Pag-ighit 7
7
1Magkun ti Panginuun sa kan Muysis, “Pagpatingi kawu! Buwatun niku kawu ga diyus sa atubangan hari Ihiptu.#7:1 hari Ihiptu: sa Hibriyu, Paraun. Katunda diman sa sunud pag manga talata. Manhampang kawu sa kanya sa panab-anan nimu patar-ari ni Aarun. 2Sabihun nimu sa kan Aarun ti tanan pagsabihun niku sa kanmu, ag sabihan nimu inda sa kanya sa hari Ihiptu. Sabihun niya sa hari Ihiptu kuntay palpasi ti manga Israilita ginan sa kay nasyun. 3Dapat paganitun niku ti tagipusuun hari Ihiptu. Una waya mamuwat aku mayamu makadululaw ag lilingutan pag manga bagay sa Ihiptu, 4balaw diman siya maniwala sa kanyu. Bag-u parusahan gid niku masyadu ti Ihiptu, ag palpasan niku ti manga linahi Israil kang nasakupan. 5Nu maparusahan yi niku ti manga Ihipsiyu ag nipalwas yi ti manga Israilita sa kanda nasyun, maalaman manga Ihipsiyu aku ngani ti Panginuun.”
6Sinunud nida ni Muysis ni Aarun ti isinugu Panginuun sa kanda. 7Si Muysis 80 ka timpu yi kay idad ag si Aarun 83 waydi kay idad katpung nagpakihampang sida sa hari Ihiptu.
8Magkun ti Panginuun sa kanda ni Muysis ag ni Aarun, 9“Nu sabihun hari Ihiptu pagbuwat kamu makadululaw, sabiha nimu Muysis sa kan Aarun, ‘Iyamut nimu ti sugkud sa atubangan hari Ihiptu, ag bumaliw ulay inda.’ ”
10Nakan nag-atag ngani sida ni Muysis ni Aarun sa hari Ihiptu ag binwat ti sinabi Panginuun. Iyinmut ni Aarun ti sugkud niya sa atubangan hari Ihiptu hanggan niya manga may kangaranan, ag nagbaliw ulay inda. 11Ipinatawag waydi hari Ihiptu kay manga dunungin pag tawu hanggan manugsalumangka. Sa panab-anan nida salumangka, nabwat diman nida ti katida pag makadululaw. 12Ti kada usa sa kanda nagyamut kanda sugkud ag nagbaliw diman waydi ulay. Dapat hinalun ulay ni Aarun kanda pag manga ulay. 13Dapat maganit di gid kay tagipusuun hari Ihiptu, balaw siya naniwala sa kanda ni Muysis ag ni Aarun, parihu sa sinabi Panginuun.
Nagbaliw Dugu ti Danum Sapa Nilu
14Magkun ti Panginuun sa kan Muysis, “Maganit gid ti tagipusuun hari Ihiptu; unman niya pinaighit ti nasakupan Israil. 15Nakan ataga nimu aldaw surip ti hari Ihiptu habang atabug siya sa Sapa Nilu. Daran-a kanmu sugkud nagbaliw ulay ag pasampak kawu sa kanya sa pangpang sapa. 16Pagkumun kawu sa kanya, ‘Sinugu aku Panginuun, ti Diyus manga Hibriyu, kuntay sabihun inda sa kanmu: Paighita nimu ti manga nasakupan niku hampay makasamba sida sa kangku ati sa pangawakawaan. Dapat hanggan taynguna balaw kawu nagsunud. 17Aku, ti Panginuun magkun, sa panab-anan niku manga buwat, maalaman nimu aku ti Panginuun. Bantayan nimu! Sa panab-anan inda pag sugkud, hampakun niku ti danum Nilu ag bumaliw dugu kay danum. 18Magkaramatay ti manga isda, bumawu ti sapa, ag balaw mainum manga Ihipsiyu kay danum.’ ”
19Magkun waya ti Panginuun sa kan Muysis, “Sabiha nimu sa kan Aarun itudlu niya kay sugkud sa danum Ihiptu: sa manga sapa, sa laad, sa kanal, hanggan sa tanan pagtipunan danum, ag bumaliw dugu inda tanan. Katunda ti mangyari sa buu Ihiptu. Una ti manga sa pasuk ngatay sa batu pag danum#7:19 pasuk ngatay sa batu pag danum: ngatay, danum pag-ibuhus sa manga diyus-diyusan. bumaliw dugu.”
20Sinunud nida ni Muysis ni Aarun ti isinugu Panginuun. Habang maghiling ti hari Ihiptu hanggan kay manga may kangaranan, ipinaabwat ni Aarun kay sugkud ag hinampak ti Sapa Nilu. Nagbaliw ngani dugu ti tanan danum. 21Nagkaramatay ti manga isda ag namawu ti sapa, nakan unman mainum manga Ihipsiyu kay danum. Nagbaliw dugu ti tanan danum sa Ihiptu.
22Dapat nabwat diman inda manga manugsalumangka taga Ihiptu sa panab-anan nida salumangka, nakan nagmaganit diman ti hari Ihiptu. Balaw diman gid siya naniwala sa kanda ni Muysis ag ni Aarun, parihu sa sinabi Panginuun. 23Nagbalik ti hari Ihiptu sa kay balay, ag unman binati ti nangyari. 24Nangutkut ti manga Ihipsiyu sa saruy Sapa Nilu hampay makab-ul danum irinmun, dahil unman nida mainum ti danum sa sapa.
Ti Sarut manga Pikaw
25Pitu ka sirang ti nakalawuy ginan sa hampakun Panginuun ti Sapa Nilu sa panab-anan ni Aarun.
Currently Selected:
Pag-ighit 7: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
