1 Kurintus 9

Kopotutan om gogoma'on nu pinongoorapan ni Yisus

1Kuwai mutangar nu okon-a ko pinongoorapan aku ni Yisus, nga itu yo sambut ku. Kopugogoma'on aku so si Kristus om dai yo su okuasa nu oturan nu lobuw Yaudi. Aku yo su pinongoorapan ni Yisus so' nosiou ku yo kondiri Iyo, Tuhan toko, om iri yo gogoma'on ku paabar nu Abar Owarong so kou su kinopoimaidan muyu so Iyo. 2Insan kuwai ya lobuw dai poimaid nu aku yo su pinongoorapan ni Yisus, nga tantu poimaid kou ya, so' kowiawan muyu kopuido yo so Tuhan-o su pongilaan nu pinongoorapan aku.

3Bang insola'on aku nu lobuw, sombutan ku nu, 4opatut kai ya si Barnabas kotorima' nu ookanon om iinumon kiat so gogoma'on mai so Tuhan. 5Opatut toko ya mongowit mompanou nu sawo poimaid, soko kosusulodan ni Tuhan Yisus om pinongoorapan wokon, kumoo yo so si Pitrus. 6Dai opatut nu kai ya si Barnabas su modium nu ingkookan kondiri. 7D'ado ido soujar mubolanja kondiri so pomutuda'an. Om d'ado ido moomutanom dai mongokan nu pinumpung nu tonoman niyo no. Om d'ado ido moongipat nu dumba dai monginum nu atas nu dumba niyo no.

8Kiawi' poinongan pinutangar ku so kou no inalap ku so gogoma'on toko runat-runat modium nu kowiwiau, om soko ono ya notangar pudi so Buuk nu Kinoringan. 9Soko nokosurat-o so Ukum ni Musa nu, “Adang-o kogosan kobang nu korabau mosaan mongupog nu gandum,” koo ri. Okon ko korabau-a su kuanon nu Kinoringan nu tinangar oono,#Pom 25:4 10nga sobana yo toko ya su kuanon. So' lobuw populo om lobuw mongindikut opatut nai' mugogoma'on maid nu umarap nu koompit nu pinumpung nu ginoma'an nosiro no. 11Soko ono ya nopotuturan kai yo nai so kou nu abar suat so Kinoringan, om soko linsou owarong tinumuu' so inawo muyu om oborokatan kou. Indadi opatut nu kotorima' kai, insan sabat-a nu bolanja mai kiat nai so kou. 12Bang momikir lobuw wokon nu opatut mokibolanja so kou, makin po so kai nga opatut mokibolanja so kou.

Nga insan soko ono, dai kai ya minokibolanja so kou nu laid iiri, todi'on mai po mubolanja kondiri ko' kopomaal kai nu pounayan nu lobuw dai poimaid nu abar nituturan mai suat so si Kristus. 13Tantu oilaan muyu ya, nu iri yo po lobuw momugogoma'on so Waloi Maayo nu Kinoringan kaalap-a nu ingkookan nai no, om lobuw posodia' nu ranggar,#9:13 ranggar: poopolakan nu onsi niusaa' (Ul 18:1). oboogi'an-a nu onsi niusaa' nai no. 14Soko ono ya ponuu'an nu Tuhan pudi so lobuw potuturan nu Abar Owarong, opatut-a kaalap nu ingkookan nu gogoma'on niyo oono.

15Nga dai aku po insan mokibolanja so kou. Om tomod ku monurat nu itu okon-a ko mokibolanja po so kou nu ono sono tu. Owarong po matoi aku ko' mokibolanja aku so kou, su' kopongondos aku nu dai ibonan ku Abar Owarong suat so si Kristus. 16D'ado ya kopogboya'an ku mongondos nu aku yo po pootuturan nu Abar Owarong kiat so Kinoringan, so' Kinoringan-o su minonuu' so aku mugogoma'on nu ono. Aagut aku yo ong dai ku nituturan Abar Owarong oono. 17Bang aku su minindamo nu gogoma'on oono, opatut nu mokigaji aku. Nga ono yo su nisuu' so aku nu Kinoringan, om niarap-o Niyo nu aku yo su pootuturan nu Abar Owarong oono. 18Bang soko ono, onu sono nisuli' so aku? Itu yo su soko ponuli' so aku, ono yo koponuturan aku nu Abar Owarong nu dai mokitaak nu mupatut aalap nu lobuw potuturan nu Abar Owarong oono.

Kogoyaan ni Paulus so lobuw wokon

19Bang moingin aku, kopomaal aku nu onu-onu ya koinginan ku. Soko ono pona, kondiri ku ya sinumiliw nu uripon nu kiawi' lobuw, om minsuw nu kogoyaan nosiro, tayon ku ong osuang lobuw oingolan ku poimaid so si Yisus Kristus. 20Bang koian aku so lobuw Yaudi, maid aku nu kogoyaan nosiro, su' oingolan ku nosiro poimaid so si Yisus Kristus. Pudi pona dai su nokuasa nu Ukum ni Musa, mongowaid aku ya nu ono, tayon ong oingolan ku nosiro poimaid so si Yisus Kristus. 21Bang koian aku so lobuw okon ko Yaudi, maid aku nu kogoyaan nosiro nu dai mongowaid nu Ukum ni Musa, tayon ong oingolan ku nosiro poimaid so si Yisus Kristus. Nga okon-a ko dai aku po sono mongowaid nu ponuu'an nu Kinoringan, sobana yo kuosaan aku nu ponuu'an ni Yisus Kristus. 22Bang koian aku so lobuw dai po opiot koimaidan, maid aku ya nu kogoyaan nosiro, tayon ong oingolan ku nosiro poimaid so si Kristus. Nadi bang potuturan aku nu abar suat so si Yisus Kristus, maid aku nu onu-onu ya kogoyaan nosiro tayon ong oingolan ku komuro-komuro ya kosuang so nosiro poimaid so si Kristus. 23Waalon ku kiawi' oono tayon ku ong kolongkop ku potuturan Abar Owarong suat so si Yisus om koompit aku nu borakat nijanji so lobuw poimaid.

24Tantu oilaan muyu yo nu okon ko kiawi' lobuw muimbas mundak so puimbasan mundak kotorima' nu odia. Ono yo ko' pogkari'-kari' kou yo mongowaid nu pontudukan ni Yisus musingkointoron muyu so surga, soko lobuw muimbas mundak mokiaalap nu odia. 25Isai yo po mokimuimbas mundak, mongoopot po laid nu koyuwan niyo om kumodos nu onu-onu ya dai owarong so koyuwan. Waalon niyo soko ono su' kaalap iyo nu odia nu sontagal-a om lumiong. Nga toko yo po poimaid so si Yisus Kristus, mogkari'-kari' kaalap nu onu yo po dai lumiong musingkolaid. 26Ono yo ko', moginoontob aku mundak lumoga' so pongoowi'an. Om iya nu potuduk aku nu tinongaran nu Kinoringan, minsuw aku nu lobuw so puimbasan mutampar, nu okon ko songkotampar ku ya, nga nisuat ku. 27Soko lobuw mongoopot nu koyuwan suat so puimbasan mutampar, soko ono ya mogkari'-kari' aku ontob koinginan nu Kinoringan goma'on ku, om dai yo sono koputangar Iyo nu dai otoop aku mugogoma'on suat so Iyo.

Currently Selected:

1 Kurintus 9: TomPWPgLgPn

Highlight

Copy