Yohanes 16

1Padola-Na mui Yesus nangulikara ana guru-Na iwei, “Humaweena lauria iulika-Ku komi bona nemo maronto peparahayami hi Aku. 2Momamo komi mei rapaliu mehua i hou-hou pepuea. Pade marata mei tempona, butu tauna to mampatehi komi, manguli ane hira ee nampobagoka Alatala. 3Humawee lauria rababeira, apa moma incanira hema-'A pade hema Tuama. 4aNaupawee iulika-Ku komi ei, bona ane madupadimi humaweena ee, milingami ane naria amimi iulika-Ku komi.”

Bago Inoha to Nagaha i dunia

4bNapu ee iuli-Na mui Yesus, “To laiuli-Ku ei, moma komi laikewoka-Ku ami lako pamulana, apa laipodohemi-'Adapa. 5Naupawee, welau ei rau-'Amo hi Hia to nampahuro-'A pade moma hema haduaa lako hi komi to nepekune, ‘Rima karaua-Mu?’ 6Hangka iulika-Ku komi lauria, nadua laudi rarami. 7Naupawee Ku'ulika komi kakonona, panculi-Ku rau hi Tuama-Ku ei, kabeloami komi. Apa ane moma-'A rau, moma-'I marata to Petulungi ee hi komi. Aji ane rau-'A, Kuhuro-'I to Petulungi ee rumai hi komi. 8Ane marata-'I mei, Hiadimi to mampakanoto hi tauna to moma neparahaya hi Aku i dunia ei nangkambelai dohara, nangkambelai bewa ingku to nanoro i tingoo Alatala pade nangkambelai pebotuhi to kakonona. 9Aji, to Petulungi ee mei mampakanoto ane momara meparahaya hi Aku, hira nadoha. 10Napakanoto mui nangkambelai bewa ingku to nanoro i tingoo Alatala, apa rau-'Amo hi Tuama pade moma-'Amo mihilo. 11Pade Napakanoto mui nangkambelai pebotuhi to kakonona, apa laibotuhi-Nami Alatala ane Magau Heta to nabaraka i dunia ei kana rahuku.

12Nadea ngaadipi to mingki Ku'ulika komi. Naupawee welau ei, poma mibuku mantarima. 13Ane maratadimi Inoha to Nagaha, Hia mei mampakanoto hi komi humawee napa to nakono. Hia ee mei mojarita moma mantuku dota-Na moto, naupawee mantuku napa to laiepe-Na, pade Hia mei mangkewoka komi napa to madupa i eo ngkapurina mei. 14Hia mei mampemabohe-'A, apa Hia mei mangkewoka komi lolita to laitarima-Na lako hi Aku. 15Humawee to naria hi Tuama, Aku tumpuna. Etu pade iulika-Ku komi, napa to laitarima Inoha to Nagaha lako hi Aku, etumi to Nakewoka komi.”

Dua rara mawali goe rara

16Yesus nangulikara ana guru-Na, “Hangonidimi tempona moma-'Amo mihilo, pade moma mahae lako hee mihilo mui-'Amo.”

17Nangepe lauria, bahangkua dua ana guru-Na noneulika, “Napa patuju-Na nangulikata, ‘Hangonidimi tempona moma-'Amo mihilo, pade moma mahae lako hee mihilo mui-'Amo’? Napa mui patuju-Na nangulikata, ‘Rau-'A hi Tuama’?” 18Nonepekune dolara, “Napa batuana ‘hangonidimi’? Moma'i laipahata napa to iuli-Na.”

19Laincani-Na Yesus ane mingkira mampekune-'I. Aji iulika-Nara, “Iulika-Ku komi he, ‘Hangonidimi tempona moma-'Amo mihilo, pade moma mahae lako hee mihilo mui-'Amo.’ Eedi to laipomeuliimi ee? 20Mpuu-mpuu Ku'ulika komi, makeo pade motantangi komi mei, naupawee tauna to moma neparahaya hi Aku i dunia ei magoe motora. Madua rarami, naupawee dua rarami ee mobali moto'i mawali goe rara. 21Hadua bangkele, ane temponadimi moana madua mpuu naepe. Naupawee hangka nehuwupi anana, laikalinganinami kadua iepena apa nagoe mpuu rarana habana hadua ngana laiotemi i dunia. 22Wee moto mui komi. Welau ei madua rarami, naupawee Kupotomuka nculi moto komi. I heedimi pade magoe rarami pade moma hema haduaa mamala mampa'alai goe rara ee lako hi komi. 23Tempo ee mei momami maria to mipekune hi Aku. Mpuu-mpuu Ku'ulika komi, nau napa to miperapi hi Tuama i rara hanga-Ku, Nawaika pura komi. 24Duu ei, poma naria to laiperapimi i rara hanga-Ku. Perapimi, kana rawaika komi bona magana mpuu kagoe rarami.

25Humaweena ei iulika-Ku komi hante porapa. Marata mei tempona, moma-'Amo mampake porapa mangkarebai nangkambelai Tuama, naupawee Kukarebai pakanoto laumi hi komi. 26Tempo ee, komi mei merapi hi Tuama-Ku i rara hanga-Ku. Bona mincani, moma iuli-Ku ane Aku to mamperapika komi hi Tuama-Ku. 27Habana Tuama moto nampotowe komi. Laipotowe-Na komi apa laipotowemi-'A pade laiparahayami ane Aku narata lako Alatala. 28Aku ei lako hi Tuama pade narata-'Amo i dunia. Naupawee Kupalahimi dunia ei apa rau-'Amo hi Tuama.”

29Nangepe to iuli-Na lauria, ana-ana guru-Na nangulika-'I, “Pue, pakanoto-Mu mpuumi nangulika kami, momamo-Ko nampake porapa. 30Welau ei laincani kamimi ane laincani-Mu pura humaweena, pade moma-Ko paraluu rapekune. Etu pade laiparahaya kamimi ane Iko narata lako Alatala.”

31Yesus nampahonoira, “Neparahaya mpuumo komi welau ei? 32Epe komi! Maratami tempona, pade narata mpuumi tempona magaromo komi. Manculi rau houmi puramo komi mei pade mipalahi-'Amo hadudua-Ku. Naupawee moma hadudua-Ku mpuudimi, apa naria moto Tuama nampodohe-'A. 33Humaweena ei iulika-Ku komi bona mirata katuwu to nanone apa nohangu rara komi hante Aku. I dunia ei, komi mei mamparata kahehaa. Naupawee, pakaroho rarami! Laidagi-Kumi humawee baraka i dunia ei!”

Currently Selected:

Yohanes 16: MYL

Highlight

Copy