Luk 8

1E diyakindi o mbuhwě mbuhwě, ka Mâ‐a ulwanidě mamboka na mabâkâ měhěpi, A kěkě A pakwanakiya na Mâ‐a levakidě sango ’a mbya ea ipangiya ja Anyambě: jomu na babale ba diyaki na Ju, 2bajo bâkâ, ba yongakudwě, malina mabe na bepulu, Meri a ma tubakwě, na, Magdelin, a věngěkudwě děvil hěmbwědi, 3na Joana mwad‘ ’a Tyusa yongo ’a Hěrod, na Susana, na bapâkwě baitě, ba ma hakiya Mâ na ngumb‘ ’abu.

4O bato baitě ba vakiyedi o mamboka měhěpi, ba latanakiyedi ta, ka Mâ‐a kaniya bâ ukanakâdi: 5Uliyi u kěkindi ka liya ibângâ jaju: o mâ‐a mwanjakidi, jâkâ i kwakindi o pěpěkě ’a njea; ka jâ‐ja pitwě, ka lonâni la oba la sâsâ jâ. 6Ka ipâkwě ja kwa o ilale; o jâ‐i kěkěkidi, ka jâ‐ja vivilaniya, ’kabojana i puhwanakindi tâ ea he. 7Ka ipâkwě ja kwa o hanganě ’a mekanda; ka jâ na mekanda bea kěkěnidě, ka jâ‐ja bweya kâlu. 8Ka ipâkwě ja kwa o mahě mayamu, ka jâ‐ja kěkě, ka jâ‐ja yěkěmě bebuma kama. O Mâ‐a vwi belombo těkabe, ka Mâ‐a yama, na, A di na matâ ma yokakě a yokake.

9Ka beyokwedi beaju bea uwa Mâ, na, Ukanakâdi těkamu u lě ovaně na e? 10Ka Mâ‐a vâ, na, Inyěni nd‘ o didini věwěngo iyowě ja mahâwě m‘ ipangiya ja Anyambě: ndi bapâkwě kabo na mekanakâdi; ovaně nd’ o boyěněkě ba yâlě o yěně, bo yokaka ba yâlě o bweyidě. 11Nd‘ ukanakâdi nd‘ ekamu: Ibângâ ndi ndaga ja Anyambě. 12Ba pěpěke ea njea, ndi ba yokakě; vâkâna děvil e vakandi, na eâ‐ea věngidě ndaga o melema meabu, na banga ba kamidě na bâ‐ba yonga. 13Ba ilale, ndi ba běkě yokango, ba pahiya ndaga na mbya; ba diye na metamba, ba kamakiděte ulingo uhâlě, o ’gombe e‘ iyějudwě ba kwa. 14I kwakidi o mekanda, ndi ba běkě yokango, ba ’la; na inaka na hika na upeyo mua eměnâ těkae be haki bâ kâlu, ba yěkěmě bebuma bea hânjâbiyěngo. 15Ndi ba mahe mayamu, ndi ba běki ndaga yokango n‘ ulema uyamu mua batango, bâ jâ tatango, ba ka yěkěměkě bebuma n‘ iyika.

16O ’bě na moto a běkě vitwa yoděngo, na mâ‐a diba viâ o eva, tombete a ngidě viâ ibomako j‘ ikondo; ndi a těkidi viâ o uhângâ, na ovaně nd‘ o ba ngakiyě ba ka yěně bwe. 17Ikabojana o ’bě na ’lombo e didi ikutakuta, e ka diyě e pumiye; tombete e didi ihâwě, e ka diyě e yowaně na eâ‐ea hamana. 18Bandamakiděni nyang‘ ’anyu e yokakě: a janidi, a ka věwěndi; a ha ’bě ně, a ka nângânwěndi tombe eaju e yěněněkě na a ndi duwango.

19Ka nyangwě na bana ba nyangwě ba viya o Mâ‐a jadi, ba diye na ngudi ’a bengiya o Mâ‐a jadi o pěl‘ ’a ebimba. 20Ka Mâ‐a langudwě, na, Nyângwě na bana ba nyângwě ba nd‘ uhěngě těmetěme, ba vahakand‘ o yěn‘ âvě. 21Ka Mâ yavwana bâ, na, Jaie na bana b‘ ina nd‘ ekaba ba yokakě ndaga ja Anyambě, na bâ‐ba haka jâ.

22E diyakind‘ o buhwa na bohuhu, ka Bâ na beyokwedi beaju ba vama o elende: ka Mâ‐a vâ na bâ, na, Ho jabwakeni o mwidi mua ’tima upâkwě. 23Ka bâ‐ba tindiya. O bâ‐ba diyaki ba tamwaka, ka Mâ‐a ya; ka ekudikudi e‘ upupě ea vunga o ’tima; ba diyakindi ba bě ti na miba, na bâ‐ba yěněkě mahihi. 24Ka bâ‐ba viya o Mâ‐a jadi, ka bâ‐ba ’mudě Mâ, na, Paia o, Paia o, ho jelindi. Ka Mâ‐a umuwa, ka Mâ‐a kandidě upupě na miba ma diyakidi ma bumbaka: ka beâ bea vâtâ, ka omě wa kwa uděmbě. 25Ka Mâ‐a vâ na bâ, na, Ikamidě janyu i l’ âve? Ba bangakindi ba ka mamaka, ba ka kalaka bâ mětě na bâ mětě, na, I lě nja jângâ ě ja moto ekadi! ’kabojana A sombiyakěte, tombete mepupě na miba, na beâ bea yokiyate Mâ.

26Ka bâ‐ba pâ o ehe ’a ba Gadara, e di banjaniděngo na Galili. 27O Mâ‐a hubakid‘ o he, ka moto ua mboka n‘ uhuhu, a diyaki na děvil uling‘ uyaba, a bâtâkâ ibâtâ, a diye o ndabo, kabo o malonga, a lata na Ju. 28O mâ‐a yěni Jisus, ka mâ‐a yama, ka mâ‐a kwa o boho boaju, ka mâ‐a kala na joi oba, na, Jisus, Mwan‘ ’a Anyambě e didi oba mětě, eahu na nâvě e lě na e? Mbi hâhâliděnd‘ âvě, o yěněkidě ’mba majili. 29Ikabojana a sombiyakiděndi ilin‘ ibe na i věngěměke o momo tě a jadi. Jambojana i ma bweyaki mâ njo iitě, a ma tatakwěndi kâmudwěngo mehinganakano na meboka; a bukaka meboka, děvil e valakidě mâ o nginga. 30Ka Jisus a uwa mâ, na, Dina jâv‘ i lě nja? Ka mâ‐a vâ, na, Lijân: ’kabojana děvil iitě i ngakiyendi o mâ‐a jadi. 31Ka bâ‐ba hâhâlidě Mâ na A sombiyake bâ na ba kěkě o ndiba ea hěl. 32Omě o diyaki na bokweya boa ngweya boněně bo jaka o ukodi: ka bâ‐ba hâhâlidě Mâ na A hulakidě bâ na ba kěkě o bwâ bo didi. Ka Mâ‐a kamidě. 33Ka děvil ja věngěmě o momo tě a jadi, ka jâ‐ja ngiya o ngweya: ka bokweya boa huba umbila umbâkâ o iboko via mbelenge o ’tima, ka jâ‐ja lâkâ. 34O ba jakidě jâ ba yěněki nyanga e hamidi, ka bâ‐ba kweya, ka bâ‐ba ’la ka languwa o mboka na o ’hiki. 35Ka bâ‐ba valanidě ka yeně nyanga e hamidi; ka bâ‐ba pâ o Jisus a jadi, ka bâ‐ba duwa momo tě, a věngěkudwě děvil, diyango o beko bea Jisus, bâtângo, n‘ ipikiliya jaju ja hohonganengo: ka bâ‐ba banga. 36Ba yěněkidi ba langwakiyi bâ nyanga ea a diyaki na děvil e yongakudwě. 37Jâ ndi ja ebimba eěhěpi ea ehe ’a ba Gadara ulwaniděngo ja hâhâlidě Mâ na A věngěměke o bâ‐ba jadi; ’kabojana jângâ ineně i bweyaki bâ: ka Mâ‐a vama o elende, na timba. 38Nandi momo tě, a pumakudwě děvil, a hâhâlâkidě Mâ na ovaně nd‘ o mâ‐a ka diyě na Ju: ndi Jisus a valakidi mâ, na, 39Timbaka o ndabo ’âvě mětě, oa levidě belombo běněně bea Anyambě be had‘ âvě. Ka mâ‐a vala, a kěkě a langwakiya o mboka eěhěpi belombo beněně bea Jisus be haki mâ.

40E diyakindi, o Jisus a timbidi, bato ba věhělěkidi Mâ na mbya; ’kabojana běhěpi ba diyakindi ba vengaka Mâ. 41Umbwakiyatě, momo dina na Jairus a vakind‘ o Mâ‐a jadi, a diyakidi upangiyi mua sinegâg; a kwakind‘ o beko bea Jisus, ka Mâ‐a hâhâlidě Mâ na A kěkě o ndabo ’aju: 42ikabojana a diyakite mwa mwajo umbâkâ pa, ba jomu na mepuma mebale utodu, a diyakindi bya o bowaka. Nd‘ o Mâ‐a diyakidi A kěkě ka bato ba pinyilidě Mâ.

43Ka mwajo a diyakidi na ulema mua makiya jomu na mepuma mebale, a makidě ibeaju be diyanakidi beěhěpi na nganga, a diye na ngudi o yonga na jehěpi, 44A viya o mbuhw‘’aju, ka mâ‐a kupaně imbunjě ja ngâi ’aju; ka ulema muaju mua makiya mu a lena. 45Ka Jisus a vâ, na, Nja kupaně ’Mba? O běhěpi ba hâhidi, ka Pitě na ba diyaki na ju ba vâ, na, Paia, ebimba e pinyilakid‘ âvě na eâ e palakě âvě, nd‘ o ka vâkâ, na, Nj‘ a kupaně ’Mba. 46Ka Jisus a vâ, na, Moto a kupani ’Mba; ’kabojana Mbi yěněki na ngudi e‘ iyonga ea pumandi o Umba‐mbi jadi. 47O mwajo a yěnidi na a ibě o kutama, ka Mâ‐a viya a likimaka, ka mâ‐a kwa o beko beaju, ka mâ‐a pakuwa tin‘ ’aju e ma kupaně Mâ o boho boa bato běhěpi, na nyang‘ ’aju e yongakidi o njo pâkâ. 48Ka Mâ‐a vâ na ju, na, Mwa mwajo, yěněkě mbya: ikamidě jâvě i yongiděnd‘ âvě; kěkě na jonga.

49O Mâ‐a diyakidi A kalaka, ka moto a viya oviya ndabo ’a upangiyi mua sinegâg, na vâ na ju, na, Mwan‘ ’âvě a wendi; o hake Uyokwidi njuke. 50O Jisus a yokidi, ka Mâ‐a yavwana mâ, na, O bangake: pagate o kamiděngě, vâkâna a yongindi. 51O Mâ‐a pâdi o ndabo, a ib‘ o ngakidě moto, kabo Pitě, na Jems, na Jân, na hangwě na nyangwě e‘ itângâ. 52Ka běhěpi ba diya o kwedi, ba eyaka mâ: nd‘ A vâki, na, O eyakeni; a ’bě wango, ndi a yakandi. 53Ka bâ‐ba věhě Mâ, yowěngo na a wendi. 54Ka Mâ‐a pumě bâ běhěpi, ka Mâ‐a bweya mâ o ’nâ, ka Mâ‐a ndiya mâ, na, Itângâ, umwaka. 55K‘ ilina jaju ja timba, ka mâ‐a hungana o ’muwa: ka Mâ‐a sombiyě na a věkwě beja. 56Ka hangwě na nyangwě ba mama: ndi A langwakiyi bâ na ba pakwake moto nyanga e ma hama.

Currently Selected:

Luk 8: BNG1895

Highlight

Copy