Marika 6

Era sa dauveivakawai Jisu na kai nona, 1-6. Sa talai iratou na nonai apositolo me ratou vunau ka vakabulai ira sa tauvi-mate, 7-13. Sa kaya ko Eroti ni sai Joni na dauveipapitaiso ko Jisu; a sa kaya e so ni sa dua na parofita: a sa rere ko Eroti ni ka vakamatei Joni, 14-29. Eratou sa lesu tale mai nai apositolo. Sa vakani ira na lewe vuqa ko Jisu, a sa lako e na dela ni wai, a sa vakabulai ira sa tauvi-mate, 30-56.

1SA qai lako tani maikeri ko koya, a sa lako ki na nona vanua; a sa muri koya ko iratou na nona tisaipeli.

2Ia ni sa yaco na siga ni vakacecegu, sa vakatekivu ko koya me vakatavuvuli e na vale ni lotu: a ra lewe vuqa ni ra sa rogoca era sa kidacala, ka kaya, Sa rawata maivei ko koya o qo na veika o qo? se na vuku cava o qo sa soli vua, me sa caka kina e na ligana na veika-mana vakaoqo? 3sa sega li ni matai ko koya o qo, a luve i Meri, kei na tuaka i Jemesi, kei Josese, kei Juta, kei Saimoni? kei na ganena, eratou sa sega li ni tiko vata kei keda? A ra sa tarabe e na vukuna. 4A sa kaya vei ira ko Jisu, Sa vakarokorokotaki na parofita e na vanua tani, e na nona vanua duaduaga e segai, se vei ira na kai nona, se e na nona vale. 5A sa sega ni cakava rawa maikea na caka-mana e dua, sa tabaki ira walega e na ligana era lewe vica sa tauvi-mate, ka vakabula. 6A sa kidacala ko koya e na vuku ni nodra tawa-vakabauta. A sa lako voli ki na Veikoro lalai, ka vakatavuvuli.

7A SA kacivi iratou mai na lewe tinikarua ko koya, ka vakatekivu me talai iratou me ratou lako yarua; a sa solia vei iratou na kaukauwa vei ira na yalo tawa-savasava. 8A sa vakarota vei iratou me ratou kakua ni kauta e dua na ka e na gau-ni-sala, ai titoko walega; me kakua na taga i vaqa, se na madrai, se nai lavo e na taga: 9ia me ratou vakaivava e nai vava vakatakelo ga; ka me ratou kakua ni vakaisulu e nai curucuru e rua. 10A sa kaya vei iratou ko koya, Ni dou sa curu ki na dua na vale e na dua na yasana, dou tiko ga kina ka yacova na nomudou lako tani mai na tikina ko ya. 11Ia ko ira kecega sa sega ni vakacegui kemudou, se rogoci kemudou, ni dou sa lako tani e na yasana ko ya, dou kuretaka laivi na kuvu-ni-soso e na ruku ni yavamudou, mei vakatakilakila vei ira. Au sa kaya vakaidina vei kemudou, Ena ca vakalailai ko Sotoma kei Komora e na siga ni lewa, ena ca vakalevu na koro ko ya. 12A ratou sa lako yani, ka dauvunau me ia na veivutuni. 13A sa lewe vuqa na tevoro eratou sa vakasava tani; a ra sa lewe vuqa sa tauvi-mate eratou sa walia e na waiwai, ka vakabula.

14A sa rogoca ko Eroti na tui; (ni sa kuruvaki na yacana:) a sa kaya, Sa tu cake tale mai na mate ko Joni na dauveipapitaiso; o koya ga sa cakacaka kina vei koya na kaukauwa mana o qo. 15Era sa kaya e so tani, Sa ko Ilija. A ra sa kaya e so tani, Sa dua na parofita, se vaka e dua vei ira na parofita. 16Ia ni sa rogoca ko Eroti, sa kaya, O Joni ga o qo, o koya kaʼu a tamusuka na uluna; sa tu cake tale mai na mate ko koya.

17Ni ka talaki eliu ko Eroti, ka tauri Joni, ka vesuka e na vale ni veivesu, e na vuku i Erotia na wati i Filipo na tacina; ni rau sa veiwatini kaya. 18Ni sa kaya vei Eroti ko Joni, Sa sega ni tara mo drau veiwatini kei na wati ni tacimu. 19A sa cati koya kina ko Erotia, a sa vinakata me vakamatea; ia ka sega ni rawata: 20ni sa rerevaki Joni ko Eroti, a sa vakabulai koya, ni sa kila ni sa tamata yalododonu ka yalosavasava; ia ni sa rogoci koya, sa vuqa na ka sa kitaka ko koya, a sa vinakata me rogoca.

21Ia ni sa yaco e dua na siga ni solevu, a siga ni sucu i Eroti, sa daucakava kina ko koya na kedra magiti na turaga ni vanua, kei na turaga ni valu, kei ira na qase ni Kalili; 22ia ni sa curu na luvena-yalewa ko Erotia, ka meke, a sa vinakata ko Eroti kei, ira era sa tiko vata kaya me kana, sa qai kaya na tui vua na gonealewa, Kerea vei au na ka ko sa vinakata, kaʼu na solia vei iko. 23A sa vosabubului vua, A ka kecega ko na kerea vei au, au na solia vei iko, kevaka kaʼu na wasea rua kina na noqu matanitu. 24A sa lako tani yani ko koya, a sa tarogi tinana, A cava meʼu kerea? A sa kaya ko koya, A ulu i Joni na dauveipapitaiso. 25A sa curu kusarawa sara vua na tui ko koya, ka masuta, ka kaya, Au sa vinakata mo solia vakasauri vei au na ulu i Joni na dauveipapitaiso e na dua na dari. 26A sa rarawa vakalevu sara na loma ni tui; ia e na vuku ni bubului, kei na vukudra talega era sa tiko kaya, sa sega ni via bureitaka vua. 27A sa tala vakasauri ko na tui e dua vei ira nai valu i vakatawa, a sa kaya me kau mai na uluna: a sa lako ka tamusuka na uluna e na vale ni veivesu; 28a sa kauta mai na uluna e na dua na dari, ka solia vua na gonealewa: a sa solia ko na gonealewa vei tinana. 29Ia ni sa rogoca ko iratou na nona tisaipeli, eratou sa lako mai ka kauta na yagona, ka virikotora e nai bulubulu.

30A ratou sa soqoni vata vei Jisu ko iratou nai apositolo, ka tukuna vua na ka kecega, a ka eratou sa cakava, kei na ka talega eratou sa vakavuvulitaka. 31A sa kaya vei iratou ko koya, Dou lako mai vakatikitiki ki na dua na vanua lala, ka mo dou vakacegu vakalailai mada: ni ra sa lewe vuqa era lako mai ka lako yani, a ratou sa sega kina ni lalaga me kana. 32A ratou sa vodoka na waqa, ka lako tani kina vakatikitiki ki na dua na vanua lala.

33Ia ko ira na lewe vuqa era sa raica ni ratou sa lako tani yani, a ra sa lewe vuqa sa kilai koya, a ra sa cici e vanua mai na Veikoro kece, ka yawasivi vei iratou, ka soqoni vata vei koya. 34A sa lako mai ko Jisu, ka raici ira era sa lewe vuqa sara, a sa lomani ira, ni ra sa vaka na sipi sa sega na nodrai vakatawa: a sa vakatekivu me vakatavulici ira e na ka e vuqa. 35Ia ni sa kolai oti na siga, sa lako mai vei koya ko iratou na nona tisaipeli, ka kaya, O qo na vanua lala, a sa kolai oti na siga: 36mo vakatalai ira yani mada, me ra lako ki na veiyasana sa vakavolivolita, kei na veikoro lalai, me ra volia na kedra madrai: ni sa sega na ka vei ira me ra kania. 37A sa vosa ko koya, ka kaya vei iratou, Dou solia vei ira me ra kana. Eratou sa qai kaya vua, Me keitou laʼki volia beka na madrai, e na tola e tolusagavulu, me solia vei ira me ra kania? 38A sa kaya vei iratou ko koya, E vica nai buli madrai sa tu vei kemudou? dou laʼki raica. Ia ni ratou kila, eratou sa kaya, E lima, kei na ika e rua. 39A sa kaya ko koya me ratou vakatikori ira sobu kecega e na veisoqosoqo, e na co karakarawa. 40A ra sa tiko sobu, e na veisoqosoqo, sa yadrau se yalimasagavulu. 41Ia ni sa taura ko koya nai buli madrai e lima kei na ika e rua, sa ta cake ki lomalagi, ka vatonaka, ka dovia na veibuli madrai, ka solia vei iratou na nona tisaipeli me ratou tauca e matadra na tamata; a sa vota ko koya na ika e rua vei ira kecega. 42A ra sa kana kecega, a ra sa mamau. 43A ra sa tomika vata na madrai sa vo, kei na ika talega, a sa tinikarua nai su sa sinai kina. 44Ia ko ira era sa kania na veibuli madrai era lewe lima beka na udolu na tagane.

45Sa qai vakarota sara ko koya vei iratou na nona tisaipeli me ratou vodoka na waqa, ka me ratou liu ki na tai kadua kivaka ki Peciseita, me sa vakatalai ira mada yani na lewe vuqa ko koya. 46Ia ni sa vakatalai ira yani oti, sa lako ko koya ki na ulu-ni-vanua, me masu.

47Ia ni sa yakavi mai, sa tiko na waqa e loma ni wai, a sa tiko duaduaga ko koya e vanua. 48A sa raici iratou ni ratou sa oca e na voce; ni sa cagi leca: ia ni sa yaco mada nai kava ni wase ni bogi, sa qai lako vei iratou ko koya, sa lako voli e na dela ni wai; a sa lako ka vaka me sivi iratou. 49Ia ni ratou sa raica ni sa lako voli ko koya e na dela ni wai eratou sa nanuma ni sa dua na yalo, a ratou sa qoqolou: 50ni ratou sa raici koya kecega, a ratou sa kidroa. A sa vosa sara vei iratou ko koya, ka kaya vei iratou, Dou vakacegu: sai au ga: dou kakua ni rere. 51A sa cabe vei iratou ki na waqa, a sa ruru na cagi: a ratou sa kidacala vakalevu sara e lomadratou, ka kurabui: 52ni ratou sa sega ni vakasama na veibuli madrai: ni sa kaukauwa na lomadratou.

53Ia ni ratou sa lako ki tai kadua, eratou sa yaco ki na nodra vanua na kai Kenisareti, a ratou sa udu ki matasawa. 54Ia ni ratou sa sobu mai na waqa, era sa kilai koya sara, 55ka cici ki na veiyasana kece sa vakavolivolita, a ra sa vakatekivu me colati ira e na veimocemoce era sa tauvi-mate, ki na yasana era rogoca sa tiko kina ko koya. 56Ia na yasana kece sa lako kina ko koya, se na Veikoro lalai, se na veikoro, se na veiyasana kisau, era sa tauci ira sa tauvi-mate e na veisala, ka masuti koya me ra bau tara na tutu ni nonai sulu: ia ko ira kecega sa tara, era sa vakabulai.

Currently Selected:

Marika 6: FIJ1864

Highlight

Copy