Markus 6

Yesus moma laitarima i Nazaret

(Mat. 13:53-58; Luk. 4:16-30)

1Napu ee mai Yesus neongko lako Kapernaum nanculi rau i ngata-Na Nazaret hante ana-ana guru-Na. 2Tempo eo Pentuua to Yahudi nopamulami Yesus nopatudu i hou pepuea. Nadea tauna to nangepe-'I namangka pade iulira, “Lako rima lairata-Na to laipatuduka-Nata ei mai? Lako rima lairata-Na noto? Bewa pade namala-'I nobabei to nepakahera? 3Laincanita ane Hia ei mai tuka hou moto-'I. Tina-Na Maria pade ompi-Na hira Yakobus, Yoses, Yudas pade Simon. Ompi-ompi-Na bangkele no'oha doheta heira.” Eemi habana hampena momaramo nadota nantarima-'I.

4Lauparia Yesus nangulikara, “Hadua nabi laibila i rima-rima ngata karauana, naupawee i ngatana, i lentongora ompi-ompina bo i houna moto moma'i laibila.” 5Apa nadea tauna moma nantarima Yesus, moma-'I namala nobabei nadea ngaa to nepakahera i Nazaret. To laibabei-Na i ria wuwu nampakauri haki bahangkua dua tauna aga hante noboli pale-Na i tanuanara. 6aNahera mpuu-'I Yesus, napa pade momara neparahaya.

Yesus nampahuro hampulu rodua rasul

(Mat. 10:5-15; Luk. 9:1-6)

6bNapu ee mai, Yesus nomako natiku ngata-ngata ntanina, nopatudu tau-tauna nangkambelai lolita Alatala. 7Laikio-Na hampulu rodua ana guru-Na, laipopodohe-Na rodua-rodua pade laihuro-Na. Kapomara neongko, laiwaika-Nara baraka bona mamalara mampopalai anudaa, 8pade laiulika-Nara nemora mangkeni napa-napa i pomakoara, lua aga to mamala rakeni. Roti, doi, pade boku ntanina moma mamala rakeni. 9Mamalara mohapatu, naupawee momara mamala mangkeni waru. 10Kapolaana Yesus nangulikara, “Ane rau komi i hangu ngata pade maria to mantarima komi i houna, katidamo komi i ria duumi meongko nculi lako ria, 11pade ane maria hangu ngata to moma mantarima komi pade moma mangepe napa to iulimi, pehuwumo komi lako ngata ee, tontahi awu lako paami halaku pepaingai hi hira.”

12Napu ee neongkoramo ana guru Yesus, rau nangkarebai lolita Alatala hi humawee tauna, bona mancororamo lako doha-dohara. 13Nadea anudaa to nampehuai tau-tauna laipopalaira, pade to nadua laigereira hante lana hampena nauriramo lako hakira.

Yohanes to Pediu laipatehi

(Mat. 14:1-12; Luk. 9:7-9)

14Tempo ee mai Magau Herodes mui nangepe kareba nangkambelai Yesus, apa hanga Yesus laidulu ncani purami, pade tau-tauna nanguli iwei, “Kakonona Hia ee rau, Yohanes to Pediu to laipakatuwu nculi lako kamateana. Etu pade nabaraka-'I nobabei to nepakahera.”

15To ntanina mui nanguli, “Moma, hia ee rau Nabi Elia.”

Pade naria mui to nanguli, “Hia ee rau hadua nabi to nahibali hante nabi owi.”

16Nangepe lauria, Herodes nangulikara, “Kakonona Hia ee rau Yohanes to Pediu to ipuduku woona, naupawee laipakatuwu nculimi.”

17Pade ewa ee iuli Herodes, apa hia moto wengi to nantudu tauna nampahoko Yohanes to Pediu pade nampahilu'i bo nopahua'i i rara tarungku. Herodes nobabei lauria habana hia nangala Herodias, bangkele Filipus ompina moto, laipobangkelena. 18Apa nadea ngkani'i Yohanes nangulika Herodes iwei, “Momako mamala mangala bangkele ompimu mupobangkele.” 19Eemi pade Herodias nopakuku hodona hi Yohanes. Mingki napatehi'i, moma mui'i namala, 20apa Herodes natongko rarana hi Yohanes, habana incanina ane Yohanes ee mai tauna to nanoro pade nabelo ingkuna. Etu pade laipotolawaina'i bona nemo'i rapatehi. Butu ngkanina Herodes nangepe Yohanes nojarita, nokalihe oa rarana, naupawee nagoe moto mui'i nangepe Yohanes nojarita.

21Kahuduana narata loga belo Herodias. Tempo ee mai, eo pampalingaa pangotea Herodes. Laibabeina huha pade laiokana humawee maradika ngata, humawee komandaa tantarana hante humawee to napangkaa to no'oha i Galilea. 22Bula huha ee mai, nehua hadua toronaa, ana Herodias i rara pohuhaa pade noence i tingoora Magau Herodes hante humawee to ratana. Poence toronaa ee mai nampakasana rara Herodes hante humawee to ratana. Herodes nangulika toronaa ee mai iwei, “Perapi napa to mupodota, kana kuwaikako!” 23Napu ee notipami Herodes hante nosumpa, iulina, “Nau napa muperapi hi aku kana kuwaikako, naupa hantanga lako kamagauaku.”

24Nangepe lauria toronaa ee mai rau nampotomuka tinana, pade nepekune, “Napa to nabelo kuperapi hi magau?”

Nehono tinana, “Perapi woo Yohanes to Pediu!”

25Pangepena lauria dungku raumi hi magau pade iulina perapiana iwei, “Dotaku welau ei muwaika'a woo Yohanes to Pediu raboli i lolo baki.”

26Nangepe ee mai najuu mpuu rara Herodes. Naupawee, momami namala nodii nculi napa to iulina, apa bela nosumpa'imi i tingoora to ratana. 27Lauparia Herodes nantudu hadua tantarana rau mohamale Yohanes to Pediu. Rau mpuumi tantara to itudu ee nohamale Yohanes to Pediu i rara tarungku. 28Laikenina woo Yohanes to Pediu, laibolina i lolo baki, pade laiwaikana hi toronaa ee mai. Toronaa ee nangkeni woo Yohanes to Pediu hi tinana.

29Pangepera ana guru Yohanes to nadupa lauria, narataramo nangala wataloka Yohanes, pade laitanara.

Yesus nopakoni nelabi alima ncobu dua tauna

(Mat. 14:13-21; Luk. 9:10-17; Yoh. 6:1-13)

30Nanculirapa hampulu rodua rasul lako nangkarebai Kareba Belo, nahiromu nculiramo hante Yesus pade nangkewo humawee to laibabeira pade to laipatudukara tau-tauna. 31Tempo ee mai, nadea mpuu tauna to narata hampena momami naria logara nangkoni. Nampahilo lauria, Yesus nangulikara ana guru-Na, “Kitamo rau i kalinoana bona mentuuta hangoni.” 32Lauparia neongkomi Yesus hante ana-ana guru-Na nencawi duanga rau mengkalino i kalinoana. 33Naupawee, nadea tauna to nampahilora neongko, laincanira rima to rakarauira Yesus pade ana-ana guru-Na. Aji, pari-parirami tauna to lako butu ngata nomako nantuku dala lorena hampena hira lodo narata i karaua Yesus hante ana-ana guru-Na ee mai. 34Pehompo Yesus lako duanga, laihilo-Naramo todea ee mai. Lauparia nehuwu ahi rara Yesus nampahilora, apa hira ee mai ewa bimba to moma naria to poewuna. Napu ee nopamulami Yesus nopatudura nadea ngaa nangkambelai poparentaa Alatala.

35Lau maholopi eo, narataramo ana guru-Na hi Hia pade nangulika-'I, “Para malimaumi lauria, pade i kalinoanata ei. 36Tuduramo todea ee rau i ngata-ngata to namohu lako hei, bona raolira pangkoni.”

37Naupawee Yesus nangulikara, “Komi to kana mopakonira.”

Nehonora ana guru-Na, “Aji, kana kioli roti to olina roatu doi halaka#6:37 Roatu doi halaka nahibali hante tomo to pobago walu mula tempo Yesus natuwu i dunia. mopakonira todea ei mai?”

38Naupawee nepekune nculi Yesus hi hira, “Hangkua ongu roti to naria hi komi? Pareha olu!”

Hangka laiparehara, iulikara-'I, “Naria ei mai alima ongu roti pade rongkau bau aga.”

39Napu ee Yesus nantudura todea moncuna bahangkua mpobagia i lolo kawoko. 40Noncuna mpuuramo tauna ee mai i lolo kawoko, naria to hatu dua hampodohea, naria mui to alima mpulu dua hampodohea. 41Napu ee mai laiala-Nami alima roti pade romaa bau ee, laitingara-Na langi, pade nohambaya-'I nosukuru hi Alatala. Napu ee roti ee laitubi-tubi-Na pade laiwaika-Na hi ana-ana guru-Na bona ratirakara hi todea ee mai. Iwee moto mui laibabei-Na hante bau to romaa ee. 42Humawee tauna nangkoni duura nabohu. 43Napu ee ana-ana guru Yesus nopalimpuru roti bo bau to nelabi. Naponu hampulu ropangkoloapi labina. 44Maria alima ncobu dua balailo to nangkoni.

Yesus nomako i lolo ue

(Mat. 14:22-33; Yoh. 6:16-21)

45Napu ee, tudu-Naramo Yesus ana guru-Na mencawi i rara duanga bona moilodoramo rau i dipo rano, i ngata Betsaida, pade todea ee mai laitudu-Na manculi rau i ngatara. 46Nanculirapa todea ee rau i ngatara, nanakemi Yesus rau i bulu pade nohambaya.

47Lau mangkawengiapi, duanga to laihawira ana guru-Na i lentongo ranomi, naupawee Yesus i lorenadipi hadudua-Na. 48Hangka laihilo-Na napepa mpuu iepera ana guru-Na nowohe duanga, habana naria ngolu bohe namparumpara. Ba tinti tolu parabaa, naratami Yesus hi ana-ana guru-Na nomako i lolo ue, pade ntumoni lailiu-Nara.

49Pangkahilora Yesus nomako i lolo ue, iulira hira hetadi. Lauparia nongareramo, 50apa nakonce mpuura nampahilo-'I.

Naupawee Yesus nangulikara, “Pakarodo rarami! Nemo maeka, Aku ei.”

51Napu ee mai nencawimi Yesus rau i lolo duanga dohera, pade ngolu to nantawiri ee naorami. Ana-ana guru-Na namangka pade naingu bewa Yesus nobabei humawee lauria, 52apa naupa laihilorami Yesus nopakoni todea to alima ncobu dua hante alima roti pade rongkau bau, poma oara nengkao hema-'I kakonona Yesus ee mai, habana nakoo rarara.

Yesus nampakauri tau-tauna to nohaki i ngata Genesaret

(Mat. 14:34-36)

53Karata Yesus hante ana-ana guru-Na i dipo rano, nehomporamo i ngata Genesaret pade duangara laibolira i wiwi rano ee. 54Pehompora lako duanga, dungku laincanirami todea ane Hia ee Yesus. 55Lauparia nokumenoramo rau nangkarebai hi humawee tauna nangkambelai peonga Yesus, pade nopamularamo nangkowa tauna to nohaki hante alira, rau laikenira i rima kariaa Yesus. 56I rima-rima ngata to laikaraui Yesus, belo i ngata kodi ba i ngata bohe, kana nariara tauna nangkeni to nohaki rau i karoaana, pade perapira mpuu hi Yesus bona mamalarahawo to nohaki mampatui nau wuntu waru pokarolapii-Na aga. Humawee tauna to nantui wuntu waru-Na, nauri lako hakira.

Currently Selected:

Markus 6: MYL

Highlight

Copy