Apostel isht Anumpa 18
18
1Nana kʋt a yakohmi ha ya̱, Pal ʋt Ahlens a̱ akohchʋt ia mʋt, Kolinhla a̱ ʋla tʋk.
2Micha Chu hatak achʋfa Akuila hohchifo, Pantʋs ai ʋtta tok ʋt, tekchi Plisilla ita tuklo kʋt, Kilatiʋs ʋt Chu ʋhleha yʋt momʋt Lom a̱ akocha wiha chi̱ ka, apesa hatuk o̱, Itili ya̱ a̱shwʋt itʋlachi tuk a̱ cheki hosh a̱shwa na, pisa mʋt yʋmmak o̱ im ona tok.
3Micha ilap ʋt a toksʋli itim ai achʋfa hatuk okʋt, takla ahantʋt toksʋli tok; yʋmmak okʋt isht ʋlhtipo ikbi im ʋlhtayak ʋhleha ha tok okʋt.
4Mihmʋt sinakak a̱ nitak hullo moma ai anumpulit, Chu ʋhleha, micha Klik okla aiena ka nukfokichi tok.
5Atuk o̱ Sailʋs, micha Timohliʋs ita tuklot Masetonia a̱shwʋt itʋlachi ma, Pal ʋt chu̱kʋsh ʋt a yimihinta mʋt, Chisʋs ak osh Klaist pulla mak atuk a̱, Chu okla ha̱ im abahanchi fehna tok.
6Mihma okla i̱ sanalit ik ahobalot anumpuli ma, ilap im ilefohka ya̱ wilohli mʋt, Hʋch issish ʋt hʋchi noshkobo akinli ho̱ onutulashke, ʋno ʋto sa kashofʋshke. Himmak pilla ano okla nan ik ithano ʋhleha ak o̱ im a̱ya la chi̱ hoke; im achi tok.
7Micha yʋmmak ash akohchʋt ia mʋt, hatak achʋfa Chʋstʋs hohchifo, Chihowa aiokpahanchi in chuka ont chukowa tok. Yʋmma in chuka yʋt sinakak o̱ bili̱kasi ho̱, talaia hatok.
8Mihma Kispʋs sinakak apehlichika yʋt in chukachʋfa moma ai itʋpehʋt, Chitokaka ya̱ i̱ yimmi tok. Mihma Kolinhla okla hʋt haklo mʋt, laua hosh yimmi cha baptismo tok.
9Mihma Chitokaka yʋt ninak o̱, Pal ʋt holhpokuna chohmi ka im anumpulit, Chi nukshopa ná, amba anumpulí, micha lumʋt chik a̱sho kashke:
10Ʋno ʋt chi awant a̱ya li hoka; hatak nana hosh chi onʋtulʋt chi hotopala he keyu hoke, tʋmaha ilʋppa okla lauʋt ʋm ai a̱shwa hoka; im achi tok.
11Mihma Chihowa im anumpa ha̱ ai im abʋchit ahanta na afʋmmi achʋfa cha hʋshi hannalit aiena tok.
12Atuk o̱ Kalio ʋt Akaia i̱ nahullo mi̱kot ahanta ma, Chu okla hʋt im anukfila ai achʋfa chohmit, Pal a̱ o̱ kinafʋt ishit nana ai apesa ya̱ isht ona mʋt,
13Nan‐ʋlhpisa ya̱ ai ahalaia keyu ka, Chihowa ya̱ aiokpʋcha chi̱ ka, hatak ilʋppʋt okla ha̱ atohnohonchishke, achanchi tok.
14Mihma Pal ʋt ilap itih ha̱ wakʋmma chi̱ foka ma, Kalio ʋt, Chu okla hash nana kʋt ik ʋlhpeso, keyukmʋt, okpulo fehna nana hatuk okmʋno, ʋno ʋt hʋchim aiokpanchi la hi a̱, ai ʋlhpiesa he tuk oke, Chu okla hʋchia ma!
15Amba anumpa, micha hohchifo puta, mikmʋt hʋchi̱ nan‐ʋlhpisa imma aiena isht anumpa hatukmʋno, hʋchishno akinli hosh yʋmmʋno isht hʋsh a̱shashke. Ʋno yokʋto nana yʋmma chohmi hokʋno, non apesʋt ahanta la he keyushke, im achi tok.
16Mihmʋt nana ai ʋlhpisa a̱sha tuk a̱ kʋnom pit tihleli tok.
17Mihma Klik ʋhleha hʋt momʋt sinakak apehlichi Soshlenes a̱, okla hoklit ishi cha, nana ai ʋlhpisa itikba ya̱ a boli tok. Mihma Kalio ʋt yʋmma puta ka nan isht ik ahno tok.
18Yakohmi ha ya, Pal ʋt ahanta na nitak kanohmi tok; atuk osh itibapishi ʋhleha ya̱ aiokpʋchit tahli mʋt, Plisilla, micha Akuila aiena ka ai itapi̱hʋt peni fohkʋt a̱yʋt Silia ya̱ ia tok; anumpa ha̱ il onochi tok okʋt, Kenklea pa̱shi ai ʋmo tok.
19Micha Efesʋs a̱ ʋla mʋt, yʋmmak o̱ ant ashachi cha; amba ilapo ʋto ʋba isht ai anumpa chuka ont chukowa cha, Chu ʋhleha ya̱ im anumpohonli tok.
20Mihma takla anta na hopaka hinla ka, okla ahni ma, ilap ak osh ik haklo tok.
21Micha okla ha̱ aiokpʋchi mʋt, Ik kaniohmi kia, impa holitopa mihinti ilʋppa Cheluselem ak o̱ ai isht anta la chi̱ hoke. Yohmi kia Chihowa ak osh ik yohmí ahni hokma, falamʋt chim a̱ya la he akinli hoke; ahanchi tok. Mihmʋt peni fohkʋt Efesʋs ʋttʋt ia tok.
22Atuk osh Sesalia ya̱ ont atayali cha, pit oiyʋt iksa ʋhleha ha̱ ont aiokpʋchit tahli mʋt, Antiak a̱ ia tok.
23Mihmʋt yʋmma ont anta naha cha ia mʋt, Kaleshi, micha Fichia yakni aiena ka, nan ithʋna ʋhleha moma hlampkochit abaiyʋt a̱yʋt hlopulli tok.
24Mihma Chu achʋfa Apollos hohchifo, Aleksantia ai ʋtta tok, hatak anumpuli imponna, micha Holisso Holitopa ya̱ imponna fehna yosh Efesʋs a̱ ʋla tok.
25Hatak ilʋppʋt Chihowa i̱ hina yʋt im ʋlbʋchi ya tok; micha chu̱kʋsh ʋt ai yimihinta hatuk osh, Chan i̱ baptismo ak illa ho̱ ithana hosh, achunanchit Chitokaka immi ya̱ isht anumpuli, micha im abʋchi aiena tok.
26Micha nukwa̱ya kʋt iksho hosh, sinakak a̱ ai anum pulit ishtia tok. Yʋmmak ash o̱ Akuila, micha Plisilla ita tuklo kʋt haklo mʋt, yʋmmak ash pit hoyot ishi cha, Chihowa i̱ hina ya̱ achukmalit i̱ shahlichit im anohonlit okla tok.
27Micha Akaia ya̱ ia ka bʋnna ma, nan ithʋna ʋhleha yʋt okla aiokpahancha chi̱ ka, pit atohnochit, itibapishi ʋhleha yʋt holissochi tuk o̱; yʋmmak ashot ʋla mʋt, i̱ nukha̱klo na yimmi tuk ʋhleha ya̱ apelahanchi fehna tok.
28Yʋmmak okʋt, Chisʋs ak osh Klaist mak a tok a̱ okla itin takla Holisso Holitopa ya̱ ai isht im abahanchit Chu okla ha̱ anukfohki fehna tok oke.
Pal ʋt ibbak isht umbitepaka Shilombish Holitopa yʋt anukfoho̱ka tok. 17 Ʋbanumpa yimmi kʋt laua.
Currently Selected:
Apostel isht Anumpa 18: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
