लुका 6
6
विसराम दिनक प्रभु
(मति १२:१-१४; मरकुस २:२३-२८; ३:१-६)
1येसुजि एक विसरामक दिनवामा गोहुँवाक खेतवा भके जाइरहलसि। हुनेक चेलवाह गोहुँवाक बलिया टुरके हथवामा मिस-मिसवते खाए लगलइ।#व्यवस्था २३:२५ 2इअ देखके कुनहुँ फरिसियाह येसुजिक चेलवानिके कहलइ, “विसराम दिनमा जथि हइने करे बनसइ तोहरा उहे केहके करइबडह?”#प्रस्थान २०:१०; २३:१२; व्यवस्था ५:१४ 3येसुजि हुनुकाके जवाफ देते कहलसि, “कथि तोहरा हइने पढल बडह? जब दाउद रजवा हसे वकर सङहतियवासभक भुख लगइकि उअ कथि करले रहलिय?#१ समुएल २१:१-६ 4उअ कस्के परमेस्वरक घरवा#६:४ परमेस्वरक बास करना मन्दिर कि तम्बुके परमेस्वरक घर कहसइ। भितरा पेसके चढोलि रोटिया लेके खेलिय हसे वकरसाङे भेलि दोसरि जनके फेनि देलिय। उअ रोटिया पुजेरियानिके मतरे खाए बनइ।”#लेवि २४:९ 5तब येसुजि हुनुकाके कहलसि, “मुइ मन्सेक पुतर विसराम#६:५ विसराम दिन फेनि प्रभु बनोले हखसि। विसराम दिनवामा कथि करेके हसे कथि नाहिँ करेके अधिकार हुनेक हखइ। दिनक फेनि प्रभु हखहि।”
हथवा सुखाइल मन्से डउल भेल
(मति १२:९-१४; मरकुस ३:१-६)
6वसनेकरते फेरि दोसरि विसरामक दिनवामा येसुजि सभाघरवामा जाके सिछा देलसि। तखनहिँ वहवाँ एक जन मन्से रहलिय, जाकर दहिनि हथवा सुखाइल रहलइ। 7व्यवस्थाक-गुरुसभ हसे फरिसियाह येसुजिके दोस लगावेके तहिँया किहो कारन खोजइ रहलइ। उहेसे हुनुका येसुजि हथवा सुखइलि मन्सावाके विसरामक दिनवामा डउल बनोबसि कहके हेरइ रहलइ। 8बाकि येसुजि हुनुकर मनवाक बतवा जानके हथवा सुखइलि मन्सावाके कहलसि, “उठहि हसे यहवाँ याके ठडियाहि!” उहेसे उअ मन्सावा वइघरहिँ उठके ठडियलिय। 9तब येसुजि हुनुकाके कहलसि, “मुइ याबे तोहराके पुछबहिँ, विसरामक दिनवामा डउल काम करेके यसल हखइ कि हइने डउल काम करेके यसल हखइ हसे प्रान बचावेके यसल हखइ कि नास करेके यसल हखइ?” 10येसुजि हुनुका जम्मे जनके हेरके उअ मन्सावाके कहलसि, “तोर हथवा पसरोहि!” उअ पसरोलिय हसे वकर हथवा वइघरहिँ डउल भेलइ।
11बाकि इअ देखके व्यवस्थाक-गुरुसभ हसे फरिसियाह खुभे खिसियाके येसुजिके कथि करेके कहके एक-दोसरि जनसाङे छलफल करे लगलइ।
येसुजि बारह जन प्रेरितसभके छानलसि
(मति १०:१-४; मरकुस ३:१३-१९)
12एक दिन येसुजि पहडावामा जाके रातभर परमेस्वरसाङे परथाना करते बितोलसि। 13जब बिहान भेलइ, येसुजि यापन चेलवानिके बलोलसि हसे हुनुकरमधेसे बारह जनके छानके, हुनुकाके प्रेरित#६:१३ सुसमाचार परचार करे हसे खिस्टक मन्डलि स्थापना करेके तके बिसेस करके पवितर-आत्मासे नियुक्त कराइल मन्सेके प्रेरित कहइ। कहके नाउँ देलसि। 14हिनिकरमधे सिमोन, जकरेके येसुजि पतरुस नाउँ फेनि धरलसि, सिमोनक भाइ अन्द्रियास, याकुब, युहन्ना, फिलिप, बारथोलोमाइ, 15मति, थोमा, अल्फयसक बेटा याकुब, देसभक्त कहल सिमोन, 16याकुबक बेटा यहुदा हसे यहुदा इस्कोरियोत, जुने येसुजिके धोखा देलिय।
येसुजि बहुत मन्सेसभके डउल बनोलसि
(मति ४:२३-२५)
17वकरपाछा जब येसुजि चेलवानिसाङे पहडावासे तर नाभके एगुडा सम ठउरिमा यलसि, वहवाँ हुनेक दोसरि चेलवाह हसे याको मन्सेसभक जबड भिड रहलइ। यहुदिया छेतरक जम्मे वरसे, यरुसलेम सहर हसे समुनदरवाक तिरवामा रहल टुरोस हसे सिदोन सहरवासे फेनि मन्सेसभक जबड भिड जामा भेल रहलइ। 18हुनुका जम्मे जन येसुजिक सिछा सुने हसे यापन-यापन रोगवासे डउल हखेके तहिँया याइल रहलइ। वहवाँ दुस्ट-आत्मा लागके दुःख पउलहरा फेनि डउल भेलइ। 19हुनुका जम्मे जन येसुजिके छुए खोजइ रहलइ, केहकेकि येसुजिसे निकडलि सक्तिसे जम्मे जन डउल हखइ।
यासिरवाद हसे सराप
(मति ५:३-१२)
20तब येसुजि यापन चेलवानिवरि हेरके यसके कहलसि,
“तोहरा धन्यक हखह, जुने गरिब बडह,
केहकेकि परमेस्वरक राज तोहरे हखइ।
21 तोहरा धन्यक हखह, जुने यखना भुखाइल बडह,
केहकेकि तोहरा यघेबह।
तोहरा धन्यक हखह, जुने यखना कनइ बडह
केहकेकि तोहरा हसबह।
22 “तोहरा धन्यक हखह, जब मुइ मन्सेक पुतरमा विस्वास करलेसे मन्सावाह हेला करतइ, समाजसे निकडा देतइ हसे दुस्ट सोचके तोहार नाउँक बदनाम करतइ, #
१ पतरुस ४:१४ 23तखनहिँ खुसि भके नचिह हसे उफरिह, केहकेकि तोहार तहिँया स्वरगमा बडके इनाम धराइल बडइ। हुनुकर पुरखावाह फेनि पहिनाक अगमवक्तावानिके वसने करके सतउले रहलइ।#२ इतिहास ३६:१६; प्रेरित ७:५२
24 बाकि तोहराके धिकार बडइ, जुने यखनि धनि बडह!
केहकेकि तोहरा यापन सुखक जिवन बिता सकले बडह।
25 तोहराके धिकार बडइ, जुने यखनि यघाइल बडह!
केहकेकि तोहरा भुखेबह।
तोहराके धिकार बडइ, जुने यखनि हसइ बडह!
केहकेकि तोहरा दुःख पउबह हसे कनबह।
26 तोहराके धिकार बडइ, जब जम्मे मन्सावाह तोहार बखान करतइ!
केहकेकि हुनुकर पुरखावाह फेनि झुठा अगमवक्तावानिके यसने करइ रहइ।
सतरुवानिके फेनि माया करे परतइ।
(मति ५:३८-४८; ७:१२)
27 “बाकि मोर बतवा सुनलहरानिके मुइ कहइ बडहिँ, यापन सतरुवानिके माया करिह हसे तोहराके घिरिना करलहरानिके डउल करिह। 28सराप देलहरानिके यासिरवाद दिह हसे हइने डउल व्यबहार करलहरानिक तहिँया परथाना करिह। 29यगर कुनहुँ तोरके एगुडा गलवामा थपरोतइ जउँ, दोसरि गलवा फेनि डोगदेसि। यगर कुनहुँ तोर बाहराक होडलि लुगवाह लिगबिय जउँ, वकरेके तोर भितरा पेहरलि झोलियावा फेनि देसि। 30जुने तोरसे मङतइ वकरेके देसि हसे तोर चिजुवा लिगलहरानिसे फिरता झिन मङसि। 31दोसरि मन्सावाह तोहराके जथि करिय कहके इछा करसह, तोहरा फेनि हुनुकाके वसने करिह।#मति ७:१२
32 “यगर तोहराके माया करलहरानिके मतरे माया करबह जउँ, तोहरा कथि सम्मान पउबह त? केहकेकि पपियाह फेनि वसने करसइ। 33यगर तोहराके डउल करलहरानिके मतरे डउल करबह जउँ, तोहरा कथि सम्मान करलह त? केहकेकि पपियाह फेनि वसने करसइ।
34 “यगर तोहरा ककरहुँके फिरता पावेके यसरामा रिन देबह जउँ, तोहरा कथि सम्मान पउबह त? केहकेकि पपियाह फेनि वसने करसइ।
35 “बाकि यापन सतरुवानिके माया करिह हसे हुनुकाके डउल करिह। फिरताक यसरा नाहिँ राखके रिन दिह, वसने करबह जउँ तोहरा जबड इनाम पउबह हसे सबसे महान परमेस्वरक बेटा-बेटि हखबह, केहकेकि परमेस्वर बइगुनि हसे दुस्टवानिके फेनि दाया करससि। 36जसने परमेस्वर पिता मइगर बडसि, तोहरा फेनि वसने मइगर हखिह।
दोसरि जनके दोस झिन लगोइह
(मति ७:१-५)
37 “दोसरि जनके झिन करिह हसे परमेस्वर फेनि तोहराके न्याय नाहिँ करबसि। दोसरि जनके दोस झिन लगोइह हसे परमेस्वर फेनि तोहराके दोस नाहिँ लगोबसि। दोसरि जनके छमा देबह जउँ, परमेस्वर फेनि तोहराके छमा देबसि। 38जब तोहरा दोसरि जनके देबह, तब परमेस्वर फेनि तोहराके खान-खानके, डिङा-डिङाके हसे हरकइलइ पुरा नापमा देबसि, केहकेकि जुन नापसे तोहरा देबह, उहे नापमा तोहरा फेनि पउबह।”
39वसनेकरते येसुजि हुनुकाके एगुडा उदाहरन देते कहलसि, “कथि यन्हरा यन्हराके डोर्यावे सकतइ? हुनुका दुन्हुँ जन गडहामा नाहिँ परतइ त?#मति १५:१४ 40कुनहुँ चेला फेनि यापन गुरुसे जबड नाहिँ हतइ, बाकि उअ सिखसकलेपर यापन गुरु नहिँया हखबिय।#मति १०:२४-२५; युहन्ना १३:१६; १५:२०
41 “यापन भयवाक यखियामा भेलि घुजिया तुइ देखइ बडहिँ? बाकि यपने यखियामा भेलि मुङडावा केहके हइने देखसहि। 42यगर यपने यखियामा भेलि मुङडावा हइने देखसहि जउँ, यापन भयवाके ‘अरे भयवा, मुइ तोर यखियामा भेलि घुजिया निकडादेबहि’ कहके कस्के कहबहिँ त? अरे कपटि, पहिला यपने यखियामा भेलि मुङडावा त निकडोहि, तब तुइ यापन भयवाक यखियामा भेलि घुजिया निकडावेके तहिँया खाँ डउलसे देखे सकबहि।
गाछ हसे वकर फर
(मति ७:१६-२०; १२:३३-३५)
43 “एगुडा डउल गाछमा कबहुँ फेनि हइने डउल फर हइने फरसइ, न त हइने डउल गाछमा डउल फर फरे सकतइ। 44एगुडा गाछ वकर फरवासे मतरे चिनेसइ। कुनहुँ फेनि काँटक झाँङसे कोइलार हइने टुरसइ, न त काँटक झाँङसे अंङगुर टुरसइ।#मति १२:३३ 45डउल मन्से यापन मनवा भितरासे डउले बात निकडोसइ हसे दुस्ट मन्से यापन मनवा भितरासे हइने डउल बात निकडोसइ, केहकेकि जुन बतवा मन्सावाक मनवा भितरा रहसइ, उहे बतवा मन्सावाक मुहँवासे निकडोसइ।#मति १२:३४
दु खलिक जग
(मति ७:२४-२७)
46 “यगर मोर कहलि बतवा हइने मनसह जउँ, तोहरा मोरके केहके ‘प्रभु, प्रभु’ कहसह? 47जुने मोर लघिना याके मोर बतवा सुनतइ हसे मोर कहलि बतवा मनतइ, उअ मन्सावा कस्नुक हखिय मुइ तोहराके कहबहिँ, 48उअ मन्सावा एगुडा घर बनोलहर मन्से नहिँया हखबिय, जुने गहिर जग खेनके सिलवा वपरा घर बनोलिय। उअ घरवा डउलसे बनोलेसे पनियाक बढिया याके ठोकइले फेनि घरवाके भसकावे हइने सकलिय। 49बाकि जुने मोर बतवा सुनके हइने मनसइ, उअ जग हइने खेनके घर बनोलहर मन्से नहिँया हसइ। जब पनियाक बढिया याके ठोकेलइ, तब उअ घरवा जम्मे नास हतइ।”
Currently Selected:
लुका 6: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
