Markus 7
7
Parenta Alatala pade ada to Yahudi
(Mat. 15:1-20)
1Hangkani tempo to Farisi pade bahangkua dua to nataualu buku Taurat narata lako Yerusalem nampotomuka Yesus. 2Tempo ee mai lainaara ana-ana guru Yesus nangkoni hante pale to narumu habana momara nowano nantuku ada to Yahudi. 3Apa humawee to Yahudi, neparauli to Farisi, momara madota mangkoni ane pomara mowano, apa iweemi ada tumpulokora. 4Ane manculira lako pasar momarahana nadota kapopola nangkoni ane pomara maniu ncala. Nadeadipi kabiahaa ntanina to laipoingkukara, ewa ane mokabohi panginua, here, bo parewa-parewa awu ntanina to laibabei lako tambaga. 5Etu pade to Farisi hante to nataualu buku Taurat nepekune hi Yesus, “Napa pade ana-ana guru-Mu momara nampoingkuka ada tumpulokota? Momarahana nowano ncala pade nangkonirada.”
6 #
Yes. 29:13 Nehono Yesus, “Nakonomi lolita Alatala, to laiparata nabi Yesaya nangkambelai komi to nabelo wongko, ewa naria laitulihi rara Buku to Nagaha iwei,
‘Todea i ngata ei nampemabohe-'A hante wiwira,
naupawee rarara na'awa lako hi Aku.
7Moma naria bunura nampasombaa-'A,
apa patudu to laipatudukara tau ntanina, aga atura to laibabei manuhia.’
8Parenta Alatala laihapuakami, pade patudu to laibabei manuhia laipoingkukami.”
9Napu ee Yesus nangulikara, “Moma nabelo ingkumi nohapuaka parenta Alatala bona mampakaroho adami. 10#Kel. 20:12; 21:17; Im. 20:9; Ul. 5:16Apa nabi Musa nanguli, ‘Bila tuamamu pade tinamu!’ ‘Hema to mangkamo tuamana ba tinana, kana rapatehi.’ 11Naupawee komi to Farisi nopatudu iwei, ‘Ane maria hadua mangulika tuamana bo tinana ane napa to mahipato napopewai halaku petulungi hi hira, laipopewaina hi Alatalami,’ 12tauna ee mai momami paliumi mobabei hangu hangaa mampatulungi totuana. 13Hante patudumi lauria, komi nampapoti lolita Alatala habana nantuku ada tumpulokomi. Nadea ngaadipi kabiahaa to ewa lauria to laipoingkukami.”
14Napu ee Yesus nangkio nculi todea pade iulika-Nara, “Epe pura komi pade mipairara mpuu napa to Ku'ulika komi. 15Humawee to lako hawalikuna to nehua i rarata moma namala nampakarumuta, naupawee napa to nehuwu lako rarata, eemi to nampakarumuta.” [16Hema to natalingaa, epe belo to iuli-Ku lauria.]
17Napu ee, hangka nehuapi Yesus i rara hou nampalahira todea, narataramo ana guru-Na nepekune hi Hia napa batua porapa to iuli-Na. 18Yesus nampahonoira, “Nahibali motoda komi hante tau ntanina. Moma ipahami napa to iuli-Ku. Moma to rakoni pade to rainu mampakarumuta i tingoo Alatala. 19Apa konia pade ue moma nehua rara pekirita, aga nehua rara ntai pade ratadi i hawalikuna.” Lauria iuli-Na nopanoto ane humawee to ikonita moma mampakarumuta i tingoo Alatala. 20Yesus nanguli mui, “Napa to nehuwu lako rarata to nadaa, etu to mampakarumuta i tingoo Alatala, 21apa lako rarata nehuwu pampekiri to nadaa, pogau hala, nangio, nepatehi, 22nebualohi bo neago, naliu ganta, ingku to nadaa, nepatiwoo, dota rara to nadaa, hiri rara, nepakudaa, nahombo pade nakoo rara. 23Humawee ingku to nadaa lauria, nehuwu lako rarata pade nampakarumuta i tingoo Alatala.”
Bangkele lako Siro-Fenisia to neparahaya
(Mat. 15:21-28)
24Napu ee neongkomi Yesus lako ngata Genesaret ee, rau i ngata Tirus, pade nehua i hangu hou, apa moma-'I nadota maria to mangincani karata-Na. Naupawee karata-Na moma namala laipopalerui-Na. 25Tempo ee naria hadua to tina to anana bangkele laipehua anudaa. Pangepena karata Yesus, rau'i notingkodu i paa Yesus. 26To tina ee to Siro-Fenisia, moma'i to Yahudi.#7:26 Tempo katuwu Yesus i dunia, to Yahudi nanguli ane tauna to moma Yahudi natepahawaliku lako petiroi Alatala, pade ntehangkani tauna ewa ee mai laikiora ‘dike to moma naria tumpuna.’ Perapina hi Yesus, bona mampopalai anudaa to nampehuai anana.
27Naupawee Yesus nangulika'i, “Paleleramo ngana mangkoni moilodo duura mabohu, apa moma mahipato mangala roti to laipahadiakara ngana pade rateneka dike.”
28Nehono'i to tina ee mai, “Nakono Tuama! Naupawee dike to i une meja muihawo nangkoni hewu konia ngana to nanawu lako lolo meja.”
29Napu ee Yesus nangulika'i, “Habana to iulimu etu, panculimoko apa nalaimi anudaa to nampehuai anamu.”
30Nanculi mpuumi to tina ee rau houna, lairatana ria anana noturu i poturua, pade anudaa to nampehuai'i nalaimi.
Yesus nampakauri hadua to nawongo bo moma nahowa nojarita
31Napu ee, neongkomi Yesus lako ngata Tirus nantara ngata Sidon rau Rano Galilea i lentongo ngamba Dekapolis. 32I ria laikenira hadua tauna to nawongo bo moma nahowa nojarita pade perapira hi Yesus bona Nadama'i. 33Yesus nangkeni tauna ee mai nopatani lako todea. Hangka natepatanirapa, Yesus nopahua karawe-Na rara talinga tauna ee mai. Napu ee notailumi Yesus pade laitui-Na dila tauna ee. 34Napu ee, Yesus notingoda nantingara langi, nodii inoha-Na pade nanguli hi tauna ee, “Efata!”, batuana: Katebeamo!
35Ngkali natebeami talinga tauna ee mai pade namalami ne'epe. Iwee mui dilana naurimi pade nahowami nojarita. 36Yesus nangulikara tauna to naria i hee, bona nemo ratutura hi tau ntanina napa to nadupa to laibabei-Na. Naupawee himukuana laitagi-Nara, laipopotolelera laumi kareba to nadupa to laibabei Yesus. 37Humawee tauna namangka nampanaa napa to laibabei Yesus pade iulira, “Humawee to laibabei-Na nabelo. To nawongo ne'epe, to nabobo nojarita.”
Currently Selected:
Markus 7: MYL
Highlight
Share
Copy
Want to have your highlights saved across all your devices? Sign up or sign in
