Luk 10

1O belombo těkabe be tombidi ka Upangiyi a pânâ pě bapâkwě mabo hěmbwědi, ka Mâ‐a loma bâ babale babale o boho boaju o mamboka n‘ iboko viěhěpi, i viaju vi ka valě. 2Ovaně nd‘ o Mâ‐a vâki na bâ, na, Pâkwěpâkwě juma i boněně, ndi bahayi ba nyěvâ: nandi kalakiyani Upangiyi mua juma, na A lomake bahayi o jum‘ ’aju. 3Kěkěteni: umbwakiyatěni, Mbi lomakandi inyěni ka bana ba medâmbě o hanganě ea njâ. 4O bapakěni elandi ea hika, tombe ea kola, tombe makogo; o homakeni moto o njea. 5Ndabo eanyu e ka ngiyě eěhěpi taka vâni, na, Jonga o ndabo těkaně. 6Oningě mwana ua jonga a diyet‘ omě, jonga janyu i himbake omě: oningě a diye, i timbakete inyěn‘ o jadi. 7Diyakateni o ndabo tě, o jakani o mâtâkâni belombo beabu be ka věyě: ’kabojana uhayi a weyango ivě jaju. O umwakani oviya ndabo pâkâ nala epâkwě. 8Mboka eěhěpi eanyu e ka betě, na bâ‐ba věhělidě inyěni, jakani belombo be těkudwě o boho boanyu: 9yongaki mebědi me did‘ omě, n‘ inyi na bâ, na, Ipangiya ja Anyambě i bakamindi o inyěni o jadi. 10Ndi mbok‘ ’anyu e ka betě eěhěpi, ba věhělidě inyěni, kěkěni uhěngě mua omě, oa vwi, na, 11Ho pupwakiyate inyěni, tombe na mahě ma mbok‘ ’anyu, ma di hwě natamango o beko: ndi yowakěni ekae pâkwěpâkwě, na ipangiya ja Anyambě i bakamindi o inyěni o jadi. 12Ndi Mbi vâki n‘ inyěni, na, o buhwa těboně tâmâkâ pě Sâdâm, na mboka těně. 13Maguga na nâvě, Koresin! maguga na nâvě, Bětseda! ’kabojana behavu beněně be di hawěngo inyěni, be jaka be hakudwě Tair na Saidân, te ba diyakindi ba uluwa, diyango na bangisi na jubu ovyo. 14Ndi tâmâkâ pě Tair na Saidân o buhwa boa yěkě, n‘ inyěni. 15Na nâvě, Kapěrnaum, o diyaki oa betudwě oba, o ka pukudwěndi o hěl. 16A yokakiyě inyěni a yokakiyi ’Mba; na a pějěkě inyěni a pějěki ’Mba; na a pějěkě ’Mba a pějěkěndi a lomaki ’Mba.

17Ka mabo hěmbwědi ba timba na mbya, na, Upangiyi, tombe na děvil i ma yokakiyi hwě o dina jâvě. 18Ka Mâ‐a vâ na bâ, na, Mbi ma hili Setan a kwaka oviya ’ba ona epělupělu. 19Umbwakiyateni, Mbi věndi inyěni ngudi e pitakě mbamba na makole, wa na ngudi yěhěpi ea ndoba; o ’bě na ’lombo e ka kokidě inyěni. 20Ndi o peyakeni na ekae, na malina ma ka yokakiyandi inyěni; ndi tâmâkâni o peya, nana mina manyu ma lěndwěngo oba.

21Iwěla tědině ndi ja Jisus i peyaki n‘ ilina, ka Mâ‐a vâ, na, Paia, Upangiyi mua oba na he, Mbi věkěnd‘ âvě akeva ka âvě o di kutiyango b‘ iyowě na ba bokeli belombo těkabe, na nâvě o ’ala ka salaka beâ mekěkě: e nonaně Paia; ’kabojana nonaně nd‘ o eâ e yěněněki bwam‘ o mihâ mâvě. 22Paia a ’Mba věngo belombo beěhěpi: o ’bě na moto a yowudě a di Mwana, kabo Hangwě; o ’bě tepě na moto a yowudě a di Hangwě, kabo Mwana, na ua Mwana a ka pangě o levidě. 23Ka Mâ‐a ’luwa o beyokwedi beaju be jadi, ka Mâ‐a vâ na bâ ikutakuta, na, Ibâtâ na mihâ ma yěněkě belombo beanyu be yěněkě: 24ikabojana Mbi langwakiyandi inyěni, na, basâki na mepolo meitě me vahakind‘ o yěně belombo tě ibeanyu be yěněkě ekabe, ndi bu yěněkě beâ; na o yoka ekabe, ndi bu yokaka.

25Umbwakiyate, upakuwi mua belekanako umbâkâ a těměkindi, ka mâ‐a yějiyě Mâ, na, Uyokwidi, mbi hake lě na ijiga ja eměnâ ea ’gombe eěhěpi? 26Ka Mâ‐a vâ na ju, na, E lě lěndwěngo o belekanako na? o langaka lě na e? 27Ka mâ‐a yavwana, na, Tândâkâ Upangiyi Anyambě ’âvě na ulema muâvě mu ěhěpi, n‘ ilina jâvě jěhěpi, na ngud‘ ’âvě eěhěpi, n‘ ipikiliya jâvě jěhěpi; na moto a bakakě na nâvě ka nyol‘ ’âvě mětě. 28Ka Mâ‐a vâ na ju, na, O yavwani hohonganěngo: o hangě ekae, vâkâna o yongindi. 29Ndi a vahaka o huwudě nyol‘ ’aju, ka mâ‐a vâ na Jisus, na, Ndi moto a bakakě n‘ umb‘ a lě nja? 30Ka Jisus a yavwana mâ, na, Moto n‘ uhuhu a diyakindi a hubaka oviya Jěrusalěm na ’la o Jěriko, ka mâ‐a lata na meibi, me patwaki mâ ngâi jaju, ka meâ mea luma mâ mavenge, ka meâ mea ’lanidě, dikango mâ piělě na bowaka. 31Ka prist pâka ea huba tepě na njea tě eâ vale vale; o mâ‐a yěni mâ, ka mâ‐a bambuwa o pěpěkě ’pâkwě. 32Ka ua Livai tepě, o mâ‐a diyakidi iboko tě, ka mâ‐a pâ ka yěně mâ, ka mâ‐a bambuwa o pěpěkě ’pâkwě. 33Ndi ua Sameria n‘ uhuhu, o mâ‐a kěkidi ekendâ ’aju, ka mâ‐a pâ o mâa jadi; o mâ‐a yeni mâ, ka mâ‐a yěniyě mâ ngěbě. 34Ka mâ‐a vala o mâ‐a jadi; ka mâ‐a kata mavenge maju, a hovakidě mavule n‘ ivě, ka mâ‐a diyidě mâ o tito ’aju mětě, ka mâ‐a vana mâ o ndabo ’a bangi, a ka bandamakidě mâ. 35Buhwa bwe, o mâ‐a diyakidi a kěkě, ka mâ‐a hoduwa fula ibale, ka mâ‐a vě jâ a duwě ndabo, ka mâ‐a vâ na ju, na, Bandamakidě mâ: mbi ka timbět‘ âvě, eâvě e ka pelidě wa, o umba‐mbi ka pâyě pě. 36Nandi, o balalo ekaba, nj‘ uâvě a piviyakě na, a diyakindi moto a bakakě na a lataki na meibi? 37Ka mâ‐a vâ, na, Mâ‐a hakiyi mâ kěngâ. Jâ ndi ja Jisus ja vâ na ju, na, Kěkě, na nâvě o ka haka tepě nyanga tě.

38E diyakindi, ba kěkěte, ka Mâ‐a ngiya o mboka ehâlě na ehuhu: ka mwajo n‘ uhuhu, dina na Martha, a věhělěkidi Mâ o ndabo ’aju. 39A diyakindi na iluku a tubakwě na Meri, a diyaki tepě o beko bea Jisus, a yokaka ndaga jaju. 40Ndi Martha a diyakindi a njěmbělěněkě n‘ iha, ka mâ‐a pâ o Mâ‐a jadi, ka mâ‐a vâ, na, Upangiyi, oa yěněk‘ isâlâ ka iluku jamě a diki ’mba na mbi hake dipâ? langwakiya mâ ovaně nd‘ o mâ‐a ka haně ’mba. 41Ka Jisus a yavwana ka Mâ‐a vâ na ju, na Martha, Martha, o nakakandi na nâvě o yěněkendi njuke na belombo beitě; 42ndi elombo eâkâ ndi e di na mala; Meri nd‘ a pânidi ngabo eyam‘, e ka měndě e nângânwě mâ.

Currently Selected:

Luk 10: BNG1895

Highlight

Copy