Luk 4
4
1Ka Jisus a viya oviya Jâdan londango na Ilina Iyamu, ka Mâ‐a valanwě na Ilina o nginga, 2a diyakindi mabo ma hwi manai A yějěkudwě na děvil. A jaka o hwi tědině: o jâ‐i makiyedi, ka Mâ‐a yoka nja. 3Ka děvil ya vâ na Ju, na, Oningě na o Mwana ua Anyambě, sombiyakě ilale těkadi na i diyake beja. 4Ka Jisus a yavwana mâ, na, E lěndwěngo, na, Moto a diye kabo na beja pa, ndi tepě na ndaga ya Anyambě eěhěpi. 5Ka děvil ya betana Mâ o ukodi mu‘ udomba, ka yâ‐ya levidě Mâ mapangiya ma he měhěpi o vililingo vihâlě. 6Ka děvil ya vâ na Ju, na, Ngudi těkaně eěhěpi n‘ ivenda jabu, nd‘ ibeamě be ka vě âvě: ’kabojana be věwěngo ’mba; na moto uěhěpi uamě a ka pangě o vě beâ, mba vě. 7Oningě o bâbingě o kaliya ’mba, vâkâna beěhěpi be ka diyandi bea bě ibeâvě. 8Ka Jisus a yavwana, ka Mâ‐a vâ na ju, na, Věngěměkě ’Mba mbuhwa, Setan, ’kabojana e lěndwěngo, na, Kalakiya Upangiyi Anyambě ’âvě, o ka dilakě Mâ dipâ. 9Ka mâ‐a pâdě Mâ o Jěrusalěm, ka mâ‐a tědě Mâ o hâkâ ya těmpěl, ka mâ‐a vâ na Ju, na, Oningě na o Mwana ua Anyambě pukwaka oviya ovaně: 10Ikabojana e lěndwěngo, na,
A ka sombiyěndi enjěl jaju n‘ i tatake âvě:
11Na jâ i ka huka nd‘ âvě o benâ beabu, o banga egombe te ’gombe oa tudiya eko o ilale.
12Jisus a yavwanakindi ka Mâ‐a vâ na ju, na, E vânwěngo, na, O yějěkiye Jěhova Anyambě ’âvě.
13O děvil e diyaki ya madě iyějiyě jěhěpi, ka yâ ya dika Mâ ukili.
14Ka Jisus a timba o Galili na ngudi y‘ Ilina: ka kum‘ ’aju ya hamana indendandenda těvině viěhěpi. 15Ka Mâ‐a yokudě o sinegâg jabu, běhěpi ba bendakě Mâ.
16Ka Mâ‐a pâ o Nasarět, o Mâ‐a tombwakidi: na hohonganěngo n‘ ihadi viaju vi diyakidi, A ngakiyendi o sinegâg o buhwa bo‘ Iyâjâ, ka Mâ‐a těmě o ilanga. 17Ka ejanganangobo ya usâki Iseas ya bweyudwě Mâ. O Mâ‐a běkidi ejanganangobo bumuděngo, A duwakindi iboko vi diyaki lěndwěngo, na,
18Ilina ja Jěhova i n‘ umba, ’kabojana a i ’mba hoviděngo mavulě ka pakuwa mekuge sango eyam‘; a i ’mba lomango ka yongě ba melema, bukiyango, ka pakuwa mbwedi ihuludwě, ka timbě pâgu mihâ, ka huludě ba di nyingiyango,
19Ka pakuwa upuma u věhělěkudwě mua Jěhova.
20Ka Mâ‐a diba ejanganangobo, ka Mâ‐a timbě yâ yongo, ka Mâ‐a diya diya. Ka mihâ ma ba diyakidi o sinegâg běhěpi ma vonguwa o Mâ‐a jadi. 21Ka mâ‐a yalě o vâ na bâ, na, Buhwa těkabo ndi boa ilěndě těkadi bo hohonganidě o matâ manyu. 22Ka bâ běhěpi ba languwa o pěl‘ aju, ba ka mamaka ndaga ja ’hekwě i pumakidi o udumbu muaju. Ka bâ ba vâ, na, A ’bě mwan‘ ’a Josěf ekaně? 23Ka Mâ‐a vâ na bâ, na, O ka kaniyandi ’Mba ni ukanakâdi těkamu mbambayě, Nganga, yongakě nyol‘ ’âvě: ibeahu be di yokango na be di hamango o Kapěrnaum, haka tepě beâ okava o ehe ’âvě. 24Ka Mâ‐a vâ, na, pâkwěpâkwě Mbi vâki n‘ inyěni, na, Usâki a věhělěkudwě o ’hiki ’aju mětě. 25Ndi Mbi langwakiyandi inyěni mbambaě, mealika meitě me diyakite o Israěl o hwi ja Ilaias, o oba e diyakidi dibamango mepuma melalo na ngândě utoba, o nja ’ně‐ně e diyakidi o ’hiki yěhěpi; 26ndi Ilaias à lomakwě o bâ‐ba jadi, kabo o Sarěpta, mboka ya Saidân, o mwajo a diyaki mualika a jadi. 27Na begâlani beitě be diyakidi o Israěl o ’gombe ya usâki Ilisius; bu yongaka n‘ umbâkâ, kabo Neman ua Siria. 28Ba diyakidi o sinegâg běhěpi, ba londakindi na jeku, o bâ‐ba yokakidi belombo těkabe, 29Ka bâ‐ba ’muwa, ka bâ‐ba tindiya Mâ o mboka o bwebwe, ka bâ‐ba valana Mâ o matângě m‘ ukodi mua mboka ’abu e longakudwě, na ovaně nd‘ o bâ‐ba ka tindiyě Mâ o he molo na he. 30Nd‘ A tombakind‘ o hanganě ’abu, ka Mâ‐a vala pělě na eaju.
31Ka Mâ‐a huba o Kapěrnaum, mboka ya Galili, ka Mâ‐a yokudě bâ o hwi j‘ Iyâjâ. 32Ka bâ‐ba mama iyokwanidě viaju: ’kabojana ndaga ’aju e diyaki na ngudi. 33O sinegâg o diyaki na momo, a diyakidi n‘ ilina ja děvil ibe, ka mâ‐a yama joyi oba, 34na, dikaka hwě mbwe Jisus ya Nasarět, ho lě na nâvě nande? O ma viyi ka weya hwě? Mbi yowudět‘ âvě; âvě nd‘ Umbâkâ ua Anyambě ua Hole. 35Ka Jisus a kandidě mâ, na, Diyaka dâ, na nâvě oa puma o mâ‐a jadi. O děvil e bi mâ yanguwango o hanganě, e věngěměkind‘ o mâ‐a jadi, e yokidě mâ mehiyo. 36Ka bâ běhěpi ba mama, ba ka kalaka bâ mětě na bâ mětě, na, E, lě nja ndaga ekaně! ’kabojana a sombiyakěndi malina mabe n‘ ipangiya na ngudi, na mâ‐ma věngěmě. 37Ka kum‘ ’aju ya vala iboko viěhěpi via ’hiki těně ulwaniděngo.
38Ka mâ‐a ’muwa o sinegâg, ka mâ‐a ngiya o ndabo ’a Saimân. Ka nyangwě ya mwad‘ ’a Saimân a bweywě n‘ ivěvu iněně; ka bâ‐ba hâhâlidě Mâ o pěl‘ ’aju. 39Ka Mâ‐a těmě baka na ju, ka Mâ‐a kandidě ivěvu; ka jâ ja dika mâ: ka mâ‐a ’muwa o penjě pâkâ na mâ‐a haya bâ.
40Nandi o joba i diyakidi i ka kweya kiya, ba diyakidi na mebědi meal bebědi bea mangâ maitě běhěpi ba vanaki meâ o Mâ‐a jadi; ka Mâ‐a kahidě benâ beaju o meâ mea jadi meěhěpi, ka Mâ‐a yongě bâ. 41Ka děvil ja věngěmě o baitě ba jadi, i yamaka, na, Avě ndi Kraist Mwan‘ ’a Anyambě. Ka Mâ‐a kandidě jâ, À bâbâkâ jâ i kalaka: ’kabojana i yowakidi na Mâ ndi Kraist.
42O mâ diyaki mu a bě mwehe, a umwakindi ka Mâ‐a vala o iboko via ikutakuta: ka bato ba vaha Mâ, ka bâ‐ba pâ o Mâ‐a jadi, ka bâ‐ba himbidě Mâ, na a dikakě bâ. 43Ka Mâ‐a vâ na bâ, na, Mbi kalakiye ipangiya ja Anyambě o mamboka mapâkwě tepě: ’kabojana yâ ndi eamě e lomanakudwě.
44Ka Mâ‐a kaliya o sinegâg ja Galili.
Currently Selected:
Luk 4: BNG1895
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1895.
