Pag-ighit 6
6
1Magkun ti Panginuun sa kan Muysis, “Makitan nimu taynguna nu unu kang buwatun sa hari Ihiptu. Dahil sa ipakakit niku pag kamaskihan, pasnuan niya kamu umighit ginan sa kay nasyun. Mapilitan siya paighitun kamu.”
2Magkun waya ti Diyus sa kan Muysis, “Aku ti Panginuun. 3Napakakit aku sa kanda ni Abraham, ni Isaak, ag ni Hakub, bilang Makamaskihan pag Diyus, dapat unman aku nagpakilala sa kanda kuntay Panginuun#6:3 Panginuun: Bantayi ti footnote sa 3:15. kang ngaran. 4Nagbuwat aku kasunduan sa kanda, kang ipakaun sa kanda ti daga Kanaan, ti inulianan nida pag daga kaybi bilang manga day-uhan. 5Nadnugan niku ti dangup manga Israilita pag-api-apihun manga Ihipsiyu, ag pag-alalahanun niku kang kasunduan sa kanda. 6Nakan kumumun kawu sa manga Israilita: ‘Aku ti Panginuun. Palpasan niku kamu sa pagkapanawuhun sa Ihiptu. Sa panab-anan kamaskihan niku, mabuyat pag parusa ti ipakaun niku sa manga Ihipsiyu, ag kamu kang iribri. 7Kilalan-un niku kamu kang nasakupan ag aku kanyu Diyus. Makilala gid niyu aku ti Panginuun kanyu Diyus, ti nagpalpas sa kanyu sa pagkapanawuhun sa Ihiptu. 8Darahun niku kamu sa kang itinaratu pag daga ipakaun sa kanda ni Abraham, ni Isaak ag ni Hakub. Ipakaun niku inda sa kanyu agud kanyu maapu. Aku ti Panginuun.’ ”
9Ipinadakit inda ni Muysis sa manga Israilita, dapat unman sida naniwala sa kanya dahil naduraan yi sida pag-asa sa masyadu pagpakuri sa kanda bilang manga panawuhun.
10Magkun ti Panginuun sa kan Muysis, 11“Paglakaw yi kawu, sabiha sa Paraun, hari Ihiptu, pasnui yi niya umighit ti manga Israilita ginan sa kay nasyun.” 12Dapat magkun si Muysis sa Panginuun, “Ti manga Israilita ngani dayu magpatingi sa kangku, ti hari Ihiptu aw waya? Lalu busal waya aku magbagaw!”
13Magkun ti Panginuun sa kanda ni Muysis ag ni Aarun, “Sabiha niyu sa manga Israilita ag sa hari Ihiptu, sinugu niku kamu pangunahan ti manga Israilita sa pagluwas ginan sa Ihiptu.”
Ti manga Ginurang Nida ni Muysis ni Aarun
14Inda ti manga ginurang manga magtal-anakan ginan sa linahi Israil:
Kay manga anak lalaki ni Rubin, ti panganay pag anak ni Israil, sida ni Hanuk, ni Palu, ni Hisrun ag ni Karmi. Sida hanggan kanda manga lahi ti manga magtal-anakan ginan sa kan Rubin.
15Ti manga anak lalaki ni Simyun sida ni Yimwil, ni Hamin, ni Uhad, ni Hakin, ni Suhar ag ni Shaul. (Si Shaul kay anak ni Simyun sa usa ka Kananiya.) Sida hanggan kanda manga lahi ti manga magtal-anakan ginan sa kan Simyun.
16Ti manga anak lalaki ni Libi, angay sa tultulanun niya manga lahi, sida ni Girsun, ni Kuhat ag ni Mirari. Kay kadugay kay buhi ni Libi 137 ka timpu.
17Ti manga anak lalaki ni Girsun sida ni Libni ni Simiy.
18Ti manga anak lalaki ni Kuhat sida ni Amram, ni Isar, ni Hibrun ag ni Usyil. Kay kadugay kay buhi ni Kuhat 133 ka timpu.
19Ti manga anak lalaki ni Mirari sida ni Mali ni Musi. Kanda manga magtal-anakan ginan sa kan Libi angay sa tultulanun niya manga lahi.
20Naasawa ni Amram si Hukabid, kay patar-ari niya ama. Kanda manga anak lalaki sida ni Aarun ni Muysis. Kay kadugay kay buhi ni Amram 137 ka timpu.
21Ti manga anak lalaki ni Isar sida ni Kura, ni Nipig ag ni Sikri.
22Ti manga anak lalaki ni Usyil sida ni Misail, ni Ilsapan ag ni Sitri.
23Naasawa ni Aarun si Ilisiba, kay anak ni Aminadab, kay patar-ari ni Nashun. Kanda manga anak lalaki sida ni Nadab, ni Abihu, ni Iliyasar ag ni Itamar.
24Ti manga anak lalaki ni Kura sida ni Asir, ni Ilkana ag ni Abyasap. Sida hanggan kanda manga lahi ti manga magtal-anakan ginan sa kan Kura.
25Si Iliyasar kay anak ni Aarun nakaasawa sa usa ka anak ni Putiyil. Kanda anak lalaki si Piniis.
Sida ti manga ginurang manga magtal-anakan ginan sa kan Libi.
26Ti ngaran Aarun ag Muysis nasambit sa inda pag listahan, imaw diman pag Aarun ag Muysis ti sinugu Panginuun manguna sa pagpalwas sa kada linahi Israil ginan sa Ihiptu. 27Sida ti nagpakihampang sa hari Ihiptu kuntay palpasi ti manga Israilita ginan sa Ihiptu.
Sinugu Panginuun si Aarun Mamagaw para sa kan Muysis
28Pagka naghampang ti Panginuun sa kan Muysis ati sa Ihiptu, 29magkun siya sa kan Muysis, “Aku ti Panginuun. Sabihun nimu sa hari Ihiptu, ti tanan pagsabihun niku sa kanmu.”
30Dapat magkun si Muysis sa Panginuun, “Busal aku magbagaw, nakan unman mamatingi sa kangku ti hari Ihiptu.”
Currently Selected:
Pag-ighit 6: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
