1 Kurintus 10

Pomogosan mongusaa' nu tinindobuw

1Oo su kosusulodan ku, ondomo muyu yo iri nololagan nu odu aki toko ri laid nu maid-waid po so si Musa. Noingoligan nosiro nu kawut, sampai nokoripau nosiro so Raat Omiang.#Kin 13:21-22; 14:22-29 2Soko nodiu' nosiro nu kawut om raat iiri, ponondu'an nu mompomaid ni Musa. 3Nokookan nosiro nu ido yo ginis nu ookanon ingoranan nu maana, nitaak nu Kinoringan kiat so surga.#Kin 16:35 4Om nokoinum nosiro nu ido yo ginis nu iinumon nitaak Niyo kiat so kuasa Niyo. Iinumon nosiro iiri sungoi kiat so watu nituduk nu Kinoringan so nosiro. Om watu yo po iiri nga soko ponondu'an nu maid-waid si Kristus so nosiro.#Kin 17:6; Pong 20:11 5Soko iri pona, dai ya ososonangan Kinoringan nu kosuangan so nosiro, om iri yo ko' minatoi nosiro so padang pantai.#Pong 14:29-30

6Kiawi' nu ono ourug nu pongoondoman toko, su' dai toko kopomaal nu koraayan soko winaal nosiro nu gulu ri.#Pong 11:4 7Om dai toko kowasa mongusaa' nu pinokokinoringan soko ginama' nu somboogian so nosiro, soko nokosurat-o so Buuk nu Kinoringan nu, “Minurami-rami nosiro mongokan monginum om mongalai sono,” koo ri.#Kin 32:6 8Dai toko kowasa minsuw so nosiro lumapa' nu soko gama' nu somboogian so nosiro, sampai duo nopulu om tolu rinibuan minatoi nu sondunat-i.#Pong 25:1-18 9Dai toko kowasa monginam-nginam nu Tuhan,#10:9: nu Tuhan; so tinu-tinu solinan silaid nokosurat nu, so si Kristus. soko ginama' nu somboogian so nosiro nu gulu ri, minatoi tininduk nu topirik.#Pong 21:5-6 10Dai toko kowasa musisingkak-singkak, soko somboogian so nosiro nu gulu ri sampai pinatoi nosiro nu Susuu'on Moomatoi.#Pong 16:41-49

11Nourug kiawi' oono so odu aki toko gulu ri, tayon ong oorotian toko onu ourug so toko ong maid-waid nu kogoyaan iiri. Om sinuu' si Musa nu Kinoringan monurat nu ono, pongoondoman toko nu ono sono tu, nu oduruk-o pongoowi'an nu wonuo tu.

12Indadi, isai yo po monokod nu opiot koimaidan niyo, ingat-ingaton-o su' dai kopomaal nu koraayan. 13Bang kinaman kou mokipopomaal nu oraai, ondomo muyu yo nu ono yo po noirosaan-a nu lobuw wokon nu gulu ri. Nga opongoorapan ong Kinoringan. Dai kou ya posimaidan Niyo kinaman nu dai ogoosan muyu. Nga iya nu kinaman kou, taakan kou ya nu kobosagan, su' dai kou kopomaal nu koraayan.

14Oo su kosusulodan kosomodan ku, pagka soko ono, mindamo aku so kou, nu adang-o sono mongusaa' nu tinindobuw. 15Mutangar aku so kou nu soko poomutangar ku so lobuw oilo. Tantu oilaan muyu nu obana ya pinutangar ku iitu. 16Iya nu moimponginum toko nu sungoi nu anggur kiat so sawan noborokatan-o, mongunsopot toko so Kinoringan, so' iri yo kinotuntugan nu raa' ni Yisus su koompitan toko nu kiawi' koworongan nu raa' Niyo oono. Om iya toko mongokan nu baang-baang kinobi-kobi iiri pongoondoman nu kinopotoyan ni Kristus, koompit toko sono nu kiawi' koworongan nu koyuwan Niyo no.#Mat 26:26-28; Mrk 14:22-24; Luk 22:19-20 17Pagka ido-ido ya baang-baang, om toko nga koompit mongokan nu ido yo baang-baang oono, koosuang toko iitu ourug nu soko ido yo koyuwan.

18Ondomo muyu yo lobuw Israil, nu isai yo po mongokan nu ookanon tunuan so ranggar niusaa' so Kinoringan, kowaid-a mongusaa' so Kinoringan.#Ot 7:6 19Mutangar aku soko ono poondom so kou nu tinindobuw intawa ookanon niusaa' so tinindobuw oono d'ado ya muad kosudaan. 20Onu yo po niusaa' so tinindobuw nu iri lobuw dai kotondu' nu Kinoringan-i, nokotaak-o so moinat, okon ko so Kinoringan, om dai su moingin ong muido kou nu komoinatan.#Pom 32:17 21Dai kou kowasa monginum so sawan ni Tuhan Yisus pokoilo nu kopuido kou so Iyo, om noopod ono monginum kou so sawan nu komoinatan pokoilo nu kopuido kou so nosiro. Dai kou kowasa mongokan so poongokanan ni Tuhan Yisus, om mongokan-a so poongokanan nu komoinatan. 22Tantu dai toko moingin kopokimalun Tuhan nu kogoyaan toko mongusaa' nu sondiang ko Iyo. Tantu dai toko kolaiw kiat so ponginsaadan Niyo nu koraayan toko oono.#Pom 32:21

23Kuwai gaam mutangar nu, “Onu yo po kowasa toko ya waalon,” koo. Obana ya nai' ono! Nga okon ko kiawi' oono kikosudaan. Kowasa toko ya nai' momaal nu onu yo po koinginan toko, nga okon ko kiawi' nu ono koponabang nu puimpugan nu lobuw poimaid.#1 Kur 6:12 24Dai musuat ong momikir toko nu onu ya owarong so toko, nga musuat ong momikir toko nu onu koo gama' monabang nu lobuw wokon.

25Onu-onu ya nu onsi niwoli so pasar, kowasa muyu ya okanon, om ikod kou yo pongoduat ong siombo kiat nu ookanon wolion muyu no, 26so' nokosurat-o so Buuk nu Kinoringan nu, “TUHAN Kinoringan-o su songapan nu wonuo tu. Kiawi' asuw nu wonuo tu songapan Niyo,” koo ri.#Lgu 24:1

27Bang soginaan kou nu lobuw okon ko poimaid mongokan so waloi niyo, om moingin kou ya, okano muyu ya onu yo po nipolak so kou no. Dai muru' mongoduat po ong siombo kiat nu ookanon oono, su' d'ado pukodong surutan so inawo muyu. 28Nga bang pokoiloon kou nu lobuw nu, “Nokousaa' yo ookanon iitu so tinindobuw,” koo, adang kou yo mongokan nu ono, su' dai muyu iyo opalid om dai ousiba' pomikiran nu inawo niyo. 29Kuanon ku yo po, okon ko kousiba' nu pomikiran nu inawo muyu, nga pomikiran nu inawo niyo.

Nga kalu kuwai wokon mongoduat nu, “Bang kowasa aku ya momaal nu onu yo po koinginan ku, nokuro su opogosan aku po nu pomikiran nu inawo nu lobuw dai po opiot koimaidan? 30Bang mongunsopot aku ya so Kinoringan nu ookanon nipolak so aku no, dai musuat ong insola'on aku po nu lobuw ong mongokan aku nu ono,” koo.

31Indadi, itu yo su oogot ondomon muyu nu, onu-onu ya goma'on muyu, mongokan ka intawa monginum kou, gomaa muyu yo nu pongorumat nu Kinoringan. 32Om poworongo muyu yo dadan kogoyaan muyu su' dai kou koponginsakit nu inawo nu wokon, kiat-o so lobuw Yaudi kumoo yo so okon ko Yaudi, intawa so lobuw nosongapan nu Kinoringan. 33Insuw kou yo so aku, ono yo mogkari'-kari' monginsanang nu inawo nu wokon so onu-onu ya gogoma'on, so' okon ko koworongan ku ya su diumon ku, sondiang ko koworongan nu kiawi' lobuw, tayon ku ong osopulan nosiro.

Currently Selected:

1 Kurintus 10: TomPWPgLgPn

Highlight

Copy