Ai Vola I Isaia, na Parofita 48
48
A Kalou, ni sa kilai ira na kai Jutia ni ra dauvakararavi ki na kalou lasu, sa tukuna eliu vei ira na ka ena yaco emuri, 1-8. Sa dauvakabulai ira e na vukuna ga, 9-11. Sa vakaroti ira me talairawarawa rua e na vuku ni sa kaukauwa ka vuku na nona lewa, 12-15. Sa vakavulici ira, 16-19; a sa yalata tale ni ra na vakabulai mai na tiko se mai Papiloni, 20-22.
1DOU rogoca na ka o qo, na mataqali i Jekope, na tamata sa vakatokai e na yaca i Isireli, ka sa lako mai na mata-ni-wai nei Juta, ka sa vosavavakini e na yaca i Jiova, ka sa daucavuta na Kalou nei Isireli, ka sega e na yalodina, se na yalododonu. 2Ni ra sa vakatokai ira e na yaca ni koro tabu, ka vakararavi vua na Kalou nei Isireli; o Jiova ni lewe vuqa na yacana. 3Na ka makawa kaʼu a tukuna mailiu sara; ia mai na gusuqu ga ka sa lako yani na ka o qori, kaʼu a vakatakila talega; kaʼu a cakava vakasauri, a sa yaco ga. 4Niʼu a kila ni ko sa yalokaukauwa, ni sa dali aironi na domomu, ka parasa na yadremu; 5o koya kaʼu a tukuna makawa kina vei iko; ni sa sega ni yaco, kaʼu a vakatakila vei iko; do ko kaya, A noqu matakau ga sa vakayacora, ia na noqu matakau ceuceu, kei na noqu matakau sa vakawaicalataki, o koya ga sa vakarota. 6O sa rogoca eliu, ia mo raica na ka kece o qo sa yaco ga; dou na sega beka ni via tukutuku talega, na matakau? kaʼu sa qai vakatakila na ka vou vei iko, ia na ka vuni, ko sa tawa kila. 7Sa qai cakavi edaidai, ka sega eliu; e na gauna eliu ko a sega ni rogoca; do ko kaya, Raica, kaʼu a kila ga. 8Io, ko a sega ga ni rogoca; ko a sega ga ni kila; sa sega talega ni basuki mailiu na daligamu: niʼu a kila ko na cakacaka vakailasu sara, ka sa vakatokai na dautalaidredre mai na kete i tinamu. 9E na vuku ni yacaqu kaʼu na vakaberaberataka na noqu cudru, kei na vuku ni qaui rogo kaʼu na tarovi au maivei iko, meʼu kakua ni muduki iko laivi. 10Raica, kaʼu a vakatovolei iko e na buka, ka sa sega na siliva dina; kaʼu a digitaki iko e na kuro qele ni veivakararawataki. 11E na vukuqu, io, e na vukuqu ga, kaʼu na cakava; ni sa vinaka li me vakadukadukalitaki na yacaqu? ia na vakarokoroko sa dodonu me ia vei au, kaʼu na sega ni solia vua e dua tani.
12Rogoci au, Jekope, o iko, Isireli, kaʼu a kaciva; sai au o qo: sai au na kenai liuliu; sai au na kenai murimuri talega: 13sa ligaqu ga ka tauyavutaki vuravura, ia sa ligaqu i matau ka cagava na mata-ni-lagi: kaʼu sa kaciva, ka sa tu vata mai: 14oi kemudou kece dou vakasoqoni vata ga, ka vakarorogo; o cei vei ira era sa vakatakila mai na ka o qori? Sa lomani koya ko Jiova: ena cakava ga na nona veitalia ki Papiloni, ia na ligana ena tauci ira na kai Kalitea. 15Oi au, kaʼu sa cavuta; kaʼu sa kacivi koya; kaʼu sa kauti koya mai; ena vakayacora na nona cakacaka ko koya.
16Dou toro voleka mai vei au, dou rogoca na ka o qo; sa sega ni kaʼu vosa vuni mai nai vakatekivu, ni sa qai tubu na ka o qori kaʼu a tiko maikina; ia o qo sa qai talai au mai na Turaga ko Jiova, kei na Yalona. 17Sa vosa vakaoqo ko Jiova, na nomui Vakabula, o Koya na Yalosavasava nei Isireli; Oi au ko Jiova na nomu Kalou, kaʼu sa vakavulici iko mo yaga, kaʼu sa tuberi iko e na sala mo lakova. 18Do ko a vakarorogo ki na noqu vunau! ena sa qai vaka na uciwai na nomu vakacegu, kei na nomu cakacaka dodonu ena sa vaka na ua ni wasawasa: 19ena sa vaka na nuku na nomu kawa, kei na luve ni ketemu me vaka na lewe ni wai; ena sa sega ni muduki se bokoci na yacana mai na mataqu.
20Dou lako tani e Papiloni, dro tani vei ira na kai Kalitea, e na domo ni marau dou tukuna yani na ka o qo; dou vakarogotaka, vakauta nai rogo ki nai yalayala kei vuravura; dou kaya, Sa vakabula ko Jiova na nona tamata ko Jekope: 21a ra sa sega ni viagunu mai na lekutu sa kauti ira voli kina ko koya; na medra wai sa vakadavea mai na vatu ko koya; a sa tasea na vatu, ka sa tovure maikina na wai, 22Sa sega na vakacegu, sa kaya ko Jiova, vei ira na tamatai valavala ca.
Currently Selected:
Ai Vola I Isaia, na Parofita 48: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
