Marika 8

Sa vakani ira na lewe vuqa ko Jisu e na kakana lailai, 1-9. Sa bureitaka nai vakatakilakila vei ira na Farisi, 10-13. Sa vakavulici iratou na nona tisaipeli me ratou qarauni iratou mai na nodrai vakavuvuli ca na Farisi kei nai tokani i Eroti, 14-21. Sa Vakabula e dua sa mataboko, 22-26. Sa tukuni koya, 27-33. A sa vakatakila nai balebale ni muri koya, 34-38.

1E NA gauna ko ya ni ra sa lewe vuqa sara, ka sega na ka me ra kania, sa kacivi iratou mai na nona tisaipeli ko Jisu, ka kaya vei iratou, 2Au sa lomani ira na lewe vuqa, ni sa qai bogi tolu era sa tiko ga vei au, a sa sega na ka me ra kania; 3ia kevaka kaʼu vakatalai ira tani ki na nodra veivale ka ra sega ni kana, era na malumalumu e na gau-ni-sala; ni sa so vei ira era sa lako vakayawa mai. 4Sa qai kaya vua ko iratou na nona tisaipeli, Ena rawa maivei na madrai me ra mamau kina ko ira o qo e na lekutu o qo? 5A sa tarogi iratou ko koya, E vica nai buli madrai sa tu vei kemudou? A ratou sa kaya, E vitu. 6A sa kaya ko koya vei ira na lewe vuqa me ra tiko sobu e na qele; a sa taura nai buli madrai e vitu, ka vakavinavinaka, ka dovia, ka solia vei iratou na tisaipeli me ratou tauca e matadra; a ratou sa tauca e matadra na lewe vuqa. 7E vica talega na ika lalai sa tu vei iratou; a sa vatonaka ko koya, ka kaya me ratou tauca e na matadra. 8A ra sa kana, a ra sa mamau; a ra sa tomika vata na vo ni ka sa dovi, a sa vitu nai su sa sinai kina. 9Ia ko ira era sa kana era sa lewe va beka na udolu: a sa vakatalai ira tani ko koya.

10A sa vodoka sara na waqa ko koya kei iratou vata kaya na nona tisaipeli, ka lako ki na yasayasa vaka-Talimanuca.

11A ra sa lako mai ko ira na Farisi, a ra sa vakatekivu me ra veileti kaya, a ra sa vakataroga e dua nai vakatakilakila mai lomalagi, me ra vakatovolei koya. 12A sa vutugu sara ko koya e na vu ni yalona, ka kaya, E na vuku ni cava era sa vakasaqara kina e dua nai vakatakilakila ko ira nai tabatamata o qo? au sa kaya vakaidina vei kemudou, Ena sega sara ni soli e dua nai vakatakilakila ki nai tabatamata o qo. 13A sa biuti ira, ka vodoka tale na waqa, ka lako yani ki tai kadua.

14Ia eratou sa guilecava me ratou kauta na madrai, a sa sega ga ni tu vei iratou e na waqa, e dua bauga nai buli. 15A sa vakarota vei iratou ko koya, ka kaya, Dou raica, dou qarauni kemudou mai na nodra leveni na Farisi, kei na leveni nei Eroti. 16A ratou sa qai veivosakitaka vakai iratou, ka kaya, Sa ka beka ni sa sega vei kedatou na madrai. 17Ia ni sa kila ko Jisu, sa kaya vei iratou, E na vuku ni cava dou sa veivosakitaka tina, ni sa sega ni tu vei kemudou na madrai? dou sa sega beka ni kila rawa, se vakasama? sa kaukauwa tiko beka na yalomudou? 18dou sa vakamatana, ka tawa rai rawa beka? ka vakadaligana, ka tawa rogoca rawa beka? se dou sa sega beka ni nanuma? 19Niʼu sa dovia nai buli madrai e lima vei ira na lewe lima na udolu, e vica nai su dou a vakatawa e na kena vo? (A ratou sa kaya. E tinikarua.) 20Ia ni sa vitu vei ira na lewe va na udolu, e vica nai su dou a vakatawa e na kena vo? A ratou sa kaya, E vitu. 21A sa kaya vei iratou ko koya, E vakaevei ni dou sa sega ni kila rawa?

22A sa yaco ko koya ki Peciseita; a ra sa kauta mai vei koya e dua na mataboko, a ra sa masuti koya me tara. 23A sa taura na liga ni mataboko ko koya, ka tubera ki mai bili ni koro; a sa qai kasivita na matana ruarua, a sa tabaka e na ligana, ka taroga se raica e dua na ka se segai. 24A sa rai cake, ka kaya, Au sa raica na tamata era vaka na kau, ia ka ra sa lako voli. 25A sa tabaka tale na matana ko koya e na ligana, ka kaya, me rai cake: a sa qai vakabulai sara, a sa raica kecega vakavinaka. 26A sa vakatalai koya ko koya ki na nona vale, ka kaya, Kakua ni ko lako ki na koro, se tukuna vua e dua e na koro.

27A sa lako tani yani ko Jisu, kei iratou na nona tisaipeli, ki na Veikoro kei Sisaria-Filipai: a sa tarogi iratou na nona tisaipeli e na gau-ni-sala, ka kaya vei iratou, Era sa kaya na tamata se ko cei koi au? 28A ratou sa kaya, Ko Joni na dauveipapitaiso: ia ka so, Ko Ilija: ia ka so tale, E dua vei ira na parofita. 29A sa kaya vei iratou, Ia dou sa kaya se ko cei koi au? Sa qai vosa ko Petero, ka kaya vua, O iko na Karisito. 30A sa vosa matua vei iratou me ratou kakua ni tukuni koya vua e dua.

31A sa vakatekivu me vakavulici iratou, ni sa kilikili kaya na Luve ni tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vu-ni-vola, ka me vakamatei ko koya, ka qai tu cake tale e nai katolu ni siga. 32A sa tukuna vakamacala na vosa koya ko koya. A sa kauti koya ko Petero, ka vakatekivu me vunauca. 33Ia ni sa vuki mai ko koya, ka vakaraici iratou na nona tisaipeli, sa vunauci Petero, ka kaya, Lako tani ki dakuqu, Satani; ni ko sa sega ni vakananuma na ka ni Kalou, ia na ka ga ni tamata.

34Ia ni sa qai kacivi ira mai na lewe vuqa kei iratou talega na nona tisaipeli, sa kaya vei ira, O koya yadua sa via muri au, me kakua ni muria na lomana, ia me colata ga na nona kauveilatai, ka muri au. 35Ia ko koya yadua sa via maroroya na nona bula, ena vakayalia; ia ko koya yadua ena vakayalia na nona bula e na vukuqu kei na vuku ni tukutuku-vinaka, ena maroroya. 36Ia ka cava na kena yaga vuana tamata, kevaka e rawati vuravura kece, ka vakayalia na yalona? 37se cava ena solia na tamata mei sau ni yalona? 38Ia ko koya ena madua-taki au kei na noqu vosa e nai tabatamata o qo e dauyalewa ka ca; ena maduataka koya na Luve ni tamata, ni sa lako mai ko koya e nai ukuuku nei Tamana kei ira vata kaya na agilose yalosavasava.

Currently Selected:

Marika 8: FIJ1864

Highlight

Copy