Marika 7

Sa vunauci ira na tisaipeli i Jisu ko ira na Farisi, a sa vunauci ira na Farisi ko Jisu, 1-13. A veika era ca dina kina na tamata, 14-23. Sa Vakabula e dua na gonealewa ko Jisu, 24-30. Sa vakabula e dua sa didivara, ka kaka, 31-37.

1SA qai soqoni vata vua ko ira na Farisi, kei na vu-ni-vola e so, era sa lako mai Jerusalemi. 2Ia ni ra sa raica na nona tisaipeli e so ni ra sa kana ni sa dukadukali na ligadra, a ya sa sega ni vuluvulu oti, era sa vakaucacataka. 3Ia ko ira na Farisi, kei ira kecega na kai Jutia, era sa sega ni kana ni ra sa sega ni vuluvulu vinaka mada, ni ra sa vakabauta na nodrai vakavuvuli na qase. 4Ia ni ra sa tale mai na veivoli, era sa vuluvulu mada, a ra sa qai kana. A sa vuqa tale na ka tani era sa taura me vakabauta, na sava na veibilo ni gunu, kei na veibilo i vakarau, kei na veibilo parasa, kei na veitiko-tiko. 5Sa qai tarogi koya ko ira na Farisi, kei ira na vu-ni-vola, Era sa sega ni muria na nodrai vakavuvuli na qase ko ira na nomu tisaipeli e na vuku ni cava, ni ra sa kana ka sega ni vuluvulu mada na ligadra?

6A sa vosa ko koya, ka kaya vei ira, Sa tukuni kemudou vinaka eliu ko Isaia, koi kemudou na dauveivakaisini, me vaka sa volai, O ira na tamata o qo, era sa vakarokorokotaki au e na belenigusudra, ia na yalodra sa yawa tani vei au: 7a sa sega ni yaga na nodra masuti au, ni ra sa vakatavuvulitaka na vunau ni tamata mei vakavuvuli. 8Ni dou sa biuta tani na vunau ni Kalou, ka vakabauta nai vakavuvuli ni tamata, na sava na veibilo i vakarau, kei na veibilo ni gunu; a sa vuqa tale na ka tani sa vakakina dou sa cakava.

9A sa kaya vei ira ko koya. Sa vinaka beka mo dou biuta na vunau ni Kalou, mo dou vakabauta na nomudoui vakavuvuli. 10Ni sa kaya ko Mosese, Vakarokoroko vei rau na tamamu kei na tinamu; ia, Ko koya sa vosavakacacataka na tamana se na tinana, me sa vakamatei. 11Ia dou sa kaya, Kevaka sa dua na tamata ena kaya vei tamana se tinana, Sa Koripani (a kenai balebale, Sa taba) na noqu ka sa yaga vei iko; 12dou sa qai tarova me kakua ni cakava e dua na ka me yaga vua na tamana se na tinana: 13dou sa vakatawayagataka kina na vunau ni Kalou e na nomudoui vakavuvuli, a ya dou sa dauvakatavulica: a sa vuqa na ka vakaoqo dou sa kitaka.

14Ia ni sa kacivi ira kecega mai na lewe vuqa ko koya, sa kaya vei ira, Dou rogoci au koi kemudou kecega, ka vakasama: 15Sa sega na ka e taudaku ni tamata, ni sa curuma sa vakadukadukalitaka rawa; ia na veika sa curu yani mai vua, o qori ga sa vakadukadukalitaka na tamata. 16Kevaka e dua na tamata sa vakadaligana me rogoca, me mani rogoca sara.

17Ia ni sa biuti ira na lewe vuqa ko koya, ka curu ki vale, sa tarogi koya ko iratou na nona tisaipeli e na vuku ni vosa vakatautauvata. 18A sa kaya vei iratou ko koya, Oi kemudou talega, dou sa tawa kila rawa vakaoqo, ne? Dou sa sega beka ni kila, ni ka kecega etaudaku sa curuma na tamata, sa sega ni vakadukadukalitaka rawa; 19ni sa sega ni curu dina ki na yalona, ki ketena walega, a sa qai lako tani ki nai benubenu, a sa caka kina me savasava na kakana kecega? 20Sa kaya talega ko koya, A ka sa curu yani mai na tamata, o qori ga sa vakadukadukalitaka na tamata. 21Ni sa curu yani mai loma, mai na yalodra na tamata, na nanuma ca, na dauyalewa, na daudara, na daulaba, 22na daubutako, na daukocokoco, nai valavala ca, na dauveivakaisini, na daugarogaro, na mata ca, na vosa vakacaoa, na qaciqacia, na lialia: 23a ka ca kecega o qo sa curu yani mai loma, a sa vakadukadukalitaka na tamata.

24A sa ia ko koya, ka lako tani maikeri kivaka ki na veiyasana i Teiri kei Saitoni, a sa curu ki na dua na vale, a sa sega ni vinakata me dua na tamata me kila: a sa sega ni vuni rawa ko koya. 25Ni sa dua na yalewa ka curuma na luvena sa gonealewa e dua na yalo tawa-savasava, sa rogoca na kenai tukutuku, a sa lako mai ka bale ki na yavana: 26(sa yalewa mai na dua na matanitu kisau, a kai Siro-finisia;) a sa masuti koya me vakasava na tevoro mai na luvena-yalewa. 27A sa vosa vua ko Jisu, Me ra mamau mada ko ira na gone; ni sa sega ni vinaka me kau na kedra na gone, ka biuta vei ira na koli. 28A sa vosa na yalewa, ka kaya vua, E dina ya, Turaga; ia ko ira na koli e ruku ni kanakana era kania na meme ni kedra na gone. 29Sa qai kaya vua ko koya, E na vuku ni vosa o qo, mo lako yani; sa lako tani mai na luvemu-yalewa na tevoro. 30Ia ni sa yaco ki nona vale, sa kunea ni sa lako tani na tevoro, a sa davo e nai mocemoce na luvena-yalewa.

31A sa lesu tale ko koya mai na veiyasana i Teiri kei Saitoni, a sa lako e loma ni yasayasa vaka-Tikapoli, ki na wai mai Kalili. 32A sa kau mai vei koya e dua sa didivara, a sa kaka; a sa masuti ko koya me tabaka e na ligana. 33A sa rauti koya vakatikitiki maivei ira na lewe vuqa, a sa daramaka na nonai qaqalo ki na daliga ruarua ni tamata, a sa kasivi, ka tara na yamena; 34sa qai ta cake ki lomalagi, ka vutugu, ka kaya vua, Efaca, a kenai balebale, Mo rogo mai. 35A sa dolavi sara na daligana ruarua, a sa sere na wa ni yamena, a sa vosa vinaka.

36Sa qai vakarota vei ira ko koya, me ra kakua ni tukuna vua e dua na tamata: ia ni sa vakarota vakalevu vei ira ko koya, era sa dautukuna vakalevu sara kina; 37ka sa kidacala vakalevu sara ko ira, ka kaya, Sa cakava vinaka na ka kecega ko koya; sa daukitaki ira na didivara me ra rogo, kei ira talega na galu me ra vosa.

Currently Selected:

Marika 7: FIJ1864

Highlight

Copy