लुका 7

येसुजि रोमि कप्‍तनवाक बहरियावाके डउल बनोलसि

(मति ८:५-१३)

1येसुजि मन्‍सावानिके इअ जम्‍मे बतवा सिखोलेपर कफरनहुम सहरवामा पेसलसि। 2वहवाँ कुनहुँ एक जन रोमि कप्‍तानक गहनि सोगावल एगुडा बहरिया रहलिय। उअ मनियाके मरहिँ जोकर रहलिय। 3जब कप्‍तनवा येसुजिक बारेमा सुनलिय, उअ वकर बहरियावाके डउल बनादेवेके तहिँया कतेक यहुदि यगुवासभके येसुजिके बिन्‍ति करे पठोलिय। 4उहेसे हुनुका येसुजिक लघिना याके बिन्‍ति करते यसके कहलइ, “रोमि कप्‍तनवा यपनहुँक मदत पावेके लाइक मन्‍से बडिय। 5केहकेकि उअ हमार यहुदि जतियाके माया करसिय हसे हमार तहिँया एगुडा सभाघर फेनि बनादेले बडिय।” 6यसनुक बिन्‍ति सुनके येसुजि हुनकरेसाङे गेलसि। येसुजि कप्‍तनवाक घरवाक लजिके पुगइकि, उअ यापन सङहतियवासभके यसके कहके समाद पठोलिय, “गुरुजि दुःख झिन करहुँ! केहकेकि यपनहुँके मोर घरवा भितरा लिगाएके मुइ लाइक हइने बडहिँ हसे 7मुइ यपनहिँ फेनि यपनहुँक लघिना यावेके लाइक हइने बडहिँ। यपनहुँ आग्‍या मतरे देहुँ हसे मोर बहरियावा डउल हखबेकरबिय। 8केहकेकि मुइ फेनि बडके हाकिमक अदलमा बडहिँ हसे मोर अदलमा फेनि सिपाहिसभ बडइ। मुइ एक जनके ‘जाहि’ कहसहि, उअ जइबे करसिय हसे दोसरि जनके ‘यवहि’ कहसहि, उअ यइबे करसिय। जब मुइ मोर बहरियावाके ‘इअ करहि’ कहसहि उअ करबे करसिय।”

9येसुजि वकर बतवा सुनके छक परलसि हसे मन्‍सावानिक भिडवावरि घुमके यसके कहलसि, “मुइ तोहराके कहबहिँ, यतुरा जबड विस्‍वास करलाहर मन्‍से त मुइ इस्राएलमा फेनि हइने देखले बडहिँ।” 10जब रोमि कप्‍तनवाक समाद यनलहरा घर फिरलइ, तब वकर बहरियावा डउल भेसकल रहलिय।

येसुजि विधुवाक बेटवाके जिउतोलसि

11दोसरि दिन येसुजि नाइन सहरवामा गेलसि। हुनेसाङे यपने चेलवाह हसे याको बहुत मन्‍सेसभ फेनि गेलइ। 12जब येसुजि सहरवाक दुवरियामा पुगलसि, तखनहिँ मन्‍सावाह एगुडा मुर्दाके गाडेके तहिँया सहरवासे बाहरा लेके जाइ रहलइ। उअ मरलि मन्‍सावा वहवाँक एगुडा विधुवाक एगुडे मतरे बेटा रहलिय। वकरसाङे सहरवाक बहुत जन मन्‍से फेनि जाइ रहलइ। 13जब प्रभुजि उअ विधुवाके देखलसि, हुनेक दाया लगलइ हसे वकरेके कहलसि, “तुइ झिन कनहि!” 14हसे लजिके जाके मुर्दावाक खटियावा छुलसि। जब मुर्दावा बोकलाहराह रोकेलइ, येसुजि मुर्दावाके कहलसि, “अरे बबुवा, उठ!” 15तखनहिँ मरलि छोकनिया उठके बेठलिय हसे फदके लगलिय। तब येसुजि उअ छोकनियाके वकर दाओके जिम्‍मा लगादेलसि।

16हुनुका परमेस्‍वरक यसनुक सक्‍ति देखके जम्‍मे जन छक परलइ हसे डर मनते परमेस्‍वरक बखान करते यसके कहलइ, “एक जन महान अगमवक्‍ता हमार लघिना देखा परल बडसि हसे परमेस्‍वर यापन मन्‍सावानिके मदत करे याइल बडसि।” 17उअ घटनावाक चरचा यहुदियाक चारिवरि जम्‍मे छेतरसभमा फइललइ।#१ राजा १७:१७-२४; २ राजा ४:३२-३७

बप्‍तिस्‍मा देलाहर युहन्‍नाक प्रस्‍न

(मति ११:२-१९)

18जब युहन्‍नाक चेलवाह येसुजिक करलि जम्‍मे बतवा वकरेके सुनादेलइ, 19युहन्‍ना यापन दु जन चेलवानिके बलाके प्रभुक लघिना यसके कहके पुछे पठोलिय, “कथि हमरा यसरा करलि मुक्‍ति देलाहर राजा यपनहुँ हखहुँ कि याको ककरहुँके हमरा इसियाइ रहेके?” 20जब चेलवाह येसुजिक लघिना याके पुछलइ, “कथि हमरा यसरा करलि मुक्‍ति देलाहर राजा यपनहुँ हखहुँ कि याको ककरहुँक पइडा हेरु? इअ बतवा बप्‍तिस्‍मा देलाहर युहन्‍ना हमराके यपनहुँक लघिना पुछे पठोले बडिय।”

21तखनहिँ येसुजि बहुत जनके रोग, दुःख हसे दुस्‍ट-आत्‍मा लागल मन्‍सेसभके डउल बनोलसि तके यन्‍हरानिके फेनि देखाह बनोलसि। 22तब येसुजि युहन्‍नाक चेलवानिके कहलसि, “तोहरा जथि देखले बडह हसे सुनले बडह, जाके उहे बतवा युहन्‍नाके कहदिह। यन्‍हराह देखइ बडइ, लङडाह बुले सकइ बडइ, बडकि दुःखवा लगलि मन्‍सावाह डउल हखइ बडइ, बहिराह सुनइ बडइ, मरलि मन्‍सावाह जियइ बडइ हसे गरिबवाह सुसमाचार सुनइ बडइ।#यसइया २९:१८-१९; ३५:५-६; ६१:१ 23मोर बारेमा सक हइने करलाहर मन्‍से धन्यक हखिय।”

24जब युहन्‍नाक चेलवाह फिरके गेलइ, तब येसुजि मन्‍सावानिके युहन्‍नाक बारेमा कहलसि, “तोहरा उराठ-ठउरियामा कथि हेरे गेल रहलह? कथि बइरावासे डिङइकि लरकटवाके? 25यगर हइने हखइ जउँ, कथि हेरे गेल रहलह? डउल-डउल लुगा पेहरल मन्‍सेके? डउल-डउल लुगा पेहरल मन्‍सेसभ त राजदरबरवामा मोजमस्‍तिसे बइठल रहसइ। 26याबे सदियो मोरके कहह त, तोहरा कथि हेरे गेल रहलह? कथि अगमवक्‍ताके हइने? हँ, उअ अगमवक्‍ताहिँ रहलिय। मुइ कहबहिँ, तोहरा एगुडा अगमवक्‍तासे फेनि महान एक जनके देखलह हसे 27जाकर बिसयमा यसके लिखाइल बडइ,

तोरसे यागा-यागा मुइ मोर दुतवाके पठोइ बडहिँ।

उअ तोर तहिँया पइडा तयार करबिय। # मलाकि ३:१

28 मुइ तोहराके कहबहिँ, ‘जनियानि मन्‍सेसे जरमलिमधे युहन्‍नासे महान मन्‍से कुनहुँ फेनि हइने बडइ, ताफेनि परमेस्‍वरक राजमा जुने सबसे झिनिक बडिय, उअ युहन्‍नासे फेनि याको महान हखिय’।” 29इअ सुनके जम्‍मे मन्‍सावाह हसे कर उठोलराह फेनि परमेस्‍वरक पइडा यसल बडइ कहके मनलइ, केहकेकि हुनुका युहन्‍नासे बप्‍तिस्‍मा लेले रहलइ।#मति २१:३२; लुका ३:१२ 30बाकि फरिसियाह हसे व्‍यवस्‍थाक-गुरुसभ परमेस्‍वरक योजनाके इन्‍कार करलेसे युहन्‍नासे बप्‍तिस्‍मा हइने लेलइ। 31तब येसुजि कहलसि, “वसके भेले इअ पुस्‍ताक मन्‍सावानिके मुइ काकरसाङे दाजेके त? हुनुका काकर नहिँया बडइ त? 32हुनुका त बजरवामा बइठके एक-दोसरि जनसाङे यसके बात करलाहर छोकनिसभ नहिँया बडइ। हुनुका एक-दोसरि जनके यसके कहसइ,

‘हमरा तोहार तहिँया बसुरि बजोलहुँ,

बाकि तोहरा हइने नचलह

हसे हमरा सोकक गित गवइकि

तोहरा हइने कनलह।’

33 “जब बप्‍तिस्‍मा देलाहर युहन्‍ना यलिय, उअ न त रोटि खइय न अंङगुरक रस पिइय, ताफेनि तोहरा वकरेके भुत लागल मन्‍से हखिय कहके कहसह। 34मुइ मन्‍सेक पुतर खइते हसे पियते यलहिँ, बाकि हेरह, तोहरा मोरके फेनि दोस लगोते यसके कहसह, ‘इअ एगुडा खउदार, मोदहरिया, कर उठोलाहर हसे पपियानिक सङहतिया हखिय।’ 35बाकि परमेस्‍वरक बुद्धि स्‍विकार करके उअ बुद्धिया यनुसार जिन्‍गि बितोलहरा मतरे उअ बुद्धिया यसल बडइ कहके परमान देसइ।”

येसुजि पापि जनियानिके छमा देलसि

36एक दिन एक जन फरिसि येसुजिके जेउना खाएके तहिँया यापन घरवामा बलोलिय हसे येसुजि वकर घरवा भितरा जाके जेउना खाए बेठलसि। 37उअ सहरवामा एक जन पापि जनियानि रहलिय। जब येसुजि फरिसियाक घरवामा जेउना खाए याइल बडसि कहके उअ थाह पउलिय, तब उअ एगुडा सिंङ्गमरमरक सिसिमा#७:३७ पत्‍थरामाहे बनावल सिसिके सिंङ्गमरमरक सिसि कहसइ। महङ महकाह तेल लेले यलिय।#मति २६:७; मरकुस १४:३; युहन्‍ना १२:३ 38उअ येसुजिक पाछासे याके हुनेक गोडवाक लघिना ठडियाके कनते रोरवाक थोपवासे येसुजिक गोडवा धोदेलिय। वकरपाछा यापन केसवासे येसुजिक गोडवा पोछदेलिय हसे चुम्‍ते महकाह तेलवा लगादेलिय।

39इअ देखके येसुजिके जेउना खाए बलोलहरा फरिसिया मने-मने यसके कहलिय, “यगर येसुजि सदियो अगमवक्‍ता हखसि जउँ, वकरेके छुलहरि जनिनिया कुने हखिय हसे कस्‍नुक खलिक पापि जनियानि हखिय कहके जन्‍तसि।” 40तखनहिँ येसुजि उअ फरिसियाके कहलसि, “अरे सिमोन, मुइ तोरके एगुडा बात कहबहिँ।” उअ कहलिय, “गुरुजि कहहुँ।” 41तब येसुजि कहलसि, “कुनहुँ एक जन मन्‍सेसे दु जन मन्‍से रिन लेले रहलइ। एक जन पाँच सय चाँनिक रुपिया हसे दोसरि जन पचाँस चाँनिक रुपिया लेले रहलइ। 42हुनुका दुन्‍हु जन यापन रिनवा तिरे हइने सकलेसे, उअ मन्‍सावा दुन्‍हु जनक रिनवा माफ करदेलिय। याबे मोरके कहह त, उअ मन्‍सावा ककरेके बढता माया करबिय?”

43सिमोन जवाफ देते कहलिय, “जाकर बढता रिन माफ भेलइ।” येसुजि कहलसि, “तुइ ठिक कहलहि।” 44तब येसुजि जनिनियावरि हेरके सिमोनके कहलसि, “इअ जनिनियाके हेरहि त? मुइ तोर घरवा भितरा यलहिँ, बाकि तुइ मोरके गोडवा धोवेके तहिँया पानि हइने देलहि, इअ त मोर गोडवा रोरवाक थोपवासे धोके यापन केसवासे पोछदेलिय। 45तुइ मोरके चुम्‍के यादर-भाव हइने करलहि, बाकि मुइ घरवा भितरा यइलिसे यखनिलइ, इअ मोर गोडवा चुम्‍ते बडिय। 46तुइ मोर केसवामा तेल हइने लगादेलहि, बाकि इअ मोर गोडवामा महकाह तेल लगादेलिय, 47मुइ तोरके कहबहिँ, यकर बहुत पापसभ छमा भेलेसे, इअ मोरके बहुत माया देखोलिय। बाकि जाकर इचिके पाप छमा भेल बडइ, उअ मन्‍सवा इचिके माया करसइ।” 48येसुजि उअ जनिनियाके कहलसि, “तोर पाप छमा भेसकल बडइ।” 49वहवाँ जेउना खाए बेठलाहर मन्‍सावाह कहे लगलइ, “पाप छमा करलाहर इअ कुने हखिय?” 50बाकि येसुजि उअ जनिनियाके कहलसि, “तोर विस्‍वास तोरके बचोले बडिय, उहेसे सान्‍तिसे जाहि।”

Currently Selected:

लुका 7: CTHR

Highlight

Copy