Ai Vola I Isaia, na Parofita 49
49
Sa tukuni na Mesaia ni sai talatala yaco ni Kalou, ni sa talai mai me nodrai Vakavuvuli kai Vakabula na lewe ni veivanua, 1-13. O ira nai vavakoso lewe ni soro era sa vakaukauwataki me vakararavi e na loloma ni Kalou vei ira, 14-23; kei na nona kaukauwa me cudruvi ira na nedra meca, ka vakabulai ira ga, 24-26.
1DOU rogoci au, na veiyanuyanu; dou vakadirorogo mai na vanua vakayawa, na veimataqali; Sa kacivi au mai na kete ko Jiova; mai na kete i tinaqu sa cavuta na yacaqu: 2a sa cakava na gusuqu me tautauvata kei nai seleiwau gata; e na yaloyalo ni ligana sa tabonaki au; a sa cakavi au me gasau makamakalivata; e na nona taga ni gasau sa vunitaki au; 3a sa kaya vei au, ni sai iko na noqui talatala, ni sai iko, Isireli, kaʼu na vakarokorokotaki kina. 4Ia koi au kaʼu a kaya, Sa tawa yaga na noqu oca, kaʼu sa vakaotia wale ka tawa yaga ga na noqu kaukauwa: ia ka sa tu vei Jiova na noqu veivakadonui, kei na noqu cakacaka sa tu ga vua na noqu Kalou. 5Ia o qo, sa qai kaya ko Jiova, o koya ka buli au mai na kete meʼu nonai talatala, meʼu saumaki ira mai na Jekope vei koya, ia kevaka ena sega ni vakasoqoni mai ko ira na Isireli, kaʼu na vakarokorokotaki ga e na mata i Jiova, a noqu Kalou talega sai koya na noqu kaukauwa. 6Ia sa kaya ko koya, Sa ka lailai mo noqui talatala me vueta cake na veimataqali i Jekope, ka vakalesui ira mai na Isireli era maroroi tiko: kaʼu sa soli iko talega mo nodra rarama na veimatanitu, mo yaco mo vu ni bula e na vukuqu ki nai yalayala kei vuravura.
7Sa vosa vakaoqo ko Jiova, o koya nai Vakabula nei Isireli, kei na nona Yalosavasava, vua sa beci sara, vua era sa vakasisilataka na lewe ni vanua, vua na nodra kaisi na turaga, Ena raica ko ira na tui ka tu cake, ko ira talega na turaga, a ra na cuva, e na vuku i Jiova sa daudina, o Koya na Yalosavasava nei Isireli, ka sa digitaki, iko. 8Sa vosa vakaoqo ko Jiova, E na gauna ni vinakati kaʼu a rogoci iko, e na siga ni bula kaʼu a vukei iko; kaʼu na maroroi iko, ka soli iko mo veiyalayalati kei ira na tamata, mo vueti vuravura, me vakatawa tale na veiyasana lala; 9mo sa kaya vei ira sa vesuki, Dou lako mai; vei ira mai na butobuto, Dou vakaraitaki kemudou mai. Era na kana voli e na sala, ia na veiyasana cabecabe kecega ena kedra veico. 10Era na sega ni viakana se viagunu; ena sega ni yaviti ira na nuku kata se na mata-ni-siga; ni sai koya sa lomani ira ena tuberi ira, ka kauti ira e na bati ni vurevure ni wai. 11Kaʼu na cakava kecega na noqu ulu-ni-vanua me sala, ia ena cecere na noqu salatu. 12Raica, o ira o qo era na lako vakayawa mai; ka, raica, o ira o qo mai na tokalau ka mai ra; kei ira o qo mai na vanua ko Sinimi.
13Dou ia na meke, na lomalagi; mo marau, na vuravura; dou lagata vata mai na meke, na veiulu-ni-vanua: ni sa vakacegui ira na nona tamata ko Jiova, ena yalolomani ira na nona era sa rarawa.
14A sa kaya ko Saioni, Sa buiti au ko Jiova, a sa guilecavi au na Turaga. 15E dua li na alewa me na guilecava na luvena sa sucu, me kakua ni lomana na luve ni ketena? io, ena sa guilecava beka, ia koi au kaʼu na sega ni guilecavi iko: 16raica, ki na qeteqete ni ligaqu kaʼu sa ceuti iko; a nomu bai sa tikotiko ga e mataqu: 17o ira na luvemu era sa kusarawa mai; o ira era vakacacani iko ka vakalalataki iko era na lako tani vei iko: 18mo ta cake na matamu, ka veiraiyaki; o ira kecega, era sa soqoni vata mai, era sa lako mai vei iko. Ena vaka na dina ni noqu bula, sa kaya ko Jiova, o ira kecega o qo, ka vaka sai sulu vakaiukuuku, ko na vakaisulu ga kina, ka vauci ira vei iko, me vaka na alewa sa qai vakawati. 19A nomu Veikoro ka rusa ga ka lala, kei na nomu vanua ka vakarusai, io sa qai osooso sara mai e navuku ni lewena; era na yawa sara ga ka ra tilomi iko: 20era na baki kaya tale e daligamu ko ira na luvemu, ko iko na luveniyali, Sa oso sara na noqu tikina; mo toro yani, meʼu tiko rawa: 21o na qai kaya e lomamu, O cei ka vakasucumi ira o qo me noqu, koi au na luveniyali, ka yava, ka tiko sese, ka biu? ia ko ira o qo ko cei beka ka susugi ira mai? Raica, oi au kaʼu a biu laivi: o ira o qo, sa ra tiko beka maivei?
22Sa vosa vakaoqo na Turaga ko Jiova, Raica, kaʼu na dodoka na ligaqu vei ira na veimatanitu, ka vakaduria na noqu rogele ki na veimataqali; a ra na keveti ira mai na luvemu atagane e na lomaseredra, kei ira na luvemu alewa era na kauta mai e na domodra. 23O ira na tui era na susugi ira na luvemu, ia ko ira na nodra marama era na ia na veisusu vei iko: ni sa cuva na matadra ki na qele era na vakarokoroko vei iko, ka dramica na kuvu-ni-soso ni yavamu: ia ko na kila ni sai au ko Jiova, a ra, na sega ni madua ko ira sa namaki au.
24Me na kovei li nai toki ni valu mai vua sa qaqa? se ko ira era vakabobulataki dodonu, me na vakabulai? 25Ia sa vosa vakaoqo ko Jiova, Ena kovei ga ko ira na bobula mai vua sa qaqa, ka kaliraki nai toki ni valu mai vua sa rerevaki; kaʼu na vala kei ira era veivala kei iko, ka vakabulai ira na luvemu: 26kaʼu na vakani ira era vakasaurarataki iko e na lewedra dina; e na kedra dra dina talega, me vaka e na waini vou, era na mateni kina; ia na tamata kecega era na kila ni sai au ko Jiova na nomui Vakabula, ni sai au ka voli iko, na Kaukauwa nei Jekope.
Currently Selected:
Ai Vola I Isaia, na Parofita 49: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
