Yohanes 11
11
Lazarus laipakatuwu nculi
1Naria hadua balailo to bulana nadua, hangana Lazarus. Lazarus ee no'oha i Betania dohe ompina bangkele to laikahangai Maria pade Marta. 2Maria eemi wengi to nampatuahi paa Yesus hante lana wongi pade laipurihina hante wuluana, pade Lazarus to nadua ee ompina. 3Bangkele to rodua eera nangkarebai hi Yesus, iulira, “Pue, bale-Mu to laipotowe-Mu nadua.”
4Pangepe-Na Yesus kareba ee, iuli-Na, “Hakina etu moma'i napomate, naupawee hante hakina ee, rahilomi kabohe baraka Alatala. Pade hante hakina ee mui Ana Alatala rapemabohe.” 5Natowe ami-'I Yesus hi Marta, Maria pade Lazarus ee. 6Naupawee, pangepe-Na kareba ane Lazarus nadua, tungkai-Na laumi no'oha i po'ohaa-Na ee roeopi. 7Napu eedi pade iulika-Nara ana guru-Na, “Kitamo rau manculi i Yudea.”
8Ana-ana guru-Na nangulika-'I, “Rabi, poma'i wei nahae to Yahudi ke mampawunu-Ko. Napa pade rau ria muimo-Ko?”
9Nehono Yesus, “Apa moma hampulu rojaa'i rarana haeo? Hema to momako mpoeo, moma'i matehunu apa lainaana moto kabaa dunia ei. 10Tauna to nomako ngkawengia kana matehunu, apa moma'i naria napa-napa to nampakabaa dalana.” 11Iweemi to laiuli Yesus hi ana-ana guru-Na. Napu ee iulika-Na muira iwei, “Doheta Lazarus noturumi. Naupawee rau-'A, bona Kulike'i.”
12Ana-ana guru-Na nangulika-'I, “Pue, ane noturu'i Lazarus, mauri moto'i.” 13Iulira ana guru-Na patuju Yesus nanguli lauria, noturu biaha moto'i Lazarus. Naupawee patuju Yesus nanguli ee mai, Lazarus namate mpuumi.
14Etu pade iulika-Na lauramo Yesus, “Namatemi Lazarus. 15Naupawee, nagoe lau rara-Ku apa moma-'A i ria kamatena. Apa ane wee, mabelo laupi hi komi bona mamala komi meparahaya. Kitamo rau hi Lazarus!”
16Lauparia Tomas to laikahangai mui Didimus nangulikara dohena, “Kitamo rau tatuku-'I bona hingkani-ngkanita mamate dohe-Na!”
17Karata Yesus i Betania, bela opo eomi Lazarus rara dayo. 18Ngata Betania ee mai namohu Yerusalem, ka'awana maria tolu kilo. 19Nadea to Yahudi nahiromu i houra Marta pade Maria nampakaroho rarara habana kamate ompira ee.
20Pangepena Marta kareba ane namohumi Yesus, nehuwumi rau mampotomu-'I, naupawee Maria i hou moto'i. 21Marta nangulika Yesus, “Pue, ane ke i hei-Ko wei, moma'i mamate ompiku. 22Naupawee ncaniku moto ane Alatala mampawaika-Ko humawee to Muperapi hi Hia.”
23Iuli-Na Yesus hi Marta, “Matuwu nculi moto'i ompimu.”
24Iulina Marta, “Ncaniku, matuwu nculi moto'i ompiku ane humawee to mate rapakatuwu nculi lako kamatea i eo kahudua dunia.”
25Iuli-Na mui Yesus, “Akumile to nampakatuwu tauna to namate pade to nampawai katuwua to moma maria kahuduana. Hema-hema to meparahaya hi Aku, matuwu nculi moto'i naupa namatemi. 26Tauna to natuwu pade neparahaya hi Aku, moma'i mamate duu kahae-haena. Parahayamu to iuli-Ku lauria?”
27Nehono Marta, “Io Pue, laiparahayaku ane Ikomi Ana Alatala, Magau to Pepakahalama to laitipa Alatala marata i dunia.”
28Napupi Marta nanguli iwee, raumi nangkio Maria ompina pade nantewai'i, “Eemi ria Guru. Mingki-'I mampotomukako.” 29Nangepe lauria, dungku raumi Maria nampotomuka Yesus. 30Tempo ee, Yesus poma-'I nehua i rara ngata. I hawaliku ngata potomuara Martadipi. 31Lauparia to Yahudi to bulara nampakaroho rara Maria i houna, nampahilo'i hoha-hohana nehuwu, alaana laitukura'i, apa pekirira rau makeo i dayo Lazarus'i.
32Karata Maria hi Yesus, notingkodumi i tingoo Yesus, iulina, “Pue, ane ke hei-Ko wei, moma'i mamate ompiku.”
33Nampahilo Maria pade hira to Yahudi to nampodohe'i nangkakeohi Lazarus, najuu mpuu rara Yesus. 34Lauparia, laipekune-Naramo, “Rima dayona?”
Nehonora, “Maimo-Ko Pue, bona kipahiloi-Ko.”
35Lauparia natudomi ue mata Yesus.
36To Yahudi eera nanguli, “Hilo, natowe mpuu-'I hi Lazarus.”
37Naupawee bahangkua dua lako hi hira nanguli iwei, “Namala-'I nampopenaa to naburo, napa pade moma-'I namala nampakauri Lazarus bona moma'i mamate?”
38Najuu oadipi rara Yesus pade raumi i dayo. Dayo ee mai i rara bulu watu, to laiwunta hante watu bohe. 39Yesus nangulikara, “Lali watu etu.”
Nehono Marta, “Pue, opo eomi laitana. Natantu nehoami.”
40Yesus nangulika Marta, “Apa moma iulika-Kumoko, ane meparahayako muhilomi kabohe baraka Alatala?”
41Lauparia lailalirami watu powunta dayo ee.
Napu ee Yesus nantingara langi, iuli-Na, “Tuama, nosukuru-'A hi Iko apa laiepe-Mu-'Amo. 42Laincani-Ku, iepe-Mu moto oa-'A. Naupawee, habana tauna to nahiromu ei, etu pade iuli-Ku lauria bona raparahayara ane Ikomi to nampahuro-'A rumai i dunia.”
43Nahudupi nanguli lauria, nongaremi Yesus iwei, “Lazarus, pehuwumoko!” 44Lauparia, nehuwu mpuumi tauna to namatemi ee, palena pade paana natewewe kaedipi, pade lencena mui natebungudipi. Yesus nangulikara tauna to i hee, “Bole kae powewena bona mamala'i momako.”
Hintuwu mampatehi Yesus
(Mat. 26:1-5; Mrk. 14:1-2; Luk. 22:1-2)
45Nadea to Yahudi to narata nampakaroho rara Maria pade nampahilo napa to laibabei Yesus, nawali neparahaya hi Yesus. 46Naupawee, bahangkua dua lako hi hira rau hi to Farisi nangkewo napa to laibabei Yesus. 47Etu pade imam-imam to i matana pade to Farisi nahiromu nolibu hante to Pobotuhi Agama. Iulira, “Napa to kana tababei? Apa nadea mpuu tanda to nepakahera laibabei Tauna ee rau! 48Ane tapalele oa-'I iwee, humawee tauna mei mamparahaya-'I. Alaana mei marataramo to poparenta Roma mampa'alaita Hou Alatala pade todeata.”
49Hadua lako hira ee to laikahangai Kayafas, Imam Bohe tempo ee, nanguli iwei, “Moma laincanimi napa-napa. 50Kana mipekiri napa to nabelo hi komi. Aginapi hadua tauna mamate mampahambei todeata, nemo humawee todeata maropu.” 51Kakonona, to iuli Kayafas ee moma nehuwu lako pekirina moto, naupawee halaku Imam Bohe tempo ee, laiulina amimi ane Yesus mei mamate mampahambeira todea to Yahudi. 52Moma wuwu to Yahudi, naupawee kamate Yesus ee mui mopahiromu pade mopahangu humawee ana Alatala to nohena i butu ngata.
53Nopamula eo eeramo to pangkeni to Yahudi nahintuwu mampatehi Yesus. 54Etu pade momami nerawa Yesus i tingoora todea to Yahudi. Laipalahi-Nami Yudea rau i ngata to laikahangai Efraim to namohu tongo mpada to nabai. I heemi no'oha hante ana-ana guru-Na.
55Tempo ee namohumi eo bohe Paskah to Yahudi. Nadea tauna lako ngata-ngata kodi rau i Yerusalem mobabei ada pampegaha woto kapomana marata eo bohe ee. 56Tempora nahiromu i karawaa Hou Alatala laipalirami Yesus pade noneulikaramo hadua bo hadua, “Bewakowo pampekirimu? Ba moma-'I tumaidi?” 57Iulira lauria, apa imam-imam to i matana pade to Farisi nampopehuwu parenta, hema to mangincani rima'I Yesus kana rakewora bona mamalara mampahoko-'I.
Currently Selected:
Yohanes 11: MYL
Highlight
Share
Copy
Want to have your highlights saved across all your devices? Sign up or sign in
