Markus 8
8
Yesus nopakoni opo ncobu dua tauna
(Mat. 15:32-39)
1Hangkani tempo, nadea muiramo tauna nahiromu dohe Yesus. Momahawo naria koniara, etu pade Yesus nangkiora ana guru-Na pade iulika-Nara, 2“Na'ahi rara-Ku nampahilora todea ei mai. Tolu eoramo dohe-Ku i hei pade moma naria koniara. 3Ane Kutudura manculi rau houra hante maoro, madungka maliwehara mei i lentongo dala, apa nariara to narata lako ka'awaana.”
4Nehonora ana guru-Na, “Kita ei mai i kalinoana. Tarata rima konia tapakonikara humawee tauna ei bona mabohura?”
5Yesus nampekunera, “Hangkua roti to naria hi komi?” Nehonora, “Papitu ongu.”
6Napu ee Yesus nantudura todea ee mai noncuna i tana. Yesus nangala papitu ongu roti ee mai pade nosukuru-'Imi hi Alatala. Napu ee laitubi-tubi-Na pade laiwaika-Na hi ana-ana guru-Na, bona ratirakara hi todea ee mai. 7Naria mui bahangkua maa bau kodi hi hira. Laihambayani-Na bau-bau ee mai pade laipetudui-Na bona ratirakara hi todea ee mai. 8Humawee tauna nangkoni duura nabohu. Napu ee ana-ana guru Yesus nopalimpuru labi roti, papitu pangkoloapi kadeana. 9Ba maria opo ncobu dua tauna to nangkoni.
Napura nangkoni, Yesus nantudura manculi rau houra. 10Naliu ee Yesus nencawi duanga hante ana-ana guru-Na pade neongkoramo rau Dalmanuta.
To Farisi nerapi tanda
(Mat. 16:1-4)
11Napu ee, narataramo bahangkua dua to Farisi nonebili hante Yesus. Hira mingki mopanawu Yesus, aji laiperapira hi Yesus bona Nababei tanda to nepakahera mampahiloi ane nakono-'I narata lako huruga. 12Pangepe-Na perapiara ee mai, Yesus nobunca inoha-Na pade iuli-Na, “Napa pade hira to natuwu tempo ei nerapi tanda? Mpuu-mpuu Ku'ulika komi, komi to natuwu tempo ei, moma komi rawai tanda.” 13Napu ee, laipalahi-Naramo Yesus pade nencawi-'Imi rara duanga neongko rau dipo Rano Galilea.
Nangkambelai ragi to Farisi bo ragi Herodes
(Mat. 16:5-12)
14Tempo ee, ana-ana guru Yesus moma ilingara nangkeni roti, hangu roti aga to naria rara duangara. 15Yesus nampalingaira ana guru-Na iuli-Na, “Pakabelo, pade kana mainga komi hi ragi to Farisi bo ragi Herodes.”
16Ana-ana guru-Na nampomeuli hore hira napa to laiuli Yesus lauria, iulira, “Nemo-nemo pade iuli-Na lauria, habana moma ilingata nangkeni roti.”
17Naupawee ncani-Na Yesus napa to laipomeuliira, pade iulika-Nara, “Napa pade pomeuliimi kamomana naria roti laikenimi? Poma oa komi nengkao? Poma oa ncanimi? Ba nakoo'di rarami? 18Naria matami, naupawee moma komi nenaa. Naria talingami, naupawee moma komi ne'epe. Momami lailingami 19potubi-tubi-Ku alima ongu roti laikonira alima ncobu dua tauna? Hangkua pangkoloapi labi roti to ipahirurumi?”
Nehonora ana guru-Na, “Hampulu ropangkoloapi.”
20“Pade potubi-tubi-Ku papitu ongu roti laikonira opo ncobu dua tauna, hangkua pangkoloapi labina to ipahirurumi?”
Nehonora ana guru-Na, “Papitu pangkoloapi.”
21Napu ee Yesus nangulikara, “Poma oa komi nengkao?”
Yesus nampakauri hadua tauna to naburo i Betsaida
22Napu ee mai, naratami Yesus hante ana-ana guru-Na i ngata Betsaida. Tau-tauna to i hee nangkeni hadua tauna to naburo hi Yesus, pade perapira bona Nadama'i. 23Yesus nangkakamu pale tauna to naburo ee mai, pade nangkeni'i rau hawaliku ngata. Napu ee laitailuhi-Na rara mata tauna to naburo ee mai, boli-Na pale-Na i mata tauna ee pade pekune-Na'i, “Nariami to narawa laihilomu?”
24Tauna ee mai nenaa mali tingoona pade iulina, “Hiloku tauna, naupawee momara narawa belo, ewa kau to nomako-mako.”
25Yesus nodamaki mata tauna to naburo ee mai, pade narawa belodi penaana bo naurimi. Hangu hangaa narawami laihilona. 26Napu ee, Yesus nantudu'i manculi rau houna pade iulika-Na'i, “Nemoko olu mehua rara ngata.”
Pangakua Petrus ane Yesus ee Ana Alatala
(Mat. 16:13-20; Luk. 9:18-21)
27Napu ee, Yesus hante ana-ana guru-Na neongko rau ngata-ngata to namohu hante ngata Kaisarea Filipi. Lentongo dala, Yesus nampekunera ana guru-Na, “Panguli tauna, hema-'A kakonona?”
28Ana-ana guru-Na nehono, “Nariara to nanguli Yohanes to Pediu. Naria muira to nanguli Elia, pade to ntanina mui nanguli hadua lako nabi-nabi owi.”
29Yesus nepekune hi hira, “Ane pangulimi komi, hema kakonona Aku ei mai?”
Nehono Petrus, “Ikomi Magau to Pepakahalama.”
30Napu ee Yesus nampatagi mpuura ana guru-Na bona nemo rakewora ane Hiami Magau to Pepakahalama to laitipa Alatala#8:30 Magau to Pepakahalama to laitipa Alatala ee mai laiuli ‘Mesias’ rara baha Ibrani, pade laiuli ‘Kristus’ rara baha Yunani..
Pangkewo Yesus to pamulana nangkambelai bewa-'I mei mamate
(Mat. 16:21-28; Luk. 9:22-27)
31Napu ee, nopamulami Yesus nopatudura ana guru-Na iwei, “Aku, Ana Manuhia, kana mangkolo madea ngaa kahehaa pade moma-'A ratarimara totua ngata to Yahudi, imam-imam to i matana bo to nataualu buku Taurat, duuna rapatehira-'A. Naupawee eo katoluna matuwu nculi-'A mei lako kamatea-Ku.” 32Humawee lauria laiuli pakanoto-Na hi hira.
Nangepe to iuli Yesus lauria, Petrus nampadii-'I rau humpiina pade nangkamaro-'I.
33Yesus nampeilira ana guru-Na pade nampakahodo Petrus, iuli-Na, “Magau Heta, petibomoko lako tingoo-Ku! Apa iko nampekiri to laipekiri manuhia moto, moma laipekirimu napa to laipekiri Alatala.”
Patudu Yesus nangkambelai bewa mantuku-'I
34Napu ee mai, Yesus nangkiora todea hante ana-ana guru-Na pade iulika-Nara, “Butu tauna to mingki mantuku-'A, hia kana mampehapuka wotona moto, mangkolo kahehaa pade mantuku-'A. 35Apa hema-hema to mampomaihi tuwuna moto, moma mei narata katuwua to moma maria kahuduana. Pade hema-hema to moma mampomaihi tuwuna habana nantuku-'A bo habana Kareba Belo, hia mei kana rapakahalama. 36Moma naria bununa hadua tauna mamparata humawee ihi dunia, ane moma'i narata katuwua to moma maria kahuduana. 37Pade moma naria to mamala rapake mohula katuwua to moma maria kahuduana ee. 38Hema to maea habana Aku pade mampoea lolita-Ku i tingoo tauna to moma natigu hi Alatala bo nadoha tempo ei, Ana Manuhia mui maea mampangakura ane marata-'I hante malaeka-malaeka to nagaha rara baa baraka Tuama-Na.”
Currently Selected:
Markus 8: MYL
Highlight
Share
Copy
Want to have your highlights saved across all your devices? Sign up or sign in
