Ai Vola I Isaia, na Parofita 50
50
A nodrai valavala ca na tamata ni Kalou na vu ni nodra ca, 1. Sa kaukauwa na Kalou me vakabulai ira, 2, 3. O Koya na nonai Talatala sa rawata sara na cakacaka sa lesi kina, ni sa vosota raica sara na veivakacacani, 4-9. A vakabauta na vu ni bula, a vakatitiqa na vu ni rusa ni tamata, 10, 11.
1SA vosa vakaoqo ko Jiova: Sa evei nai vola ni tawase nei tinamu, kaʼu sa vakatalai koya kina? seʼu sa volitaki iko vei cei vei ira ka ra sega ni vakaivolitaki vei au? Raica, e na vuku ni nomudoui valavala ca dou sa volitaki kina; kei na vuku ni nomudou talaidredre sa vakatalai kina na tinamudou. 2A cava, niʼu a lako mai, sa sega kina e dua na tamata? a cava, niʼu a kaci, sa sega kina e rogo mai? Sa lekaleka li na ligaqu, me dredre kina ni ia na veivakabulai? se sa sega beka vei au na kaukauwa, meʼu dredreta kina na veikali? raica, niʼu sa vunauca, kaʼu sa vakadiva na wasawasa, ka cakava na uciwai me talasiga: ni sa yali na wai, sa bona na kena ika ka mate sara e na viagunu: 3kaʼu sa vakaisulutaka na mata-ni-lagi e na butobuto, ka ubia e nai sulu ni tagi.
4Sa solia vei au na Turaga ko Jiova na yame sa vakavulici rawa, meʼu vuku ni tokoni koya e na vosa e sa ceguoca: sa vakayadrati au ko koya e na veimataka, sa vakayadrata na daligaqu, meʼu vakarorogo me vakataki ira era sa vakatavulici. 5Sa basuka na daligaqu na Turaga ko Jiova, ia kaʼu a sega ni beca, kaʼu a sega ni vakanadaku. 6A dakuqu kaʼu a solia vei ira na dauveiyaviti, kei na baluqu vei ira na dauveivuti; a mataqu kaʼu a sega ni tabonaka mai na veivakamaduataki kei na veikasiviti. 7Ia na Turaga ko Jiova ena vukei au; o koya o qo kaʼu sa sega kina ni taqaya; ia kaʼu sa vaqaqataka kina na mataqu me vaka na qiwa, kaʼu sa kila niʼu na sega ni madua. 8Sa voleka mai ko koya sa vakadonui au; o cei me na ia na veilewai kei au? me keirau tu cake vata mada; o cei sa bolei au? me toro mai vei au ko koya. 9Raica, ena vukei au na Turaga ko Jiova; o cei me na vakacalai au? raica, o ira kece era na madra ga mai me vaka nai sulu; ena kani ira na sarasara.
10O cei vei kemudou sa rerevaki Jiova, ka sa vakarorogo ki na domo ni nonai talatala, ka sa lako ga e na butobuto, ka sa sega vua na rarama? me vakararavi ko koya ki na yaca i Jiova, ka ravita na nona Kalou. 11Raica, oi kemudou kece e sa tutuvaka na buka, ka vauci kemudou e na lidi ni buka: dou lako voli ga e na rarama ni nomudou buka, kei na lidi ni buka dou sa tutuvaka. Mai na ligaqu dou na rawata na ka o qo: dou na koto sobu ga e na rarawa.
Currently Selected:
Ai Vola I Isaia, na Parofita 50: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
