Yohanes 15

Puu anggur to nakono

1Yesus nopadola nangulikara iwei, “Akumile puu anggur to nakono pade Tuama-Kumi tumpu pampa anggur ee. 2Butu raa to nerika hi Aku to moma nowua, Natompo. Pade butu raa to nerika hi Aku to nowua, Nalali huluna pade Nagalihi bona madeaki wuana. 3Nawali nagahamo komi habana patudu to laiwaika-Ku komi.

4Mohangu rara dolamo komi hante Aku pade Aku mui mohangu rara dola hante komi. Raa anggur to moma'i nerika i puu anggur, moma'i mamala mowua. Wee moto mui komi, ane moma komi mohangu rara hante Aku, moma komi mowua.

5Akumile puu anggur, komimi raa-raana. Hema-hema to mohangu rara hante Aku, pade Aku mohangu rara hante hia, madea wuana. Apa ane mogaa komi hante Aku, moma maria to mamala mibabei. 6Tauna to moma mohangu rara hante Aku, hia ee ratadi ewa raa kau, alaana mabangimi. Raa kau to ewa ee rapalimpuru, ratene rara apu pade rahuwe. 7Ane mohangu rara moto oa komi hante Aku, pade mipairara mpuu patudu-Ku, perapimi hi Tuama-Ku napa-napa to mipodota Nababeika komi. Kana Nababei hi komi ewa to laiperapimi. 8Ane madea wuami, mahipatomo komi rauli to pantuku-Ku. Pade ane iwee, rapemabohemi Tuama-Ku.”

Parenta bona momepotowe hadua bo hadua

9Padola-Na mui Yesus nangulikara, “Ewa Tuama nampotowe-'A, wee moto mui pampotowe-Ku komi. Kabelo-belona katuwumo komi mohangu rara hante Aku bona mirasai towe-Ku hi komi. 10Ane mituruhi parenta-Ku, mirasai dola moto'i mei towe-Ku. Ewa Aku nanturuhi parenta Tuama-Ku, lairasai-Ku dola moto towe-Na.

11Humaweena lauria iulika-Ku komi, bona goe rara-Ku mamala mirasai pade magana mpuu kagoemi. 12Eimile parenta-Ku, bona momepotowe komi hadua bo hadua ewa pampotowe-Ku komi. 13Moma naria towe to nelabi kabohena lako hadua tauna to nahadia mamate bona mahalamara dohena. 14Ane mituruhi humawee to laiparentaka-Ku komi, komimi dohe-Ku. 15Momamo komi Ku'uli batua-Ku, apa batua moma ncanina rara maradikana. Ku'uli dohe-Kumo komi, apa laikewoka-Kumo komi humawee napa to laiepe-Ku lako hi Tuama-Ku. 16Moma komi to nampelihi-'A, naupawee Aku to nampelihi komi pade nantudu komi rau i dunia mowua mabelo, pade wuami ee mantaha duu kahae-haena. Ane wee komi, Tuama mampawaika komi humawee to miperapi hi Hia rara hanga-Ku. 17Eimile parenta-Ku hi komi: Pomepotowemo komi hadua bo hadua.”

Yesus pade ana-ana guru-Na laipodaa tauna to moma neparahaya

18“Ane tauna to moma neparahaya hi Aku i dunia ei mampodaa komi, lingami ane Akumi lodo laipodaara. 19Ane ke nohangu pekiri komi hante to moma neparahaya hi Aku i dunia ei, natantu amimi rapotowera komi. Naupawee moma komi nohangu pekiri hante hira. Komi laipelihi-Ku lako tau-tauna i dunia ei nawali todea-Ku, etu pade laipodaara komi. 20#Yoh. 13:16Lingami napa to laiulika-Ku komi, ‘Hadua batua moma nelabi lako maradikana.’ Batuana, ane Aku laipakaheha tauna, wee moto mui mei komi kana rapakahehara. Pade ane maria tauna manturuhi patudu-Ku, maria moto mui mei tauna manturuhi patudumi. 21Naupawee, humaweena ee rababeira hi komi habana hanga-Ku, apa moma incanira Alatala to nampahuro-'A. 22Ane ke moma-'A narata pade nangulikara humaweena lauria, momara madoha. Naupawee apa narata-'Amo pade laiulika-Kuramo humawee lauria, momami mamala rapehapukara dohara. 23Tauna to nampodaa-'A, hia mui nampodaa Tuama-Ku. 24Ane ke moma laibabei-Ku nadea ngaa to nepakahera i tingoora to moma naria laibabei tau ntanina, momara madoha. Naupawee welau ei, naupa laihilorami napa to laibabei-Ku batena motora nampodaa-'A pade nampodaa Tuama-Ku. 25#Mzm. 35:19; 69:5Humawee lauria nadupa nopaganai to laitulihi rara buku Tauratra to nanguli iwei, ‘Moma naria habana to rapodaakara-'A.’

26Kuhuro mei to Petulungi lako hi Tuama marata hi komi. To Petulungi ee Inoha to Nagaha lako hi Tuama pade Hia mangkewo napa to nakono. Ane marata-'I mei, Hia mohabi nangkambelai Aku. 27Komi mui kana mohabi nangkambelai Aku, apa laipodohemi-'Amo lako pamulana.”

Currently Selected:

Yohanes 15: MYL

Highlight

Copy