Apostel isht Anumpa 17
17
1Yʋmohmi kashot Amfipolis, Apollonia aiena ka hlopullit okla mʋt, Hlessalonika yʋmmak o̱ Chu okla i̱ sinakak ʋt hikia ho̱ itʋlachi tok.
2Mihma Pal ʋt yʋmmak o̱ a yohmi atuk okʋt ont iba chukowa cha, nitak hullo nitak tuchina ka Holisso Holitopa ya̱ ai isht okla ha̱ im anumpohonli tok.
3Klaist ʋt issikkopa he, micha illi tuk osh falamʋt tana hi ʋt ai ʋlhpiesa tok, isht i̱ fahpullit im abʋchit, yʋmohmi ka Chisʋs ilʋppa ʋno ʋt isht hʋchim anumpohonli li kak osh, yʋmmʋt Klaist mak oke; achi tok.
4Mihma kanimi kʋt yimmi mʋt Pal, Sailʋs ita tuklo kash iba kaha tok. Mihma Klik hatak ʋbanumpuli laua fehna, micha ohoyo holitompa aiena kʋt kanomosi tok keyushke.
5Yohmi kia Chu okla nan ik yimmo hokʋto anukhobela mʋt, hatak haksi nan isht ʋtta ik im iksho kaniohmi ho̱ pehliechit itʋnnali cha, tʋmaha okla ha̱ mominchit nukhlaka̱shlit, Chesʋn in chuka ya̱ o̱ yihlepa tok; micha pehlichit kohchʋt okla isht im ʋla chi̱ hosh yʋmmak ash hoyo tok.
6Atuk osh yʋmmak ash okla ik ahayucho mʋt, Chesʋn micha itibapishi ʋhleha kaniohmi ka‐aieninchit, hʋllat tʋmaha apehlichi ʋhleha ya̱ isht im ona cha, tahpʋlʋt, Yakohmi kʋt yakni a̱ shot filimmi tuk ʋt ilʋppak kia ai ʋlʋshke.
7Mihi yo̱ Chesʋn ʋt pehlichit ishi tuk; micha yakohmi kʋt momʋt Sesa i̱ nan‐ʋlhpisa ai ahalaia keyu ho̱, okla yʋmohmit, mi̱ko inla Chisʋs ʋt a̱sha hoke, ahanchishke, achi tok.
8Mihmʋt okla puta, micha tʋmaha apehlichi ʋhleha aiena kʋt na yakomi ka haklo ma, nukhlaka̱shli tok.
9Mihmʋt Chesʋn, micha inla aiena anumpa nana ho̱ im ai ishi kʋt im ʋlhpesa mʋt, a̱sht ik itʋnowá, okla im ahni tok.
10Mihma itibapishi ʋhleha yʋt ashali̱ka ninak o̱ Pal, Sailʋs itatuklo kash Belia pit tihleli tok; yʋmmak ash itonachi mʋt, Chu okla i̱ sinakak o̱ ont abeha tok.
11Yakohmi kʋto hochukma kʋt Hlessalonika ma̱ya ka i̱ shahli tok, im anukfila mominchit isht aiokpanchit anumpa ha̱ ishi hatuk osh, micha yʋmmʋt yohmi ho mʋhli ho̱ chishba, nitak moma Holisso Holitopa ya̱ a hoho̱yo tok.
12Yʋmohmi hatuk osh okla yʋmmʋt laua hosh yimmi tok; mihma Klik ohoyo holitompa ʋhleha, micha hatak aiena mʋt kanomosi tok keyushke.
13Yohmi kia Chu okla Hlessalonika a̱sha kʋt, Pal ʋt Chihowa im anumpa ha̱ Belia ya̱ isht ai anumpohonli ka pit akostininchi mʋt, yʋmmak ash kia okla ai ʋla cha, okla ha̱ ant okpʋni tok.
14Mihma ashali̱ka itibapishi ʋhleha ash osh Pal a̱ okhʋta ak o̱ ia chohma chi̱ ho̱, pit chʋffichi tok. Amba Sailʋs, micha Timohliʋs itatuklo kʋto yʋmmak inli ho̱ a̱shwa moma tok.
15Mihma Pal ilauet isht okla a̱ya tuk ʋt Ahlens a̱ isht ona tok; micha Sailʋs, Timohliʋs itatuklo kʋt tu̱shpa fehnʋt im itonancha chi̱ ka, pit i̱ miha, anumpa ishi mʋt, okla ilhkoli tok.
16Yohmi ma Pal ʋt yʋmma pit hoyo hosh Ahlens a̱ anta ta̱kla cha, tʋmaha hʋt na holba toba banot isht alotowa na, pihi̱sa mʋt im anukfila hʋt ik ʋlhpeso ki tok.
17Yʋmohmi hatuk osh Chu okla, micha ʋbanumpa ahni ʋhleha aiena ka, sinakak micha kʋna ho̱ nana ai itatoba ai itafama hokʋt nitak moma ai im anumpohonli beka tok.
18Mihma hatak nan‐imponna Epikulʋs iksa, micha Istoik okla aiena kaniohmi kʋt, yʋmma okla itim anumpuli tok. Mihma kanimi kʋt, Anumpuli shahli ilʋppʋt nanta ko̱ acha hinla? achi ma; kanimi kʋt, Chisʋs, micha falamʋt tani aiena isht im anumpuli hatuk o̱, Yakni kanima nan isht ahullo ho̱ isht anumpuli ha chinishke; achi tok.
19Micha okla ilauelit ishtiʋt, Mas nʋnih a̱ isht ona mʋt, Ilʋppʋt anumpa himona nana ho̱ isht ish ai anumpuli hatukma, il ithʋna hinla cho?
20Chishno yokʋt nan inla nana mak o̱ pi haksobish a̱ ant ish foyuki hoka. Yohmi hoka ilʋppʋt kaniohmi hatuk okma il akostinincha hinlʋshke; ahanchi tok.
21Ahlens okla moma, micha yakni inla hatak puta yʋmma aiasha aiena kʋt, nan inla yo̱ keyu, amba na himona fehna anoli, keyukmʋt haklo hokmá, nana hosh aiasha bilia hatok oka.
22Yʋmohmi ma Pal ʋt Mas nʋnih iklʋnna ya̱ hikia cha, Ahlens okla hʋchia ma! nana a kaniohmi puta ka na holba toba ya̱ hʋsh aiokpanchi fehna ho̱, hʋchim akostininchi lishke.
23Ant ia li kʋt hʋchi̱ na holba toba puta ka pihi̱sa li mʋt, ʋba tʋla ya̱, Kʋna ik ithano Chihowa mak o̱, achi, ilʋppak osh isht ai o̱ holisso ka pisa li hokʋno. Yohmi hoka hʋsh ithana keyu hosh, pit hʋsh aiokpahanchi chatuk, mihmak o̱, ʋno ʋt hʋchim anohonli lishke.
24Chikowa yakni, micha nana moma yʋmma anu̱kaka aiasha aiena ka ikbi tok; yʋmmak okʋt ʋba shutik, micha yakni aiena ka in Chitokaka yokʋt tempel puta ibbak a̱ isht toba ya̱, ai ahanta keyu.
25Micha nana hosh ik im iksho hatuk o̱, hatak ibbak ʋt im isht anta chatuk keyu; yʋmmak osh moma ka okcha̱ya, micha im ilhfiopak, micha nana moma aiena ka ihi̱ma hatuk oka.
26Micha issish achʋfa ho̱, hatak oklushi moma yakni paknaka a mominchit aiasha hi a̱ ikbi tok; mihmʋt nitak kaniohmi ʋlhpisa ho̱, micha kanima yo̱ aiasha he puta ka, apesa tok.
27Yʋmmʋt Chitokaka ya̱ hoya chi̱ hatok; yʋmmak okʋto eho moma ka hʋpi mishemanchi keyu nana kia, yohma he yobakmʋt, pasholit hoyo fehna cha, yʋmmak oka ahayucha hinla hoke.
28Hʋpishno ʋt yʋmmak o̱ iloh ai okcha̱ya, micha ilhkolit, iloh aiasha hoka. Hʋchim ataloa ikbi kaniohmi kʋt, Hʋpishno ak kia yʋmma ushi hʋpia hoka, ahanchi akinli tok oka.
29Yohmi ka Chihowa ya̱ ushi ʋhleha pia hokʋt, Chihowa imma ya̱ tʋli holisso lakna okmá, keyukmʋt, tʋli hʋta, keyukmʋt tʋli, hatak nan isht ʋtta imponna nana anukfilli hosh, na holba ikbi ya̱ chohmi hoka, hʋpim ahoba he tuk keyu hoke.
30Nan ik ithaiyano nitak yʋmmak foka hokʋno, Chihowa yʋt tohmosonli hosh pihi̱sa tok kia; amba himak okʋno hatak oklu̱ha kanima moyuma ahanta kʋt ile kostinincha he ak o̱, im apihi̱sʋshke.
31Hatak a̱ ilapo inlit atokoli tok, yʋmmak o̱ yakni a̱ ai a̱hli banot nan isht im apesa he ʋt nitak a̱ apesa tok okʋt; illi tuk a̱ tanichi hosh moma ka im ai a̱hlichi tok; ahanchi tok.
32Illi falamʋt tana he puta okla haklo mʋt, kanimi kʋt isht yopula tok; mihma kanimi kʋt, Anonti himmakma ilʋppa e chim a hakla hi oke; achi tok.
33Yakohmi ho̱ Pal ʋt okla iklʋnna̱ka ya̱, akohcha tok.
34Yohmi kia hatak kaniohmi kʋto yimmi cha, yʋmmak ash ibakaha tok. Yʋmma iba ta̱kla kʋt Taionishʋs, Mas nʋnih nan ai apesa, micha ohoyo Tamelis hohchifo hosh, anonti inla ai itʋpeha tok oke.
Pal ʋt Kolinhla, a̱ ibbak isht a toksʋli, micha ʋba isht ai anumpuli aiena, 1, 9 Holhpokuna hosh isht ai i̱ yiminta.
Currently Selected:
Apostel isht Anumpa 17: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
