लुका 4

येसुजिक परिछा

(मति ४:१-११; मरकुस १:१२-१३)

1जब येसुजि पवितर-आत्‍माक सक्‍तिसे भरपुर भके यरदन लदियासे फिरलसि, पवितर-आत्‍मा हुनेके उराठ-ठउरियामा लिगलसि। 2वहवाँ सइतनवा चालिस दिनलइ येसुजिके पापमा फसावेके तहिँया परिछा करलिय। उअ दिन येसुजि किहो फेनि हइने खइलेसे, हुनेके भुख लगलइ।#व्‍यवस्‍था ९:९; १ राजा १९:८ 3तखनहिँ सइतनवा येसुजिके कहलिय, “यगर यपनहुँ परमेस्‍वरक पुतर हखहुँ जउँ, इअ पत्‍थरावाके रोटि बनेके आग्या करहुँ।” 4तब येसुजि वकरेके जवाफ देते कहलसि, “धरमसास्‍तरवामा यसके लिखाइल बडइ, मन्‍सावा रोटिसे#४:४ रोटि: येसुजिक जुनवामा मन्‍सावानिक तहिँया रोटि मुख्‍य जेउना रहलइ। मतरे हइने बचसइ।”#व्‍यवस्‍था ८:३

5वकरपाछा सइतनवा येसुजिके एगुडा उँच ठउरिमा लिगाके वइघरहिँ संसारक जम्‍मे राजसभ देखोते कहलिय, 6“मुइ यपनहुँके इअ जम्‍मे राजसभ वपरा अधिकार हसे वकर महिमा देबहिँ, केहकेकि इअ जम्‍मे मोरे हथवामा बडइ हसे मुइ जकरेके देवे खोजबहिँ वकरेके देवे सकसहिँ। 7यगर यपनहुँ मोरके ढोग करबहुँ जउँ, इअ जम्‍मे यपनहुँक हतइ।” 8येसुजि सइतनवाके जवाफ देते कहलसि, “धरमसास्‍तरवामा यसके लिखाइल बडइ,

‘तुइ परमप्रभु यापन परमेस्‍वरके मतरे ढोग करसि

हसे हुनेके मतरे यादर करसि’।” # व्‍यवस्‍था ६:१३

9तब सइतनवा येसुजिके यरुसलेममा लिगलिय हसे मन्‍दिरवाक सबसे वपरा टिस्‍कुनियामा पुगाके कहलिय, “यगर यपनहुँ परमेस्‍वरक पुतर हखहुँ जउँ, यहवाँसे तर उफरहुँ, 10केहकेकि धरमसास्‍तरवामा यसके लिखाइल बडइ,

‘यपनहुँक रछा करेके परमेस्‍वर यापन स्‍वरगदुतवानिके आग्या करबसि,

11हसे यपनहुँक टङडियामा पत्‍थरावासे चोट झिन लगइ कहके

स्‍वरगदुतवाह यपनहुँके हथवामा लोखतइ’।”#भजन ९१:११-१२

12बाकि येसुजि जवाफ देते कहलसि, “धरमसास्‍तरवामा यसके लिखाइल बडइ, ‘तुइ परमप्रभु यापन परमेस्‍वरके परिछा झिन करसि’।”#व्‍यवस्‍था ६:१६ 13सइतनवा येसुजिके जम्‍मे परिछा करसकलेपर फेरि दोसर डउल मउका नाहिँ पवइलइ हुनेके छाडके गेलिय।

गालिल छेतरमा येसुजिक सेवाक काम सुरु

(मति ४:१२-१७; मरकुस १:१४-१५)

14जब येसुजि पवितर-आत्‍माक सक्‍तिसे भराके गालिलमा फिरलसि, हुनेक बारेमा चारिवर जम्‍मे ठउरियामा चरचा हखे लगलइ। 15येसुजि यहुदि सभाघरवाहमा सिखावे लगलसि, तब जम्‍मे मन्‍सावाह हुनेक बखान करलइ।

16जब येसुजि यापन बढलि गउँवा नासरतमा यापुगलसि, हुने सबदिनक नहिँया विसराम दिनवामा सभाघरमा गेलसि हसे धरमसास्‍तरवा पढेके ठडियलसि। 17येसुजिके यसइया अगमवक्‍ताक कितबवा#४:१७ अगमवक्‍ताक लिखलि कितबवाके अगमवक्‍ताक किताब कहसइ। पढेके दियलइ हसे उअ कितबवा खोलके इअ बतवा लिखइलि खन्‍ड निकडाके पढलसि,

18 “परमप्रभुक आत्‍मा मोरसाङे बडसि,

केहकेकि गरिबवानिके सुसमाचार सुनावेके तहिँया मोरके अभिसेक # ४:१८ अभिसेक: पुरान करारक जुनवामा मन्‍सावानिक मुडवामा तेल लगाके बिसेस कामक तहिँया छानल कहके देखावेके अभिसेक करइ। करले बडसि।

कइदियानिके छुटकारा देवेके,

यन्‍हरानिके देखाह बनावेके,

यत्‍याचारमा परलहरानिके छुटकारा देवेके तहिँया,

19 हसे परमप्रभुक खुसिक बरस घोसना करेके तहिँया परमेस्‍वर मोरके पठोले बडसि।” # यसइया ६१:१-२

20वकरपाछा येसुजि कितबवा बन्‍द करके एक जन सेवकके देलसि हसे बेठलसि। तब सभाघरवामा भेलि जम्‍मे जनक लजरिया हुनेक वपरा परलइ। 21तखनहिँ येसुजि हुनुकाके कहलसि, “याजु धरमसास्‍तरवाक इअ वचन तोहरा सुनते-सुनते पुरा भेल बडइ।”

22वहवाँ भेलि जम्‍मे मन्‍सावाह येसुजिके बखान करलइ। हुनेक मुहवासे निकडलि यचम्‍मक बतवा सुनके छक परके यसके कहलइ, “कथि इअ योसेफहिँक बेटा हइने हखिय त?” 23तब येसुजि कहलसि, “मोर थाह बडइ कि, याबे तोहरा मोरके सदियो इअ कहावत कहबह, ‘अरे बइध! तुइ यपनहिँके डउल बनोहि’ हसे ‘कफरनहुममा यपनहुँ जथि-जथि काम करले बडहुँ वसने यहवाँ फेनि यापन गउँवामा यचम्‍मक काम करहि’।”

24बाकि येसुजि कहलसि, “सदियो मुइ तोहराके इअ कहइ बडहिँ, कुनहुँ अगमवक्‍ताके फेनि मन्‍सावाह यापन देसवामा यादर-भाव हइने करसइ।#युहन्‍ना ४:४४ 25मुइ तोहराके एगुडा सदियो बात कहइ बडहिँ, जब एलिया अगमवक्‍ताक जुनवामा साढे तिन बरसलइ पानि हइने परके जबड यनिकाल परलइ, तखनहिँ इस्राएल देसवामा बहुत विधुवासभ रहलइ।#१ राजा १७:१; १८:१ 26बाकि सिदोन देसक सारपत गउँवाक एगुडा विधुवा लघिना मतरे परमेस्‍वर एलियाके पठोलसि।#१ राजा १७:८-१६ 27वसने एलिसा अगमवक्‍ताक जुनवामा इस्राएलमा बहुत जन बडकि दुःखवा लागल मन्‍सेसभ रहलइ, बाकि हुनुकरमधेसे सिरिया देसक नामान नाउँक मन्‍सावा मतरे डउल भेलिय।”#२ राजा ५:१-१४

28इअ बतवा सुनके सभाघरवामा भेलि जम्‍मे मन्‍सावाह खुभे खिसियलइ। 29हुनुका भका-भक उठके येसुजिके घिसियोते सहरवासे बाहरा निकडा देलइ, केहकेकि हुनुकर इअ सहरवा पहडावा वपरा रहलइ हसे हुनुका हुनेके पहडावाक टिस्‍कुनियासे धकिलके खसावे खोजइ रहलइ। 30बाकि येसुजि मन्‍सावानिक भिडवासे निकडके गेलसि।

भुत-आत्‍मा लागल मन्‍से

(मरकुस १:२१-२८)

31वकरपाछा येसुजि गालिल जिल्‍लाक कफरनहुम नाउँक सहरवामा यलसि। विसराम दिनवामा हुने मन्‍सावानिके सिछा देलसि। 32मन्‍सावाह येसुजिक सिछा सुनके छक परलइ, केहकेकि हुने अधिकार सहित वचन देइ रहलसि।#मति ७:२८-२९; मरकुस १:२२

33तखनहिँ उअ सभाघरवामा एक जन भुत-आत्‍मा लागल मन्‍से रहलिय। उअ मन्‍सावा जबड माहे चिल्‍लाके कहलिय, 34“हे नासरतक येसुजि, यपनहुँ हमारके कथि करे खोजइ बडहुँ त? कथि यपनहुँ हमराके नास पारे याइल बडहुँ? यपनहुँ परमेस्‍वरक पठाइल पवितर जन हखहुँ कहके मुइ चिनसहिँ।” 35येसुजि उअ भुतवाके डाटके यसके कहलसि, “तुइ चुपचाप भके इअ मन्‍सावासे निकडके जइबे करहि!” तब उअ मन्‍सावाके जम्‍मे जनक यागा पटकके भुतवा निकडलिय, बाकि वकर किहो चोट फेनि हइने लगलइ।

36तब जम्‍मे मन्‍सावाह छक परके एक दोसरिसाङे यसके बात करे लगलइ, “इअ मन्‍सावाक बतवामा त कस्‍नुक अधिकार हसे सक्‍ति बडइ। इअ आग्‍या करतेकि भुतवाह फेनि मन्‍सावानिसे निकडके जेसइ!” 37उहेसे येसुजिक चरचा उअ छेतरक चारिवर फइललइ।

येसुजि बहुत मन्‍सेके डउल बनोलसि

(मति ८:१४-१७; मरकुस १:२९-३४)

38वकरपाछा येसुजि सभाघरवासे निकडके सिमोनक घरवामा गेलसि। तखनहिँ सिमोनक ससुइया गहनि जर लागके मनियाइल रहलिय। उहेसे वहवाँ भेलि मन्‍सावाह “वकरेके डउल बनादेहुँ” कहके येसुजिके बिन्‍ति करलइ। 39तब येसुजि वकर लजिके जाके जरवाके डटलसि हसे जरवा छडबे करलिय। वकरपाछा उअ वइघरहिँ उठके हुनुकर सेवा करे लगलिय।

40बेरियावा डुबलिपाछा मन्‍सावाह बहुत खलिक रोग लागल मनियाइल मन्‍सेसभके येसुजिक लघिना यनलइ। येसुजि हुनुकर वपरा हथवा धरके जम्‍मे जनके डउल बनोलसि। 41बहुत जनसे भुतवाह, “यपनहुँ परमेस्‍वरक पुतर हखहुँ” कहके चिल्‍लइते निकडलइ, बाकि येसुजि भुतवानिके डटते फदकहि हइने देलसि, केहकेकि हुनुका येसुजिके मुक्‍ति देलाहर ख्रिस्‍ट हखसि कहके चिनलइ।

42दोसरि दिन जब बिहान भेलइ, येसुजि एगुडा सुनसान ठउरिमा गेलसि। बाकि मन्‍सावाह येसुजिके खोजते गेलइ। हुनुका येसुजिके भेटलेपर “हमराके छाडके झिन जाहुँ,” कहके रोके खोजलइ। 43बाकि येसुजि हुनुकाके कहलसि, “मुइ परमेस्‍वरक राजक सुसमाचार याको सहरवाक मन्‍सावानिके फेनि सुनोहि परतइ, केहकेकि मुइ यकरे तहिँया पठाइल बडहिँ।” 44उहेसे येसुजि जम्‍मे यहुदिया जिल्‍लाक सभाघरवाहमा जाके सुसमाचार परचार करलसि।

Currently Selected:

लुका 4: CTHR

Highlight

Copy