Luk 6

1E diyakindi o buhwa bo‘ Iyâjâ ja mabale o ja boho i běki tombango; ka Mâ‐a tomba o meanga mea poti; ka beyokwedi beaju bea buka poti, ba ka jaka, ba hingilaka jâ o makadu mabu. 2Ka Farisi jâkâ ja vâ na bâ, na, E lě nd‘ eanyu e hakě e ha ibě hohonganěngo na o ha o hwi j‘ Iyâjâ? 3Ka Jisus a yavwana bâ, na, O ha langeteni tombete ekae, ea Devid e hakidi, o mâ na ba diyaki na ju ba yokaki nja; 4o mâ‐a ngakiyedi o ndabo ’a Anyambě, ka mâ‐a ja pěmbě e‘ ilevudwě, ka mâ‐a vě tepě ba diyaki na ju; e ha diyaki hohonganěngo na mâ‐a jaka kabo prist dipâ? 5Ka Mâ‐a vâ na bâ, na, Mwana moto a tepě Upangiyi mua buhwa bo‘ Iyâjâ.

6E diyakindi tepě o buhwa bo‘ Iyâjâ bopâkwě, ka Mâ‐a ngiya o sinegâg ka Mâ‐a yokudě: omě o diyaki na momo a diyakidi enâ eyomi vivilaniyango. 7Ka balěndi na Farisi ba běmbě Mâ, n‘ ipě A ka yongěte o buhwa bo‘ Iyâjâ; na ovaně nd‘ o bâ‐ba ka pahiyě ponda o Mâ‐a jadi. 8Nd‘ a diyakite yowěngo ipikiliya jabu, ka Mâ‐a vâ na momo a diyakid‘ enâ vivilaniyango, na, Umwaka, na nâvě oa těmě o hanganě. Ka mâ‐a umuwa ka mâ‐a těmě. 9Ka Jisus a vâ na bâ, na, Mbi ka uwandi inyěni elombo; E te hohonganěngo na o ha bwam‘ o buhwa bo‘ Iyâjâ, ipě o ha bobe? o yongě ’měnâ ipě o weya eâ? 10Ka Mâ‐a umbuwa bâ běhěpi, ka Mâ‐a vâ na momo tě, na, Hambakidě enâ ’âvě. Ka mâ‐a ha nonaně: ka enâ ’aju ya timba upeha ka epakwě. 11Ka bâ‐ba londa na jeku iitě; ba ka tingaka bâ mětě na bâ mětě nyang‘ ’abu e ka hayě Jisus.

12E diyakindi o hwi tědině, ka Mâ‐a vala o ukodi ka kaliya ka Mâ‐a diya o ikaliya ja Anyambě bulu bohuhu. 13O mu diyaki mu‐a bě mwehe, ka Mâ‐a ndiya beyokwedi beaju: ka Mâ‐a pânâ omě jomu na babale, ibaju ba vangakidě, na, metodu; 14Saimân, uaju A vangakidě pě, na, Pitě, na mwana nyangwě Andru, Jems na Jân, Filip na Batâlomiu, 15Matiu na Tâmas, Jems ja Alfius, na Saimân a ma tubakwě, na, Silotěs, 16na Judas mwana nyangwě na Jems, na Judas Iskariât, a diyakidi tepě ukândi. 17Ka Mâ‐a huba na bâ, ka Mâ‐a těmě o itaba, na ndumba ea beyokwedi beaju, na ebimba ea bato eněně e vakiyedi o Judia eěhěpi na Jěrusalěm, na oviya betěbě bea Tair na Saidân, ka yoka Mâ na ka yongwě bebědi beabu; 18na ba ma yěněkě njuke na malina mabe: ka bâ‐ba yongwě. 19Ka ebimba eěhěpi ya vaha o kupaně Mâ: ’kabojana ngudi e vakiyendi o Mâ‐a jadi, ka eâ‐ea yongě bâ běhěpi.

20Ka Mâ‐a betaně beyokwedi beaju mihâ, na, Ibâtâ, n‘ inyěni banyamani ’kabojana ipangiya ja Anyambě i ndi janyu. 21Ibâtâ n‘ inyěni ba yokakě nja pâni: ’kabojana o ka vulandini. Ibâtâ n‘ inyěni be eyakě pâni: ’kabojana o ka yândini. 22Ibâtâ n‘ inyěni, oningě bato ba lonaka inyěni, na bâ‐ba palwakidě inyěni o njamba jabu, na bâ‐ba kilaka inyěni, na bâ‐ba ka uhwaka dina janyu pani ka i ndi bobe, o pělě ’a Mwana moto. 23Peyakani o buhwa těboně, n‘ inyěni o ka sodaki na mbya: ’kabojana, hilakěteni mahomano manyu ma nd‘ o kena oba: ’kabojana bahangwě babu ba ma hakate basâki ihadi tě. 24Ndi maguga n‘ inyěni ba di kenango! ’kabojana o pahiyendini mbya ’anyu. 25Maguga n‘ inyěni ba di vulango! ’kabojana o ka yokandini nja. Maguga n‘ inyěni ba yâkě pâni! ’kabojana o ka yěněndi ngěbě n‘ inyěni o ka eyakani. 26Maguga n‘ inyěni, oningě bato běhěpi ba kalaka inyěni bwamu! ’kabojana bahangwě babu ba haki basâki ba menoki nonaně.

27Ndi Mbi vâki n‘ inyěni ba yokake’, na, Tândâkâni baloni banyu, hakani ba binak‘ inyěni bwamu. 28Vambakiyani ba hâkâkě inyěni ibâtâ, n‘ inyěni o ka kalakiyani o pělě ’a ba ngongolakid‘ inyěni. 29Na a ka bweye âvě ibuku jâkâ věkě mâ ipakwě; a ka patuwě koto ’avě o kandakidě tepě mâ inângâ ja ngâi ’âvě. 30Věkě a jombakě âvě uěhěpi; a ka patuwě belombo beâvě o uwake pě beâ. 31K‘ inyěni o ka vahě bato ba hak‘ inyěni, haka tepě bâ ni nyanga tě. 32Nd‘ oningě o tândâkâni ba tândâk‘ inyěni, o li na nja akeva? ’kabojana bato babe ba tândâkâte ba tândâkě bâ. 33Nd‘ oningě o nyěvěkiyěni ba nyěvěkiyě inyěni, o li na nja akeva? ’kabojana bato babe ba hakate nyanga tě. 34Nd‘ oningě o věkěni ibanyu ba pitakidě na ba ka timběndi, o li na nja akeva? ’kabojana bato babe ba věkě tepě bato babe, na ovaně nd‘ o bâ‐ba ka pahiyě pě nyanga tě. 35Ndi tândâkâni ndoba janyu, nyěvěněkiyěni, věněkěni, o pitidě pě ni elombo; vâkâna mahomano manyu ma ka kenandi, n‘ inyěni o ka diyandini bana ba Ua Oba: ’kabojana A ndi kěngâ na bato babe na bâ‐ba ha věkě Mâ akeva. 36Diyakani tepě na ngěbě, ka Hângw‘ ’anyu A di na ngěbě. 37O yěkěněkiděni, vâkâna oa yěkudweni: o kwehanakěni, vâkâna oa kwehwěni: iyanakiděni, vâkâna o ’yidwěndini. 38Věkěni, vâkâna o věwudwěndini; eyějâ eyamu, e bandakwě, na e ninganakwě, na eâ e hovakiya, ndi eabu e ka věyě o ngonga janyu. Ikabojana eyějâ eanyu e yějěněkě eâ tepě eanyu e ka yějěnwě.

39Ka Mâ‐a kaniya bâ ukanakâdi, na; Pâgu e ka tumbwanate pâgu? bâ babale ba kwe o mbela? 40Eyokwedi a ’bě wa n‘ uyokwidi muaju, ndi uěhěpi a di hânjâbiyěngo a ka diyi k‘ uyokwidi muaju. 41E lě nd‘ eâvě e ’mbwakiyě uhâmbâ u jadi o dihâ ja mwana‐nyângwě, nd‘ o hilě ukâkâ u jadi o dihâ jâvě mětě. 42Nd‘ o lě o vâkâ na mwana nyângwě, na, Mwan‘ ina, ta ha, mbi věngid‘ uhâmbâ u jadi âvě o dihâ, nd‘ âvě mětě o hilě ukâkâ u jadi ijâvě dihâ? Âvě unoki, ta věngidě ukâkâ u jadi o dihâ jâvě, vâkâna o yěnindi bwe o ivěngidě j‘ uhâmbâ u jadi o dihâ ja mwana nyângwě. 43Ikabojana ele eyam‘ ea lângâkâ bebuma bebe; na ele ebe ’a lângâkâ bebuma beyamu. 44Ikabojana ele eěhěpi e yowanakěndi na bebuma beaju mětě. Ikabojana bato ba pataka fig o mbângě, na bâ‐ba pataka ivě o bombela. 45Mot‘ uyamu o ngumba eyam‘ e‘ ulema muaju a pumakěndi belombo beyamu; na mot‘ ube o ngumba ebe e‘ ulema muaju a pumakěndi belombo bebe: ’kabojana o bwinge bo‘ ulema ndi bo‘ udumbu muaju u kalakě.

46Nd‘ e lě nd‘ eanyu e tubakě ’Mba, na, Upangiyi, Upangiyi, o hayeni belombo beamě be vâkě? 47Mbi ka leviděndi inyěni, a vakě o ’Mba‐mbi jadi, a yokaka ndaga jamě, na mâ‐a haka jâ, ka mâ‐a kwanakě: 48A kwanakandi momo a longakě ndabo, a ’la ka tonga dângěngo, na mâ‐a ’la ka yalě o ilale: o tonda e pâdi, na miba ma viya ka kumbiya o ndabo těně nangudi, e diye na ngudi o hoka; ’kabojana e kâmâmâkindi o ilale. 49Nd‘ a yokakě, na mâ‐a haye, a kwanaki momo a longakidi ndabo o he oba e diye na jali; ea miba e kumbakiyedi na ngudi, ka eâ ea hungana o kwa; n‘ ibuluwa ja ndabo těně i diyakindi iněně.

Currently Selected:

Luk 6: BNG1895

Highlight

Copy