Ai Vola I Isaia, na Parofita 47
47
Ena cudruvi na kai Papiloni kei na kai Kalitea e na vuku ni ra sai valavala vakaukauwa; ni ra viavialevu ka viaqaqa; ni ra dauvakararavi ki nai valavala vakatevoro, 1-15.
1LAKO sobu, ka mani tiko ki na kuvu-ni-soso, o iko na gonealewa ni Papiloni; mo tiko ki na qele, sa sega nai tikotiko vakaturaga, o iko na gonealewa ni kai Kalitea: ni ko na sega ni vakatokai tiko na marama vakaalewa. 2Kauta na vatu i qaqi, ka mani qaqi sila; biuta na nomu pulou; laveta na bui ni nomui sulu; luvata nai sulu ni yava, sikakosova na uciwai. 3Ena luvati na nomui sulu; io, ena rairai na nomu veivakamaduataki: kaʼu na ia na veicudruvi, kaʼu na sega ni ia na veisorosorovi.
4A neimami Vakabula! o Jiova ni lewe vuqa na yacana, o Koya na Yalosavasava nei Isireli. 5Mo tiko lo, ka mani lako ki na butobuto, o iko na gonealewa ni kai Kalitea: ni ko na sega ni vakatokai tiko, Na radi ni veimatanitu. 6Au a cudruvi ira na noqu tamata; au a vakacacana na noqui votavota, ka soli ira ki na ligamu: o sa sega ni yalololoma vei ira; ia vei ira na qase ko sa vakabibitaka vakalevu na nomui vua. 7Ia ko a kaya, Kaʼu na Ranadi tikoga ka tawa mudu; ko sa sega kina ni vakasara na ka o qo ki lomamu, se vakananuma na kenai tinitini. 8Ia mo qai rogoca na ka o qo, o iko sa daumamarau, ka sa dautiko vakacegu wale, ka sa kaya e lomamu, Oi au ga, ka sa sega e dua tale, koi au ga; kaʼu na sega ni tiko vakadawai, kaʼu na sega ni kila talega na tiko vakaluveniyali: 9ia na ka ruarua o qo ena yaco ga vei iko me vakidacala, e na siga ga e dua, na tiko vakaluveniyali kei na tiko vakadawai; ena yaco vaka dina kina vei iko, ni sa daulevu na nomu caka mana lasu, ka levu na nomu dausorosoro. 10Ia ko a vakararavi ki na nomui valavala ca: ko a kaya, Sa sega e raici au. A nomu vuku kei na nomu daukila ka, o qori sa vakaucataki iko; ia ko a kaya e lomamu, Oi au, ka sa sega e dua tale, koi au ga. 11Ia ena yacovi iko na ca, o na sega ni kila se sa kida maivei; ena lutuki iko na rusa, ko na sega ni vakadaroya rawa; ena yacovi iko vakidacala na cava veivakarusai, ko na sega ni kila. 12Mo tu dei mada e na nomu dausorosoro, kei na levu ni nomu daucaka mana lasu, a ya ko sa dauoca kina ni ko sa gone ka yacova na gauna o qo; de yaga beka ga vei iko, do ko na gumatua kina. 13O sa oca e na levu ni nomu daubose. Ia ko ira era dauvakarai mata ni lagi, era dauvakarai kalokalo, era daukila vula vou, me ra tu mada mai ka vakabulai iko mai na ka ena yacovi iko. 14Raica, era na vaka na vu-ni-sila; ena vakamai ira na buka; era na sega ni vakabulai ira rawa vakai ira mai na kaukauwa ni yameyame ni buka; ena sega na qilaiso me ia kina na vavavi, se na buka me tatalai e matana. 15Ena vakaoqo vei iko ko ira ko a dauoca e na vukudra, era dauveivoli kei iko ni ko sa gone ka yacova na gauna o qo: era na dui lako sese yadua ki nodratou; ena sega e dua me vakabulai iko.
Currently Selected:
Ai Vola I Isaia, na Parofita 47: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
