लुका 3
3
बप्तिस्मा देलाहर युहन्नाक सन्देस
(मति ३:१-१२; मरकुस १:१-८; युहन्ना १:१९-२८)
1याबे रोमक महाराजा तिबेरियसक सासनक पनरह बरसमा, जब पन्तियस पिलातस यहुदिया छेतरक बडके हाकिम, हेरोद अन्तिपास गालिल छेतरक, वकर भयवा फिलिप इतुरिया हसे तरखोनितियस छेतरमा राज करइ रहलिय, तखनहिँ लुसानियस अबिलेन छेतरक सासक रहलिय। 2उहे जुनवामा हन्नास हसे कइयाफा प्रधान पुजेरि रहलइ। तखनहिँ परमेस्वरक वचन उराठ-ठउरियामा जकरियाक बेटा युहन्नाक लघिना यलइ।
3उहेसे युहन्ना यरदन लदियाक चारिवरक छेतरमा जाके मन्सावानिके, “यापन-यापन पाप मानके छडह हसे बप्तिस्मा लेह तके तोहार करलि पपवाह परमेस्वर छमा करबसि” कहके परचार करे लगलिय। 4जसने यसइया अगमवक्तावा युहन्नाक बारेमा कहले बडसि,
“उराठ-ठउरियासे कुनहुँ एक जन जबड स्वर निकडाके यसके कहइ बडिय,
‘प्रभुक तहिँया पइडा तयार पारह,
हुनेक पइडावाह सोझ बनोह।
5जम्मे खोल्सा-खोल्सि पुरेतइ,
पहाड हसे परवत सम बनेतइ।
टेड पइडा सोझ
हसे गारह पइडा उसार हतइ,
6हसे जम्मे मन्सावाह
परमेस्वरक मुक्ति देखतइ’।”#यसइया ४०:३-५
7जब बहुत मन्से युहन्नासे बप्तिस्मा लेवे यलइ, युहन्ना हुनुकाके कहलिय, “अरे बिखियार सपवाक बचवाह! यावे लगइकि परमेस्वरक दन्डसे भागे सकबह कहके तोहराके कुने सिखोलिय?#मति १२:३४; २३:३३; मति १२:३४; २३:३३ 8तोहरा यापन पपवाह मानके परमेस्वरवरि सदियो यापन मनवा घुमोले बडह जउँ, वसने जिन्गि बितोइह। हमरा ‘अब्राहमक सन्तान’ कहके झिन कहिह, केहकेकि मुइ तोहराके कहइ बडहिँ, परमेस्वर इअ पत्थरावासे फेनि अब्राहमक तहिँया सन्तान बनावे सकबसि।#युहन्ना ८:३३ 9हेरह, यखनहिँ गछवाक जरियामा टङिया परिसकल बडइ। उहेसे जुन गछवा डउल फर नाहिँ फरतइ, उअ जम्मे गछवानिके काटके यगियामा फकेतइ।”#मति ७:१९
10तब मन्सावाह युहन्नाके पुछलइ, “वसके भेले याबे हमरा कथि करेके त?” 11युहन्ना हुनुकाके जवाफ देके कहलिय, “जाकरसाङे दु गो पेहराना लुगा बडइ, उअ हइने भेलिनके एगुडा दिय। वसने जाकरसाङे खइना चिजु बडइ, उअ फेनि वसने करिय।” 12तखनहिँ कर उठोलराह फेनि बप्तिस्मा लेवे यलइ हसे युहन्नाके पुछलइ, “गुरुजि, हमरा कथि करे परतइ त?”#लुका ७:२९ 13युहन्ना हुनुकाके कहलिय, “सरकारक तोकलिसे बढि कर झिन लिह।” 14तब कतेक जन सिपहियावाह फेनि पुछलइ, “हमरा कथि करेके त?” युहन्ना हुनुकाके कहलिय, “ककरहुँसे करकापमा पारके कि झुठा दोस लगाके पइसा झिन लिह। बरु यापन तनखामा चित बुझइह।”
15तखनहिँ मन्सावाह मुक्ति देलाहर ख्रिस्ट हलहालि यबसि कहके इसियाइ रहलइ। उहेसे हुनुका मनमने “युहन्नाहिँ ख्रिस्ट हखसि किहा?” कहके विचार करे लगलइ। 16तब युहन्ना जम्मे जनके कहलिय, “मुइ त तोहराके पनियामा बप्तिस्मा देसहिँ। बाकि मोरसे महान एक जन यइतहि बडसि। मुइ त हुनेक चप्पलवाक फिता फोवेके लाइक हइने बडहिँ। हुने तोहराके पवितर-आत्मा हसे यागिसे बप्तिस्मा देबसि। 17यापन खरिहनवा डउलसे फरछिनावेके तहिँया हुनेक हथवामा यन्न फटकाना सुपा बडइ। गोहुँवा यापन धनसरवामा जामा करबसि, बाकि भुसवा कबहुँ हइने बुतइना यगियामा जरोबसि।”
18यसने युहन्ना याको बहुत यरति-उपदेस देते मन्सावानिके सुसमाचार सुनोलिय। 19बाकि रजवा हेरोद#३:१९ इअ हेरोद येसुजि जरमलि जुनवाक हेरोद हइने हखिय। इअ दोसरे हेरोद रहलिय। यापन भयवाक जनियावा हेरोदियासके बियाह करलेसे युहन्ना वकरेके डटले रहलिय हसे वकर याको जम्मे खराब कमवाह फेनि वकरेके देखोलिय। 20उहेसे हेरोद युहन्नाके झ्यालखनवामा थुनके झन याको दोसर खराब काम करलिय।#मति १४:३-४; मरकुस ६:१७-१८
येसुजिक बप्तिस्मा
(मति ३:१३-१७; मरकुस १:९-११; युहन्ना १:३२-३४)
21याबे जम्मे मन्सावाह बप्तिस्मा लेसकले पर येसुजि फेनि बप्तिस्मा लेलसि। जब हुने परथाना करइ रहलसि, तखनहिँ स्वरग खोलेलइ, 22हसे पवितर-आत्मा घुटुरिक रुपमा येसुजिक वपरा परलसि हसे स्वरगसे यसनुक स्वर यलइ, “तुइ मोर सोगावल पुतर हखहि, तोरसे मुइ गहनि खुसि बडहिँ।”#भजन २:७; यसइया ४२:१
येसुजिक वंसावलि
(मति १:१-१७)
23जब येसुजि यापन सेवाक काम सुरु करे लगलसि, हुनेक उमेर तिस बरस जतुरा भेल रहलइ। मन्सावाह येसुजिके योसेफक बेटा कहके सोचइ रहलइ। योसेफ एलिक बेटा हखिय, 24एलि मतातक बेटा, मतात लेविक बेटा, लेवि मल्किक बेटा, मल्कि यान्नाक बेटा, यान्ना योसेफक बेटा, 25योसेफ मताथियासक बेटा, मताथियास आमोसक बेटा, आमोस नहुमक बेटा, नहुम इसलिक बेटा, इसलि नग्गइक बेटा, 26नग्गइ माथक बेटा, माथ मताथियासक बेटा, मताथियस सेमइनक बेटा, सेमइन योसेखक बेटा हसे योसेख योदाक बेटा, 27योदा योआननक बेटा, योआनन रेसाक बेटा, रेसा यरुबाबेलक बेटा, यरुबाबेल सालतिएलक बेटा, सालतिएल नेरिक बेटा, 28नेरि मल्किक बेटा, मल्कि अद्दिक बेटा, अद्दि कोसामक बेटा, कोसाम एलमादमक बेटा, एलमादम एरक बेटा, 29एर यहोसुक बेटा, यहोसु एलिएजरक बेटा, एलिएजर योरिमक बेटा, योरिम मतातक बेटा, मतात लेवियाक बेटा, 30लेविया सिमियोनक बेटा, सिमियोन यहुदाक, यहुदा योसेफक बेटा, योसेफ योनानक बेटा, योनान एल्याकिमक बेटा, 31एल्याकिम मलेआक बेटा, मलेआ मिन्नाक बेटा, मिन्ना मताथाक बेटा, मताथा नातानक बेटा, नातान दाउदक बेटा, 32दाउद यिसइक बेटा, यिसइ ओबेदक बेटा, ओबेद बोअजक बेटा, बोअज सल्मोनक बेटा, सल्मोन नहसोनक बेटा, 33नहसोन अम्मिनादाबक बेटा, अम्मिनादाब आरामक बेटा, आराम हेस्रोनक बेटा, हेस्रोन फारेसक बेटा, फारेस यहुदाक बेटा, 34यहुदा याकुबक बेटा, याकुब इसहाकक बेटा, इसहाक अब्राहमक बेटा, अब्राहम तेरहक बेटा, तेरह नाहोरक बेटा, 35नाहोर सरुगक बेटा, सरुग रउक बेटा, रउ पेलेगक, पेलेग एबेरक बेटा, एबेर सलेहक बेटा, 36सलेह केनानक बेटा, केनान अर्पछदक बेटा, अर्पछद सेमक बेटा, सेम नोहाक बेटा, नोहा लेमेखक बेटा, 37लेमेख मतुसेलहक बेटा, मतुसेलह हनोकक बेटा, हनोक येरेदक बेटा, येरेद महलालेलक बेटा, महलालेल केनानक बेटा, 38केनान एनोसक बेटा, एनोस सेतक बेटा, सेत आदमक बेटा, आदम परमेस्वरक बेटा#३:३८ परमप्रभु परमेस्वर भुयवाक मटियासे यपने हथवासे आदमके बनोलेसे आदम परमेस्वरक बेटा रहलिय। रहलिय।#उत्पति ५:३-३२; ११:१०-२६; रुथ ४:१८-२२; १ इतिहास १:१-४; २४–२८; २:१-१५
Currently Selected:
लुका 3: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
