Lucas 9
9
Nai Jesus foo knaar ba Nia apostolu nain sanulu resin rua
(Mateus 10:5-15; Marcos 6:7-13)
1Iha loron ida, Jesus halibur Nia apostolu nain sanulu resin rua hodi foo kbiit ba sira para bele duni sai espiritu aat hosi ema no kura moras oin-oin. 2Nia haruka sira baa foo sai kona ba Maromak ukun nudar Liurai, no kura ema moras. 3Nia hatete ba sira, “Imi baa, la bele lori buat ida. La bele lori ai tonka, pasta, bukae, ka osan. Hena hodi troka mos la bele. 4Bainhira ema simu imi iha sira nia uma, hela deit iha uma nee too imi sai fali ba iha fatin seluk. 5Maibee se imi tama iha sidade ida mak ema lakohi simu imi, husik tiha sidade nee. I baku rai rahun hosi imi nia ain okos hodi hatudu katak, Maromak sei kastigu sira.”#Lucas 10:4-11; Apostolu sira nia Istoria 13:51
6Depois apostolu sira lao hosi aldeia ba aldeia hodi foo sai Nai Maromak nia Novidade Diak i kura ema moras iha fatin-fatin.
Liurai Erodes duvida kona ba Nai Jesus
(Mateus 14:1-12; Marcos 6:14-29)
7Liurai Erodes#9:7:Liurai nee naran Herodes Antipas. Nia aman Herodes Boot mak foo orden para oho labarik nurak sira iha Belém bainhira Nai Jesus moris. Haree Mateus 2:16-18. rona kona ba buat hotu-hotu mak Jesus halo. Nia duvida tanba iha ema balu dehan, “Jesus mak João Sarani Nain nebee moris fila fali ona.” 8Balu tan dehan, “Nia Maromak nia profeta Elias mak mosu fali.”
Iha seluk tan dehan, “Nia nee profeta seluk ida nebee mate kleur ona, i agora moris fali.”#Mateus 16:14; Marcos 8:28; Lucas 9:19
9Maibee Erodes dehan, “Hau rona buat oi-oin kona ba ema ida nee. Maibee João nia kakorok, hau haruka tesi tiha ona. Entaun ema ida nee see tan?” Nunee Erodes buka atu hasoru malu ho Jesus.
Nai Jesus foo hahaan ema rihun lima resin
(Mateus 14:13-21; Marcos 6:30-44; João 6:1-14)
10Bainhira Jesus nia apostolu sira fila fali mai, sira konta ba Jesus buat hotu-hotu nebee sira halo ona. Depois Jesus lori sira sees aan baa iha aldeia Betsaida. 11Maibee ema barak rona katak Jesus atu baa nebaa, i sira mos tuir. Jesus simu sira ho diak. Nia foo sai ba sira kona ba Nai Maromak ukun nudar Liurai, i Nia kura ema sira nia moras hotu.
12Loro atu monu ona, apostolu nain sanulu resin rua baa Jesus hodi dehan, “Diak liu haruka ema sira nee baa buka hahaan iha aldeia-aldeia nebee besik, i haruka sira mos baa buka fatin hodi toba, tanba iha nee rai fuik.
13Jesus hataan, “Imi mak foo hahaan ba sira.”
Nia eskolanti sira hataan, “Ita so iha paun fuan lima ho ikan rua deit. Halo nusaa mak ita bele sosa hahaan ba ema barak hanesan nee?!” 14Tanba ema iha nebaa mais-ou-menus rihun lima, nee mane deit, seidauk konta feto ho labarik.#Mateus 14:21
Jesus dehan ba sira, “Haruka sira hotu tuur tuir grupu. Grupu ida ema nain lima-nulu.”
15Sira mos halo tuir. Bainhira ema tuur hotu ona, 16Jesus foti paun fuan lima ho ikan rua nee, i Nia hateke ba lalehan hodi foo agradese ba Nai Maromak. Nia silu paun ho ikan halo rohan-rohan, i foo ba Nia eskolanti sira hodi baa fahe ba ema barak nee. 17Sira hotu haan too bosu. I eskolanti sira baa tau hamutuk hahaan restu sira nee iha bote sanulu resin rua nakonu.
Pedro rekonhese Jesus mak Kristu
(Mateus 16:13-19; Marcos 8:27-29)
18Iha loron ida, Jesus mesak halo hela orasaun iha fatin ida, i Nia eskolanti sira besik Nia. Hotu tiha, Nia husu ba sira, “Tuir ema barak konta, Hau nee see?”
19Sira hataan, “Iha balu dehan, Ita Boot João Sarani Nain. Balu tan dehan, Maromak nia profeta Elias. Balu tan dehan Ita Boot profeta seluk nebee mate kleur ona, i agora moris fali.”#Mateus 14:1-2; Marcos 6:14-15; Lucas 9:7-8
20Jesus husu tan, “Tuir imi rasik, Hau nee see?”
Pedro hataan, “Ita Boot nee Mesias, Salvador nebee Maromak promete hori uluk ona atu haruka mai.”#9:20:Liafuan ‘Kristu’ hatudu ba Ema ida nebee mak Maromak foti para salva Nia povu i ukun sira. Hori uluk kedas, Nai Maromak nia profeta sira foo sai katak Maromak sei haruka Nia mai, i ema Judeu hotu-hotu hein atu simu Nia nudar Salvador ho Liurai. #João 6:68-69
21I Jesus bandu sira para la bele foo hatene ba see-see deit.
(Mateus 16:21-28; Marcos 8:31—9:1)
22Jesus hatutan tan, “Hau, Ema Oan, tenki simu terus oi-oin. Nai ulun Judeu sira, nai lulik nia ulun sira ho mestri relijiaun sira sei la simu Hau. Ema sei oho Hau, maibee iha loron tolu, Maromak sei halo Hau moris fila fali.”
23Depois Nia foo hatene ba sira hotu dehan, “Ema nebee hakarak tuir Hau, nia tenki nega nia aan rasik, lori nia krus loro-loron no tuir Hau.#Mateus 10:38; Lucas 14:27 24Tanba see mak hakarak salva nia aan, nia sei lakon nia vida. I see mak lakon nia vida tanba nia tuir Hau, nia sei hetan moris rohan-laek.#Mateus 10:39; Lucas 17:33; João 12:25 25Se ema hetan buat hotu-hotu iha mundu nee, maibee nia lakon nia moris ho Maromak, nee la iha folin ida. 26See mak moe simu Hau i lakohi simu Hau nia liafuan, aban-bainrua Hau, Ema Oan, mos sei moe rekonhese nia bainhira Hau fila fali mai hosi lalehan. Hau sei tuun mai ho naroman nabilan nian, ho Aman Maromak nia kbiit tomak, i anju sira nia nabilan haleu Hau. 27Hau hatete loloos ba imi, hosi imi sira nee, balu sei moris too haree Maromak ukun nudar Liurai, mak foin mate.”
Nai Jesus fila Aan iha foho leten
(Mateus 17:1-8; Marcos 9:2-8)
28Liu tiha loron walu hanesan nee, Jesus lori Pedro, João ho Tiago sae ba iha foho ida hodi halo orasaun. 29Bainhira Jesus halo hela orasaun, Nia oin fila aan tiha, i Nia hena mos sai mutin nabilan tiha.
30Derepenti deit, Maromak nia profeta nain rua, Moisés ho Elias, mosu mai 31ho naroman nabilan nian hodi koalia ho Jesus. Sira nain tolu koalia kona ba Jesus nia mate, tanba la kleur tan Nia sei mate iha Jerusalém hodi kumpri Maromak nia planu.
32Tempu nee, Pedro ho nia kolega nain rua nee toba dukur tiha. Bainhira sira hadeer mai, sira haree Jesus naroman nabilan loos hamriik hela ho profeta nain rua nee.
33Bainhira Moisés ho Elias atu baa ona, Pedro nia hanoin lakon tiha, i nia koalia arbiru deit dehan, “Mestri, fatin nee kapaas teb-tebes. Diak liu ami halo tenda tolu, ida ba Ita Boot, ida ba Moisés, i ida tan ba Elias.” 34Pedro sei koalia hela nunee, kalohan ida tuun mai falun tiha sira, halo eskolanti nain tolu nee tauk. 35I lian ida hosi kalohan nee dehan, “Nee Hau nia Oan nebee Hau hili ona. Imi tenki rona Nia.”#2 Pedro 1:17-18; Isaías 42:1; Mateus 3:17; 12:18; Marcos 1:11; Lucas 3:22
36Rona tiha lian nee hotu, eskolanti sira haree mak Jesus deit, sira la haree tan ema seluk. Iha tempu nebaa, sira nain tolu la konta sai ba ema ida kona ba buat nebee mak sira haree.
Nai Jesus duni sai espiritu aat hosi labarik ida
(Mateus 17:14-18; Marcos 9:14-27)
37Aban fali, Jesus tuun fali hosi foho nee hamutuk ho Nia eskolanti nain tolu, i ema barak teb-tebes mai hasoru Nia. 38Hosi ema barak nia leet nee, iha ema ida bolu ho lian makaas dehan, “Mestri, favor ida, haree lai hau nia oan mane. Nia hau nia oan mesak. 39Dala barak espiritu aat ida ataka nia halo nia hakilar derepenti i tebe liman tebe ain too kabeen mutin sai hosi ibun. Espiritu aat nee book nia bebeik i halo nia terus liu. 40Hau husu tiha ona ba Ita Boot nia eskolanti sira atu duni sai tiha espiritu aat nee, maibee sira la konsege.”
41Jesus siak sira hotu dehan, “Imi jerasaun nebee la fiar ba Maromak no sempre halo buat aat. Hau tenki hela ho imi too bainhira tan? Hau tenki pasiensia ho imi too iha nebee!?”
Depois Nia hatete ba ema nee, “Lori labarik nee mai.”
42Labarik nee lao dadauk ba Jesus, espiritu aat riba nia ba rai i halo nia tebe liman tebe ain. Maibee Jesus haruka espiritu aat nee sai hosi labarik nee, i nia diak kedas. Depois Jesus entrega fali labarik nee ba nia aman. 43aEma hotu admira tanba haree Nai Maromak nia kbiit boot nee.
Jesus koalia tan kona ba Nia terus
(Mateus 17:22-23; Marcos 9:30-32)
43bTempu nebee ema hotu sei admira hela ho milagre oi-oin nebee Jesus halo, Nia hatete ba Nia eskolanti sira, 44“Imi rona didiak saida mak Hau atu hatete nee. La kleur tan, ema sei faan Hau, Ema Oan ba ema aat .”#9:44:Iha fraze nee, lian Gregu la hatete ho klaru, see mak faan Nai Jesus. Bele “ema sei faan Hau, Mane Maksoin ba ema aat”; se nunee, Nai Jesus hatudu ba Judas. Maibee bele mos “Maromak sei entrega Hau, Mane Maksoin ba ema aat.” Nee katak Nai Maromak rasik mak foo Jesus mai simu terus too mate hodi salva ita. (Haree mos João 3:16, Atus 2:23, Roma 8:32.) 45Maibee Nia eskolanti sira la komprende. Tanba liafuan nia signifikadu sei taka hela ba sira, nunee sira la hatene. I sira mos la brani atu husu ba Jesus.
See mak boot liu?
(Mateus 18:1-5; Marcos 9:33-37)
46Jesus nia eskolanti sira komesa haksesuk malu, entre sira nee eskolante ida nebee mak boot liu.#Lucas 22:24 47Maibee Jesus hatene sira nia hanoin. Entaun Jesus bolu labarik ida mai hamriik iha Nia sorin. 48Nia hatete ba sira, “See mak simu labarik nee hodi Hau nia naran, nia simu Hau. I see mak simu Hau, nia simu mos Ida nebee haruka Hau mai. Ema nebee haraik aan nudar ema kiik, nia mak boot liu iha Maromak nia futar oin.”#Mateus 10:40; Lucas 10:16; João 13:20
Ema nebee la kontra imi, nia ita nia ema
(Marcos 9:38-40)
49João foo hatene ba Jesus, “Mestri, ami haree ema ida duni sai espiritu aat hodi Ita Boot nia naran. Ami bandu nia, tanba nia laos ema nebee tuir ita.”
50Maibee Jesus hataan, “La bele bandu! Tanba ema nebee la kontra imi, nia ita nia ema.”
Ema iha aldeia ida iha Samaria lakohi simu Nai Jesus
51Jesus nia loron atu sae ba lalehan besik ona, entaun Nia desidi Nia tenki baa iha sidade Jerusalém. 52Nia haruka ema balu baa uluk Nia, i sira tama iha aldeia ida iha provinsia Samaria hodi prepara fatin ba Nia. 53Maibee ema iha nebaa lakohi simu Jesus, tanba sira hatene katak Nia atu baa iha Jerusalém.#9:53:Iha tempu nebaa, ema Judeu adora Nai Maromak iha Jerusalém, maibee ema Samaria adora Nai Maromak iha foho Gerizim iha sira nia rain rasik. Sira haree malu la diak kleur ona. 54Bainhira Jesus nia eskolanti Tiago ho João haree ema Samaria sira nia hahalok nee, sira husu ba Jesus, “Nai, se Ita Boot hakarak, ami haruka ahi tuun mai hosi loro leten haan motuk tiha sira.”#2 Liurai sira 1:9-16
55Maibee Jesus fila ba sira nain rua hodi siak sira. 56Depois sira hotu baa fali aldeia seluk.
Kona ba tuir Jesus
(Mateus 8:19-22)
57Bainhira Jesus ho Nia eskolanti sira lao dadauk, ema ida dehan ba Jesus, “Ita Boot baa nebee deit, hau prontu atu tuir.”
58Jesus hataan, “Asu fuik iha nia fatin hodi hela. Manu fuik mos iha nia knuuk. Maibee Hau, Ema Oan la iha fatin hodi tau Hau nia ulun baa.”
59Jesus hatete ba ema ida seluk dehan, “Mai tuir Hau.”
Ema nee hataan, “Nai, husik hau fila baa hakoi lai hau nia aman, mak foin hau tuir.”#9:59:Tuir matenek nain Biblia nian balu, ema nee nia aman sei moris hela, sei forti hela.
60Jesus hatete ba nia, “Husik ema nebee la fiar ba Maromak hakoi sira nia mate. Maibee o nia serbisu mak baa foo sai kona ba Nai Maromak ukun nudar Liurai iha fatin-fatin.”
61Iha ema ida tan dehan, “Nai, hau hakarak tuir Ita Boot, maibee husik hau baa despede lai ho hau nia familia mak foin hau tuir.”#1 Liurai sira 19:20
62Jesus hataan, “Ema nebee komesa serbisu ona hodi tuir Hau, maibee haree fali ba kotuk, nia la serve serbii Nai Maromak nudar nia Liurai.”
Currently Selected:
Lucas 9: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
