Markus 10
10
Patudu Yesus nangkambelai pogaa to poncamoko
(Mat. 19:1-9)
1Yesus neongko lako ngata Kapernaum rau i Yudea pade rau i dipo Ue Yordan. I ria nadea tauna nahiromu i humpii-Na, pade ewa kabiahaa-Na laipatudu-Nara.
2Lauparia narataramo bahangkua dua to Farisi madota mopanawu Yesus hante nepekune iwei, “Bewa popantarui-Mu? Mantuku atura agamata, mamaladihawo hadua balailo mampogaaka bangkelena?”
3Nehono Yesus, “Napa to laiparentakana komi Musa?”
4 #
Ul. 24:1-4
Nehonora, “Musa nampaliu hadua balailo mampogaaka bangkelena, naupawee kana nababei ncala hura pogaa.”
5Napu ee Yesus nangulikara, “Musa notulihi parenta lauria hi komi, apa neliu gaga kakoo rarami. 6#Kej. 1:27; 5:2Naupawee kakonona, hinungkai dunia laipajadi Alatala, laipajadi-Nara balailo pade bangkele. 7#Kej. 2:24‘Etu pade balailo kana mampalahi tuamana bo tinana, pade mopahangu hante bangkelena, 8hampena roduara ee mawali hangu wotoradamo.’ Aji, i tingoo Alatala, to poncamoko momaramo rongu woto, naupawee nawali hangu wotoradamo. 9Etumo, napa to laipahangu Alatala moma mamala rapopogaa manuhia.”
10Hangka i hourapa, ana-ana guru-Na nepekune hi Yesus nangkambelai to iuli-Na lauria. 11Lauparia Yesus nangulikara, “Hema to mampogaaka bangkelena pade mobangkeleki, hia nogau hala pade nadoha hi bangkelena to puu. 12Wee moto mui ane hadua bangkele mampogaaka balailona pade mobalailoki, hia nogau hala.”
Yesus nantiroi ngana-ngana
(Mat. 19:13-15; Luk. 18:15-17)
13Napu ee, bahangkua dua tauna nangkeni ngana-ngana kodi hi Yesus bona Natiroira, naupawee ana-ana guru-Na nampakahodora tauna ee. 14Nampanaa ingkura ana guru-Na ee, nahodo-'I Yesus pade iulika-Nara, “Paleleramo ngana etu marata hi Aku, nemora mitagi, habana tauna to ewa hirami to mawali todea i rara poparentaa Alatala. 15Mpuu-mpuu Ku'ulika komi, hema-hema to moma nampaturuhi Alatala ewa ngana kodi, moma'i mawali todea Alatala.” 16Napu ee, Yesus nangkapuira ngana ee mai pade laidama-Nara bo laitiroi-Na.
To nahugi nakoro mehua rara poparentaa Alatala
(Mat. 19:16-30; Luk. 18:18-30)
17Tempo Yesus nopadola pomakoa-Na, naria hadua balailo nokumeno nampotomuka-'I pade notingkodu i tingoo-Na bo nepekune, “Guru to nabelo, napa to kana kubabei bona kurata katuwua to moma maria kahuduana?”
18Nehono Yesus, “Napa pade iulimu nabelo-'A? Moma naria haduaa tauna to nabelo, wuwu Alatala aga to nabelo. 19#Kel. 20:12-16; Ul. 5:16-20Laincanimu moto parenta Alatala to nanguli iwei, nemo mepatehi, nemo mogau hala, nemo mangio, nemo manguli to moma nakono i tingoo to pobotuhi, nemo mebagiu, bila tuamamu bo tinamu.”
20Nehono tauna ee hi Yesus, “Guru, humaweena lauria laituruhikumi lako kanguraaku.”
21Yesus nampenoto'i hante towe-Na pade iulika-Na'i, “Hangaapi to poma nagana hi iko. Koimoko, pobalumi humawee gagumu pade popewaimi doina hi to nakahiahi bona murata mei gagu i huruga. Napu ee karatamoko mantuku-'A.”
22Pangepena to iuli Yesus lauria, nawali nahau rara tauna ee pade raumi hante juu rarana, apa nadea gaguna.
23Napu ee Yesus nampanaara ana guru-Na to nahiromu i humpii-Na, pade iulika-Nara, “Nakoro mpuu to nahugi mehua i rara poparentaa Alatala.” 24Ana-ana guru-Na nakonce nangepe to iuli Yesus lauria. Naupawee padola-Na Yesus nangulikara, “Ana-ana-Ku, nakoro mpuu mehua i rara poparentaa Alatala. 25Nadolipi hamaa unta mehua rara wulou jaru lako hadua to nahugi mehua rara poparentaa Alatala.”
26Lauparia natetambai kakoncera, pade noneulika hore hira, “Ane wee, hema to mamala rapakahalama?”
27Yesus nampenotora pade iulika-Nara, “To moma naowo hi manuhia, naowo hi Alatala.”
28Petrus nangulika Yesus, “Pue, hangu hangaa laipalahi kamimi pade nantuku-Ko!”
29Iuli-Na Yesus, “Mpuu-mpuu Ku'ulika komi, hema to nampalahi houna, ompina balailo ba ompina bangkele, tinana ba tuamana, ana-anana ba bonena habana nantuku-'A pade nangkarebai Kareba Belo, 30natantumi tempo ei tauna ee kana mamparata nculi hatu ngkani hou, ompina balailo, ompina bangkele, tinana, ana-anana pade bonena, naupa madea ngkani'i rahehaki, pade eo ngkapurina mei narata katuwua to moma maria kahuduana. 31Naupawee nadea tauna to tempo ei laibila, mawali tauna to moma rabila, pade tauna to tempo ei moma laibila, mawali tauna to rabila.”
Pangkewo Yesus katolu ngkanina nangkambelai bewa-'I mei mamate
(Mat. 20:17-19; Luk. 18:31-34)
32Yesus hante ana-ana guru-Na pade bahangkua dua tau ntanina nopadola pomakoara rau ngata Yerusalem. Yesus nomako noilodo. Ana-ana guru-Na nakaekata, pade tauna to netuku nehuwu ekara. Hangkanipi Yesus nangkiora hampulu rodua ana guru-Na nopatani lako todea pade laiulika-Nara napa mei to kana madupa hi Hia. 33Iuli-Na, “Hilo, kita ei mai rara pomakoa rau i Yerusalem. I ria mei Ana Manuhia rapopewai hi imam-imam to i matana pade hi hira to nataualu buku Taurat, pade rabotuhira mei bona rahuku mate-'I. Napu ee rapopewaira-'I hi tau-tauna to moma Yahudi, 34pade Hia mei rapopore, ratailuhi, racambu pade rapatehi. Naupawee eo katoluna mei matuwu nculi-'I lako kamatea-Na.”
Perapia Yakobus pade Yohanes
(Mat. 20:20-28)
35Napu ee Yakobus pade Yohanes, ana-ana Zebedeus, nampamohuki Yesus pade nangulika-'I, “Guru kiharumaka bona madota-Ko mobabei napa to kiperapi!”
36Nehono Yesus hi hira, “Napa to ipodotami Kubabei hi komi?”
37Laihonoira-'I, “Kiperapi bona ane moparentapa-Ko mei halaku Magau, mamala kami moncuna moparenta hingkani-ngkani hante Iko. Hadua mali pangkana-Mu pade hadua mali pangkai-Mu.”
38Naupawee Yesus nangulikara, “Moma incanimi napa to iperapimi. Mipakule mangkolo kahehaa to kana Kukolo, pade mahadia komi rahehaki ewa Aku?”
39Nehonora hi Hia, “Kipakule.”
Yesus nangulikara, “Mikolo ami mei kahehaa-Ku, pade rahehaki ami komi mei ewa Aku. 40Naupawee hema mei to moncuna mali pangkana-Ku ba mali pangkai-Ku, moma Aku to mampakatantu. Laipakatantu-Na amimi Alatala Tuama-Ku hemara to moncuna i poncunaa ee.”
41Nangepe lauria, nahodoramo ana guru to hampulu dua hi Yakobus pade Yohanes. 42Naupawee Yesus nangkio purara pade iuli-Na, “Laincanimi moto kahombora to poparenta to moma nangincani Alatala noparenta todeara. Tauna to nalangko pangkara noparenta todeara hante hekera. 43Moma iwee ane komi. Hema lako hi komi mingki malangko pangkana, hia ee mai kana mampalayani komi ewa hadua batua. 44Pade hema to mingki mawali to pangkenimi, hia kana mawali ewa hadua batua mopahadia napa to miparaluu. 45Apa Ana Manuhia narata, moma bona ralayani, naupawee mampalayani pade mampopewai tuwu-Na mawali petolohi hi tauna to nadea.”
Yesus nampakauri Bartimeus
(Mat. 20:29-34; Luk. 18:35-43)
46Naratami Yesus pade ana-ana guru-Na i ngata Yerikho. Pehuwu Yesus hante ana-ana guru-Na pade nadea tau ntanina lako Yerikho, naria hadua to naburo noncuna i wiwi dala nerapi-rapi, hangana Bartimeus ana Timeus. 47Hangka laiepena Yesus to Nazaret noliu, nongare'i nekio, “Yesus muli Magau Daud, potowe'akuwo!”
48Nadea tauna nampatagi'i pade nantudu'i malino. Naupawee pahimukukina laumi nongare, iulina “Muli Magau Daud, potowe'akuwo.”
49Nangepe'i nongare, nentuumi Yesus pade iuli-Na, “Kio'i tumai tauna etu.”
Laikiorami to naburo ee mai pade iulikara'i, “Pakaroho raramu pade pokangkoremoko, laikio-Nako.”
50To naburo ee mai noloncu waru pokarolapiina, pade dungku nokangkoremi rau hi Yesus.
51Nepekunemi Yesus hi hia, “Napa to laipodotamu Kubabei hi iko?”
To naburo ee mai nehono, “Rabi, to laipodotaku bona mamala'a menaa!”
52Lauparia Yesus nangulika'i, “Koimoko! Peparahayamu nampakahalamako.”
Tempo ee mui namalami nenaa, pade raumi nantuku Yesus rara pomakoa-Na.
Currently Selected:
Markus 10: MYL
Highlight
Share
Copy
Want to have your highlights saved across all your devices? Sign up or sign in
