Lucas 8

Feto sira nebee ajuda Nai Jesus

1Hotu tiha, Jesus lao hosi sidade ba sidade ho aldeia ba aldeia hodi foo sai Novidade Diak kona ba Nai Maromak ukun nudar Liurai. Nia eskolanti nain sanulu resin rua akompanha Nia. 2Iha mos feto balu nebee tuir. Sira nee uluk iha moras oi-oin, balu espiritu aat tama iha sira nia laran, maibee Jesus kura tiha hotu. Ida mak Maria Madalena, uluk Jesus duni sai espiritu aat hitu hosi nia. 3Iha mos Joana ho Susana. Joana nia kaben Kuza mak toma konta liurai Herodes nia uma. Sei iha tan feto barak mos tuir Jesus. Feto sira nee serbii Jesus ho Nia eskolante sira ho sira nia osan rasik.#Mateus 27:55-56; Marcos 15:40-41; Lucas 23:49

Komparasaun kona ba ema nebee kari fini !

(Mateus 13:1-9; Marcos 4:1-9)

4Iha loron ida, ema hosi aldeia-aldeia nadodon mai iha Jesus. Bainhira ema barak sira nee halibur hamutuk ona, Jesus halo komparasaun ida hanesan nee, 5“Iha toos nain ida baa kari fini iha nia toos. Fini balu monu iha dalan. Ema sama deit, no manu fuik mai hili tiha hotu. 6Fini balu monu iha rai fatuk. Fini nee moris duni, maibee la kleur namlaik tiha, tanba rai ituan deit. 7Fini balun monu iha duut tarak laran. Fini ho duut tarak moris hamutuk, maibee la kleur duut tarak nee habit mate tiha fini nee. 8Iha tan fini balu monu iha rai bokur, i moris too foo isin. Fini sira nee, ida-idak foo fali musan atus ida.”

Konta tiha hotu, Jesus hatete ho lian makaas, “Imi nebee iha tilun hodi rona, rona didiak mai!”

Jesus explika komparasaun ida nee

9Depois Jesus nia eskolanti sira husu ba Nia, komparasaun nee dehan saida.

10Jesus hataan, “Uluk ema seidauk hatene Nai Maromak ukun nudar Liurai. Agora Hau foo sai momoos ba imi. Maibee ba ema seluk, Hau hanorin sira uza komparasaun deit, atu nunee

‘Sira haree,

maibee hanesan sira la haree.

Sira rona,

maibee sira la komprende.’ ”#Isaías 6:9-10

11Jesus hatutan tan, “Komparasaun nee dehan nunee: Fini nee mak Nai Maromak nia liafuan. 12Fini nebee monu iha dalan, mak ema nebee rona Maromak nia liafuan, maibee diabu mai hadau tiha hosi sira nia laran. Entaun sira la fiar ba Maromak, i la hetan salvasaun. 13Fini nebee monu iha rai fatuk, mak ema nebee rona Maromak nia liafuan i simu ho haksolok, maibee sira nia abut la tama ba rai. Sira fiar duni, maibee bainhira sira hasoru provasaun ruma, sira husik kedas. 14Fini nebee monu iha duut tarak laran, mak ema nebee rona Maromak nia liafuan, maibee sira preokupa ho sira nia moris ho sira nia rikusoin, i buka goza deit. Nunee, sira nia fiar la baa oin, i sira nia moris nunka foo rezultadu diak. 15Maibee fini nebee monu iha rai bokur, mak ema nebee moris loos ho laran moos. Bainhira sira rona Maromak nia liafuan, sira rai didiak iha sira nia laran hodi kaer metin nafatin too foo rezultadu diak teb-tebes.”

Komparasaun kona ba ahi-oan

(Marcos 4:21-25)

16Jesus halo komparasaun ida tan nunee: “La iha ema ida sunu ahi-oan, depois taka tiha ho sanan rai ka tau fali iha kama okos. Maibee ahi-oan, ema tenki tau iha fatin aas, atu bele foo naroman ba ema nebee tama mai.#Mateus 5:15; Lucas 11:33 17Nunee mos, buat hotu-hotu nebee agora sei subar hela, iha loron ida sei hatudu momoos. I buat hotu-hotu nebee agora segredu hela, iha loron ida ema sei hatene.#Mateus 10:26; Lucas 12:2

18Nunee, imi tenki rona Hau nia hanorin ho atensaun. Tanba ema nebee rona ho atensaun, Maromak sei halo nia komprende liu tan. Maibee ema nebee lakohi rona, maski nia hanoin dehan nia komprende ituan, nia sei sai beik liu tan.#Mateus 25:29; Marcos 4:25; Lucas 19:26

See mak Nai Jesus nia alin sira?

(Mateus 12:46-50; Marcos 3:31-35)

19Iha loron ida, Jesus nia inan ho Nia alin sira mai atu hasoru Nia, maibee sira la konsege hasoru, tanba ema barak haleu hela Nia. 20Iha ema ida foo hatene ba Jesus dehan, “Ita Boot nia inan ho alin sira iha hela liur. Sira hakarak hasoru Ita Boot.”

21Maibee Jesus hataan, “Hau nia inan ho Hau nia alin sira mak ema nebee rona Nai Maromak nia liafuan hodi halo tuir.”

Nai Jesus halo hakmatek anin boot

(Mateus 8:23-27; Marcos 4:35-41)

22Iha loron ida, Jesus hatete ba Nia eskolanti sira, “Mai ita baa iha tasi sorin.” Entaun sira sae bero hodi baa. 23Bero lao dadauk, Jesus toba dukur tiha. La kleur anin boot mai, halo tasi been tama ba bero laran, too bero atu besik mout.

24Haree nunee, eskolanti sira baa fanu Jesus, dehan, “Mestri, mestri, ita atu mate ona!”

Jesus hadeer hodi hatete ho lian makaas ba anin ho laloran boot nee. Anin paara kedas, i tasi mos hakmatek kedas.

25Depois Nia hatete ba Nia eskolanti sira, “Imi nia fiar iha nebee?”

Sira tauk ho admira hodi husu ba malu dehan, “Ema nee see loos? Nia foo orden ba anin ho laloran, sira mos halo tuir!”

Nai Jesus duni sai espiritu aat hosi ema Gerasa ida

(Mateus 8:28-34; Marcos 5:1-20)

26Jesus ho Nia eskolanti sira ho bero lao too rai Gerasa, iha tasi Galileia nia sorin baa. 27-29Iha fatin nee, iha mane ida, espiritu aat tama iha nia laran kleur ona. Nia hosi sidade, maibee la hela iha uma, hela deit iha rate, i nia isin molik deit. Espiritu aat sira ataka nia dala barak ona. Ema kesi nia liman-ain bebeik ho korenti, maibee nia sempre rasta kotu hotu. I espiritu aat sira obriga nia halai ba iha rai fuik.

Bainhira Jesus tuun hosi bero, ema nee mai hasoru Nia. Nia hakilar i hakneak hakruuk too rai iha Jesus nia ain. Depois Jesus haruka espiritu aat sai hosi nia.

Ema nee hakilar dehan, “Jesus, Nai Maromak Aas Liu nia Oan. O hakarak halo saida mai hau? Hau husu ba O, keta kastigu hau!”

30Jesus husu ba nia, “O naran saa?”

Nia hataan, “Batalhaun”. Nia hataan nunee tanba espiritu aat barak loos hela iha nia laran.

31Depois espiritu aat sira husu bebeik ba Jesus atu la bele haruka sira baa iha rai kuak klean nakukun.

32Iha tempu nebaa, iha fahi barak teb-tebes haan hela iha foho lolon. Espiritu aat sira husu fila-fila ba Jesus para haruka sira ba tama iha fahi sira nee. I Jesus konkorda. 33Entaun espiritu aat sira sai tiha hosi ema nee baa tama fali iha fahi sira. I fahi sira nee halai saruntu malu tuun hosi foho nee, monu hotu ba bee laran, i mout too mate hotu.

34Fahi atan sira haree buat nebee akontese, entaun sira halai baa konta sai iha sidade ho aldeia-aldeia sira nebee besik. 35Rona nunee, ema barak sai baa atu haree rasik ho matan. Too iha nebaa, sira haree ema nebee uluk espiritu aat domina nee, diak tiha ona. Nia tuur hakmatek hela iha Jesus nia ain, hatais tiha ona hena, i nia hanoin normal fali ona. Haree nunee, sira hotu tauk. 36Ema sira nebee ohin haree Jesus duni sai espiritu aat sira nee, sira konta ba sira nebee foin mai, kona ba oinsaa mak Jesus salva ema nee. 37Depois ema hotu-hotu iha rai Gerasa husu atu Jesus sai tiha hosi nebaa, tanba sira tauk teb-tebes.

Entaun Jesus baa sae bero atu fila fali ba iha tasi sorin.

38Ema nebee ohin espiritu aat sai hosi nia nee, husu para bele tuir Jesus.

Maibee Jesus hataan, 39“Diak liu o fila ba o nia uma hodi konta saida mak Nai Maromak halo ona ba o.”

Entaun ema nee baa lao lemo-lemo iha sidade nee tomak hodi konta sai kona ba buat hotu nebee Jesus halo ba nia.

Nai Jesus halo moris fali labarik feto ida, i kura feto ida tan

(Mateus 9:18-26; Marcos 5:21-43)

40Bainhira Jesus fila fali hosi tasi sorin, ema barak hein hela Nia, i simu Nia ho haksolok. 41-42Iha nebaa iha ema ida naran Jairo, nia mak responsavel uma kreda iha sidade nee. Nia oan ida deit, feto ida ho tinan sanulu resin rua. Labarik nee moras boot, besik atu mate. Entaun Jairo baa hakneak i hakruuk too rai iha Jesus nia ain hodi husu ho laran tomak para Jesus baa iha nia uma.

Jesus lao dadauk ba Jairo nia uma, ema barak akompanha Nia too sena malu.

43Iha ema lubun boot nee, iha feto ida, nia fulan mai la para durante tinan sanulu resin rua. Nia faan tiha nia sasaan hotu hodi baa konsulta iha doutor sira, maibee la iha ema ida mak bele kura nia moras.#8:43:Iha dokumentu antigu ho lian Gregu barak loos. Balu hakerek, balu la hakerek liafuan “Nia faan tiha nia sasaan hotu hodi baa konsulta iha doutor.” 44Feto nee baa besik iha Jesus nia kotuk, nia kona kois Jesus nia hena tutun, i nia raan paara kedas.

45Jesus husu, “See mak ohin kona Hau nee?”

Sira hotu hataan, "Laos ami". Pedro mos hatete, “Mestri, iha ema barak mak sena malu ho Ita Boot.”

46Maibee Jesus hataan, “Lae, ohin Hau senti kbiit ida sai hosi Hau. Nee mak Hau hatene, iha ema ida kona Hau.”

47Bainhira feto nee hatene katak nia la bele subar, nia tauk teb-tebes no nakdedar, i nia baa hakneak i hakruuk too rai iha Jesus nia ain. Depois nia konta nia problema nee ba Jesus iha ema hotu nia oin, i foo hatene katak, momentu nia kona Jesus, nia moras diak kedas.

48Jesus dehan ba nia, “Hau nia oan, o hetan kura tanba o fiar mai Hau. Fila ho diak.”

49Jesus sei koalia hela, ema ida mai hosi Jairo nia uma foo hatene ba Jairo, “senhor nia oan iis kotu tiha ona. Lalika halo kolen tan Mestri.”

50Rona nunee, Jesus hatete ba Jairo, “Lalika tauk. Fiar deit, mak ita nia oan sei moris fali.”

51-53Bainhira sira too iha Jairo nia uma, ema barak iha tiha ona nebaa, sira tanis lelir hela. Jesus hatete ba sira, “Imi lalika tanis tan ona. Labarik nee la mate ida, nia toba deit!”

Maibee sira hamnasa fali Jesus, tanba sira rasik haree labarik nee mate tiha ona. Jesus husu ba labarik nia inan-aman, ho mos Pedro, João ho Tiago, tama ba laran hamutuk ho Nia. Sira seluk Nia haruka hein iha liur.

54Sira tama tiha ba laran, Jesus kaer labarik nia liman hodi hatete ho lian makaas, “Hau nia oan, hadeer ona!” 55Derepenti deit, labarik nee nia iis mai fali, nia hadeer i hamriik kedas. Jesus haruka sira foo hahaan ba nia. 56Labarik nia inan-aman admira teb-tebes. Maibee Jesus bandu sira para la bele konta sai ba ema ida, buat nebee mak akontese.

Currently Selected:

Lucas 8: BTDT

Highlight

Copy