Yohanes 12
12
Yesus laituahi lana wongi i Betania
(Mat. 26:6-13; Mrk. 14:3-9)
1Ono eo kapomana eo bohe Paskah to Yahudi, naratami Yesus i Betania po'ohaa Lazarus to laipakatuwu nculi Yesus lako kamatea. 2I hee laibabei huha nampabila Yesus. Rara pohuhaa ee Marta noaturu pangkoni, pade Lazarus hante to rata ntanina nangkoni dohe Yesus. 3Lauparia naratami Maria nangkeni hantanga lite lana wongi narwastu to nelabi kahulina. Laituahina paa Yesus pade laipurihina hante wuluana. Alaana, rara hou ee nawali nawongi mpuu.
4Naupawee Yudas Iskariot, hadua lako ana guru Yesus to mampobalu-'I mei, nanguli iwei, 5“Napa pade moma laipobalu lau'i lana etu tolu atu doi halaka#12:5 Hampeka doi halaka nahibali hante tomo nobago haeo. pade doina rawaikara to nakahiahi?” 6Pade iwee iuli Yudas, moma habana nampalinga to nakahiahi, naupawee nampalinga wotona moto, apa hia ee to pangio. Yudas ee to poboli doira hingkani, pade naharo'i nangala bongo doi to laibolina ee.
7Naupawee Yesus nehono, “Palelemi nababei Maria iwee. Habana to laibabeina ei mopahadia popatana-Ku ane mamate-'A mei. 8Apa maria moto oa logami mantulungira to nakahiahi, naupawee Aku moma-'A mei mipodohe oa.”
Imam-imam to i matana nahintuwu mampatehi Lazarus
9Nadea tauna to Yahudi nangepe ane Yesus no'oha i Betania, aji rauramo tauna ee mingki mampahilo Yesus. Moma wuwu Yesus to mingki rahilora, naupawee Lazarus to laipakatuwu nculi Yesus ee mui. 10Etu pade imam-imam to i matana ee nahintuwu muira mampatehi Lazarus. 11Apa habana hiami pade nadearamo to Yahudi nampalahira pade neparahaya hi Yesus.
Yesus laipemabohe i Yerusalem
(Mat. 21:1-11; Mrk. 11:1-10; Luk. 19:28-38)
12Kanailena, todea to narata i Yerusalem i eo bohe Paskah to Yahudi nangepe ane Yesus bula-Na nomako mehua i Yerusalem. 13#Mzm. 118:25-26Lauparia laialara tawe palem pade rauramo nampotomu-'I hante nongare nanguli iwei,
“Hosana!#12:13 Hosana batuana: Pakahalama kami welau. Tempo katuwua Yesus i dunia baha ei laipakera todea nampaune Yesus.
Laitiroimi Hia to narata halaku huro Alatala!
Hiami Magau to Israel!”
14Yesus namparata hamaa keledai to nanguradipi, pade laihawi-Nami. Lauria nopaganai to laitulihi rara Buku to Nagaha iwei,
15 #
Za. 9:9
“Nemo komi maeka todea Yerusalem.
Hilo, naratami Magaumi,
nencawi hamaa keledai to nanguradipi.”
16Tempo ee poma'i laipahara ana guru-Na to nadupa lauria. Naupawee natuwu nculipi Yesus lako kamatea-Na pade nengkahe rau huruga, lailingarami ane humawee to laibabeira tauna ee hi Yesus naria amimi laitulihi rara Buku to Nagaha.
17Todea to nampahilo Yesus nangkio Lazarus nehuwu lako dayo pade nampakatuwu nculi'i lako kamatea, nampojarita oa nangkambelai to laihilora ee. 18Etu pade nadea tauna rau nampotomu Yesus apa ieperami Yesus nobabei tanda to nepakahera ee. 19Lauparia, noneulikaramo to Farisi ee hadua bo hadua iwei, “Nadagitamo! Hilo motomi, humawee tauna i dunia nantuku-'I.”
Yesus nanguli bewa-'I mei mamate
20Lako humawee tauna to rau mepue i Yerusalem tempo eo bohe Paskah to Yahudi ee, naria muira bahangkua dua to moma Yahudi. 21Tauna eera rau hi Filipus to lako Betsaida i Galilea pade nangulika'i iwei, “Tuama, mingki kami mampotomuka Yesus.” 22Filipus rau nangkewoka Andreas. Lauparia Andreas pade Filipus rau noparata hi Yesus.
23Yesus nangulikara, “Naratami tempona Ana Manuhia rapemabohe. 24Mpuu-mpuu Ku'ulika komi, ane wua gando moma'i ratuda pade mamate, wua gando ee batena moto'i hangu. Naupawee, ane wua gando ee ratuda, mamate ncala'i olu pade matuwu nculidi mawali madea. 25Hema to mampotowe inohana, makarontoa inohana. Naupawee, hema to moma mampotowe inohana i dunia ei, mantarima katuwua to moma maria kahuduana. 26Hema to mampobagoka-'A, kana natuku-'A bona mamala'i mampodohe-'A nau rima karaua-Ku. Tauna to mampobagoka-'A, Nabila tuama-Ku.
27Napepa mpuu iepe-Ku. Napami to Ku'uli ei? Mingki Ku'uli, ‘Tuama, bakaha-'Akuwo lako kahehaa ei.’ Moma Ku'uli iwee, apa Aku narata i dunia ei bona mangkolo kahehaa ei. 28Tuama, pemabohemi hanga-Mu!”
Lauparia, naria to pojarita lako langi nanguli iwei, “Laipemabohe-Kumi hanga-Ku! Pade kana Kupemabohe muidipi.”
29Todea to nokangkore i hee nangepe to pojarita ee pade iulira, “Moni guru ee rau!” Naria mui to nanguli, “Malaeka Alatala nampojaritaka-'I!”
30Lauparia, iulika-Nara Yesus, “Jarita to laiepemi ee rau, moma mampakaroho rara-Ku naupawee mampakaroho rarami. 31Welau ei temponami Alatala mampabotuhira manuhia i dunia ei. Welau ei mui temponami Magau Heta to nabaraka i dunia ei rapopalai. 32Pade ane Aku raore rapakalangko, Kudii pura humawee tauna mantuku-'A.” 33Iuli-Na ewa ee, bona rancani bewa-'I mei mamate.
34Todea eera nangulika-'I, “Laincani kamimi lako rara buku Taurat ane Magau to Pepakahalama ee matuwu duu kahae-haena. Napa pade iuli-Mu ane Ana Manuhia ee kana raore rapakalangko? Hema-'I Ana Manuhia ee?”
35Yesus nampahonoira, “Hangonidimi Baa ee maria dohemi. Aji, lawina nariadipi Baa ee laipodohemi, peparahayamo komi hi Hia bona nemo komi matuwu i rara kalimauana. Apa tauna to nomako i kalimauana, moma ncanina karauana. 36Parahayami Baa ee lawina nariadipi laipodohemi, bona batena moto komi matuwu i rara Baa.”
Nahudupi nanguli lauria, neongkomi Yesus lako i hee pade momami nadota rahilora todea.
Yesus moma laiparahayara to Yahudi
37Naupa nadeami tanda to nepakahera laibabei Yesus i tingoora to Yahudi, moma oara neparahaya hi Hia. 38#Yes. 53:1Ee mai nopaganai to laiuli nabi Yesaya owi iwei,
“Pue, ke nono momami hema to namparahaya kareba to laiparata kami.
Naupa laipahiloi-Muramo baraka-Mu, moma oara neparahaya.”
39Etu pade momara namala neparahaya. Apa iulina muimi Yesaya iwei,
40 #
Yes. 6:10
“Laipakaburo-Na matara bona nemora mehilo,
pade laipakakoo-Na rarara bona nemora mengkao,
bona nemora megoli hi Hia pade Napakauri.”
41Nabi Yesaya nanguli ewa ee, apa laihilonami kabohe baraka Yesus pade nampojarita nangkambelai Yesus.
42Naupawee nadea motora todea pade to pangkeni to Yahudi neparahaya hi Yesus. Aga momara nabia nangaku peparahayara hi Yesus hi tau ntanina apa naekara hi to Farisi, nemo-nemo mei momaramo rapaliura mehua i rara hou pepuea. 43Apa hira ee, pokonorapi peune manuhia lako peune Alatala.
Patudu Yesus to nampabotuhi manuhia
44Napu ee pahimuku-Na Yesus nanguli iwei, “Hema-hema to neparahaya hi Aku, kakonona moma Aku to laiparahayana, naupawee Hia to nantudu-'A narata i dunia to laiparahayana. 45Hema to nampahilo-'A, hia mui nampahilo to nantudu-'A. 46Aku narata i dunia ei halaku baa, bona humawee tauna to neparahaya hi Aku, momaramo mo'oha rara kaliamauana. 47Tauna to nangepe patudu-Ku, naupawee moma'i laipoingkukana, moma Aku to mampahuku'i, apa Aku narata i dunia, moma-'A tumai mampabotuhi manuhia i dunia, naupawee mampakahalamara. 48Hema-hema to moma mantarima-'A pade moma mantarima patudu-Ku, naria amimi to mampabotuhi'i. Patudu to laiuli-Ku eemi to mampabotuhi'i i kahudua dunia. 49Apa moma dota-Ku moto to nojarita, naupawee nantuku dota Tuama-Ku to nantudu-'A narata i dunia. Hiami to noparenta-'A manguli napa to kana Ku'uli pade Kuparata hi komi. 50Ncani-Ku, ane parenta-Na ee nampawai katuwua to moma maria kahuduana. Aji, to laiparata-Ku ei ewa to iulika-Na-'A Tuama-Ku.”
Currently Selected:
Yohanes 12: MYL
Highlight
Share
Copy
Want to have your highlights saved across all your devices? Sign up or sign in
