’hoka na Herodian o pěl‘ ’aju, nyang‘ ’abu o ka weyaně Mâ.

7Ka Jisus a věngěmě na beyokwedi beaju na ’la o ’tima: ebumbu eněně e vitanakidi Mâ oviya Galili na Judia, 8na oviya Jěrusalěm na oviya Idumia, na o pělě ’pâkwě ya Jordan na ba Tair na Saidon, ebumbu ya bato eněně e vakind‘ o Mâ‐a jadi, o bâ‐ba yokakidi belombo beaju be hakidi beněně. 9Ka Mâ‐a kala na beyokwedi beaju, na, elende ehâlě e vengakidě Mâ, o banga ebumbu ya dibidě Mâ. 10Ikabojana a yongakiděndi bato baitě, ovaně nd‘ o bâ‐ba pinyilakidě o kupaně Mâ, tango e diyakidi na bebědi yehěpi. 11O malina mabe ma yěni Mâ, ma ka kwaka o boho boaju, ma ka yamaka, na, O Mwana ua Anyambě. 12Ka Mâ‐a languwa bâ, na, ba pangake Mâ‐a yowanakě.

13Ka Mâ‐a beta o ukodi, ka Mâ‐a ndiya ibaju ba vahakidi; ka bâ‐ba pâ o Mâ‐a jadi. 14Ka Mâ‐a kenjě jomu na babale, na ba diyaki na Ju, ovaně nd‘ o Mâ‐a ka lomě bâ ka pakwaniya, 15na bâ‐ba pahiya ngudi o yonganakě mebědi, na e pumanakě děvil: 16’Saimân uaju a vangakidě na Pitě; 17Jěms ja Zěbědi, na mwana nyangwě Jân na Jems, ibaju ba vangakidě, na, Boaněrjes, i weyaki, na Bana ba ngadi: 18na Andru, na Filip, na Bartholomiu, na Mathiu, na Thomas, na Jems ja Alfeus, na Thadius, 19na Saimân ya Kenan, na Judas Iskariot a kândâkiyi Mâ.

20Ka bâ‐ba ngiya o ndabo. Ka ebumbu ya lataniya pě epâkwě njo, ba diye na ngudi e jakě tombete na beja. 21O mbweyi jaju i yoki yâ, ka bâ‐ba vala ka bweya Mâ; ’kabojana ba vâki, na, A potwakandi. 22Ka balěndi ba vakiyedi o Jěrusalěm ba vâ, na, A na Biělzibub, A věngěkiděndi děvil na ngudi y‘ upolo mua děvil. 23Ka Mâ‐a ndiya bâ o Mâ‐a jadi, ka Mâ‐a vâ na bâ na mekanakâdi, na, Setani a lě a yâlâkě o věngidě Setani na‐e? 24Oningě ipangiya ja pěhě jâ mětě, ipangiya tědině ja yâlě o těmě. 25Oningě ndabo ya pěhě yâ mětě, ndabo těně ya yâlě o těmě. 26Ndi oningě Setan a yanaka na mâ mětě, a ndi pěhěngo, a yâlě o těmě, vâkâna a pândi ’huku. 27O ibě na moto a ka yâlě o ngiya o ndabo ya moto ukolo, na jongolidě jumba jaju, kabo a ta o kata moto ukolo katango, nandi běngě a jongolakidě ndabo ’aju. 28Pâkwěpâkwě Mbi vâki na inyěni, na, Mabe měhěpi ma te ma iyakudwě bana ba bato, n‘ ikila ja Anyambě nyang‘ ’abu e ka kilě yěhěpi; 29ndi a ka kilě Ilina Iyamu a ’yidwě, ndi a na mahihi ma yěkě ya ’gombe yěhěpi. 30Ikabojana ba vâki, na, A na ilina ibe.

31Nandi bana ba nyangwě na nyangwě ba vakindi, těměngo o bwebwe, ka bâ‐ba banda Mâ, ba ndakiya Mâ. 32Ebumbu e diyaki Mâ lungango, ka bâ‐ba vâ na Ju, na, Yěněkěteni, nyângwě na bana ba nyângwě ba vahakand‘ Âvě o bwebwe. 33Ka Mâ‐a vâ na bâ, na, Jaie lě nja, tombe na bana bina lě ba nja? 34Ka Mâ‐a hilě ba diyaki diye diye, ka Mâ‐a vâ, na, Yěněkěteni jaie na bana bina! 35Uěhěpi a ka hayě upango mua Anyambě, mâ nd‘ a di mwan‘ ina na jaie.

Currently Selected:

Mark 3: BNG1895

Highlight

Copy