Yohanes 14
14
Hou Tuama
1Yesus nangulikara ana guru-Na, “Nemo mokalihe rarami. Peparahayamo komi hi Alatala, pade peparahaya mui komi hi Aku. 2I hou Tuama-Ku nadea po'ohaa. Rau-'A mei i ria mopahadiaka komi po'ohaami. Ane moma'i nakono, natantu amimi moma komi Ku'ulika. 3Ane mahudu-'Adamo mopahadiaka komi po'ohaa, marata nculi-'A mei mangala komi pade Kukeni komi rau i po'ohaa-Ku, bona rima-'A mo'oha, i hee mui komi mo'oha. 4Pade i rima karaua-Ku, laincanimi moto dalana rau ria.”
5Nepekunemi Tomas, “Pue, moma ncani kami karaua-Mu. Aji, bewami kincani dalana rau ria?”
6Nehono Yesus, “Akumile dala, Akumi to mampawai komi kakonoa pade katuwua. Moma hema haduaa to mamala marata hi Tuama ane moma hante Aku. 7Ane ke ncanimi-'A, natantu amimi mincani mui Tuama-Ku. Welau ei laincanimimi pade laihilomimi.”
8Filipus nangulika Yesus, “Pue, pahiloi kami Tuama to iuli-Mu etu bona maoha rara kami.”
9Naupawee Yesus nehono, “Filipus, nahae-'Amo laipodohemi. Poma oa-'A ncanimu? Hema to nampahilo-'A, hia mui nampahilo Tuama. Bewa pade iulimu, ‘Pahiloi kami Tuama to iuli-Mu etu’? 10Moma parahayamu ane Aku nopahangu hante Tuama pade Tuama nopahangu hante Aku? Humawee to iulika-Ku komi, moma dota-Ku nanguli naupawee dota Tuama to nohangu rara hante Aku. Tuama motomi to nampobago humawee bago-Na. 11Parahaya-'Amo ane Aku ei nopahangu hante Tuama pade Tuama nopahangu hante Aku. Ane moma miparahaya to iuli-Ku ei, parahaya-'Amo habana humawee to nepakahera to laibabei-Ku. 12Mpuu-mpuu Ku'ulika komi, hema-hema to meparahaya hi Aku, hia mui mei mampobago bago to laipobago-Ku. Moma wuwu ee, napobago mui mei bago to melabi kabohena lako bago to laipobago-Ku ei. Apa Aku mei, rau hi Tuama-'Amo. 13Pade ba napa-napa to miperapi rara hanga-Ku bona Kubabei, kana Kubabeika komi. Pade napa to Kubabeika komi mampemabohe Tuama. 14Nau napa to miperapi rara hanga-Ku bona Kubabei, kana Kubabeika komi.”
Yesus nanguli nangkambelai karata Inoha to Nagaha
15“Ane laipotowemi-'A, kana mituruhi humawee parenta-Ku. 16Kuperapi hi Tuama pade Hia mei mampawaika komi to Petulungi ntanina, to mampodohe komi duu kahae-haena. 17To Petulungi ee mai, Inoha to Nagaha to mampatudukii komi napa to nakono. Manuhia i dunia ei moma nantarima-'I apa moma-'I laihilora pade moma-'I laincanira. Naupawee, komi nangincani-'I, apa Hia ee nampodohe komi pade nohangu rara hante komi.
18Moma komi Kupalahi ewa ngana to laipalahi tina pade tuamana. Marata nculi moto-'A mei hi komi. 19Hangonidimi manuhia i dunia ei mampahilo-'A, naupawee komi mei mihilo moto oa-'A. Komi mei kana matuwu habana Aku natuwu. 20Ane maratadimi tempona, mincanimi ane Aku nohangu rara hante Tuama-Ku, komi nohangu rara hante Aku pade Aku nohangu rara hante komi. 21Tauna to nantarima pade to nampoingkuka humawee parenta-Ku, hia eemi tauna to nampotowe-'A. Tauna to nampotowe-'A, hia Napotowe Tuama-Ku pade Aku mui mampotowe'i bo Kupoperawa woto-Ku hi hia.”
22Yudas (moma Yudas Iskariot) nepekune hi Yesus, “Pue, napa pade hi kami moto Mupoperawa woto-Mu, moma hi humawee tauna?”
23Nehono Yesus, “Tauna to nampotowe-'A, kana naturuhi patudu-Ku. Tuama-Ku mui mampotowe'i. Aku pade Tuama-Ku marata hi tauna ee pade mampodohe dola'i. 24Tauna to moma nampotowe-'A moma'i laituruhina patudu-Ku. Patudu to laiepemi etu moma lako hi Aku naupawee lako hi Tuama to nampahuro-'A.
25Humaweena lauria laiulika-Ku komi apa naria-'Adapa dohemi. 26Naupawee, ane marata mei Inoha to Nagaha, Hiami to mopatudu komi humaweena pade mampalingai komi humawee napa to laiulika-Ku komi. Apa Hiami to Petulungi to Nahuro Tuama mampahambei-'A.
27Katuwu to nanone Kuwaika komi. Katuwu to nanone lako hi Aku motomi to Kuwaika komi. Pade to Kuwaika komi ee, moma ewa to laipopewai dunia ei. Nemo komi mokalihe pade nemo komi maeka. 28Laiepemimi to iulika-Ku komi, ‘Rau-'Amo, naupawee marata nculi moto-'A mei hi komi.’ Ane laipotowemi-'A, kana magoe komi ane rau-'A hi Tuama-Ku, apa neliupi kabaraka Tuama lako Aku. 29Welau ei laikewoka-Ku amimo komi kapomana humaweena madupa, bona ane madupadimi mei, miparahayami. 30Momami madea to Ku'uli hi komi, apa parami marata Magau Heta. Hiami to nabaraka i dunia ei. Naupawee moma'i nabaraka nau hodia hi Aku. 31Humawee lauria kana madupa, bona manuhia i dunia ei mangincani ane laipotowe-Ku Tuama pade laibabei-Ku humawee parenta-Na.
Pokangkoremo, kitamo rau.”
Currently Selected:
Yohanes 14: MYL
Highlight
Share
Copy
Want to have your highlights saved across all your devices? Sign up or sign in
