Markus 9
9
1Iulikana muira Yesus, “Mpuu-mpuu Ku'ulika komi, maria mei bahangkua dua tauna to naria i hei to moma mamate kapomana rahilora Alatala moparenta halaku Magau hante baraka-Na.”
Yesus laipemabohe i lolo bulu
(Mat. 17:1-13; Luk. 9:28-36)
2Ono eo lako hee, Yesus nangkeni Petrus, Yakobus pade Yohanes rau nanake bulu to nalangko. Wuwu hira aga i ria. I lolo bulu ee mai Yesus nobali tari-Na i tingoora. 3Waru-Na nabula ngkihi, nengkila-ngkila. Moma hema haduaa manuhia i dunia ei to namala notopohi waruna bona mabula ngkihi ewa ee mai. 4Tolu dua ana guru-Na ee mai ngkali nampahilo Elia pade Musa nampojaritaka Yesus.
5Nampahilo lauria, Petrus nangulika Yesus, “Rabi, nagoe mpuu kami i hei. Nabelo ane kibabei tolu bamaru, hangu hi Iko, hangu hi Musa, pade hangu hi Elia.” 6Petrus nanguli ewa ee mai apa moma incanina napa to nauli, habana naeka mpuura.
7Naliu ee mai nehuwu gawu to nampakaolu Yesus, Elia pade Musa, pade lako rara gawu ee mai iepera Alatala nololita, “Eimi Ana towea-Ku. Epe pade turuhi-'Imi.” 8Napu ee mai natiku lainaara momami naria tau ntanina dohera, wuwu hadua Yesusdimi.
9Panaura Yesus hante ana-ana guru-Na lako lolo bulu ee mai, laipalingai-Nara bona nemo olu rakewora hi hema-hema nangkambelai napa to ihilora i lolo bulu, kapomana Ana Manuhia matuwu nculi lako kamatea.
10To laiuli Yesus lauria laipairarara mpuu, pade laipomeuliira hore hira napa batuana Yesus nanguli, Hia matuwu nculi lako kamatea. 11#Mal. 4:5Napu ee mai, nepekunera hi Yesus, “Napa pade to nataualu buku Taurat nanguli ane Elia kana marata moilodo?”
12Nehono Yesus, “Nakono to iulira etu. Elia kana marata moilodo mampakabelo hangu hangaa. Naupawee bewa to laitulihi nangkambelai Ana Manuhia, ane Hia mei mamparata madea kahehaa pade rapopore? 13Ku'ulika komi kakonona naratami Elia, pade dota-dota rarara tauna nobabei hangu hangaa to nadaa hi hia, ewa to laitulihi rara Buku to Nagaha nangkambelai hia.”
Yesus nampopalai anudaa lako hadua ngana to nabobo
(Mat. 17:14-21; Luk. 9:37-43)
14Panculi Yesus, Petrus, Yakobus pade Yohanes hi ana-ana guru to ntanina, laihilora nadea tauna nahiromu dohera ana-ana guru Yesus ee mai pade bahangkua dua to nataualu buku Taurat bulara nonebili hante ana-ana guru Yesus. 15Hangka todea ee mai nampahilo Yesus, namangka purara pade pari-parira nampotomu-'I. 16Yesus nampekunera ana guru-Na, “Napa to laipomebiliimi hante to nataualu buku Taurat etu?”
17Hadua tauna lako lentongora todea ee nangulika Yesus, “Guru, aku nangkeni anaku hi Iko, habana hia laipehua anudaa to nampakabobo'i. 18Butu ngkanina anudaa ee mampehuai'i, laidungkana'i i lolo tana, ngangana nowura, ngihina nokiro, pade wotona nawali nakadu. Laiperapikumi hi ana-ana guru-Mu bona rapopalaira anudaa ee mai lako hi anaku, naupawee moma'i namala laipopalaira.”
19Yesus nangulikara, “He, komi tauna to moma neparahaya! Hangkuapi kahae-Ku matida dohemi? Hangkuapi kahae-Ku mohabara hi komi? Keni tumai ngana etu!”
20Laikenirami ngana ee mai hi Yesus. Hangka anudaa ee mai nampahilo Yesus, lairidina woto ngana ee duuna nanawu nengkalule i tana, pade ngangana nowura. 21Napu ee Yesus nepekune hi tuama ngana ee mai, “Hangkuami kahaena anamu laipehua anudaa ewa ei mai?”
Nehono tuama ngana ee, “Lako kakodiana. 22Pade naharo anudaa ee mai nangkeni'i rau rara apu ba rara ue bona mampatehi'i. Aji, ane maria to mamala Mubabei bona mauri'i ngana ei mai, kiperapi potowe kamikawo pade tulungi kami.”
23Nehono Yesus, “Pangulimu, ane mamala-'A? Moma naria to moma mamala rababei hi tauna to neparahaya!”
24Dungku nongaremi tuama ngana ee, iulina, “Laiparahayaku-Ko! Tulungi'akuwo to moma naroho peparahayaku ei!”
25Hangka laihilo-Na Yesus nadeaki tauna narata nahiromu i humpii-Na, laikamaro-Na anudaa ee pade iulika-Na'i, “He, anudaa to nepakabobo pade nepakawongo. Ku'ulikako! Palaimoko lako woto ngana ei, pade nemopi mupehuai nculi'i!”
26Anudaa ee mai nongare pade lairidi-ridina woto ngana ee, napu ee nalaimi lako woto ngana ee mai. Ngana ee mai hiloana ewa to namatemi, etu pade nadea tauna nanguli, “Ngana ee mai namatemi.” 27Naupawee Yesus nangkakamu pale ngana ee mai pade laitulungi-Na'i nokangkore. Nokangkore mpuumi ngana ee mai.
28Napu ee mai, Yesus hante ana-ana guru-Na nehua rara hou. Hangka momarapa naria todea i humpii Yesus, ana-ana guru-Na nepekune hi Hia, “Napa pade moma'i namala laipopalai kami anudaa to nampehuai ngana ee wei?”
29Nehono Yesus, “Anudaa to hangaa ei mai mamala'i rapopalai hante mohambaya aga.”
Pangkewo Yesus karongkanina nangkambelai bewa-'I mei mamate
(Mat. 17:22-23; Luk. 9:43-45)
30Napu ee Yesus pade ana-ana guru-Na neongko lako ria nantara Galilea. Moma-'I nadota Yesus maria to mangincani rima karaua-Na, 31apa bula-Na nopatudu ana-ana guru-Na, iwei, “Ana Manuhia kana rapopewai i rara mpale manuhia, pade rapatehira-'I. Naupawee eo katoluna matuwu nculi-'I lako kamatea.”
32Ana-ana guru-Na momara nengkao napa to iuli Yesus, naupawee momara nabati nampekune-'I.
Hema to neliu pobununa lako humawee ana guru
(Mat. 18:1-5; Luk. 9:46-48)
33Napu ee, naratami Yesus pade ana-ana guru-Na i Kapernaum. Nehuarapa i rara hou, Yesus nampekunera ana guru-Na, “Napa to laipomebiliimi bulata nomako he?”
34Naupawee momara nowotu, apa bulara nomako he, hira nampomebilii hema to neliu pobununa lako humaweera. 35Lauparia noncunami Yesus pade laikio-Nara ana guru-Na to hampulu rodua ee, pade iulika-Nara, “Hema to mingki meliu pobununa, hia kana mawali ewa tauna to moma naria bununa, pade mawali batua humawee tauna.”
36Napu ee Yesus nangkakamu pale hadua ngana kodi to i humpii-Na pade laipopokangkore-Na i lentongora, laikapui-Na ngana ee mai pade iulika-Nara, 37“Hema-hema to mantarima hadua ngana kodi to ewa ei habana tauna ee neparahaya hi Aku, hia mui nantarima-'A. Pade hema-hema to nantarima-'A, moma wuwu Aku to laitarimana, naupawee hia mui nantarima Alatala to nantudu-'A tumai.”
Hadua to moma ana guru Yesus nampopalai anudaa
(Luk. 9:49-50)
38Napu ee Yohanes nangulika Yesus, “Guru, laihilo kami naria hadua tauna to moma'i doheta, nampopalai anudaa nampake hanga-Mu. Aji, laitagi kami tauna ee mai apa moma'i doheta.”
39Naupawee Yesus nanguli, “Nemo mitagi'i, habana moma naria tauna to mamala mobabei to nepakahera mampake hanga-Ku, hampiniri mata mampopore-'A. 40Hema-hema to moma nampaewata, hia ee mai doheta. 41Ku'ulika komi, kakonona hema-hema to mampawaika komi hancangkiri ue inu habana komi to pantuku-Ku, natantu amimi tauna ee mantarima tomo lako hi Alatala.”
Patudu bona nemo mopahalatara tauna
(Mat. 18:6-9; Luk. 17:1-2)
42“Hema-hema to mopahalatara hadua lako ngana kodi ei hampena momami meparahaya hi Aku, aginalaupi tambolo tauna ee rapantoeni watu pogilia to nabohe pade ratene'i i rara tahi. 43Ane palemu to mampakanawuko i rara doha, tompomi. Aginalaupako mopale hamika naupawee mehuako i rara katuwua to moma maria kahuduana. Nemo mopale ntimalia naupawee rateneko i naraka, rara apu to moma namala laipatehi. 44[I ria mei ule bau hante apu moma maria mamate.] 45Iwee mui ane paamu to mampakanawuko i rara doha, tompomi. Aginalaupako mopaa hamika naupawee mehuako i rara katuwua to moma maria kahuduana. Nemo mopaa ntimalia, naupawee rateneko i naraka. 46[I ria mei ule bau hante apu moma maria mamate.] 47Iwee mui ane matamu to mampakanawuko i rara doha, dungkimi. Aginalaupako mehua rara poparentaa Alatala hante hamika matamu. Nemo romika matamu maria naupawee rateneko i rara naraka. 48#Yes. 66:24I ria mei ule bau hante apu moma maria mamate.
49Humawee kurban to laijuju hi Alatala kana rapoii. Wee moto mui butu dua tauna kana rapakagaha hante apu.
50Poi nabelo ami, naupawee ane poi mawali matawoo, hante napapi mampakapoiki? Aji, kana maria oa poi rara wotomi pade batena moto oa komi matuwu mohingkabelo hadua bo hadua.”
Currently Selected:
Markus 9: MYL
Highlight
Share
Copy
Want to have your highlights saved across all your devices? Sign up or sign in
