Luk 9

1Jâ ndi jaju ja ndiya jomu ja beyokwedi na beyokwedi beaju bebale o Mâ‐a jadi, ka Mâ‐a vě beâ ngudi n‘ ipangiya ja děvil jěhěpi, n‘ iyongě ja bebědi. 2Ka Mâ‐a loma bâ ka pakuwa ipangiya ja Anyambě, na ka yongě mebědi. 3Ka Mâ‐a vâ na bâ, na, O nângâkeni elombo ea ’kěndâ, tombete metumbe, tombe elandi ’a kola, tombe beja, tombe hika; o diyakeni tombe ngâi ibale. 4Ndabo ka ndabo eanyu e ka ngiyě, diyakani omě, o ka pumaka tepěni omě. 5A ka diyě a ngid‘ inyěni, o inyěni o ka věngěměni o mboka těně, pupwakani mahě ma beko beanyu o ilanguwa jabu. 6Ka bâ‐ba valanidě, ka bâ‐ba ulwanidě mamboka, ba pakwaka sango eyamu, ba yongakě o loboko lěhěpi.

7Ndi Hěrod titrak a yokakindi belombo beaju be hakidi: ka mâ‐a yěně njuke, ’kabojana bâkâ ba vâki, na, Jân a pumbuwendi oviya iwedo; 8bâkâ, na, Ilaias nd‘ a pumiyedi; na bepâkwě, na, usâki umbâkâ mua vyo u pumbuwi pě. 9Ka Hěrod a vâ, na, Jân nd‘ uamě a lenakidi ibâlu; nd‘ ekaně lě pě nja, uamě a yokakě belombo těkabe? Ka mâ‐a vaha o yěně Mâ.

10O metodu me timbidi, ka bâ‐ba languwa Mâ belombo beabu be ma ha beěhěpi. Ka Mâ‐a vala na bâ o pěpěkě ikutakuta, o iboko via nginga via mboka e tubakwě na Bětseda. 11O bato ba yowakidě, ka bâ‐ba vitaně Mâ: ka Mâ‐a věhělidě bâ, ka Mâ‐a kala na bâ o pělě e‘ ipangiya ja Anyambě, ka Mâ‐a yongě ba diyaki na mala m‘iyongwě. 12O buhwa bo diyaki bo ka hubakiya, ka jomu na babale ba viya o Mâ‐a jadi, ka bâ‐ba vâ, na, Valakidě ebimba, ovaně nd‘ o bâ‐ba ka valě o mamboka na ’hiki e didi ulwaniděngo, ka yěngidě, na ka vaha beja; ’kabojana ho nd‘ okava o iboko via nginga. 13Nd‘ A vâki na bâ, na, Inyěni věki bâ ni beja. Ka bâ‐ba vâ, na, Ho ’bě wa na membunda metano na bejaka bebale; kabo hwa vala ka hambiya bato těkaba běhěpi beja. 14Ikabojana ba diyakindi ba tâjěn itano ja bamo. Ka Mâ‐a vâ na beyokwedi beaju, na, Diyakidi bâ ni mabo matano njamba pâkâ. 15Ka bâ‐ba ha nonaně, ka bâ‐ba diyidě bâ běhěpi. 16Jâ ndi jaju ja nângâ membunda metano na bejaka bebale, o Mâ‐a bědi umbuwango oba, ka Mâ‐a vambiya beâ ibâtâ, ka Mâ‐a buka, ka Mâ‐a vě beyokwedi na ba těkidě o ebimba e jadi. 17Ka bâ‐ba janidě, ka bâ běhěpi ba vula: ka nguhu jabu i dikakidě ja tâludwě jomu na belinga bebale.

18E diyakindi o Mâ‐a diyakidi dipâ A kalakiya, beyokwedi beaju omě na Ju; ka Mâ‐a uwa bâ, na, Bebimba be vâkâ lě na Umba lě nja? 19Ba yavwanakindi, na, Jân Baptist; ndi bâkâ bâ, na, Ilaias; na bapâkwě bâ, na, Usâki umbâkâ mua vyo ndi u pumbuwi pě. 20Ka Mâ‐a vâ na bâ, na, Nd‘ o vâkâ li na Mbi lě nja? Ka Pitě a yavwana, na, Kraist ea Anyambě. 21Ka Mâ‐a kelevidě bâ, ka Mâ‐a sombiyě bâ na ba langwake moto elombo těně; 22na, Mwana moto a ka yěni belombo beitě, batodu na prist ja meolo na balěndi ba ka kiyi Mâ, a ka wěyudwěndi, na Mâ‐a pumbudwě o buhwa boa hwi ’lalo. 23Ka Mâ‐a vâ na bâ běhěpi, na, Oningě moto a panga o vitě ’Mba a hâhâkiye nyol‘ ’aju, na mâ‐a bapě krâs ’aju buhwa ka buhwa, na mâ‐a ka vilinganakě ’Mba. 24Ikabojana uěhěpi a ka tândě o yongě eměnâ ’aju a ka nyangi eâ: nd‘ a ka nyangě eměnâ ’aju o nyang‘ ’amě, mâ tepě a ka yongě eâ. 25Ikabojana moto a lě kovango nde, oningě a jeya he yěhěpi, na mâ‐a nyangě nyol‘ ’aju mětě, tombete a uhwě vě? 26A ka yokiyě ’Mba na ndaga jamě ihâni, mâ těpě ua Mwana moto a ka yokiyě ihâni, o Mâ‐a ka viyě n‘ ivenda jaju mětě, na ja Hangwě, na ja enjěl i didi holi. 27Ndi Mbi langwakiyandi inyěni ea mbambayě, o na bâkâ ba jadi okava těmetěme, ba ka diyě ba veke iwedo, kabo ba ta yěně ipangiya ja Anyambě.

28E diyakindi panika hwi logwambi oviya belombo těkabe, ka Mâ‐a nângâ Pitě na Jân na Jems, ka Mâ‐a beta o ukodi ka kaliya. 29Mâ t‘ ikaliya, ka boho boaju boa uluwa itingidi vipakwě, na ibâtâ jaju ja bě botano i panyaka. 30Umbwakiyate, bato babale ba ka kalaka na Mâ ovoně, ba diyakindi Mosěs na Ilaias: 31ba pumakiyedi n‘ ivenda, ba ka kalaka o pělě e‘ iwedo jaju i ka hânjâbidě o Jěrusalěm. 32Ndi Pitě na ba diyakidi na ju ba diyakindi ba bě mihâ bodilo na viyâ: o bâ‐ba umuwedi, ka bâ‐ba yěně ivěnda jaju, na bamo tě babale ba těměki na Ju. 33E diyakindi, o bâ‐ba věngěmidi o Mâ‐a jadi, ka Pitě a vâ na Jisus, na, Paia, e ndi bwamu na ho diyaka okava: ho longaka meâkâ melalo; umbâkâ umuâvě, umbâkâ mua Mosěs, na umbâkâ mua Ilaias: a yowě eaju e kalakidi. 34A kalakate ekabe, omě o diyakindi na evindi, ka eâ ea yambiya bâ: ka bâ‐ba banga o bâ‐ba ngakiyedi o evindi. 35Ka joyi ja oviya o evindi, na Mwan‘ ’amě a tândâkě nd‘ ekaně: yokakiyi Mâ ni. 36O joyi i tombidi, Jisus a duwanakiyete dipâ. Ka bâ‐ba kuta jâ, bu langwaka moto o hwi tědině belombo tě ibeabu be yěněkidi beně.

37E diyakindi, o buhwa bopâkwě, o bâ‐ba hubidi o ukodi ka ebimba eněně ea lata na Ju. 38Umbwakiyate, momo ua njamba a yamaka na, Uyokwidi, mbi hâhâliděnd‘ âvě, na umbwakiya ’mba mwan‘ ’amě ua momo; ’kabojana mbi te mâ mwana umbâkâ. 39Umbwakiyate, ilina i bweyingě mâ, na mâ‐a yamaka matota; i hunjaka mâ, a pumakě ivudi, i nyingaka mâ, manini ma na i věngěme bověngěměkě. 40K‘ umbamba hâhâlidě beyokwedi beâvě nana ba pumakě jâ; ndi ba yâlě. 41Ka Jisus a yavwana, na, E! igona ja belenganango, na ipuhwa j‘ ikamidě, Mbi ka diya lě n‘ inyěni nj‘ ulingo ě, n‘ Umba mba ’yika inyěni? Pâkiděngě mwan‘ ’âvě okava. 42A vakate, ka děvil ea bweya mâ ubondo, e ka hunjaka mâ. Ka Jisus a kandidě ilina tě ibe, ka Mâ‐a yongě mwana, ka Mâ‐a bweyidě mâ hangwě. 43Ka bâ běhěpi ba mama ngudi ea Anyambě ’něně.

O bâ běhěpi ba diyakidi ba mamaka belombo bea Jisus be hakidi beěhěpi, 44mâ na beyokwedi beaju, na, Ngakiděni ndaga těkadi o matâ manyu: ’kabojana Mwana moto a ka bweyudwěndi o benâ bea bato. 45Bu bweyakidě ndaga těkaně, e diyakindi kutamango o bâ‐ba jadi, nana ba yowakě yâ: ba bangakindi o uwa Mâ opěla ndaga těně.

46Ka usâju mwa betakindi o bâ‐ba jadi, na, a lě ndi nja a ka diyě boněně wa. 47Jisus a yowakiděte ipikiliya ja melema meabu, ka Mâ‐a nângâ etumbě, ka Mâ‐a tědě yâ o boho boaju. 48Ka Mâ‐a vâ na bâ, na, A ka věhělidě etumbě těkae o dina jamě a ka věhělidě ’Mba; a ka věhělidě ’Mba, a věhělěkiděndi a lomaki ’Mba: ’kabojana a di yěviyěngo wa o inyěni běhěpi, mâ tepě a ka diyě boněně.

49Ka Jân a yavwana ka mâ‐a vâ, na, Paia, ho yěněkindi umbâkâ a věngěkidě děvil na dina jâvě; ka hwě hwa kandidě mâ, ’kabojana a vitanakě hwě. 50Ka Jisus a vâ na ju, na, O kandakidě mâ: ’kabojana a ha hingaka na hwě a nd‘ o pěl‘ ’ahu.

51E diyakindi, o ’gombe e běki pângo eaju a ka ’mbaka o beta oba, ka Mâ‐a vongudě boho boaju n‘ ivala ja Jěrusalěm. 52Ka Mâ‐a loma metodu o boho boaju: ka bâ‐ba vala, ka bâ‐ba ngiya o mboka ea ba Sameria, ka kokě o pěl‘ ’aju. 53Bu věhělěkidě Mâ, ’kabojana boho boaju bo diyakindi ona A kěkě o Jěrusalěm. 54O beyokwedi beaju Jems na Jân ba yěnidi, ka bâ‐ba vâ, na, Upangiyi, o ka kamiděte ho sombiyakě veya na vi hubake oviya ’ba, na viâ via hinidě bâ, panika Ilaias a hakidi? 55Nd‘ a ulwakindi, ka Mâ‐a hěnjě bâ; ka Mâ‐a vâ, na, Oa ’wěni jângâ ja malina manyu ma jadi. 56Ikabojana Mwana moto au vaka ka weya beměnâ bea bato, ndi kabo ka yongě. Ka bâ‐ba ’la o ibâkâ ipâkwě.

57E diyakindi, o njea o bâ‐ba diyaki ba kěkě, ka moto n‘ uhuhu a vâ na Ju, na, Upangiyi, mbi ka vitěnd‘ âvě iboko viěhěpi i viâvě vi ka valě. 58Ka Jisus a vâ na ju, na, Mehingi me na mebana, na lonâni la oba na mumbu; ndi Mwana moto a ’bě n‘ iboko via nangidě molo. 59Ka Mâ‐a vâ n‘ upâkwě, na, Vitakě ’Mba. Nd‘ a vâki, na, Upangiyi, hulwakidě ’mba mbi t‘ o vala mbi tonge paia tongango. 60Jisus a vâki na ju, na, Bekengo be tongake bekengo beabu; ndi kěkě ka pakuwa ipangiya ja Anyambě. 61K‘ upâkwě a vâ pě, na, Upangiyi, mbi ka vitěnd‘ âvě, ndi mbi t‘ o vala ka yohaně ba did‘ o ahu o ndabo ’amě. 62Ka Jisus a vâ na ju, na, O ’bě na moto a běkě enâ ’aju kahiděngo o plau, a timbakě maběyi a bě ndi kokango n‘ ipangiya ja Anyambě.

Currently Selected:

Luk 9: BNG1895

Highlight

Copy