Luk 7

1O Mâ‐a madě ndaga jaju jěhěpi o matâ ma bato, ka Mâ‐a ngiya o Kapěrnaum.

2Uhayi mua sěnturiân pâkâ, u muaju mu a yěněkě jambo iněně, u diyakindi u běkě, piělě n‘ iwa. 3O mâ‐a yokidi o pělě ’a Jisus, ka mâ‐a loma batodu ba Jiu o Mâ‐a jadi, ka hâhâlidě Mâ na A vake ka yongě uhayi muaju. 4O bâ‐ba pâdi o Jisus a jadi, ba hâhâlâkidi Mâ nangudi, na, Uâvě a ka hayě ekae a weyango: 5ikabojana a tândâkândi etomb‘ ’ahu, na mâ‐a i hwě longiyango sinegâg. 6Kâ Jisus a vala na bâ. O Mâ‐a diyakidi a diye yaviděngo na ndabo, ka sěnturiân ea loma mboi o Mâ‐a jadi, ka mâ‐a vâ na ju, na, Upangiyi, o hake nyol‘ ’âvě njuke; ’kabojana mbi ’bě weyango na o pâkâ o ibomako j‘ unyuwa muamě: 7n‘ umba‐mbu pikiliya nyol‘ ’amě weyango na iviya o âvě o jadi: ndi kalaka ndaga pa, vâkâna mot‘ uamě a yongindi. 8Ikabojana mbi ndi momo a pangakudwě, n‘ umba‐mbi na sâjě i pangakiyě, mba vâ na ekaně, na, Kěkě, na mâ‐a ’la; n‘ upâkwě, na, Vaka, na mâ‐a viya; n‘ uhayi muamě, na, Haka ’kae, na mâ‐a ha. 9O Jisus a yokidi belombo těkabe, ka Mâ‐a mama na mâ, ka Mâ‐a ’luwa, ka Mâ‐a vâ na bato ba vitakidě Mâ, na, Mbi ’bě duwango ikamidě iněně kakana, tombete o Israěl. 10Ba lomakudwě, o bâ‐ba timbidi o ndabo, ka bâ‐ba kâbidě uhayi u diyakidi u běkě mâ‐a yonga.

11Bia bwe, ka Mâ‐a vala o mboka e tubakwě, na, Nen; beyokwedi beaju beitě be kěkindi na Ju, na bato baitě. 12O Mâ‐a diyakidi a bě baka na jâmbě j‘ ugomba mua mboka, umbwakiyate, ekengo ’a moto e pumanakwě, a diyakite mwana ua nyangwě dipâ, na nyangwě a diyaki tepě mwalika: bato ba mboka těně baitě ba diyaki na mâ. 13O Upangiyi a yěni mâ, ka Mâ‐a yěně mâ ngěbě, ka Mâ‐a vâ na ju, na, O eyake pě. 14Ka Mâ‐a pâ ka Mâ‐a kupaně ilala ja ’kengo: ka babapi ba těmě de. Ka Mâ‐a vâ, na, Iwanja, Mbi vâki na nâvě, na, Umwaka. 15Ka a diyaki wango a diya diya, a ka kalaka. 16Ka Mâ‐a bweyidě mâ nyangwě. Ka jângâ ja bweya běhěpi: ka bâ‐ba bendě Anyambě, na, Usâki uněně u pumiyendi o hwě ho jadi; na Anyambě a lumbiyi bato baju. 17Ka ilango těkadi ja hamana o Judia yěhěpi o pěl‘ ’aju, n‘ indendandenda těvině ulwaniděngo.

18Ka beyokwedi bea Jân bea languwa mâ belombo těkabe beěhěpi. 19Ka Jân a ndiya beyokwedi beaju bebale, ka mâ‐a loma beâ o Jisus a didi, na, Âvě ndi A vakě? ipě ho umbwakiyete upâkwě? 20O bamo tě ba pâdi o Mâ‐a jadi, ba vâki, na, Jân Baptist a ma lomi hwě o âvě o jadi, na, Âvě ndi A vakě? ipě ho umbwakiyeti upâkwě? 21A yongakiděndi iwěla tědině baitě oviya bebědi na bevuva, na malina mabe; ka Mâ‐a bumudě pâgu iitě mihâ. 22Jâ ndi ja Jisus ja yavwana bâ, na, Kěkěni, n‘ inyěni oa languwani Jân beanyu be yěnidi n‘ ibeanyu be yokidi; ka pâgu i yěněkě, bebokě be tamwaka, begâlani be yongakwě, poke i yokaka, bekengo be pumbwakudwě, na sango eyam‘ e pakwakudwě mekuge. 23Nd‘ ibâtâ, na, a ka diyě a kâbe n‘ Umba.

24O metodu mea Jân me validi, A yalakiděndi ikala na bato e pělě ’a Jân, na, O kěki lě ni o nginga ka yěně nde? Tuka e ninganakě n‘ upupě? 25Nd‘ o kěki lě ni ka yěně nde? Momo bâtângo ibâtâ ibâbu? Umbwakiyate, ba bâtâkě mabâtâ m‘ ivenda, na bâ‐ba diyaka n‘ ulunda, ba nd‘ o ndabo ja mepolo. 26Nd‘ o kěki lě ni ka yěně nde? Usâki? E, Mbi vâki n‘ inyěni na wa n‘ usâki. 27Ekaně ndi a di lěndwěngo, na,

Umbwakiyate, mbi lomindi utodu muamě o boho boâvě, ka kenjě njeya ’vě o boho boâvě.

28Ndi Mbi vâki n‘ inyěni, na, O ’bě na ba di jawěngo na bajo usâki u di boněně wa na Jân ja Baptist: nd‘ a di yeviyěngo o ipangiya ja Anyambě a boněně wa na ju. 29Ka bato běhěpi ba yokaki Mâ‐a kalaka, na bayoli pago, ba huwudě Anyambě, baptaiswěngo na baptisma ea Jân. 30Ndi Farisi na bayokwidi ba belekanako ba kiyakindi o pělě ’abu mětě upango mu‘ Anyambě, ba baptaiswě o Mâ‐a jadi. 31K‘ Upangiyi a vâ, na, Mbi kwanakidě lě okava bamo b‘ igona těkadi nde? ba kwanaka lě nde? 32Ba kwanakandi ba nděmbě o ihambanido diye diye, ba ndanakiya, na, Ho lângindi inyěni mabeka, nd‘ o yembeni; ho diyendi inyěni o jěbâ, nd‘ o eyeni. 33Ikabojana Jân Baptist a vakindi a je pěmbě a mâte ivě; n‘ inyěni mâ, na, A na děvil. 34Mwana moto a vakindi a jaka na Mâ‐a mâtâkâ; n‘ inyěni mâ, na, Umbwakiyate savulaka, n‘ umâti ivě, mbweyi ea bayoli ba pago na bato babe! 35Nd‘ iyowě i huwudwěngo na bana baju běhěpi.

36Ka Farisi pâkâ ea vaha na A jake na ju. Ka Mâ‐a ngiya o ndabo ’a Farisi, ka Mâ‐a diya o beja. 37Umbwakiyate mwajo, ua mboka tě, a diyakidi mot‘ ube, o mâ‐a yowudě na Jisus a ndi diya o beja o ndabo ’a Farisi, ka mâ‐a vana ukâbě mu‘ alabasta m‘ uyâmbâ, 38ka mâ‐a těmě o beko beaju o mbuhwa, a eyaka, a ka tukaka beko beaju na manyângâdiba, a titwaka beâ na howe ja molo muaju, a pyâpyâkâ matambi maju, a hakiya mâ uyâmbâ. 39O Farisi e ndakiyi Mâ e yěnidi, ka mâ‐a kala na nyol‘ ’aju mětě, na, Momo těkaně, a jaka na a nd‘ usâki, t‘ a yowuděte mwajo tě a kupanakě Mâ ekaně na nyang‘ ’aju e didi; ’kabojana a mot‘ ube. 40Ka Jisus a yavwana mâ, na, Saimân, Mbi na ’lombo e kalakě na nâvě. Ka mâ‐a vâ, na, Uyokwidi, kalaka. 41O diyaki na moto a diyaki banwani babale: umbâkâ nuwanango kama ja fula itano, upâkwě mabo matano. 42O bâ‐ba diyaki ba diye na ’lombo e věkě, a iyakidi bâ běhěpi o naně. Langwakiya ’Mba, oviya bâ babale, nj‘ a ka tândě mâ wa? 43Ka Saimân a yavwana Mâ, na, Mbi yebakiyi na uaju a iyakidě wa. Ka Mâ‐a vâ na ju, na, O ma yěkiděndi hohonganěngo. 44Ka Mâ‐a ’luwa o mwajo a didi, ka Mâ‐a vâ na Saimân, na, O yěněkěte mwajo těkaně? Mbi ma ngiyand‘ o ndabo ’âvě, ou vě ’Mba miba ma beko beamě: nd‘ a tukango beko beamě na manyângâdiba, a titwaka beâ na howe ja molo muaju. 45Ou pyâpyâ ’Mba: ndi mwajo těkaně, n‘ Umba na ngiya, a ha yâjete ipyâpyâ ja matambi mamě. 46Oa bu hiya molo muamě mavule: ndi mwajo těkaně a hiyango matambi mamě uyâmbâ. 47Ndi Mbi vâki na nâvě, na, Mabe maju ma di maitě, ma iyidwěndi; ’kabojana a tândâkândi wa: nd‘ a iyakudwě bohâlě, a tândâkândi bohâlě. 48Ka Mâ‐a vâ na ju, na, Mabe mâvě ma iyidwěnd‘ âvě. 49Ba diyaki ba jaka na Ju ba yalakiděndi o vâ na melema meabu, na, Nja ka ’yakidě pě mabe ekaně? 50Ka Mâ‐a vâ na mwajo, na, Ikamidě jâvě i yongiděnd‘ âvě; kěkě na jonga.

Currently Selected:

Luk 7: BNG1895

Highlight

Copy