Apostel isht Anumpa 16
16
1Yʋmohmi mʋt Tabi, micha Listi aiena ka ʋla tok. Mihma yʋmma nan ithʋna achʋfa Timohliʋs hohchifo hosh anta tok; Chu ohoyo na yimmi o̱ ushi; amba i̱ki okʋto Klik hatak a tok.
2Yʋmmak oka itibapishi ʋhleha Listi, micha Aikoniʋm aiena aiasha kʋt ahnichi tok.
3Yʋmmak osh takla a̱ya hi a̱, Pal ʋt aiahni tok; micha ishi cha hakshup tʋpli tok, yakni koyofa yʋmma aiasha kʋto Chu ʋhleha hatuk o̱, micha i̱ki okʋto Klik hatak a̱ mo̱mʋt ithana hatok oka.
4Micha tʋmaha puta a hlopullit a̱ya mʋt, nan ʋlhpisa ʋbanumpeshi ʋhleha, micha hatak asononchi aiena Cheluselem aiasha kʋt apesa tuk a̱, holitobla chi̱ ka ihi̱mʋt okla tok.
5Yʋmohmi ho̱ iksa puta kʋt yimmi kʋt kʋllot hiohli ma, holhtina mʋt laua kʋt nitak atukma, i̱ shahlit ia tok.
6Yʋmohmi ma Fichia, micha Kaleshi yakni aiena a hlopullit okla, micha Asia a̱ anumpa ha̱ isht ai anumponla he keyu, Shilombish Holitopa yʋt i̱ miha tuk o̱,
7Mishi a̱ itʋlachi mʋt, Bihlinia chukowa bʋnna tuk kia, Shilombish ʋt ʋlhpesa, ik im ahno tok.
8Yohmi ma Mishi a̱ ant itiachi mʋt, Tloas a̱ itʋlachi tok.
9Mihma ninak o̱, Pal a̱ nan isht ahoba yʋt ant i̱ haiaka tok. Masetonia hatak osh hikia cha, im asilhhʋchit, Masetonia ak o̱ ʋla cha ant pi apelá, ahanchi tok.
10Mihma yʋmmak oka ʋbanumpa ont isht il im anumpula he mako̱, Chitokaka yʋt auet pi hoyo tok pulla ka, pim anukfihinla mʋt, nan isht ahoba ka pisa tuk a̱, in chekosi ma, Masetonia ya̱ ia pi bʋnna tok.
11Yohmi cha Tloas a̱ il a hotoffi mʋt, auet apissalint mintit Samoleshi e la tuk osh, nitak atu̱kla ka Niapolis a̱ e la.
12Micha yʋmma a̱shwʋt il ia mʋt, Filippi, yʋmmak okʋt tʋmaha chito kʋt Masetonia yakni koyofa yʋmma moma i̱ shahli, okla wiha a binili a̱ e la tok. Micha tʋmaha yʋmma il a̱shwa na nitak kanohmi tok.
13Micha nitak hullo ma tʋmaha kohchʋt iʋt okhina lapali ka, yʋmmak o̱ ʋba pit ai anumpuli chatuk a̱, ont e chieya mʋt, ohoyo hʋt itahohumba ma il im anumpuli tok.
14Mihma Chihowa aiokpanchi ohoyo achʋfa Litie hohchifo, na humma lusbi kanchi, Hlaiataila tʋmaha ʋtta yʋt pi haklo tok; mihi yo̱ chu̱kʋsh o̱ Chitokaka yʋt tiwi na Pal ʋt nana isht ai anumpohonli ka anukfohka tok.
15Micha ilap ʋt in chuka chʋfa aienʋt baptismo mʋt, asilhhʋchit, Ʋno ʋt Chitokaka ya̱ pit im ai a̱hli li ka hʋchim ahobakmʋt, an chuka ya̱ ont hʋsh chukowa cha hʋsh a̱shwashke; ahanchi mʋt, pi atu̱shpalechi tok.
16Yakohmi tok, ʋba pit ai anumpuli ia hosh il a̱ya ma, ohoyo himita achʋfa kʋt isht ahullo shilombish anukfo̱ka hosh pi afama tok; yʋmmak okʋt nan anoli ilahobit ʋlhtoba chinto i̱ shahli ʋhleha isht im ahayuchi a tok.
17Yʋmmak ashot Pal, micha pishno aiena ka piakaiyʋt a̱ya mʋt tahpʋlʋt, Hatak yakohmi kʋt Moma i̱ Shahli Chihowa yako̱, in tʋshka ʋhleha yosh ai okcha̱ya hina hʋpim abahanchi hoke; ahanchi tok.
18Mihmʋt ilʋppa yakohomi na nitak kanohmi tok. Yohmi kia Pal ʋt ik im ʋlhpeso hatuk osh filema mʋt, shilombish ash, Chisʋs Klaist hohchifo pulla ho̱, chishno ʋt yʋmma ish akohcha chi̱ ka, chi̱ miha lishke; im achi tok. Mihma yʋmmak ashot mih makinli ho̱ kohcha tok.
19Yʋmohmi ma i̱ shahli ʋhleha yʋt nan isht ai ahayunchi ashot kʋnia na pisa mʋt, Pal, micha Sailʋs ita tuklo ka hokli cha, hʋllat ishtiʋt nan ʋpa a kanchi a̱ isht chukowʋt, hatak pehlichi ʋhleha ya̱ isht im ona tok.
20Micha ishtiʋt tʋshka chipota i̱ mi̱ko ʋhleha ya̱ isht im ona cha, Hatak ilʋppʋt Chu okak osh hʋpin tʋmaha ha̱ atakaiyʋmmi fenʋshke.
21Micha Lom okla pia hʋt, nan ʋlhpisa yʋmma il aiokpʋchi cha, e holitobla he pim ai ʋlhpesa keyu ka pim abahanchishke; ahanchi tok.
22Yohmi ma okla laua yashot im a sʋnali himona achʋfa wakaya tok; mihma tʋshka chipota i̱ mi̱ko ʋhleha yashot im ilefohka ya̱ okla i̱ shueli mʋt bola chi̱ ka, okla apesa tok.
23Mihma fʋma la̱wa ho̱ okla onochi mʋt, aboha kʋllo apesʋchi a̱ achukmalit apesahancha chi̱ ka im apesʋt tahli cha, aboha kʋllo pit apitta tok.
24Yʋmmak ashot nana kʋt yakohmit im ʋlhpihi̱sa mʋt, aboha kʋllo anu̱kaka pilla pit apitta cha, iti iyi isht akʋllo isht a kʋllochi tok.
25Yʋmohmi tuk o̱ ninak iklʋnna ma, Pal, micha Sailʋs ita tuklo kashot ʋba pit anumpulit, Chihowa pit aiokpʋchit in taloho̱wa tok; mihma aboha kʋllo ʋlhpinta tuk ʋt haiyaklo tok.
26Mihma yakosi fena makinli ho̱, yakni winakʋchi chinto na, aboha kʋllo nutaka intola yʋt ilhkoli tok: mihma ashali̱ka okhissa yʋt mo̱mʋt tiwa ma, momʋt im isht talakchi yʋt i̱ mokohli tok.
27Mihma aboha kʋllo apesʋchi yʋt nusi tuk ʋt okcha cha, aboha kʋllo okhissa puta kʋt ti̱wa ho̱ pisa mʋt, aboha kʋllo ʋlhto a̱ tihlaiyʋt tamoa tuk a̱, im ahoba mʋt i̱ bʋshpo falaia ya̱ hʋllat shu̱fi kʋt ile ba chin tok.
28Yohmi kia Pal ʋt chitolit pit tahpʋlʋt, Momʋt ilʋppa e maya hoka, nana kia chik ile kanihcho kashke; ahanchi tok.
29Mihma pʋla ha̱ pit hoyo cha, mʋlet pit chukowʋt wʋnihinchi hosh ʋla mʋt, Pal, micha Sailʋs ita tuklo itikba ya̱ ant hlipia tok.
30Micha pehlichit kohcha mʋt, Hatak hʋchia ma! sai okcha̱ya chi̱ kʋto nanta ko̱ katiohmi la chi̱ cho? achi tok.
31Yohmi ma, Chitokaka Chisʋs Klaist ak o̱ ish i̱ yimmashke, mikmak osh chishno, micha chin chuka achʋfa aienʋt chi okcha̱ya hi oke; achit okla tok.
32Micha Chitokaka im anumpa ha̱ ilap, micha in chuka anu̱ka ya̱ ma̱ya tuk ash a mominchit isht im anumpuli tok.
33Mihma ninak hʋshi kanʋlli isht ʋlhpisa mih makinli ho̱ ishi cha, a fʋma tuk a̱ achifa tok; mihma ashali̱ka ilap ʋt in chuka chʋfa mo̱mʋt baptismo tok.
34Micha pehlichit im aboha ya̱ ishit chukowa mʋt, ilhpak a̱ itikba in talohli mʋt, in chuka chʋfa ya̱ a moyumʋt Chihowa ya̱ yimmit na yukpa tok.
35YĘ‹mohmi tuk o̱ onnĘ‹t taha ma, tĘ‹shka chipota i̱ mi̱ko Ę‹hleha yĘ‹t anumpeshi a̱ pit tihleli mĘ‹t, Hatak yĘ‹mmĘ‹t ant ik itiachĂ, ahanchi tok.
36Atuk o̱ aboha kʋllo apesʋchi yʋt Pal a̱ anumpa ilʋppa im anolit, Tʋshka chipota i̱ mi̱ko ʋhleha yʋt ant ik a̱yá, auet hʋchim aiahni tuk oke; yʋmohmi hoka himak ano kohchʋt iʋt, na yukpʋt hʋsh a̱yashke, achi tok.
37Yohmi kia Pal ʋt, Anumpa ʋlhpisa yosh pi onʋtula keyu ka, Lom hatak pia ho kak o̱ haiakʋchi hosh pi fahami cha, aboha kʋllo ya̱ pit pi apitta tuk; yohmi kash ot anonti peh luma hosh pi kohchi hoh cho? Yohma he keyu pullʋshke. Amba ilapo inlit ai ʋla cha, isht pi kohchashke; im ahanchi tok.
38Atuk o̱ anumpeshi ash ot anumpa ilʋppa tʋshka chipota i̱ mi̱ko ʋhleha yash ont im anoli tok. Mihma yʋmmʋt Lom hatak atuk o̱ okla haklo mʋt, nukshopa tok.
39Mihmʋt ai ʋla cha ant im asilhhʋt, isht kohchi mʋt, tʋmaha ha̱ a kohchʋt okla hinla ka, im ahni tok.
40Mihma aboha kʋllo a̱ a kohchʋt ia mʋt, Litie in chuka ont chukowʋt okla tok; micha itibapishi ʋhleha ya̱ pisa cha hopohlʋlit tahli mʋt, kohchʋt itiachi tok oke.
Pal ʋt Hlessalonika ya̱ ʋba isht ai anumpuli, 1, 10 Pal ʋt Belia ako̱ ai anumpuli. 15 Pal ʋt Ahlens a̱ ai anumpuli.
Currently Selected:
Apostel isht Anumpa 16: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
