Ai Vola I Isaia, na Parofita 52

Era sa vakaroti nai vavakoso lewe ni soro me vakabauti koya sara na nodrai Vakabula, 1-6. Sa ka vinaka sara nai tukutuku ni bula, 7-10. Me biu ko Jerusalemi, ka vakabau ga ko na Mesaia, na Kalou nei Isireli, 11, 12. Sa tukuni mai ko koya na Mesaia, 13-15.

1MO yadra, mo yadra; vakaisulutaki iko e na nomu kaukauwa, Saioni; mo vakaisulutaki iko e na nomui sulu vakaiukuuku, Jerusalemi, na koro tabu: ni na sega tale ni curumi iko na tawa cili kei na dukadukali. 2Ceburaka tani vei iko na qele; tu cake, mo laʼki tiko, Jerusalemi: sereka tani nai vau ni domomu, o iko na gonealewa ni Saioni na bobula.

3Ni sa vosa vakaoqo ko Jiova: Dou a volitaki wale; ia ena sega e nai lavo dou na voli mai kina. 4Ni sa vosa vakaoqo na Turaga ko Jiova, Sai Ijipita era sa lako sobu kina eliu na noqu tamata, me tiko vulagi kina; ia ko Asiria sa qai vakasaurarataki ira wale: 5ia o qo, a cava sa noqu eke, sa kaya ko Jiova, ni ra sa kauti tani walega na noqu tamata, era qoqolou na kedra turaga, sa kaya ko Jiova, a sa tawa mudu e na veisiga kece ni sa vosavakacacataki ga na yacaqu? 60 koya o qo era na kila ga kina na yacaqu na noqu tamata; o koya o qo era na kila ga kina e na siga ko ya ni sai au o qo sa kaya, Raici au!

7Na kena lagilagi e na ulu-ni-vanua na yava i koya sa kauta mai nai rogorogo vinaka, sa rogotaka mai na sautu, sa kauta mai nai rogo vinaka vakamarau ni ka vinaka, ka vakarogotaka mai na bula, ka sa kaya mai ki Saioni, Sa lewa na nomu Kalou! 8A domodra na nomui vakatawa! era sa tabalaka na domodra, ena ia vata ga na nodra kaila: ni ra na raica e na matanavotu, ni sa lesu mai ki Saioni ko Jiova. 9Dou lagata mai na meke ni marau, dou kaikaila vata, na veiyasana lala ni Jerusalemi: ni sa vakacegui ira na nona tamata ko Jiova; sa vakabulai Jerusalemi. 10Sa vakaraitaka mai ko Jiova na ligana tabu e na matadra na veimatanitu kecega; ia nai yalayala kecega kei vuravura ena kunea na bula sa maivei koya na noda Kalou.

11Dou lako, dou lako, lako tani eke; na ka sa tawa savasava dou kakua ni tara; dou lako tani mai vua; dou savasava mai, oi kemudou sa kauta nai yaya nei Jiova. 12Ni na tawa vakariri na nomudou lako tani, ia dou na tawa dro ni dou sa lako: ni sa kemudoui liuliu ko Jiova, kei na kemudoui murimuri na Kalou nei Isireli.

13RAICA, ena cakacaka vakavuku ko koya na noqui talatala, ena levu ka laveti cake, ia ena cecere sara. 14Me vaka era rerevaki iko na lewe vuqa, —ni sa vakacacani na matana me sega ni vaka na tamata, kei na yagona me sega ni vakai ira na luve ni tamata: 15ena vakakina, ena kureitaka vei ira na veimatanitu e vuqa; e na vukuna ena sogorubu na gusudra na tui: ni sai koya sa sega ni tukuni vei ira era na kunea; kei na ka era sa sega ni rogoca era na veinanuyaka.

Currently Selected:

Ai Vola I Isaia, na Parofita 52: FIJ1864

Highlight

Copy