1 Kurintus 11

1Insuw kou yo so aku, soko aku su minsuw so si Kristus.#1 Kur 4:16; Plp 3:17

Mudolundung ong sumombaayang

2Royowon ku kou so' dadan kou ya koondom so aku om imaidon muyu pontudukan ku ri. 3Nga moingin aku po ong oilaan muyu nu, Kinoringan-o su mogkuasa so si Kristus, om si Kristus-o su mogkuasa nu kusoi, om kusoi-o su mogkuasa nu sawo niyo no. 4Indadi, bang mudolundung kusoi ong mogdu'a intawa potuturan nu abar kiat so Kinoringan so tiningkuangon nu lobuw suang, lobuw oono mongusiba' so si Kristus. 5Nga bang dai mudolundung woinoi ong mogdu'a intawa potuturan nu abar kiat so Kinoringan so tiningkuangon nu lobuw suang, mongusiba' iyo nu sawo niyo, iri mogkuasa so iyo. Woinoi oono muinong-a nu noburutan-o. 6Bang dai mudolundung woinoi, owarong po mupompod iyo nu obuk. Nga pagka koiyu'-iyu' ong woinoi muburut intawa mupompod nu obuk, ono yo ko' owarong po mudolundung. 7Kusoi-o po dai musuat mudolundung, so' kusoi-o su pointolang nu kobuotanon om pongorumatan nu Kinoringan. Nga woinoi-o po pointolang nu pongorumatan so kusoi,#Pgn 1:26-27 8so' okon ko kusoi su inurug kiat so woinoi, sondiang ko woinoi-o su inurug kiat so kusoi. 9Kusoi nga okon ko inurug monabang nu woinoi, sondiang ko woinoi-o su inurug monabang nu kusoi.#Pgn 2:18-23 10Indadi subai mudolundung woinoi ponondu'an nu opogkuosaan iyo nu sawo niyo, su' osanang inawo nu susuu'on nu Kinoringan kosiou nu ono. 11Soko ono pona, suat so toko lobuw poimaid-o so si Kristus, woinoi kusoi sompikoogot-a, 12so' pudi pona woinoi togna ri inurug kiat so kusoi, nga noopod iri nopuanak-a kusoi kiat so woinoi, om kiawi' nu ono kiat-a so Kinoringan.#P'rapan 18:24

13Tantu oilaan muyu yo nu obana ya itu, nu dai opatut woinoi mogdu'a so Kinoringan so tiningkuangon nu lobuw suang ong dai mudolundung. 14Mongowaid nu koopotan nu lobuw suang, notudukan kou yo nu sobana ko dai musuat ong kusoi polanggau nu obuk. 15Nga suat so woinoi, ono yo su koporu'an niyo polanggau nu obuk, om ono yo su pongodolundung nu ulu niyo. 16Bang kuwai sumagka' nu tinangar ku oono, soko itu nisambut ku: Toko yo po songapan nu Kinoringan, d'ado yo koopotan sondiang ko ono.

Poginokanan ni Tuhan

(Mat 26:26-29; Mrk 14:22-25; Luk 22:14-20)

17Kosiono mongobiat aku so kou suat nu gama' muyu mongowaid nu poginokanan ni Tuhan. Om dai su mongorayou so kou nu ono so' dai owarong tomod muyu muimpug sumombaayang sondiang ko oraai nai'. 18Gulu po, norongou ku nu kuwai tinu-tinu impug dai kopusuat so puimpugan muyu sumombaayang, om kiro ku bana ya gaam abar oono. 19Opatut-a nai' nu kuwai pusosogka'an nai so kou, su' oilaan ong isai om isai su bana-bana nu ototog poimaid so Kinoringan. 20Iya nu muimpug kou, okon ko mongokan kou mongoondom nu kinopotoyan ni Tuhan, 21so' iya muyu mongokan, mupopogulu kou ya om boromosingan-a mongokan nu ingkookan inowit kiat so waloi, om dai koompit wokon om witilon sono om kuwai ya nu moowukan. 22Sobana ko oraai pogokalan muyu oono. Kiwaloi kou ya pongokanan om ponginuman muyu. Nokuro su mongusiba' kou nu koimaidan nu lobuw songapan nu Kinoringan om mongoiyu' nu lobuw omiskin? Onu po sono tongaron ku so kou, royowon ku kou? Nga sobana ko dai opatut mongorayou aku so kou.

23Ombo yo po nituduk nu Tuhan so aku suat so pongoondoman toko nu kinopotoyan Niyo, nilombus ku po potuduk so kou, ono yo awi nu pinonindoraayan so si Tuhan Yisus, iya nu moimpongokan nosiro, minongalap Iyo nu baang-baang, 24mongunsopoto yo Iyo so Kinoringan, kobi-kobio yo Niyo baang-baang iiri om mutongaro yo nu, “Itu yo su koyuwan Ku nitaak gumanti' so kou. Waalo muyu yo soko itu pongoondoman muyu so Aku,” koo. 25Soko iri ya, nu noopod mongokan, olapo yo ni Yisus sawan pinoosuwan nu anggur om mutongaro yo nu, “Itu yo po inumon muyu so sawan iitu nga raa' Ku, popiot nu porojonjian wagu nu Kinoringan. Sombiya-biya kou ya monginum so sawan iitu, waido muyu yo soko itu pongoondoman muyu so Aku,” koo.#Kin 24:6-8; Yir 31:31-34

26Ono yo ko', sombiya-biya kou ya mongokan nu baang-baang om monginum nu anggur oono, ono yo su pointolang kou so lobuw wokon nu kinopotoyan ni Tuhan, musingkologa' Niyo koimbagu.

27Bang dai musuat poongokan nu lobuw nu baang-baang nu Tuhan intawa poonginum so sawan nu Tuhan, kowaal lobuw oono nu koraayan om dai orumaton nu lobuw koyuwan om raa' ni Tuhan. 28Nadi, isai yo po subai impa'on po laid inawo niyo ong kikoraayan ko' d'ado. Bang kikoraayan iyo, mokiampun po laid so Kinoringan, om mongokan nai' nu baang-baang om monginum nu sungoi nu anggur so sawan oono. 29So', bang mongokan lobuw nu baang-baang om monginum nu sungoi nu anggur om dai koilo nu orati, nu iri yo kinopotoyan ni Tuhan, iyo kondiri su kourug nu pongukuman nu Kinoringan so iyo. 30Ono yo ko' osuang so kou sumakit om kumugui, om kuwai ya otilombus matoi. 31Bang impa'on toko po laid inawo toko nu d'ado ya ka koraayan, dai toko ya ukumon nu Kinoringan. 32Nga bang oinsaadan toko nu Kinoringan so wonuo tu, tomod Niyo montuduk so toko, su' dai kowaid nu lobuw dai poimaid ukumon Niyo ri.

33Oo su kosusulodan ku, ono yo ko' bang muimpug kou mongokan nu pongoondoman nu kinopotoyan ni Tuhan, owarong ong imatan po wokon-o nu oimpug om mongokan kou nai'. 34Bang kuwai witilon, owarong mongokan po laid so waloi su' dai kou ukumon nu Kinoringan nu iya muyu muimpug.

Iri yo po duduat muyu wokon-i, nitarang ku ya ong kologa' aku yo nai so kou.

Currently Selected:

1 Kurintus 11: TomPWPgLgPn

Highlight

Copy