Yohanes 13
13
Yesus nokabohi paara ana guru-Na
1Kapomana laipamula eo bohe Paskah to Yahudi, ncani-Nami Yesus ane naratami tempona Napalahi dunia ei pade manculi rau hi Tuama-Na. Bewa pampotowe-Na todea-Na i dunia ei, wee moto mui pampotowe-Nara duu-Na namate.
2Yesus hante ana-ana guru-Na nangkoni hingkani ngkawengia ee. Tempo ee Magau Heta napumi nopahua liwona i rara pekiri Yudas bona napobalu-'I Yesus. 3Ncani-Na Yesus ane laipopewai-Nami Tuama-Na humawee baraka hi Hia. Laincani-Na mui ane Hia narata lako Alatala pade manculi mui rau hi Alatala. 4Aji, nokangkoremi Yesus pade noloncu waru pokarolapii-Na. Laiala-Na kae pade laipou-Na peko-Na. 5Napu ee, laitoli-Na ue i rara loya pade laikabohi-Nami paara ana guru-Na pade laipurihi-Na hante kae to laipou-Na i peko-Na ee.
6Hangka temponapi paa Simon Petrus rakabohi, nojaritami Simon Petrus hi Yesus iwei, “Pue, napa pade Iko gagadi mokabohi paaku?”
7Nehono Yesus, “Welau ei, poma'i mupaha napa to laibabei-Ku ei. Naupawee mupaha moto'i mei napa batuana to laibabei-Ku ei.”
8Nehono mui Petrus, “Nemo Pue. Nemo Mukabohi paaku.”
Nehono Yesus, “Ane moma'i Kukabohi paamu, momami maria katekaiamu hante Aku.”
9Naupawee nehono nculi mui Petrus, “Pue, ane wetu nemo wuwu paaku moto Mukabohi, naupawee hante pale pade wooku mui!”
10Iuli-Na Yesus, “Tauna to naniumi, wetumi maniuki nculi. Wuwu paanadimi nakabohi apa nagaha purami humawotona. Wee moto mui komi, nagahamo komi. Naupawee moma humaweemi nagaha.” 11Apa laincani-Nami Yesus hema mei to mampopewai-'I hi bali-bali-Na. Etu pade iuli-Na, “Moma humaweemi nagaha.”
12Nahudupi Yesus nokabohi paara, laipake-Na nculimi waru pokarolapii-Na pade noncunami. Lauparia, iulika-Naramo, “Laipahami napa to laibabei-Ku lauria? 13Laikiomi-'A Guru pade Pue. Nakono pekiomi etu, apa Akumi Guru pade Pue. 14Aji, ane Aku halaku Pue pade Gurumi nokabohi paami, komi mui kana momekabohika paami hadua bo hadua. 15Laibabei-Ku ei hi komi, bona mibabei muikowo ewa ei hi tau ntanina. 16Mpuu-mpuu Ku'ulika komi, hadua batua moma'i nelabi lako maradikana pade hadua to laitudu moma'i nelabi lako to nantudu'i. 17Ane mipaha humawee patudu ei, morahi komi ane mibabei.
18 #
Mzm. 41:10
To iuli-Ku ei moma nangkambelai humaweemi. Ncani-Ku hema to laipelihi-Ku. Naupawee kana rapaganai to laitulihi rara Buku to Nagaha to nanguli iwei, ‘Tauna to nangkoni roti hingkani-ngkani hante Aku, hiami to nampaewa-'A.’ 19Kapomana madupa lauria, Kukewoka amimo komi welau ei. Bona ane madupapi mei, miparahayami ane Aku eimi Alatala.#13:19 Aku eimi Alatala rara baha Yunanina laiuli “Aku naria.” “Aku naria” ei mai hanga Alatala to laikewoka-Na hi Musa (hilo Kel. 3:14). 20Mpuu-mpuu Ku'ulika komi, hema-hema mantarima to Kutudu, hia ee nantarima-'A pade hema to nantarima-'A, hia mui nantarima to nantudu-'A.”
Yesus nangkewo ane Yudas mei mampopewai-'I hi bali-bali-Na
(Mat. 26:21-25; Mrk. 14:18-21; Luk. 22:21-23)
21Nahudupi Yesus nanguli lauria, najuu mpuu rara-Na pade iuli-Na, “Mpuu-mpuu Ku'ulika komi, hadua lako hi komi mei mampopewai-'A hi hira to nampobali-'A.”
22Nangepe to iuli-Na lauria nonenaaramo ana guru-Na hadua bo hadua, apa moma ncanira hema to laipatuju-Na. 23Hadua lako ana guru-Na to laipotowe-Na#13:23 Ana guru-Na to laipotowe-Na ee mai, nadea to nataualu Buku to Nagaha tempo ei nanguli Yohanes ana Zebedeus (hilo Yoh. 21:24)., noncuna humpii-Na mali pangkana-Na. 24Petrus nangkini mata tauna ee bona mampekune Yesus hema to laipatuju-Na.
25Lauparia ana guru to i humpii Yesus ee nampatewai Yesus iwei, “Hemadi to laipatuju-Mu Pue?”
26Nehono Yesus, “Tauna to Kuwai roti to Kulome rara mangko, hiamile to laipatuju-Ku.” Nahudu nojarita iwee, lailome-Nami roti rara mangko pade laiwaika-Na Yudas ana Simon Iskariot.
27Pantarimana Yudas roti ee, laipehua Magau Hetami rarana.
Yesus nangulika'i, “Babeimi mahomi napa to mingki mubabei.”
28Moma hema haduaa lako hira to nangkoni ee nampaha napa pade Yesus nangulika Yudas ewa ee. 29Nariara to nanguli ane Yesus nantudu Yudas mangoli napa kaparaluara i pohuhaa ee ba mampopewai doi hi to nakahiahi, apa Yudas to poboli doira.
30Pantarimana Yudas roti ee, dungku nehuwumi lako i hee. Tempo ee nalimaumi.
Parenta to nabou
31Nehuwupi Yudas lako hee, nololitami Yesus, “Welau ei Ana Manuhia rapemabohe, pade napa mei to madupa hi Aku, ee mai mampemabohe Alatala. 32Ane napa to madupa hi Aku mampemabohe Alatala, Alatala mui mei mampemabohe-'A hante baraka-Na, pade momami mahae Alatala mampemabohe-'A.
33Ana-ana-Ku, moma-'Amo mahae dohemi. Mipali-'A mei pade ewa to iulika-Kura to pangkeni to Yahudi, wee moto mui Ku'ulika komi welau ei, i rima karaua-Ku, moma komi mamala marata.
34Kuwaika komi parenta to nabou. Eimi parenta to nabou ee, momepotowe komi hadua bo hadua. Bewa pampotowe-Ku komi, kana wetu moto mui pomepotowemi hadua bo hadua. 35Ane momepotowe komi, rancanirami humawee tauna ane komi etu to pantuku-Ku.”
Yesus nanguli ane Petrus mei mampehapuka-'I
(Mat. 26:31-35; Mrk. 14:27-31; Luk. 22:31-34)
36Simon Petrus nangulika Yesus, “Pue, rau rima-Ko?”
Nehono Yesus, “Rima karaua-Ku, pomako mamala mantuku-'A welau. Maratadimi mei tempona, pade mutuku-'Ada.”
37Nehono Petrus, “Pue, napa pade moma-Ko mamala kutuku welau ei? Kana kutuku moto-Ko naupa mamate'a.”
38Nehono mui Yesus, “Mutuku moto-'A naupa mamateko? Mpuu-mpuu Ku'ulikako, kapomana manu motuturua, bela tolu ngkanimoko mampehapuka-'A.”
Currently Selected:
Yohanes 13: MYL
Highlight
Share
Copy
Want to have your highlights saved across all your devices? Sign up or sign in
