Ai Vola I Isaia, na Parofita 51
51
Me vaka ni ra tubu me lewe vuqa nai vavakoso lewe ni soro e na gauna eliu, era na tubu tale me taka talega kina e na gauna ni Mesaia, 1-3. Ena lewe vuqa ena lotu tei ira na lewe ni veivanua, 4-6. O ira era ia na veivakacacani era na cudruvi, me vaka ka cudruvi ko Ijipita, ni sa dauvakabulai ira na nona tamata ko Jiova, 7-23.
1DOU rogoci au, oi kemudou sa muria na yalododonu, ka sa qaravi Jiova: dou vakaraica na vatu dou a ta maikina, kei na qara ni keli dou a keli maikina. 2Dou vakaraici Eparaama na tamamudou, kei Sera sa vakasucumi kemudou: sa lewe dua ga niʼu a kacivi koya, kaʼu a vakalougatataki koya ka vakalevutaki koya. 3Ni na vakacegui Saioni ko Jiova; ena vakaceguya na nona veiyasana lala; ena cakava na nona talasiga me tautauvata kei Iteni, kei na nona veikau me tautauvata kei na were i Jiova: ena kune mai kina na reki kei na marau, na vakavinavinaka kei na domo ni meke.
4Dou vakarorogo vei au, na noqu tamata; ka vakatu daliga vei au, na noqu matanitu: ni na lako yani maivei au na vunau, ia na noqu lewa kaʼu na vakataudeitaka me nodra rarama na veimataqali. 5Sa voleka meʼu sa ia na lewa dodonu, sa lako yani na veivakabulai kaʼu sa ia, ia na ligaqu ena lewai ira na veimataqali; sai au ga era na waraka na veiyanuyanu, sa ligaqu ga era na vakararavi kina. 6Ta cake ki lomalagi e na matamudou, ka vakaraici vuravura kira; ni na seavu yani na lomalagi me vaka na kubou, ka madra mai na vuravura me vaka nai sulu, ka mate vakakina na lewena: ia na bula sa maivei au ena tawa mudu, kei na noqu yalododonu ena sega ni takali.
7Dou vakarorogo vei au, oi kemudou sa kila na yalododonu, na tamata sa tiko e lomamudou na noqu vunau; kakua ni dou rerevaka na nodra vosa ca na tamata, ia ni ra ia na veivakalialiai, kakua ni dou yalolailai kina. 8Ni sa vaka sai sulu, ena kani ira na sarasara, ka vaka sa vutika ni sipi ena kani ira na yavato; ia na noqu yaladodonu ena tawa mudu, kei na bula sa maivei au ena ia tikoga mai nai tabatamata ka yacova nai tabatamata.
9Mo yadra, mo yadra, mo vakaisulu e na kaukauwa, o iko na liga i Jiova; mo yadra, me vaka e na gauna eliu, e nai tabatamata makawa. Sai iko, se segai, ka tamusuki Rakapi, ka vuetaka na gata levu? 10Sai iko, se segai, ka vakadiva na wasawasa, na wai ni wasa levu? ka cakava na dreke ni wai titobu me nodra sala me lako yani kina era vakabulai? 11Ia ko ira sa vakabula ko Jiova era na lesu mai, ka tadu mai ki Saioni ka meke tu, ia na reki tawa mudu ena tauca na uludra: ena vauci ira mai na reki kei na marau, ia na rarawa kei na tagi ena dro tani yani. 12Oi au, io koi au, kaʼu sa vakacegui kemudou: o cei ko iko, mo rerevaka na tamata ena mate, kei na luve ni tamata ena cakavi me co; 13ka sa guilecavi Jiova ka Buli iko, ka tevuka yani na mata-ni-lagi, ka tauyavutaki vuravura, ka sa rere tale tikoga e na veisiga, e na mata ni cudru i koya na dauveivakasaurarataki, ni sa vakarau me ia na veivakarusai? ia sa evei na nona cudru na dauveivakasaurarataki? 14Sa kusakusa na bobula me sereki, ia ena sega ni mate e nai keli, na kena kakana talega ena sega ni yali.
15Ni sai au ko Jiova na nomu Kalou, kaʼu sa vakamaravutaka na Wasawasa, ni sa vadugu na kena biau; o Jiova ni lewe vuqa na yacana. 16Ia kaʼu sa tauca na noqu vosa ki na gusumu, e na yaloyalo ni ligaqu kaʼu sa ubi iko, mo tea na lomalagi, ka tauyavutaki vuravura, ka kaya ki Saioni, Oi kemudou na noqu mataqali.
17Mo yadra, mo yadra, tu cake, Jerusalemi, ko sa gunuva mai na liga i Jiova na bilo ni nona cudru katakata, na soko e na bilo e dauveivakamatei ko sa gunuva, ka lobaka. 18Sa sega vei ira kecega na luvena sa vakasucuma, me sa tuberi koya; sa sega vei ira kecega na luvena ka susuga, me sa taura na ligana. 19A ka ruarua o qo sa kolai yacovi iko; o cei me tagicaki iko? na veivakalalataki kei na rusa, na viakana kei nai seleiwau: o cei me vakacegui iko, se koi au ga? 20O ira na luvemu era sa waicala; era sa koto e na mua ni saqata ni koro kecega, me vaka na karavau atagane kila e na lawa; ni sa ka levu sara na nona cudruvi ira ko Jiova, kei na nodra vunauci mai vua na nomu Kalou.
21Ia mo rogoca mada kina na ka o qo, o iko sa rarawa, ka sa mateni, ka sega e na waini: 22sa vosa vakaoqo na nomu Turaga ko Jiova, kei na nomu Kalou ena totaki ira na nona tamata, Raica, kaʼu sa kauta tani mai na ligamu na bilo e dauveivakamatei, na soko e na bilo ni noqu cudru katakata; o na sega ni gunuva tale; 23kaʼu na solia ga ki na ligadra era sa vakararawataki iko, era kaya ki na yalomu, Mo koto sobu me keitou lako yani: ia ko sa cakava na dakumu me vaka na qele, ka vaka na sala, vei ira era lako voli yani.
Currently Selected:
Ai Vola I Isaia, na Parofita 51: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
