Luk 5

1E diyakindi, o bato ba pinyilakidě Mâ o iyoka ja ndaga ja Anyambě, ka Mâ‐a těmě o manga ma Jěněsarět, 2Ka Mâ‐a yěně belende bebale o manga kubu: bahombwedi ba diyakindi ba huba, ba tukaka belâba beabu. 3Ka Mâ‐a vama o elende eâkâ, e diyakidi ea Saimân, ka Mâ‐a hâhâlidě mâ na a jěnjuwěkidě na he kwěi. Ka Mâ‐a diya diya, ka Mâ‐a yokudě bato o elende. 4O Mâ‐a mad‘ ikala, ka Mâ‐a vâ na Saimân, na, Jěnjuwěkidě na ’la ndiba, oa huběni belâba beanyu uhombo. 5Ka Saimân a yavwana Mâ, na, Paia, ho janjango bulu těkabo boěhěpi, ho bweyidě elombo: nd‘ Âvě o ma vâ, mbi ka huběte elâba. 6O bâ‐ba hi nonaně, ba dibakiděndi ikinda ja bejaka iněně: elâba e ka nyakiya. 7Ka bâ‐ba pěpidě ibabu ba njamba, ba diyakidi o elende epâkwě, na ba vake ka hana bâ. Ka bâ‐ba viya, ka bâ‐ba londě belende beěhěpi bebale, be ka ’mbaka o hinga. 8O Saimân Pitě a yěnidi, ka mâ‐a kwa o beko bea Jisus, na, O Upangiyi, věngěměkě o ’mba‐mbi jadi; ’kabojana mbi mot‘ ube. 9Ikabojana mâ, n‘ ibaju ba diyanakidi, ba mamakindi o ikinda ja bejaka i jabu i weyakidi: 10yâ nyanga tě te ya Jems, na Jân, bana ba Sěbidi, ba diyakidi na Saimân o njamba. Ka Jisus a vâ na Saimân, na, O bangake; o ka bweyi bato oviya egombe těkae. 11O bâ‐ba pâdě belende beabu o he, ba dikakindi beěhěpi, na vitakě Mâ.

12E diyakindi, o Mâ‐a diyakidi o mboka n‘ ehuhu, umbwakiyate moto a diyaki na egâlani ti; a yěněkětě Jisus ka mâ‐a kwa o boho boaju, ka mâ‐a hâhâlidě Mâ, na, Upangiyi, oningě oa panga, o te na ngudi e yongakě ’mba. 13Ka Mâ‐a hambidě enâ ’aju, ka Mâ‐a kupaně mâ, na, Mbi pangindi: yongaka. Ka egâlani ya věngěmě o mâ‐a jadi o njo pâkâ. 14Ka Mâ‐a sombiyě mâ, na, a langwake moto: ndi kěkě, na nâvě oa levidě nyol‘ ’âvě prist, oa vě opěla iyongwě jâvě, ka Mosěs a sombiyakidě, ka tali o bâ‐ba jadi. 15Ndi kum‘ ’aju e hamanaki pě n‘ iněně: ka bebimba beněně bea yolaně ka yoka, na ka yongwě bebědi beabu o Mâ‐a jadi. 16Ka Mâ‐a timbiya o nginga, ka Mâ‐a kaliya.

17E diyakindi, o buhwa na bohuhu, o Mâ‐a diyakidi a yokwakidě, ka Farisi na bayokwidi ba belekanako ba vakiyedi o mboka ja Galili, na Judia, na Jěrusalěm jěhěpi, bâ diya diya: ngudi y‘ Upangiyi e diyakindi omě iyongě jabu. 18Umbwakiyate, bato ba vanakindi momo a diyakidi na ebědi ’a nyolo limbelimbe o ikondo: ka bâ‐ba vaha pělě e ngakidě mâ, ka nangidě mâ o boho boaju. 19O bâ‐ba diyakidi ba diye na ngudi e pahakiyě pělě ’a ngidě mâ ’kabojana ebimba, ka bâ‐ba beta o ndabo oba, ka bâ‐ba hubě mâ o unyuwa na enangi o boho boa Jisus. 20O Mâ‐a yěnidi ikamidě jabu, ka Mâ‐a vâ na ju, na, Momo, mabe mâvě ma ’yidwěnd‘ âvě. 21Ka balěndi na Farisi ba yalě ipikiliya, na, Nj‘ a kilakě Anyambě ekaně? Nja ka ’yidě mabe, hanga Anyambě dipâ? 22O Jisus a yowakidě mapikiliya mabu ka Mâ‐a yavwana bâ, na, O pikilakiya li nde o melema meanyu? 23Eve lě e di bobâbu wa, na o vâ na, Mabe mâvě ma ’yidwěnd‘ âvě; ipě o vâ, na, Umwaka, oa tamuwa? 24Ovaně nd‘ inyěni o ka yowě na Mwana moto A na ngudi o he e iyakidi bobe, (ka Mâ‐a vâ n‘ ubědi mua nyolo limbelimbe, na,) Mbi vâki na nâvě, na, Umwaka, na nâvě oa nângâ enangi ’âvě, oa vala o ndabo ’âvě. 25Ka mâ‐a ’muwa o njo pâkâ o boho boabu, ka mâ‐a nângâ eaju e nangakiyedi, ka mâ‐a vala o ndabo ’aju mětě, a kěkě a bendakě Anyambě. 26Ka bâ běhěpi ba mama, ka bâ‐ba bendě Anyambě, londango na jângâ, na, Ho yěněngo belombo be mamanakwě o buhwa.

27O ekabe be diyakidi bea maya A kěkindi, ka Mâ‐a yěně uyoli pago, dina na Livai, diyango o inângânido via pago: ka Mâ‐a vâ na ju, na, Vitakě ’Mba. 28Ka mâ‐a dika beěhěpi, ka mâ‐a ’muwa, na vitě Mâ.

29Ka Livai a hadě Mâ isango iněně o ndabo ’aju mětě: omě o diyakindi na ndumba ea bayoli pago na bapâkwě ba diyaki diya o beja na bâ. 30Ndi balěndi babu na Farisi ba hâkâlânâkiyendi na beyokwedi beaju, na, E lě nd‘ eanyu e jakě n‘ inyěni o mâtâkâni na bayoli pago na bato babe? 31Ka Jisus a yavwana bâ, na, Ba di mepeha ba vahaka nganga; kabo ba běkě. 32Mbu vaka ka ndiya bato bayamu, kabo babe, o iluwa ja melema.

33Ka bâ‐ba vâ na Ju; na, E lě nde ’a beyokwedi bea Jân e hindinake njo iitě, na bâ‐ba haka makaliya, eâ nyanga tě ’a bea Farisi; ndi ibeâvě be jaka be mâtâkâ? 34Ka Mâ‐a vâ na bâ, na, O t‘ o pangakani ba ilika vi‘ ubâmbi ba hindinaka ulingo mu‘ ubayi u di na bâ? 35Ndi hwi i vakandi, j‘ ubayi u ka nângânwě bâ, běngě ba hindinake o hwi tědině. 36Ka Mâ‐a kaniya bâ ukanakâdi, na; O ’bě na moto a vamakě epěhi e‘ unamba uyânâ o unamba mua vyo; oningě a hangě, vâkânâ uyânâ u nyakiyandi, na epěhi tě e nângâkwě o mua kya ea hohonganakě na mua vyo. 37O ’bě na moto a vamakě ivě ja kya o mbute ea vyo; o banga ivě ja kya ja tumba mbute, na jâ‐ja hoviya, na mbute ja umbaniya. 38Ndi ivě ja kya i vamakwěndi o mbute ja kya; vâkâna beěhěpi be tatudwěndi. 39O ’bě na moto a běki ivě ja vyo mâtângo na mâ‐a ka vahaka pě ja kya o njo tě ea pâkâ; ’kabojana a vâki na ja vyo i bwamu wa.

Currently Selected:

Luk 5: BNG1895

Highlight

Copy